San Mateo 3

Juan Bautista oñemoñe'ẽ

(Mc 1.1-8; Lc 3.1-9,15-17; Jn 1.19-28)

1Umíva umi árape Juan Bautista oñemoñe'ẽ yvy ojeiko'ỹháme, Judéape. 2Ha he'i:

—Pembyasy pene angaipa ha peheja. Hi'aguĩma hína Tupã sãmbyhy yvágagui oúva.#Mt 4.17; Mc 1.15.

3Ko Juan rehe niko maranduhára*f** Isaías oñe'ẽ vaekue, omoĩ ramo guare kuatiáre kóicha:

“Peteĩ osapukáiva

yvy ojeiko'ỹháme:

‘Pembosako'i Ñandejárape haperã,

pejapo chupe tape ikarẽ'ỹva.’”#Is 40.3.

4Juan ao ojejapo kaméllo raguekuégui ha iku'a jokuaha vakapígui.#2 R 1.8. Ha hembi'u vaekue tuku ha eíra ka'aguy. 5Opavave Jerusalén ha Judeagua osẽ hendápe ohendu haguã iñe'ẽ, ha péicha avei umi Jordán rembe'y rupi oikóva. 6Oñemombe'u hembiapo vaikuégui ha Juan omongarai chupe kuéra ysyry Jordánpe.

7Juan ohechávo umi fariséo ha Saduséo kuérava hetaha oúva oñemongarai haguã, he'i chupe kuéra:

—Peẽ mbói ñemoñare!#Mt 12.34; 23.33. Máva piko he'i peẽme ikatúne haguã pekañy upe ñenupã Tupã omboútavagui? 8Peikóke ojehecha porã haguã pende rehe pejevyha Ñandejára gotyo. 9Ani peimo'ã peje haguére “Ore niko Abraham ñemoñare”#Jn 8.33. ndojehu mo'ãiha peẽme mba'eve. Cháke ha'e peẽme, Tupã ikatuha ko'ã itágui jepe ojapo Abrahámpe iñemoñarerã. 10Cháke, hácha ojeitýtama yvyra rapóre. Opa yvyra hi'a porã'ỹva guive, ojeitýta ha oñemombóta tatápe.#Mt 7.19. 11Che niko añetehápe ýpe pomongarai, pembyasy haguére pene rembiapo vaikue. Upe oútava che rire katu pene mongaraíta Espíritu Santo ha tatápe. Ha'e ipokatuve che hegui, ha chéve ndaijái ipy reheguánte jepe arahávo chupe. 12Pála ipópe ombovevéta pe ikoga'a ra'ỹi hakãngue reígui. Ha oñongatúta pe ha'ỹingue ha ohapýta pe hakãngue rei, peteĩ tata araka'eve ogue'ỹtavape.

Jesús oñemongarai ramo guare

(Mc 1.9-11; Lc 3.21-22)

13Jesús osẽ Galiléagui ha oho Juan rendápe, ysyry Jordánpe, ha'e omongarai haguã chupe. 14Ha Juan nomongaraiséigui Jesúspe he'i chupe:

—Nde uvei niko chéve che mongarai vaerã. Ha piko nde reju che rendápe?

15Jesús katu he'i chupe:

—Marãve ndoikói. Iporã niko jajapopa hekoitépe Tupã oipotáva.

Ha Juan ojapo Jesús he'i haguéicha chupe. 16Jesús oñemongarai rire ha osẽvo upe ýgui, yvága ojepe'a ha Jesús ohecha Tupã Espíritu, oguejýva hi'ári pykasúicha. 17Upévo oñehendu peteĩ oñe'ẽva yvágagui, ha he'íva:

—Kóva hína che ra'y ahayhúva, che aiporavo vaekue.#Gn 22.2; Sal 2.7; Is 42.1; Mt 12.18; 17.5; Mc 1.11; Lc 9.35.

Currently Selected:

San Mateo 3: GPC2006

Highlight

Copy