Miqueas 4
4
Tupã oisãmbyhýta py'a guapýpe
(Is 2.2-4)
1Umi ára pahápe yvyty
opu'ãháme Ñandejára Róga.
Oñemoĩta opa yvyty ári
Upéva ijyvatevéta opa yvytýgui.
Opa tetã megua hendápe oguahẽta.
2Heta tetã he'íta oúvo:
“Jaha jajupi Ñandejára yvytýpe,
Israelgua Tupã Rógape,
ohechaukáta ñandéve hape,
ha hape rupi jaguatáta.”
Sióngui osẽta
Ñandejára rembiporavopy
Jerusaléngui katu iñe'ẽ.
3Tupã ombojovakéta tetã nguérape,
joavy oĩva tetã nguéra rupi
ha'e omoĩ porãta,
umi tetã mombyryve oĩvape jepe.
Kyse pukúgui ojejapóta yvy mbovoha,
ha kyse yvukúgui machéte.
Ndaipóri mo'ã véima ñorãirõ,
avavépe noñembo'e mo'ãi
mba'éichapa oñorãirõ vaerã.
4Kyhyje'ỹre opa rupi ojeikóta,
maymáva ikatúta opytu'u
iparral ha hi'ígo máta guýpe.#Zac 3.10; 1 Mac 14.12.
Peichaite he'i Ñandejára ipu'akapáva!
5Ambue tetã nguéra
iñe'ẽ rendúta itupã nguérape,
ore katu roikóta
ore Jára oipotaháicha opa ára.
Tupã oipytyvõta hetã guápe
6Péicha he'i Ñandejára:
“Umiha árape ambyatýta che ovecha ikarẽva,
ambyatýta oñondive umi okañy vaekue
ha umi ainupã vaekue.
7Ko'ãva hína umi hemby vaekue.
Chugui kuéra amopu'ãta
peteĩ tetã imbaretéva.
Che, opa mba'e Jára,
aisãmbyhýta chupe kuéra
yvyty Sión guive opa árape guarã.#Is 40.1; Ez 34.11-16; Sof 3.19; Jn 10.7-16.
8Ha nde Jerusalén,
Sión pegua óga yvate,
ha imbaretéva,
nde jeýta Israel pegua
táva tenondegua,
pe kuñakarai guasu yma guare.”
9Mba'ére piko aipo ramo resapukái?
Ndaipóri nga'u piko
nde pype mburuvicha guasu?
Térã omano mba'e piko
umi he'íva ndéve rejapo vaerã?
10Ejepokáke ha esapukái,
táva Sión, imemby pota vaicha.
Osẽta ne memby kuéra
ha ohóta oiko umi ñúre.
Babilonia peve oguahẽta hína
ha upépe Ñandejára oguenohẽta
chupe kuéra ohayhu'ỹva poguýgui.
11Ko'ágã heta tetã oñembyaty,
oñemoĩ nde rehe ha he'i:
“Jaha jahecha mba'éichapa
Jerusalén oñemomarã”.
12Ko'ã tetã nguéra ndoikuaái
mba'épa oguereko Ñandejára ipy'ápe,
térã mba'épa upe ha'e ojapótava.
Ndoikuaái ombyatytaha chupe kuéra
trígo aty kokuépe oñembyatyháicha.
13“Epu'ãke ha ejykýi, táva Sión.
Tóroicha romombaretéta,
ne ratĩrã fiérrogui ajapóta,
ha ne pysãpẽrã vrónsegui.
Heta tetã remyangu'íta.
Imba'eta oipe'a vaekue ambue tetãgui
ha opa umi mba'e oguerekóva,
remboykéta upe ha'éva
Tupã, opa yvy Jára peguarã.”
Tupã ome'ẽta Israélpe huvicharã
14Ko'ágã eñemombaretéke Jerusalén,
emopu'ãke nde korapy yvate kuéra.
Ne mongoráma hikuái
ha yvyrápe hováre oinupãta
Israel ruvicha guasúpe.
Currently Selected:
Miqueas 4: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.
