Hechos 5
5
Ananías Cui'ne Safira Co'aye Yo'ose'e
1Ja̱je pa'iquëta'are yequëpi Ananías hue'equëpi i̱ paco Safira ja̱'re yejare i̱sihuë. I̱sini curi neni, 2si'aye i̱siye pa̱ñu'u te'e cuasahuë. Cuasani i̱ohua'i pa ja̱'ñe de'huahuë. De'huani yequere Jesús jëjo saocohua'ina i̱sipi, i̱ohua'ipi ñajë huahueja̱jë caquë. 3I̱siquëna, Pedropi capi:
“¿Ananías i̱que do'ire huati ëjaë më'ë joyona cacaë'ni yeja do'i sa̱isi curire më'ëpi yequere de'huani yequere i̱siquë si'aye i̱siyë caquë de'o joyore cosoja̱quë caquë? 4¿Yejaje̱ më'ë yeja pa'ima'ona, ja̱je yo'ou? ¿Curije̱ më'ë curiquë pa'ima'ëna, ja̱je yo'ou? ¿Merepa më'ë ja̱je yo'osi'i cuasaë'ni? Pa̱ini më'ë cosoma'ë paë'ë. Maija'quëni më'ë cosohuë.”
5Caquëna, Ananías asani ju̱ni ta̱ji'i. Si'aohua'i i̱ ju̱ni ta̱ise'e asasicohua'i quëquë huesëhuë. 6Ja̱ maca yureta'a po̱sëohua'ipi dani i̱ ca̱pë ca̱ñapi tu̱nani sani ta̱huë.
7Tres horas tëto sai maca Ananías nëjo cacao, i̱o ë̱jëre yo'ose'e asama'copi. 8Cacacona, Pedropi i̱ote se̱ji'i:
“¿Mësaru case'e ja'ye yeja do'i i̱sire?”
Caquëna, cao:
“Ja̱je pa'ijë̱'ë, ja̱re ja̱ ja'ye i̱sihuë.”
9Cacona, Pedropi capi:
“¿Me neni mësaru te'e ja̱je yo'oñu'u cuasani ëjaërepa joyore neñañu'u cajë yo'oye'ni? Jecohua'i daiyë, më'ë ë̱jëre ta̱sicohua'i cui'ne yure më'ëni saja̱'cohua'i a'ë.”
10Ca macarepa Safira huajërepa ju̱ni ta̱co'ë, Pedro quë̱o yë'quë macana. Ju̱ni ta̱isicopi u̱iona, po̱sëohua'ipi cacani ti̱'ani sani ta̱huë, i̱o ë̱jëre ta̱sico yë'quë macana. 11Ja̱ maca si'aohua'i sehuosicohua'i cui'ne si'aohua'i i̱ti yo'ose'e, asasicohua'i quëquë huesëhuë.
I̱ñoñe Cui'ne Pa̱i Yo'o Ti̱'a Ma'ñere Yo'ose'e
12Pa̱i pa'i hue̱'ñana Jesús jëjo saocohua'ipi jaiye de'oye yo'ohuë, pa̱i yo'o ti̱'a ma'ñere cui'ne i̱ñoñere. Yo'ojëna, si'aohua'i Salomón nequë pa'isi tu'rihuë pa'icona, tsi'sijë yo'ohuë. 13Te'ije̱ yecohua'i aquë tsiosi'i caquë yo'oye pa̱pi, i̱ohua'ire. Ja̱je pa'iquëta'are pa̱i cato de'ocohua'i a'ë, cuasajë. 14Yo'ojëna, ë̱mëohua'i cui'ne nomiohua'i Ëjaëre sehuoni jai pa̱i paë'ë. 15Cui'ne ju̱'icohua'ireje̱ ca̱i saina cui'ne ju̱'icohua'ire sayena o̱eni ma'añana eto o̱ehuë, Pedropi da saina, i̱ pa̱i to'oupi ja̱ohua'i acohua'ina ju'aquëna, co'yaja̱jë cuasajë. 16Cui'ne Jerusalén yërëhue pa̱i dari pa'icohua'ipi jai pa̱i Jerusalénna daë'ë, ju̱'icohua'ire cui'ne huati quë'iohua'ire dajë. Dajëna, si'aohua'i juju cua̱ñohuë.
Pedrore Cui'ne Juanre Huani Je̱oñu'u Cajë Yo'oye
17Maija'quë huë'e ñacaicohua'i ëjaë ja̱'re saduceo pa̱i pa'icohua'ipi si'aohua'i co̱ni i̱ohua'i yo'oyere ñajë oicohua'i paë'ë, cui'ne yo'o ti̱'añe peo do'ire. 18Ñani pë̱ijë Jesús jëjo saocohua'ire tse̱ani co'aye yo'ocohua'ire co hue̱'ñana cohuë. 19Cosicohua'ini Maija'quë hui̱ñaëpi ñami pa̱ire co huë'e eta sa'ro hui'yoni etopi, ñeje caquë:
20“Sani pa̱ire quëajë̱'ë, mësaru iye huajëye pa'iyere Maija'quëre se̱ huë'epi nëcajë.”
21Caëna, asasicohua'ipi ñatani i̱ case'eje̱ pa'ye Maija'quë huë'ena nea hue̱'ñarepa cacani pa̱ire ye'ya huëohuë. Ja̱je ye'yajëna, Maija'quë huë'e ñacaicohua'i ëjaë cui'ne i̱ ja̱'re co̱ni pa'isicohua'ipi ëjaohua'ire pase'e coca cayena soihuë, si'aohua'ire Israel pa̱i aiohua'ire coca cañu'u cajë. Ja̱ maca tsi'sini Jesús jëjo saocohua'ire co hue̱'ña ñu'icohua'ire quërëja̱ija'cohua'ire jëjo saohuë. 22Jëjo saojëna, soldadopi co huë'ena sani coa ña jujahuë, tsoe peojëna. Ja̱je ña jujani co'ini ñeje cajë quëahuë:
23“Pa̱ire co tu'rihuë cato de'oyerepa si̱osico paji'i. Pa'ina, cui'ne soldado pa̱ije eta sa'noare nëcajë de'oyerepa ñahuë. Ja̱je pa'ioni hui'yojë ñajëna, ti pa̱i peoco paji'i, sa̱'nahuë.”
24Cajëna, ja̱re asani Maija'quë huë'e ñacaicohua'i ëjaërepa, Maija'quëre se̱ huë'e ñacai soldado pa̱i ëjaë cui'ne aiohua'i co̱ni cahuë: “¿Jerore pana ja̱ yo'ose'e nëajai ja̱'ñe a'ni?” 25Ja̱je yo'ojë ca macarepa te'i ti̱tani capi:
“Mësaru cosicohua'ipi Maija'quëre se̱ huë'ere nëcajë pa̱ini ye'yayë.”
26Caquëna, asani soldado pa̱i ëjaëpi i̱ soldado pa̱i ja̱'re saji'i, tse̱asi'i caquë. Tse̱asicohua'ita'a co'aye yo'oye pa̱huë, pa̱ipi pë̱ti huëoni quë̱na pë̱api je̱ama'cohua'ini cuasajë ca'rajë. 27Ti̱tani i̱ohua'ire tse̱ani sahuë, ca tëji ëjaohua'i quë'rona. Sarena, Maija'quë huë'e ñacaicohua'i ëjaëre papi capi, i̱ohua'ire:
28“Tsoe mësarute cahuë yëquë, ja̱ë Jesús aye ti pa̱ire ye'yama'pë pa'ijë̱'ë cajë. ¿Casicohua'ini mësaru cato me yo'ore'ni? Mësaru cato si'a Jerusalén ja̱ë aye ye'yayepi ti̱më huesoyë. Cui'ne ja̱se'e yo'oye pa̱ni yëquëreje̱ ja̱ëre huani je̱osi do'i quë'iohua'ire cañu'u cajë yo'oyë.”
29Caquëna, Pedropi cui'ne i̱ cajeohua'i Jesús jëjo saocohua'ipi sehuojë cahuë, ñeje:
“Yëquë cato Maija'quë cayere sehuocaiye pa'iji, pa̱ni pa̱i cayere. 30Mësaru cruzuna deoni huani je̱osiquëre mai aiohua'i Diusupi huajëquëre huëopi, Jesure. 31Maija'quëpi huëoni i̱ ëja te̱'tena ñopi, i̱te. Pa̱ire de'oye saquëre neni cui'ne huasoquëre nepi, i̱te, Israel pa̱ipi Maija'quëna co'ini i̱ohua'i co'aye yo'ose'e sa̱icaja̱'quë caquë. 32Iye yo'ose'e yëquë ñasicohua'ipi quëaye cui'ne Maija'quë i̱te sehuocohua'ire i̱si joyo de'o joyoje̱ ñasiquëpi quëaji.”
33Ja̱je cayere asani Israel pa̱i ëjaohua'ipi pë̱titeni huani je̱oñu'u cajë yo'ohuë. 34Ja̱je yo'ojë ca ëjaohua'i jopore te'i fariseo Gamaliel hue'equë paji'i, si'a pa̱i de'oye cajëna pa'iquërepa, cui'ne cua̱ñese'e ye'yaquërepa. Ja̱ëpi huëni nëcani cua̱ñepi: “Jesús jëjo saocohua'ire hue'sena eto saojë̱'ë, ëa maca cacaja̱'cohua'ire,” capi. 35Caëna, etosi jeteyo'je i̱je pa'i ëjaohua'ire capi:
“Israel pa̱i mësaru ja̱ohua'ire yo'o ja̱'ñe de'hua ñani yo'ojë̱'ë. 36Cuasajë̱'ë, cui'ne Teudas yo'ose'ere. Ai tsoe maca, ja̱ë je̱'quë ëjaëre pa'ë caquë yo'opi. Yo'oquëna, cuatrocientos pa̱irepa i̱te pe'tehuë. Pe'tejëna, i̱ti saquëni huani je̱orena, i̱te pe'tecohua'i peo hue̱'ña tiya huesëhuë. Ja̱ maca caraja̱ji'i, ja̱ yo'ose'e si'aye. 37Ja̱ jeteyo'je pa̱ire cue̱cue mu'seña pa'i maca Judas Galilea aquëpi cui'ne ëjaë'ë caquë yo'opi. Yo'oquëna, i̱te pa̱i pe'te huëohuë. Pe'te huëorena, i̱ni huani je̱orena, i̱te pe'tecohua'i peo hue̱'ña tiya huesëhuë. 38Ja̱je pa'ina, mësarute yëhuoquë cayë. Ja̱ohua'ire yo'oye je̱oni ñuni saojë̱'ë, i̱ohua'ise'e pa'ija̱jë. Ja̱je pa'ina, iyepi pa̱i tse̱ pani coa caraja̱i ja̱'ñe a'ë. 39Ja̱je pa'iquëta'are iyepi Maija'quë tse̱ pa'ito mësaru ne ti̱'añe pa̱ja'cohua'i a'ë. Ja̱je pa'ito ñare pajë yo'ojë̱'ë. Yo'ojë Maija'quëni sa̱ñope yo'oyë, mësarupi.”
40Caëna, asani i̱ case'e sehuocaë'ë. Ja̱ maca yureta'a Jesús jëjo saocohua'ire soini si'seni, Jesús coca ti quëaye pa̱jë'ë, cani yureta'a ñuni saohuë. 41Ñuni saojëna, Jesús jëjo saocohua'ipi etajë Maija'quëpi ja̱je yëna Jesús mami do'ire ai yo'oyë cuasajë sihuahuë, pa̱i ëjaohua'i quë'ropi etajë. 42Etasicohua'ipi si'a mu'seña Jesús de'o cocare quëajë ye'yahuë, Maija'quëre se̱ huë'ena cui'ne huë̱'ñana.
Currently Selected:
Hechos 5: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.