SAN MARCOS 1

Juan Bautista tsuya nga kjuaꞌe Jesucristo

Mt. 3:1-12; Lc. 3:1-9, 15-17; Jn. 1:19-28

1ꞌBitsaꞌen ꞌbetutsꞌinre en nda xi ngatꞌa tseꞌe Jesucristo, Kiꞌndire Naꞌenchana.

2ꞌBitsaꞌen kuaꞌindutꞌa xujunre xuta chinga profeta Isaías:

An tetsikasentitjunra̱ xutana̱ xi beꞌeya nijmi.

Kui xi kꞌuejñandatitjun ndiyari.

3Jndare xuta xi ꞌñu nchja ngaꞌnde tꞌaxin:

“Tꞌenda_ru ꞌba kixi chjuꞌi_ru ndiyare Naꞌenchana.”

4ꞌBa kui= kjuañu jaꞌeni Juan Bautista ngaꞌnde tꞌaxin tuxi yatendani xuta ꞌba tuxi yeꞌeyanire nijmi xuta nga tjinnere sikꞌantjaiya kjuafaꞌetsjenre ꞌba sa̱tenda, meni nga ku̱achatꞌanire jere. 5ꞌBa ꞌetju ngatsiꞌi xuta xi tjin nangi Judea ko ngatsiꞌi xutare naxinanda Jerusalén nga jaꞌekasen ñojonre Juan. ꞌBa kionga je yeꞌe nijmi ngatꞌare je xi tjinre, Juan yatenda ngajin ndaje Jordán.

6ꞌBa najñu xi yaja Juan ntsjare chakameyu kuandakoni, ꞌba ko jngu tjiuxinjnde tikjakonire. ꞌBa naxkajndi ko ntsjenre tjiuchusera xi tjin ngijña kjine. 7ꞌBa kionga beꞌeyare nijmi, tsu:

—Jaskanre an ndiba jngu xuta xi ngisa tjinre kjuaꞌñu tuꞌbani ko an xi kaꞌnda an bi bakinna̱ nga sikindia̱ ꞌba skjendaa̱ naꞌñu jndere. 8An tebatenda_nuu̱ ko nanda; tunga kui ko Isennixtjintsjere Naꞌenchana kuatendanu.

Jesús satenda ꞌba chanayiu kutꞌayako

Mt. 3:13-17; 4:1-11; Lc. 3:21-22; 4:1-13

9ꞌBa ꞌbi kuán kui nixtjinbiu nga Jesús ꞌetjuni naxinanda Nazaret, naxinanda xi tijñajin nangi Galilea, ꞌba echu ña tijña Juan. ꞌBa Juan yatenda ngajin ndaje Jordán. 10ꞌBa kionga tiꞌbetukajin nando, Jesús tsabe nga kitjuꞌi ngankꞌaa, ꞌba nga Isennixtjintsjere Naꞌenchana tiꞌbetukajennere joni jngu tjiunise tiba. 11ꞌBa jngu jnda kjinuꞌyanire ngankꞌaa xi tsu:

—Ji= ni xi kiꞌndina̱ xi tsimijaa̱n. Ne tsja tjinna̱ ngatꞌa tsiji.

12ꞌBa jaskan, Isennixtjintsjere Naꞌenchana kiko ngaꞌnde tꞌaxin. 13ꞌBa kio tsikꞌejña yachan nixtjin ngajinre tjiuba tsꞌen, ꞌba chanayiu kiskutꞌayako. ꞌBa ankjere Naꞌenchana jaꞌekatesinre Jesús.

Jesús ꞌbetutsꞌinre xare nangi Galilea

Mt. 4:12-17; Lc. 4:14-15

14ꞌBa jaskan nga Juan kisꞌeya nduya, Jesús echu nangi Galilea, ꞌba kio kitsikjaꞌaxtiuya en ndare Naꞌenchana.

15—Nixtjinbi xi kikꞌinnu je kuajngu ꞌba kjuatexumare Naꞌenchana je tijña tiña. Tikꞌantjaiyo kjuafaꞌetsjennu, ꞌba ngatamakjainnu ngatꞌa tseꞌe en ndare Naꞌenchana —kitsure Jesús.

Jesús nchjare ñujun xuta xi tsuba tjiuti

Mt. 4:18-22; Lc. 5:1-11

16ꞌBa tifaꞌa Jesús ngandai ndachikunre Galilea, kionga tsabe Simón ꞌba ko ntsꞌe xi Andrés ꞌmi. ꞌBa naꞌya tire inyakanikjaꞌajin nando, ngatꞌa kui nchjabiu xi ti= tsuba. 17ꞌBa Jesús kitsure:

—Jun naꞌen, ndetjennginu. An saꞌen_nuu̱ nchja xi ꞌbeku xuta.

18ꞌBa ndekuini chubabiu nchjabiu ꞌendu naꞌya tire ꞌba kitjenngi.

19ꞌBa kio nguba chire Jesús tsabe Santiago ꞌba ko ntsꞌe Juan, kiꞌndire Zebedeo, xi tjinduya barku nga inyaꞌbendunda naꞌya tire. 20ꞌBa tukjuan kinchja=re, ꞌba nchjabiu kitsikꞌejña naꞌenre xi Zebedeo ꞌmi ngaya barku ko chuꞌndare ꞌba kitjenngi Jesús.

Jesús tsinda jngu xuta xi tijñajinre jngu isennixtjin xi bi nda

Lc. 4:31-37

21ꞌBa jaskan Jesús ko xutare jaꞌe naxinanda Capernaum. ꞌBa kionga nixtjin nga nikjaꞌaya, Jesús jaꞌasꞌen niꞌya sinagoga ꞌba ꞌetutsꞌinre nga yakuya. 22ꞌBa tu kuakun=re xuta jotsaꞌen yakuyare joni tsa xa nkꞌa tjinre, ꞌba bi joni nchja chjine kjuatexuma. 23ꞌBa ngaya niꞌya sinagoga tijña jngu xuta xi isennixtjin xi bi nda tijñajinre, xi kitsu nga kiskiꞌndaya:

24—Ji Jesús tseꞌe Nazaret, ¿mé= xi tjinri ngatꞌa tsajain? ¿A jaꞌenikjekjuanii̱? ꞌBe=ña̱ ꞌyá= ni ji. Ji= ni xuta tsjere Naꞌenchana.

25Tunga Jesús jatiko isennixtjinbiu ꞌba kitsure:

—¡Xiu teni ꞌba tꞌetukajin_ri xutabi!

26ꞌBa isennixtjinbiu xi bi nda se ꞌetsujmeyare xutabiu, ꞌba niki ꞌñu= kiskiꞌndaya nga ꞌetukajinre. 27ꞌBa ngatsiꞌi xuta tu kuakun=re, ꞌba tsiningiyare xinkjin:

—¿Mé= kibi? Kjaꞌe tsaꞌen bakuya xutabi, joni tsa xa nkꞌa tjinre. ¡Kaꞌnda isennixtjin xi bi nda ꞌbexa=re ꞌba tsikꞌetjusunre!

28ꞌBa ne xati kjiꞌyare ngatꞌa tseꞌe Jesús ngayéje nangi Galilea.

Jesús tsinda nachiꞌyare Simón Pedro ꞌba ko ne nkjin xuta xi sefesun

Mt. 8:14-17; Lc. 4:38-41

29ꞌBa kionga ꞌetju niꞌya sinagoga, Jesús kiji ko Santiago ꞌba ko Juan ndaba Simón ko Andrés. 30ꞌBa nachiꞌyare Simón nachan tikijñasun nga ntꞌai kunre. ꞌBa taꞌa kikꞌere nijmi Jesús. 31ꞌBa kui kitsitiñatꞌare ꞌba kiskjebe ntsja nga kitsikisetjen. ꞌBa ndekuini chubabiu kitukjaꞌaxinre chiꞌin ntꞌaire chjunbiu. ꞌBa saꞌe kitsikjén xuta xi echukun.

32ꞌBa kionga je tjimaꞌña, kionga je kintjai tsuꞌbiu, echuchanire Jesús ngatsiꞌi xuta xi sefesun ko xi tjindujinre isennixtjin xi bi nda. 33ꞌBa nkjin xuta xi tjindu Capernaum jaꞌe ꞌba kuañajanxtiu xuntja niꞌyo. 34ꞌBa Jesús ne nkjin xuta kitsinda xi kjaꞌe kjuanga chiꞌin kunre, ꞌba ne nkjin isennixtjin xi bi nda tsꞌaxjejin. ꞌBa ngatꞌa isennixtjinbiu bexkun ꞌyá=ñu kui, kui= kjuañu Jesús bi kitsjaꞌndenire nga kinchja.

Jesús ꞌbetju nga fitsikjaꞌaxtiuya enre Naꞌenchana

Lc. 4:42-44

35Kionga je tjisꞌe isen, kionga jñu chun ngisa, tsisetjen Jesús ꞌba ꞌetju nga kiji jngu ngaꞌnde tꞌaxin nga kikjako Naꞌenchana. 36ꞌBa kio Simón ꞌba ko nchja xinkjin kikangisjai Jesús. 37ꞌBa kionga kuasjaire nde, kitsure:

—Ngatsiꞌi xuta inyamangisjairi.

38Tunga Jesús kitsingojore:

—Tangian kjaꞌe ngaꞌnde xi tjindu tiña, tuxi ꞌba nde kio sikjaꞌaxtiuyani_ra̱ enre Naꞌenchana; ngatꞌa tu kui xa ꞌetjuña̱.

39ꞌBa kiji ngayéje niꞌya sinagoga xi tu tjin nangi Galilea, nga titsikjaꞌaxtiuya enre Naꞌenchana, ꞌba ne nkjin isennixtjin xi bi nda tiꞌbaxje.

Jesús tsinda jngu xuta xi chiꞌin feꞌndujun kunre

Mt. 8:1-4; Lc. 5:12-16

40ꞌBa kio jngu xuta xi chiꞌin feꞌndujun kunre jaꞌetsitiñatꞌare Jesús ꞌba tsakasenkunchꞌintꞌare ꞌba ꞌetsꞌare:

—Tsa mejénri ku̱an sitsjenaa̱ nga xjaꞌaxinnaa̱ chiꞌin xi kunna̱.

41ꞌBa Jesús jaꞌanimare xutabiu, ꞌba kitsure nga yanere ntsja:

—Mejénna̱. Ngatamandai.

42ꞌBa ndekuini chubabiu, kitukjaꞌaxinre chiꞌinre, ꞌba kuanda. 43ꞌBa taꞌa kitsikixantꞌa Jesús xutabiu, ꞌba ꞌñu ꞌenere nga kitsure:

44—Tuꞌyá ꞌbe_ri nijmi; tu tꞌin ꞌba tikaku_ri yojori naꞌmiu. ꞌBa tꞌikue kjuatjo xi baku nga je kuatsjejin jotsaꞌen kitsu Moisés, tuxi ꞌbatsaꞌen skuekixini xuta nga je kuanda ngani.

45Tunga kionga kui xutabiu kiji, ꞌetutsꞌinre nga yeꞌere nijmi ngatsiꞌi xuta mé xi tu kuán. ꞌBa kui= kjuañu Jesús bi nde nda kuán jaꞌasꞌenni naxinando, tu kioña tsajain xuta ꞌbejña. Tunga ꞌetjuni xuta xi kjaꞌe kjuanga nangi tseꞌe nga jaꞌekutsejenre.

Currently Selected:

SAN MARCOS 1: vmy

Highlight

Copy