Aj Rom 15

Il tiꞌj tuꞌn qkꞌuꞌjlin kye qukꞌa

1Me awotzinqe, awo at qipin toj qnimbꞌil, il tiꞌj tuꞌn kyikyꞌxjo qukꞌa quꞌn, a nyaxix kujqe toj kynimbꞌil, ex mi kubꞌ qbꞌinchin a tzeꞌnkuxjo qaj. 2Qalaꞌ ax junjunqe kꞌwel bꞌinchin teꞌ bꞌaꞌn, tuꞌntzin tajbꞌin te onbꞌil kye qukꞌa, ex tuꞌn kytzalaj tiꞌj, ex tuꞌn kychꞌiy toj kynimbꞌil. 3Quꞌn ikyxjo xkyij tyekꞌin Crist; quꞌn mix kubꞌe tbꞌinchine tzeꞌnkuxjo taj. Qalaꞌ, ma tzꞌikyx tuꞌn tzeꞌnkuxjo ntqꞌmaꞌn toj Tuꞌjil Tyol Dios: Atzin yasbꞌilte s-ok qꞌoꞌn, ma kubꞌ tzꞌaq wibꞌajach.#Sal. 69:9.

4Quꞌn tkyaqiljo xqꞌumlajtz toj Tuꞌjil Tyol Dios, kyij tzꞌibꞌin te jun xnaqꞌtzbꞌil te qe, tuꞌntzintla tqe qkꞌuꞌj, ex tuꞌn qweꞌ toj tkyaqiljo n-ikyꞌx quꞌn, ex tuꞌn qonit toj qnimbꞌil. 5Noqit ax qMan Dios, a tzaj qꞌoꞌnte t-xel kyeꞌy toj kynimbꞌila ex Qꞌuqbꞌil kykꞌuꞌja, aku tzaj mojin kyeꞌy, tuꞌn kybꞌeta toj tbꞌanil kyxolxa, tzeꞌnku xkyij tyekꞌin Crist, a Jesús, 6tuꞌntzin kykyaqilxa junx ja kynimsiꞌn tbꞌi qMan Dios te jun majx, a Ttata qAjaw Jesucrist.

Ajo Tbꞌanil Tqanil nqꞌumlajtz kyeꞌ nya Judiy

7Tuꞌnpetziꞌn, kymujbꞌinktzin kyibꞌa kyxolxa, tzeꞌnku te Crist ma tzꞌok tmujbꞌin tibꞌ qukꞌa, te nimsbꞌil tbꞌi qMan Dios. 8Kxel nqꞌmaꞌn kyeꞌy, qa Crist, a Jesús, xi tqꞌoꞌn tibꞌ tuꞌn tajbꞌin qe, a awo aj Judiy, ex tuꞌn tyekꞌit qa tzꞌaqlexix Dios tukꞌa Tyol, tej tjapin bꞌaj tuꞌn Jesús tuꞌn tkujsitjo a tzaj ttziyin qMan Dios kye qxeꞌchil ojtxe. 9Ex nya oꞌkqox; qalaꞌ tuꞌn tnimsit tbꞌi qMan Dios kyuꞌnxjal nya Judiyqe, noq tuꞌn tqꞌaqꞌbꞌil tkꞌuꞌj qMan kyiꞌj, tzeꞌnku ntqꞌmaꞌn toj Tuꞌjil Tyol Dios:

Tuꞌnpetziꞌn, kchin bꞌitzila bꞌitz,

ex ok kjawil nnimsiꞌn tbꞌiy kyxol txqantl xjal, ayeꞌ nya Judiyqe.#2Sa. 22:50; Sal. 18:49.

10Ex juntl majl ntqꞌmaꞌn:

Chi tzalajxa, ayiꞌy nya Judiyqiꞌy, junx kyukꞌa Ttanim qMan Dios.#Deu. 32:43.

11Ex toj juntl tnej Tuꞌjil Tyol Dios, ntqꞌmaꞌn:

Chi bꞌitzinqiꞌy tbꞌi qAjaw, ayiꞌy nya Judiyqiꞌy.

Ex chi nimsiꞌn tbꞌi kyxol tkyaqil xjal twutz txꞌotxꞌch.#Sal. 117:1.

12Ex ikyxjo kubꞌ ttzꞌibꞌin Isaías:

K-itzꞌjil juntl tiꞌjjo tyajil Isaí, tzeꞌnkuꞌ t-xul tze.

Ex kkawil tibꞌaj tkyaqil xjal, a nya Judiyqe,

ayeꞌ k-okil qe kykꞌuꞌj tiꞌjch.#Is. 11:10.

13Ax Dios, a ntzaj qꞌonte qꞌuqbꞌil qkꞌuꞌj, nojsinte kyanmiꞌn tukꞌa nim tzaljbꞌil ex jun nukꞌbꞌil toj tkyaqil, tuꞌntzintla kychꞌiya wen tojjo kyqꞌuqbꞌil kykꞌuꞌja tiꞌj, noq tuꞌn tipin Xewbꞌaj Xjan.

14Ayiꞌy werman, ma qe nkꞌuꞌja, qa ma noj kyanmiꞌn tukꞌa tkyaqil bꞌaꞌn ex ojtzqibꞌl, tuꞌn tel kynikyꞌa te, ex tuꞌn kyqꞌoꞌn jun tumil kyxolxa. 15Tojjo wuꞌja lo, ma txi ntzꞌibꞌiꞌn junjun tumil kuj chꞌin, tuꞌntzin mi tzꞌele najeꞌ t-xtalbꞌil Dios toj kykꞌuꞌja, a ma tzaj toqxenin weꞌy, 16tuꞌn wajbꞌiꞌn te Jesucrist kyxoljo xjal nya Judiyqe, tzeꞌnku jun pale. Quꞌn atzin waqꞌinjiꞌy tuꞌn t-xi nqꞌmaꞌn Tbꞌanil Tqanil Dios te kolbꞌil, tuꞌntzin tyekꞌitjo nya Judiyqe twutz Dios tzeꞌnku jun oyaj tbꞌanilx wen, saqxix tuꞌn Xewbꞌaj Xjan. 17Ex nim nchin tzalaja tuꞌn waqꞌnbꞌiꞌn tiꞌj qMan Dios, noq tuꞌn Crist, a Jesús. 18Quꞌn nlay chin yoliꞌn tiꞌj juntl tiꞌ; qalaꞌ noq tiꞌjjo ma tbꞌinche Crist, tuꞌn waqꞌnbꞌiꞌn, kyuꞌn nyola ex nbꞌinchbꞌiꞌn, tuꞌn kynimiꞌn nya Judiyqe. 19O kubꞌ nyekꞌiꞌn tipin qMan Dios kyuꞌn nim techil ex nbꞌinchbꞌiꞌn tukꞌa tmojbꞌil Xewbꞌaj Xjan, tuꞌntzin kyja kykaꞌylajxjal tiꞌj. Ikytziꞌn, ma japine nbꞌajjo tyolajtz Tbꞌanil Tqanil tiꞌj Crist toj tnam Jerusalén ex tzmax toj txꞌotxꞌ te Ilírico. 20Quꞌn kukx n-ok nqꞌoꞌn tilil, tuꞌn tqꞌmet Tbꞌanil Tqanil kolbꞌil jaꞌ naꞌmtaq tbꞌijte tqanil tbꞌi Crist. Quꞌn nkyꞌeꞌy tuꞌn t-xi nxikybꞌiꞌn waqꞌiꞌn tibꞌaj taqꞌnbꞌin juntl. 21Qalaꞌ, tzeꞌnku ntqꞌmaꞌn toj Tuꞌjil Tyol Dios:

Aye xjal, a naꞌm tpon tqanil kye, kchi jawil kaꞌylaj.

Exqetziꞌn a naꞌm kybꞌiꞌnte, k-elil kynikyꞌ te.#Is. 52:15.

Nkubꞌ t-ximin Pabl tuꞌn t-xiꞌ Rom ex España

22Tuꞌn jtzꞌoꞌnqintaqa tuꞌn aqꞌuntl, ntiꞌtaq jun tumil tzeꞌn tten tuꞌn nxiꞌy lol kyeꞌy.#Ro. 1:13. 23Me atziꞌn jaꞌlin, ma japin bꞌaj waqꞌiꞌn tzaluꞌn. Quꞌn ojtxex tkubꞌlin nximiꞌn tuꞌn npoꞌn qꞌolbꞌil kyeꞌy. 24Me aj nxiꞌy España, chin kyꞌelixa qꞌolbꞌil kyeꞌy. Aj tbꞌaj jun jteꞌ qꞌij wuꞌn kyxola, wajatlaꞌy tuꞌn kymojiꞌn wukꞌiy toj nbꞌeꞌy, aj nxiꞌy tzma tzachiꞌn. 25Me nej, ma chinka toj Jerusalén tuꞌn t-xi wiꞌn jun oꞌnbꞌil kye nimil antza. 26Quꞌn aye nimil toj txꞌotxꞌ te Macedonia ex Acay o kubꞌ kybꞌisiꞌn tuꞌn tjaw chmet jun tal oyaj, tuꞌn t-xi smet kyeꞌ erman tal yajqe toj Jerusalén.#1Co. 16:1-4. 27Ex kubꞌ kybꞌinchin tukꞌa tzaljbꞌil, ex axtaq jun tumiljo, quꞌn ikytziꞌn tzeꞌnqeku nimil aj Judiy, kubꞌ kysipin a at kye toj kynimbꞌil kyukꞌaꞌ nya Judiyqe; exsin ikyxtzjo, il tiꞌj tuꞌn kyonin, ayeꞌ nya Judiyqe, kyukꞌa nimil Judiy tukꞌa at kye tzaluꞌn twutz txꞌotxꞌ.#1Co. 9:11. 28Ex ajtzin tbꞌaj nsipinjiꞌy oyaj luꞌn kyxol, bꞌeꞌxsin chin xela tzma España, ex kchin kyꞌela kyukꞌiy, aj nxiꞌy. 29Quꞌn bꞌiꞌn wuꞌn, aj npoꞌn kyukꞌiy, chin ponbꞌila tukꞌa t-xilin Tbꞌanil Tqanil, ex tukꞌa tkyaqil tkyꞌiwbꞌil Crist.

30Werman, nchin kubꞌsin nwutza kyeꞌy toj tbꞌi qAjaw Jesucrist, ex tuꞌn tqꞌuqbꞌil qkꞌuꞌj tuꞌn Xewbꞌaj Xjan, tuꞌn kymujbꞌinte kyibꞌa wukꞌiy toj aqꞌuntl, tuꞌn kynaꞌn Diosa wiꞌja. 31Ex chi kubꞌsin kywutza te Dios, tuꞌn nkleta toj kyqꞌobꞌjo xjal nya nimilqe, a iteꞌ toj txꞌotxꞌ Judey. Quꞌn ex atjo oyaj qꞌiꞌn wuꞌn, a tzaj kyqꞌoꞌn tuꞌn t-xi wiꞌn kye erman toj Jerusalén, noqxit tbꞌanilx tzꞌele toj kywutz, 32tuꞌntzintla aj nkaniꞌn kyukꞌiy, chin kaninxita tukꞌa tzaljbꞌil, tzeꞌnku taj qMan Dios, ex tuꞌn tjaw wiꞌn wibꞌa junx kyukꞌiy. 33Noqit ax qMan Dios, a tAjaw tkyaqil nukꞌbꞌil, ten junx kyukꞌiy. Ikyxit tzꞌele.

Currently Selected:

Aj Rom 15: mamC

Highlight

Copy