2 Timoteo 2

De'o Jesucristo Soldado

1Yë'ë mamaquë më'ë cato Cristo Jesús i̱si tutupi pa'ijë̱'ë. Ja̱je pa'i, 2yë'ë jai pa̱ire quëaquëna, më'ë asase'ere ne ti̱'acohua'ire pana, ta̱'ñe de'oye yecohua'ire se ye'yaja̱'cohua'irepa ña cua̱ñocohua'ina cua̱ñe nëojë'ë, ye'yaja̱'cohua'ire.

3Më'ë yë'ë ai yo'oyeje̱ pa'itoje̱ quëcojë̱'ë, Jesucristo de'o soldado sëte. 4Ti te'ije̱ soldadopi soldado peocohua'i yo'oyere cui'na yo'oma'quë api, ja̱re i̱ ëjaërepa cua̱ñese'e de'oyerepa sehuoja̱'quë caquë. 5Ja̱je cui'ne ca̱'a yo'oquëpi ca̱'a yo'ocohua'ire cua̱ñese'ere yo'oma'ë pani ca nëosi co'amaña i̱ñe peoji. 6Tsio nequë cato i̱ pa ja̱'ñere du'ru tëaquë api, ja̱ yë'ta'a yecohua'i pa̱jëna. 7Iye yë'ë case'ere cuasaquëna, mai Ëjaëpi co̱caina, si'aye asa ti̱'añe pa'iji.

8Hua̱nëyema'ë pa'ijë̱'ë, Jesucristore ju̱'isiquëpi huëisiquëre David tsëcapë aquëre. Yë'ë ja̱ë ayere huaso coca quëayë. 9Iye de'o coca quëa do'ire ai yo'onije quëcoquë quëayë, pa̱ire huani je̱oquëre sëayeje̱ quë̱na meapi sëasiquë pa'inije. Ja̱je yë'ë pa'iquëta'are de'o coca cato quë̱na meapi sëa ma'ñe a'ë. 10Ja̱je pa'ina, Cristo Jesuna tsioni pa'ijë Maija'quë sahuasicohua'ipi huasosicohua'i pa'ijë de'oyere pare ti pa'iyere ti̱'ajajë caquë si'aye ai yo'onije quëcoyë.

11Iye nuñerepa caye a'ë.

Maipi Cristo ja̱'re ju̱'isicohua'i pani i̱ ja̱'re co̱ni pa'ija̱'cohua'i a'ë.

12Ai yo'onije o̱cue pa'i macarepa i̱te tuisicohua'i pani i̱ ja̱'re co̱ni cua̱ñeja'cohua'i a'ë.

I̱te ñama'cohua'i a'ë casicohua'i cato i̱je ñama'quë a'ë caja̱'quë api.

13Mai cato yo'o jujacohua'i a'ë. Ja̱je pa'iquëta'are i̱ cato yo'o jujama'quë api.

I̱ case'eje̱ ne ti̱'aquë api. ¿Me neni i̱ ca nëose'e necaima'ë pa'iquë'ni?

Co'amaña Nequërepa Pa'iye

14Iyere hua̱nëyema'ë quëa sëtoquë cua̱ñejë'ë. Sa̱'ñe cama'pë pa'ija̱jë do'i peo cocare, ca huëoni. Ja̱ sa̱ñope caye ti co̱cai ma'ñe a'ë. Coa ai jerepa yecohua'i de asacohua'ini co'aye neñe a'ë. 15Ja̱je pa'ina, më'ë cato co'amaña nequërepa ca'raye peoquëre paje̱ pa'i pasi'i caquë, de'oyerepa Maija'quëre i̱ñosi'i caquë, Maija'quë cocare nuñerepa ye'yajë̱'ë, tayoye peoyerepa si'aye më'ë ai cuasaye ja'ye yo'oquë. 16Ja̱je pa'ipi iye yeja do'i peo cocare cama'ë pa'ijë̱'ë. Ja̱je cacohua'i cato jero sa'na ai jerepa co'ayena ne huesëyë. 17Ja̱je ne huesëcohua'i ye'yapi ai a'sio jai saiyeje̱ pa'ye yo'oji. Ja̱je Himeneo cui'ne Fileto ye'yayë, 18nuñerepa cocare tayo saicohua'ipi ju̱'isicohua'i huëiye tsoe tëto saji'i cajë. Ja̱je cajë nuñerepa de'oye asacohua'ire ca co̱'me huesojë yo'oyë. 19Ja̱je caye pa'itoje̱ Maija'quë nesico quë̱na pëje̱ pa'io jëaco ñu'cuema'cona toyasico pa'iji, ñeje: “Ëjaëre papi ñaji, i̱ tse̱cohua'ire.” Cui'ne yequeje̱ caji: “Si'aohua'i Cristo pa̱i a'ë cacohua'i cato co'aye yo'oyere je̱ocosicohua'i pa'iyë.”

20Jai huë'e sa̱'nahuëre së̱'ño curiquëpi cui'ne po curiquëpi de'huasi co'amañase'e pa'ima'coa. Pa'icoa, cui'ne so̱quë cui'ne ya'o de'huasi co'amañaje. Ja̱ yeque de'oyerepa cato ëjare pase'e ne ja̱'ñepi pa'iji. Cui'ne yequepi si'a co'amaña coa neroja̱i ja̱'ñepi pa'iji, ya'opi, cui'ne so̱quëpi de'huase'e cato. 21Ëjaëre pana i̱sisiquëpi ëjare pase'e yo'oja̱'quë pasi'i cani si'aye co'ayere yo'oma'quërepa pa'iye pa'iji. Ja̱je pa'ipi de'o co'amañare pase'e neñe pa'iji.

22Po̱sëohua'i co'aye yëyere catijë̱'ë. Catini nuñerepa pa'ijë̱'ë, Maija'quë pa'iji cuasayere, pa̱ire oiyere cui'ne jo'cua de'oye si'aohua'i ja̱'re pa'iyere. Ja̱je pa'ipi de'o joñoare papi mai Ëjaëre tse̱cohua'i ja̱'re co̱ni pa'ijë̱'ë. 23Cui'ne huesëcohua'ipi, ye'yema'cohua'ipi sa̱'ñe cajëna, asaquë i̱ohua'i ja̱'re co̱ni cama'ë pa'ijë̱'ë, më'ëpi tsoe asaquë. Ja̱ cato pë̱ti ëayena saye. 24Mai Ëjaërepa jo'yaë cato sa̱'ñe pë̱ti cocare caquë uihuaquë pa'iye peoji. Ja̱re yo'oma'ë si'aohua'ire de'oye yo'oquë pa'iye pa'iji, de'oye ye'yaquëpi tayocohua'ire quëcoquë de'oye yo'oquëpi. 25Sa̱ñope co'aye cacohua'ire joyore papi oi quëa nu'ñequëpi jerepa pa'i a'ë, cuasama'quëpi Maija'quëpi co̱caina, ja̱'në yo'ose'e je̱oni Maija'quëna po̱nëni nuñerepa cocare asaja̱'cohua'i a'ë cuasaquëpi. 26Cui'ne huati tse̱ani i̱ yëye yo'oja̱'cohua'i a'ë caquë pa̱cohua'ipi de'hue ña sëtani jëaja̱'cohua'i a'ë, caquë utequë pa'iye pa'iji.

Currently Selected:

2 Timoteo 2: sey

Highlight

Copy