Lucas 9
9
Tej kyxi tsmaꞌn Jesús t-xnaqꞌtzbꞌin qꞌmal Tbꞌanil Tqanil kolbꞌil
(Mt. 10:5-15; Mr. 6:7-13)
1I ok tchmoꞌn Jesúsjo kabꞌlajaj t-xnaqꞌtzbꞌin, exsin xi tqꞌoꞌn kyoklin te kawil, ex xi tqꞌoꞌn kyipin tuꞌn kyetzjo jniꞌ tkyaqil wiq taqꞌnil tajaw il toj kyanminxjal kyuꞌn, exsiꞌn jniꞌqe yabꞌ tuꞌn kyqꞌanit. 2Exsin i xi chqꞌoꞌntz tuꞌn Jesús tuꞌn kyxiꞌ yolil teꞌ Tkawbꞌil qMan Dios, ex tuꞌn kyqꞌanin kyiꞌjjo jniꞌ yabꞌ. 3Chiꞌ kyjaluꞌn: Ntiꞌ chꞌin kyeꞌ tuꞌn t-xi kyiꞌn, a il tiꞌj tuꞌn tajbꞌin toj kybꞌeꞌy; mina txi kyiꞌn kye kytze, kychꞌuꞌẍa ex wabꞌj, ex mina txi kyiꞌn kyeꞌ pwaq, nipe jun xbꞌalin te txꞌixpil kyiꞌja.#Lc. 10:4. 4Ex aꞌlchaqx kye jatz jaꞌ chi pon kaniniꞌy ajlal, axsa chi tenkuy, tzmaxi kꞌaꞌ chi etzjiꞌy toj, ajxi kyxiꞌy toj junxil tnam, chi Jesús kye. 5Me metziꞌn, aj qa at jun tnam, a jaꞌ kykyꞌeꞌyexjal kyiꞌja, bꞌeꞌx kꞌaꞌ chi etza antza. Me bꞌeꞌx kꞌaꞌ tzꞌel kychtoꞌn quq tiꞌj kyqaꞌn kywutzjo xjal tojjo tnam anetziꞌn, tuꞌn tajbꞌin te techil kye, tuꞌn mina xkubꞌ kybꞌiꞌn Tyol Dios.#Lc. 10:10-11; Kybꞌi. 13:51.
6Bꞌeꞌxsin i xiꞌ kyej t-xnaqꞌtzbꞌin Jesús tojile junjun kojbꞌil, qꞌmal teꞌ Tbꞌanil Tqanil kolbꞌil kyexjal, ex tuꞌn kyqꞌanitjo jniꞌ yabꞌ kyuꞌn.
Tej t-ximin Herodes tiꞌj ankye teꞌ Jesús
(Mt. 14:1-12; Mr. 6:14-29)
7Jotxjo a nyolajtztaq tiꞌj Jesús, ex tiꞌj tkyaqiljo nbꞌanttaq tuꞌn. Bꞌeꞌx bꞌijte teꞌ tuꞌn Herodes, a nmaq kawiltaq, me mix elexix tnikyꞌ te, quꞌn ilaꞌtaq nqꞌmante a qa ataq Juan, a Jawsil Aꞌ, otaq jatz itzꞌje juntl majl. 8Ex iteꞌtaqtl nchi qꞌmante a qa ataqj Elías, a yolil Tyol Dios, otaq tzul juntl majl. Me iteꞌtaq nchi qꞌmante a qa jun qtzan yolil Tyol Diosjo otaq jaw anqꞌin juntl majl.#Mt. 16:14; Mr. 8:28; Lc. 9:19. 9Me atzin te Herodes iky teꞌ tqꞌma kyjaluꞌn: Nyatel te Juan, a Jawsil Aꞌ, quꞌn ayinku weꞌ in xi qꞌmante, tuꞌn tel txꞌemit teꞌ twiꞌ. ¿Me altzila kyeꞌ xjaltz, a nimku nqꞌumlajtz tiꞌj? Tuꞌn ikyjo, ok tqꞌoꞌn Herodes tilil, tuꞌntzintla tiwle Jesús.
Tej tkaꞌchit jweꞌ mil ichin tuꞌn tipin Jesús
(Mt. 14:13-21; Mr. 6:30-44; Jn. 6:1-14)
10Atzaj teꞌ kymeltzꞌajjo t-xnaqꞌtzbꞌin Jesús, bꞌeꞌx i ok ten qꞌmalte te Jesús jniꞌ otaq bꞌaj kybꞌinchin. Bꞌeꞌxsin i xi qꞌiꞌntz kyjunalx, tuꞌn kypon kanin tojjo jun najbꞌil, Betsaida tbꞌi. 11Me atzaj teꞌ kybꞌinte txqantl xjal, qa otaq cheꞌx Jesús kyukꞌa t-xnaqꞌtzbꞌin tzma Betsaida, bꞌeꞌxsin i xi lipetz kyiꞌj. I kubꞌ tziyin tuꞌn Jesús tej kykanin; xi chikyꞌbꞌin Tkawbꞌil qMan Dios kye, ex i kubꞌ tqꞌanin jniꞌ yabꞌ.
12Atzaj teꞌ kyjaꞌtaq qok yupj, bꞌeꞌxsin i xi laqꞌe kabꞌlajaj t-xnaqꞌtzbꞌin tkꞌatz Jesús, exsin xi kyqꞌmaꞌn te kyjaluꞌn: Chqꞌonqexjiy xjal lo kyojileꞌ jniꞌ kojbꞌil a nqayin iteꞌ, tuꞌntzintla kyjyon kywa, ex tuꞌn kyjyon teꞌ jaꞌ tuꞌn kyktane, quꞌn tuꞌn ntiꞌx chꞌin te at tzaluꞌn.
13Xitzin ttzaqꞌwin Jesús: Kyqꞌonxa kywa.
Me ayetzintljo t-xnaqꞌtzbꞌin xi kytzaqꞌwin kyjaluꞌn: Ntiꞌ qe wabꞌj qꞌiꞌn quꞌn, oꞌkxjo jweꞌ tal wabꞌj exsin kabꞌe tal netzꞌ kyiẍ. ¿Ma man qoꞌxtza laqꞌolte txqantl wabꞌj te tkyaqiljo xjal lo? chi chiꞌ.
14Attaq jun jweꞌ mil ichin antza. Me chi Jesúsjo kye t-xnaqꞌtzbꞌin kyjaluꞌn: Kyqꞌmanxa kyexjal tuꞌn tok kychmoꞌn kyibꞌ toj chꞌuqin, lajaj toj ox kꞌal#9:14Lajaj toj ox kꞌal, 50 n-ele. tuꞌn tten toj junjun chꞌuq, ex tuꞌn kykubꞌ qe.
15Jotx xjal i bꞌaj kubꞌ qe, tzeꞌnxjo xi qꞌmaꞌn kye kyuꞌnjo t-xnaqꞌtzbꞌin Jesús. 16Texjo paq anetziꞌn, i jaw ttzyuꞌn Jesúsjo jweꞌ tal wabꞌj exqetziꞌn kabꞌe tal netzꞌ kyiẍ, jaw tiꞌn twutz jawl, exsin xi tqꞌoꞌn chjonte te Dios kyiꞌj. Atzaj teꞌ tbꞌaj naꞌn Dios, bꞌeꞌxsin i kubꞌ tpiẍin tal wabꞌj, exsin i xi tqꞌoꞌntz kyeꞌ t-xnaqꞌtzbꞌin, tuꞌntzintla tkubꞌ kysipin kye tkyaqilxjal. 17Jotxjo xjal bꞌaj noj kykꞌuꞌj, quꞌn tuꞌn nimx kywa bꞌaj. Me atzaj teꞌ kybꞌaj waꞌn, kabꞌlajaj chiꞌljo tbꞌuchil wabꞌj chmet.
Tej t-xi tqꞌmaꞌn Pegr qa Kolil te Jesús
(Mt. 16:13-19; Mr. 8:27-29)
18Jun majjo ikyjo, tjunalxtaq Jesús at kyukꞌa t-xnaqꞌtzbꞌin; naꞌn Dios nej, exsin xi tqanin kyeꞌ t-xnaqꞌtzbꞌin. Chiꞌ kyjaluꞌn: ¿Ankyeqiꞌn toj kywutzjo jniꞌ xjal?
19Xitzin kytzaqꞌwin t-xnaqꞌtzbꞌin kyjaluꞌn: At junjun nqꞌmaꞌnte qa ajiy qtzan Juan, a Jawsil Aꞌ; at junjuntl nqꞌmaꞌnte qa ajiy Elías, a yolil Tyol Dios ojtxe. Ex at junjuntl nqꞌmaꞌnte qa ajiy jun yolil Tyol Dios jaw itzꞌje juntl majl.#Mt. 14:1-2; Mr. 6:14-15; Lc. 9:7-8.
20¿Yajtzin kye toj kywutz? ¿Ankyeqiꞌn?
Ate Pegr xi tzaqꞌwinte kyjaluꞌn: A tejiy Crist, a skꞌoꞌnxix tuꞌn Dios, tuꞌn tul tzaluꞌn twutz txꞌotxꞌ, chiꞌ.#Jn. 6:68-69; 11:27.
Tej tyolin Jesús tiꞌj tkyimlin
(Mt. 16:20-28; Mr. 8:30—9:1)
21Tbꞌajlinxiꞌ ikyjo, xi oqxeninxix kye tuꞌn Jesús, tuꞌn mix alqeye tuꞌn t-xi kyqꞌmaꞌne qa ate Jesúsjo Crist.
22Xi tqꞌmaꞌn kye t-xnaqꞌtzbꞌin kyjaluꞌn: Ayiꞌn, a Tkꞌwal Ichin, ilxix tiꞌj tuꞌn tikyꞌx nim yajbꞌil wuꞌn, ex ok kchin elil iꞌjliꞌn kyuꞌn kynejilxjal ex kyuꞌn kynejil pale junx kyukꞌa tkyaqil xnaqꞌtzil tiꞌj ojtxe kawbꞌil. Ok kchin kꞌwel bꞌyoꞌn kyuꞌn, me toj toxin qꞌij ok kchin jawitz anqꞌintla juntl majl.
23Xitzin tqꞌmaꞌn kye kykyaqilx: Ankye jun taj tuꞌn tok te nxnaqꞌtzbꞌiꞌn, il tiꞌj tuꞌn tel tiꞌn toj tkꞌuꞌj tkyaqil tajbꞌil, ex tuꞌn t-xi tqꞌoꞌn tibꞌ tuꞌn t-xi lipe wiꞌja tkyaqil qꞌij, exla qa ma kyim twutz cruz.#Mt. 10:38; Lc. 14:27. 24Ikytziꞌn, alkye taj noq tuꞌn tkubꞌ tbꞌinchin tajbꞌil tzaluꞌn twutz txꞌotxꞌ, kxeꞌl toj najin te jun majx. Ex alkye kꞌwel ttzyuꞌn tibꞌ tiꞌj tkyaqiljo at tajbꞌin kyexjal tzaluꞌn twutz txꞌotxꞌ, noq tuꞌn npaja, ktenbꞌil tchwinqil te jun majx.#Mt. 10:39; Lc. 17:33; Jn. 12:25. 25¿Quꞌn tiꞌxsila tajbꞌin tuꞌn tkanbꞌit tkyaqiljo ajbꞌil tzaluꞌn twutz txꞌotxꞌ, exsin tuꞌn tnaj tanmin? 26Tuꞌnpetziꞌn, qa at jun saj txꞌixwe wiꞌja ex tiꞌjjo nyola, ex ikyx wejiꞌy, ayiꞌn Tkꞌwal Ichin, ex ok kchin tzajil txꞌixwe weꞌ te, aj wula tukꞌa nkawbꞌila ex tukꞌa tqoptzꞌajiyil nMaꞌn junx kyukꞌa jniꞌ xjan angel. 27Twutzxix kxel nqꞌmaꞌn kyeꞌy, at junjun iteꞌ tzaluꞌn wukꞌiy, mi kyli kyimin, tzmaxi aj kylonte Tkawbꞌil Dios tzaluꞌn twutz txꞌotxꞌ.
Tej ttxꞌipit kaꞌylajtz Jesús
(Mt. 17:1-8; Mr. 9:2-8)
28Otaqxi bꞌaj wajxaq qꞌij, tej tjax Jesús naꞌl Dios twiꞌ jun wutz; lipcheqektaq Pegr, Santyaw ex Juan tiꞌj.#2Pe. 1:17-18. 29Tzmataq nnaꞌn te Jesús Dios, tej ttxꞌixpit tkaꞌybꞌil twutz, exsin ajo t-xbꞌalin ox qoptzꞌajx wen. 30Texjo paq anetziꞌn, i kubꞌ kyyekꞌin kyibꞌ kabꞌe ichin nchi yolintaq tukꞌa Jesús, a Moisés ex Elías. 31Tzunxtaq nqoptzꞌaj kyiꞌjile ichin anetziꞌn, tej kyok ten yolil tiꞌjjo tkyimlin Jesús, a tuꞌntaq tbꞌaj toj Jerusalén. 32Nimxtaq te Pegr twatl at, exqetziꞌn tukꞌa. Me mix ikyꞌe ktane; tuꞌntziꞌn iwle tqoptzꞌajiyil Jesús kyuꞌn, exsin kyspikyꞌimiljo kabꞌe ichin, a iteꞌtaq tukꞌa. 33Atzaj teꞌ kyjaꞌtaq tel kypaꞌn kyibꞌjo kabꞌe ichin tiꞌj Jesús, xitzin tqꞌmaꞌn Pegr kyjaluꞌn: ¡Ay Xnaqꞌtzil, tbꞌanilx teꞌ tuꞌn otoꞌ tzaluꞌn! Kꞌaꞌ kubꞌ qbꞌinchiꞌn oxe tal pach; jun te, ex jun te Moisés, ex jun te Elías.
Me mix ele te Pegr tnikyꞌ tiꞌjjo a otaq txi tqꞌmaꞌn. 34Tzmataq nyolin Pegr, tej tkubꞌ juktzꞌaj jun muj kyibꞌaj. Tuꞌntziꞌn, nimx kyxobꞌil tzaj. 35Tojjo muj anetziꞌn, etz yolin jun tqꞌajqꞌojil, ex tqꞌma: Axixpen wejiꞌy Nkꞌwal lo, skꞌoꞌnxix wuꞌn. Kybꞌinkujiꞌy Tyol.#Is. 42:1; Mt. 3:17; 12:18; Mr. 1:11; Lc. 3:22. 36Tej tbꞌaj kybꞌiꞌn yol, a etz qꞌmaꞌn toj muj, iwle Jesús kyuꞌn, ex kyli qa tjunalxtaq waꞌl. Ntiꞌ chꞌin i jaw yolin, ex mix aꞌl qe xi kyqꞌmaꞌne tiꞌjjo otaq kyli.
Tej tex tlajoꞌn Jesús taqꞌnil tajaw il toj tanmin jun qꞌa
(Mt. 17:14-21; Mr. 9:14-29)
37Tojxi junxil qꞌij i meltzꞌaj twiꞌ wutz. Atzaj teꞌ kykuꞌtzku, nimx xjal i bꞌajetz kꞌlulte Jesús. 38Kyxoljo xjal anetziꞌn, attaq jun te ichin jaw yolin kujxix wen. Chiꞌ kyjaluꞌn:
Ay Xnaqꞌtzil, bꞌinchim t-xtalbꞌila, qꞌaninkujiy tal nkꞌwala lo, noq tuꞌn oꞌkx wejiꞌy tal nkꞌwal junchꞌin: 39Jun taqꞌnil tajaw il ma bꞌinchin tiꞌjjo tal nkꞌwala; tuꞌntziꞌn, tzunx nẍchꞌinx wen, ex n-etz plut toj ttzi tzeꞌnku ntzaj kyimin tiꞌj. Tuꞌn ikyjo, nimx ma kyꞌixbꞌe tal nkꞌwala tuꞌn, ex ntiꞌx tumil tuꞌn ttzaqpaj. 40Nimx ma chin kubꞌsin nwutza kye t-xnaqꞌtzbꞌiꞌn, tuꞌntzintla tetz kyiꞌn taqꞌnil tajaw il, me naꞌmx tetz kyuꞌn.
41Xitzin ttzaqꞌwin Jesús kye t-xnaqꞌtzbꞌin kyjaluꞌn: Ayiꞌy xjal ntiꞌ kynimbꞌila, ex ntiꞌ kyumila. ¿Jteꞌxsin qꞌij nkubꞌlin teꞌn kyxola? ¿Ex jteꞌxsin qꞌij kkyꞌelix wuꞌn kyukꞌiy? Kyintzinjiꞌy qꞌa tzaluꞌnch.
42Atzaj teꞌ t-xi laqꞌe tal kꞌwal tkꞌatz Jesús, bꞌeꞌx pon tolpaj juntl majl tuꞌn tipin taqꞌnil tajaw il, ex bꞌeꞌx tzaj jun majljo kyimin tiꞌj. Me ante Jesús bꞌeꞌx xi tmiyoꞌn tipin taqꞌnil tajaw il. Tuꞌntziꞌn, bꞌeꞌx qꞌanit tej kꞌwal anetziꞌn, exsin xi qꞌoꞌntz te ttata.
43Jotx i bꞌaj jaw kaꞌylaj tuꞌn tipin qMan Dios antza.
Tej tyolin Jesús juntl majl tiꞌjjo tkyimlin
(Mt. 17:22-23; Mr. 9:30-32)
Tzunxtaq nchi labꞌtexjal antza tiꞌjjo a nbꞌanttaq tuꞌn Jesús, xitzin tqꞌmaꞌn Jesús kye t-xnaqꞌtzbꞌin kyjaluꞌn: 44Kybꞌinkutzinjiꞌy a kxel nqꞌmaꞌn kyeꞌy, ex mina tuꞌn tel naj toj kykꞌuꞌja: Ayin wejiꞌy, a Tkꞌwal Ichin, me ok kchin xel qꞌoꞌn toj kyqꞌobꞌxjal tuꞌn nkyima, chiꞌ.
45Me mix ele kynikyꞌjo t-xnaqꞌtzbꞌin teꞌ a otaq bꞌaj tqꞌmaꞌn Jesús kye, quꞌn tuꞌn axtaq te Dios otaq tzꞌok jpunte kynabꞌl, tuꞌn minataq tzꞌele kynikyꞌ te. Ex nimx kyxobꞌil tzaj tuꞌn t-xi kyqanin juntl majl, tzeꞌn chi elpineꞌ yol anetziꞌn.
Ankye nimxixtl toklin toj Tkawbꞌil Dios
(Mt. 18:1-5; Mr. 9:33-37)
46Texjo paq anetziꞌn, bꞌeꞌx i ok ten kyej t-xnaqꞌtzbꞌin Jesús chꞌotjil kyxolile, quꞌn kyajtaq tuꞌn kybꞌinte alkyexixjo nimxixtl toklin kyxol.#Lc. 22:24. 47Me atzaj teꞌ tel tnikyꞌ Jesús tiꞌjjo nbꞌajtaq kyxol, tzaj tkꞌleꞌn jun kꞌwal, exsin kubꞌ twaꞌbꞌintz kyxol, 48exsin xi tqꞌmaꞌn kye: Ankye jun kxel kꞌmonte jun tal qꞌa tzeꞌnku lo noq tuꞌn tnimbꞌil tiꞌj nbꞌiꞌy, nya oꞌkxjo tal qꞌa kxel tkꞌmoꞌn, qalaꞌ ayiꞌn. Ex alkyeꞌ kxel kꞌmon weꞌy, nya oꞌkqinxa chin xel tkꞌmoꞌn, qalaꞌ majxjo Dios, a saj chqꞌon weꞌy.#Mt. 10:40; Lc. 10:16; Jn. 13:20. Tuꞌnpetziꞌn, alkye nya nim chꞌin toklin kyxola toj kywutza, apente nimxix toklin, chiꞌ Jesúsjo.
Ankyeqexix qukꞌa toj taqꞌin qMan
(Mr. 9:38-40)
49Atzin te Juan xi tqꞌmaꞌnl kyjaluꞌn: Xnaqꞌtzil, o qli qeꞌ jun xjal, a nchi etzjo jniꞌ taqꞌnil tajaw il toj kyanminxjal tuꞌn, noq toj tumil tbꞌiy. Me o txi qmiyoꞌn tuꞌn mina kubꞌ tbꞌinchintl, quꞌn tuꞌn nya qukꞌa.
50Xitzin ttzaqꞌwin Jesús kyjaluꞌn: Mina txi kymiyoꞌn kyeꞌ, quꞌn atziꞌn luꞌn nya qiꞌjbꞌinxi taꞌ, qukꞌa taꞌ teꞌ.
Tej t-xi tmiyoꞌn Jesús Santyaw ex Juan
51Atzaj teꞌ chꞌixtaq tul kanin qꞌij, jaꞌ tuꞌn taje Jesús toj kyaꞌj, okxix tilil tuꞌn, tuꞌn tkanin tzmax Jerusalén. 52Me nej i xi tnejsin kabꞌe t-xnaqꞌtzbꞌin tzma tojjo jun kojbꞌil te Samaria, tuꞌntzintla tjyet jun ja kyuꞌn, jaꞌ tuꞌntaq tktane Jesús.
53Me ayetzin kyej xjal aj Samaria, mix kytziye tuꞌn tkyij Jesús antza, quꞌn tuꞌn otaq kybꞌi qa kyjaꞌtaq t-xiꞌ Jesús tzma Jerusalén, ex nimtaq qꞌoj kyxol aj Samaria kyukꞌa aj Jerusalén. 54Atzaj teꞌ kybꞌin teꞌ kabꞌe t-xnaqꞌtzbꞌin Jesús, a Santyaw ex Juan, tiꞌtaq kybꞌis aj Samaria, xitzin kyqꞌmaꞌn te Jesús: ¿Taa, me qa aku ttziya te, tuꞌn t-xi qqꞌmaꞌn tuꞌn tkuꞌtz qꞌaqꞌ toj kyaꞌj, tuꞌntzintla kykyimjo maꞌ xjal kykyaqil?#2Re. 1:9-16.
55Tej tbꞌinte Jesús kyyoljo t-xnaqꞌtzbꞌin, bꞌeꞌx aj meltzꞌaj, exsin i xi tmiyoꞌn. Chiꞌ kyjaluꞌn: Mina n-el kyeꞌ kynikyꞌ te, jaꞌ tzajniꞌn tbꞌis kyanmiꞌn, a nya bꞌaꞌn, chiꞌ. 56Quꞌn ayiꞌn, a Tkꞌwal Ichin, mi ẍin ula yuchꞌil kychwinqilxjal, qalaꞌ tuꞌn kyklet.#9:56At junjun wiq Tyol qMan, ntiꞌ tkyaqil v. 55 ex 56 toj. Noqx teꞌ tbꞌaj tqꞌmaꞌn ikyjo, bꞌeꞌx i xiꞌ toj junxil kojbꞌil.
Aye kyajtaq tuꞌn kyxi lipe tiꞌj Jesús
(Mt. 8:19-22)
57Tzuntaq chi bꞌet, tej tjaw yolin jun ichin, exsin xi tqꞌmaꞌn te Jesús kyjaluꞌn: Taa, wajx weꞌ tuꞌn wok lipe tiꞌja, jaꞌchaqx txaꞌyetza.
58Xitzin ttzaqꞌwin Jesús kyjaluꞌn: ¿Ma twutzxixsin tey qa aku txi lipey wiꞌja? Me majx kxel nqꞌmaꞌn tey: At kye wech kyjul te kynajbꞌil; ex at kye pichꞌ kypaqbꞌil. Me metzin weꞌ, a Tkꞌwal Ichin, nipe jaꞌ tuꞌn nxi qꞌejeye chꞌiꞌn, ntiꞌ.
59Ex xi tqꞌmaꞌn Jesús te juntl: Lipeka wiꞌjach.
Me ante xjal xi ttzaqꞌwin: Me ntiꞌ ambꞌil wiꞌja jaꞌlin, quꞌn ma tijin ntatiy. Wajatlaꞌy nej tuꞌn tkubꞌ nyoꞌn ajxi tkyim, ex tuꞌn tkuꞌx nmuquꞌn, tzmaxitzintla ẍinx lipejiꞌy tiꞌja.
60Me xi ttzaqꞌwin Jesús: Lipeka wiꞌja jaꞌlin. Ex tzaqpinqekjiꞌy kyimninqe toj kynimbꞌil, tuꞌn tkux kymuquꞌn kyibꞌ. Me ante, ku txiꞌy qꞌmalte Tbꞌanil Tqanil kolbꞌil, a tzajnin toj kyaꞌj.
61Me atx juntlte xi qꞌmante kyjaluꞌn: Taa, waj weꞌ tuꞌn wok lipe tiꞌja, me nej ma chinka qꞌmalte nqanila kyeꞌ iteꞌ toj njaꞌy.#1Re. 19:20.
62Xitzin ttzaqꞌwin Jesús kyjaluꞌn: Mina, quꞌn alkye teꞌ k-okil ttzyuꞌn ttzꞌutzꞌ wakx tuꞌn taqꞌnin, exsin oꞌkxsa nkyimexi tiꞌjxi, ntiꞌ te xjal lo tajbꞌin tuꞌn taqꞌin toj Tkawbꞌil Diosch.
Currently Selected:
Lucas 9: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
