Santiago 1

Tiya Huesësicohua'ini Santiago Toyase'e

1Yë'ë Santiago, Maija'quëre cui'ne Ëjaë Jesucristore necaiquëpi pëpayë, Israel doce tsëcapë̱a acohua'ipi jai hue̱'ña hua huesëni pa'icohua'ire.

Maija'quë Ta̱'ñe Asayere I̱siye

2Maija'quë do'ijë, jaiye ai yo'oyepi cui'ne co'aye ëayepi mësaruna ti̱'a maca sihuajë̱'ë. 3Mësarupi tsoe asayë, ja̱ ai yo'oyepi cui'ne co'aye ëayepi mësaru pa'ire paji cuasayere neñañe a'ë. Ja̱je pa'ina, ja̱ neñañepi quëcocohua'i pa'iyere neji. 4Nequëna, quëcosicohua'i pa'ijë nuñe pa'icohua'i cui'ne carase'e peocohua'irepa de'oye pa'iyë.

5Mësaru acohua'ipi ta̱'ñe cuasajë yo'oyere carasicohua'i pani se̱jë'ë, Maija'quëni. Se̱to Maija'quëpi i̱sija̱'quë api, ta̱'ñe cuasajë yo'oyere. Maija'quë cato si'aohua'ire ta̱'tëpo ti peoyerepa cui'ne ti ë̱seye peoyerepa i̱siquë api. 6Ja̱je pa'iquëta'are se̱ñe pa'iji, i̱sire paja̱'quë api cuasajë ti jëa coeye peoyerepa. Jëa coequë cato jai jaira tutupi ju'aquëna, co'poco ñese sani cui'naopi co'ye daio yo'oyeje̱ pa'i api. 7Ja̱je pa'i cato i̱na Maija'quë i̱sija̱'quë api cuasama'ë pa'ijë̱'ë, 8iye mu'se yeque cuasasiquëpi ñamina'a yequere cuasaquëpi, o̱cue pa'i macarepa pa'ima'quë cato.

9Maija'quë do'iquëre teaye pa'ini Maija'quëpi jerepa pa'ire necaina, asaquë sihuaye pa'iji. 10Cui'neje jaiye co'amaña paquëni Maija'quëpi teaye pa'ire necaina, asaquë sihuaye pa'iji. Jaiye co'amaña paquë cato taya jorohuë ju̱muse'eje̱ pa'i api, tsoe quëcoye peoquë api. 11Ja̱je pa'ina, jaiye paquëpi i̱ cuasaquë yo'ora'ase'ere je̱oni esa ju̱'iquë api, jorohuë maca ju̱musico airepa ë̱së ëoquëna, cue̱neni de'oye ña cua̱ñoñe caraja̱ini me'meni to̱meñeje pa'ye.

Neñañe Cui'ne Co'aye Nëiñe

12Neñañere quëcoquë ta̱ima'quëpi sihuaquë api. Ja̱je pa'ina, neña tëjisi maca ti pa'i marore i̱si cua̱ñoja'quë api, Maija'quëre oicohua'ire i̱sisi'i ca nëose'ere. Ja̱ do'ire sihuaquë api. 13Mësaru aquëpi co'ayere yo'o ëaye nëiñe pa'ito cuasama'ë pa'ijë̱'ë, Maija'quëpi co'aye yo'o ëaye nëiñe neji, cajë. Maija'quë cato co'aye yo'o ëaye nëiñe asama'quë api. Cui'ne pa̱ipi co'ayere yo'oja̱jë caquë co'ayere yo'o ëaye nëiñe nema'quë api. 14Pa̱i cato i̱ohua'ipi co'ayere yë do'ire i̱ohua'i yëyepi quërë saquëna, co'aye yo'oyena ta̱icohua'i a'ë. 15Pa̱i cuasayepi, pa̱i co'ayere yëyepi tsi̱ ë̱tapëje̱ pa'io de'oni tayo yo'oyere jojoyeje̱ pa'ye etoco. Etona, tayo yo'oyepi ai de'o huesëni yureta'a ju̱ni huesëyere jojoyeje̱ pa'ye neco.

16Coso cua̱ñoma'pë pa'ijë̱'ë, Maija'quë do'ijë maña. 17Si'aye maire de'oyerepa i̱sise'e cato ma'tëmopi Maija'quë i̱sise'e a'ë. Ja̱ i̱siquë cato si'aye ma'tëmo miacohua'ire de'huasiquë api, ti̱ñe pa'i po̱nëma'quë api, cui'ne si'a tëcahuë̱a tëto saina, cui'neje pa'iquë api. 18I̱se'e te'i ja̱je yo'osi'i cuasani maire nuñerepa coca quëayere asani sehuojëna, pa'iyere i̱sipi, maipi du'ru macarepa quë̱ise'eje̱ pa'iohua'i huajë sëcapë huëocohua'i pa'ija̱jë caquë.

Nuñerepa Pa'iye

19Ja̱je pa'ina, Maija'quë do'ijë maña. Si'aohua'i mësaru cui'ñasicohua'ire papi yecohua'i cayere esa asajë̱'ë. Ja̱je pa'iquëta'are coca cayere esarepa cama'pë pa'ijë̱'ë. Cui'ne esa pë̱titema'pë pa'ijë̱'ë. 20Pë̱titesiquë cato Maija'quë nuñerepa yo'oyere yo'oma'ë pa'iji. 21Ja̱je pa'iye sëte si'si yo'oye pa'iye cui'ne jaiye co'ayepi mësarute ti̱më huesoni pa'iyere je̱ocojë̱'ë. Je̱oconi teaye pa'iohua'i maña'ë cuasajë de'o coca mësaru joñoana ta̱se'ere pajë̱'ë. Ja̱ coca cato mësaru joñoa huaso tutu paye a'ë.

22Maija'quë coca asani i̱ti cayeje̱ pa'ye neñe pa'iji. Nema'pë coa Maija'quë cocase'e asajë pa'ini co'ye coso cua̱ñosicohua'i pa'iyë. 23-24Ja̱je pa'ina, Maija'quë coca quëayese'e asaquëpi i̱ti asase'eje̱ pa'ye yo'oma'quë cato tsi̱ña de'huana me pa'i a'ni caquë i̱ tsia ñani se po̱nëni sai tsoe hua̱nëyeni me pa'i pate'ni cuasayeje̱ pa'i api. 25Ja̱je pa'iquëta'are nuñerepa pa'icohua'ire cui'ne tse̱a cua̱ñoma'cohua'ire ne cocare asani i̱ asase'ere hua̱nëyema'quëpi i̱ti cua̱ñeñere o̱cue pa'i macarepa yo'o ti̱'aquë pa'iquëpi sihuaja̱'quë api, i̱ yo'oyere.

26Maija'quëre ti̱'asi'i caquë yo'oquëre pa'ë cuasaquëpi i̱ tse̱meñore nau nëcoma'quë pani i̱ja'a co'ye cosoji. Cosoquëna, i̱ Maija'quëre ti̱'asi'i caquë yo'oyepi ti co̱cai ma'ñe pa'iji. 27Ja̱je pa'ina, Maija'quë pa̱i nuñerepa pa'iye cato iye a'ë: yëhuiohua'ire co̱caiye, hua'jeohua'i ai yo'ojëna, co̱caiye, cui'ne iye yeja si'si yo'oyere pu̱'pema'cohua'irepa pa'iye a'ë.

Currently Selected:

Santiago 1: sey

Highlight

Copy