Kybꞌinchbꞌin 26

Tej tyolin Pabl te kolbꞌil tibꞌ twutz Agripa

1Xitzin tqꞌmaꞌn Agripa te Pabl kyjaluꞌn: Aku yolin jaꞌlin, tuꞌn tkolin tiꞌjxa.

Jawtzin tiꞌn Pabl tqꞌobꞌ, exsin ok tentz yolil. Chiꞌ kyjaluꞌn: 2Noq same, tata. Tzunx nchin tzalaja jaꞌlin, ay, nmaq kawil Agripa, tuꞌn nim toklin, tuꞌn kchin yolila twutza, ex tuꞌn tbꞌant nklonte wibꞌa, tiꞌj tkyaqiljo nya bꞌaꞌn, a ma bꞌaj kyqꞌmaꞌn Judiy wiꞌja. 3Tzun nchin tzalaja, quꞌn tuꞌn tojtzqiꞌn te, ay Agripa, a jniꞌxjo nbꞌant toj kychwinqil Judiy exqetziꞌn nchi bꞌaj yolajtz qxola. Tuꞌnpetziꞌn, kxel nqanin tey tukꞌa tipin tchwinqila, ex tuꞌn tkubꞌ tbꞌiꞌnjiy a kxel nqꞌmaꞌn.

Tchwinqil Pabl, teꞌ naꞌmtaq tnimin

4Kykyaqil Judiy bꞌilte ex ojtzqiꞌn kyuꞌn, tzeꞌn nchin anqꞌiniꞌy kyxol, toj weꞌ ntxꞌotxꞌ ex toj Jerusalén, atxixj tej ẍin tzaja toj nqꞌayila. 5Ex bꞌiꞌn kyuꞌn, ex aku kubꞌ kyqꞌmaꞌn qa kyaj, qa Pariseyqinx weꞌ, ex intinkxa kyxoljo chꞌuq xjal, a tzunxix kubꞌ qniminjiꞌy tkyaqil kyxnaqꞌtzbꞌil Judiy.#Kybꞌi. 23:6; Fil. 3:5. 6Ex atzin jaꞌlin, ma chin tzaj qꞌiꞌn toj paꞌbꞌin noqxix tuꞌn at jun qꞌuqbꞌil qkꞌuꞌja tiꞌjjo o tzaj tqꞌmaꞌn qMan Dios kye ojtxe qxjalila. 7Ajo kabꞌlajaj chꞌuq xjal, tyajil Israel, a ojtxe qxeꞌchil, loqoꞌy nqo ayon tiꞌj tuꞌn tjapin bꞌajjo a tzaj ttziyin qMan Dios qeꞌy: Qa il tiꞌj tuꞌn kyjaw anqꞌin juntl majl kyimnin. Tuꞌnpetziꞌn, nqo kꞌulin twutz Dios, ex nqo ajbꞌin te, qꞌijl ex qnikyꞌin. Ay Agripa, noq tuꞌnjo qqꞌuqbꞌil qkꞌuꞌja lo loqe Judiy nchi patin wiꞌja tojjo paꞌbꞌin jaꞌlin. 8¿Me tiꞌxix quꞌn mina nxi kynimin kye, qa kchi jawitz anqꞌin juntl majl kyimnin tuꞌn qMan Dios?

Tej tajtaq Pabl tuꞌn kykubꞌ tbꞌyoꞌn nimil

9Ex ikyxtaq wejiꞌy nnabꞌl ojtxe, chi Pabl, qa iltaq tiꞌj tuꞌn tkubꞌ bꞌinchit ilaꞌ mibꞌin kyiꞌjjo kykyaqil, a lipcheqetaq tiꞌj tbꞌi Jesús aj Nazaret. 10Ikytzin bꞌantjo wuꞌn toj Jerusalén; ilaꞌ nimil kux nqꞌoꞌn toj tze, tej ttzaj kytziyin kynejil pale. Ex atzaj teꞌ kykubꞌ bꞌyoꞌn, bꞌaꞌntaqjo luꞌn te weꞌy.

11Ilaꞌ maj, chi Pabl, i bꞌaj nbꞌyoꞌn tuꞌntzintla tkyij kytzaqpiꞌn kynimbꞌil tiꞌj Jesús. Ex bꞌantjo lo wuꞌn toj kykyaqil ja te kynaꞌbꞌl Dios Judiy. Ex tuꞌntaqjo txqan nqꞌoja kyiꞌj, in ok teꞌn lajolkye nya noq oꞌkxjo kyojjo tnam te Israel, qalaꞌ majx kyojjo tnam te najchaq.#Kybꞌi. 8:3; 22:4-5.

Tej tyolin Pabl juntl majl tiꞌjjo otaq bꞌaj tiꞌj, teꞌ tnimin

(Kybꞌi. 9:1-19; 22:6-16)

12Ay, Agripa, chi Pabl, noq tuꞌn nbꞌisa ikyjo, bꞌeꞌx xi wiꞌn wibꞌa, tuꞌn nkaniꞌn tojjo tnam Damasco; chqꞌoꞌn in xiyiꞌy tuꞌn kykawbꞌil kynejil pale. 13Me tzuntaq nchin bꞌeta ikyjo, otaq tzikyꞌ kabꞌlaj qꞌij, teꞌ nlontiꞌy jun nim tspikyꞌimil, tzaj qoptzꞌaj toj kyaꞌj, a nimxix chꞌintl tqoptzꞌajiyil tzeꞌnku tqan qꞌij, a ox tilkꞌajxix wiꞌjaliꞌy ex kyiꞌjjo a nchi bꞌettaq wukꞌiy. 14Qkyaqilxa kubꞌ lankꞌaj twutz txꞌotxꞌ, ex nbꞌiꞌy tqꞌajqꞌojil twiꞌ jun aꞌla, a tzaj qꞌmante weꞌy toj kyyol aj Judiy. Chiꞌ kyjaluꞌn: ¡Saulo, Saulo! ¿Tiꞌn wila ma chin el tikyꞌiꞌn? Axa n-ok qꞌoꞌnte jun mibꞌin tiꞌjxa, ikyx tzeꞌnku jun wakx nkjoꞌn, aj tok twaꞌbꞌiꞌn jun ma juchꞌ kxbꞌil, ex aj qa nya tumiljo nbꞌant tuꞌn.

Xitzin nqꞌmaꞌntza: 15Noq samexixa, wAjawa. ¿Ankye te?

Tzajtzin ttzaqꞌwin weꞌy: Ayin wejiꞌy Jesús, ex ayinxjiꞌy a ma chin el tikyꞌiꞌn. 16Weꞌksa jaꞌlin, quꞌn ma tzꞌok nyekꞌin wibꞌa tey tuꞌntzin tajbꞌiꞌn weꞌy, ex tuꞌn tokin te qꞌmal teꞌ a ma tliy jaꞌlin, exsin a naꞌmx tlontiy wiꞌja. 17Kkletila wuꞌn kye Judiy ex kyeꞌ nya Judiy, quꞌn kyxoltzin xjal anetziꞌn kxel nchqꞌoꞌniy jaꞌlin. 18Kxel nchqꞌoꞌn kyxol, tuꞌntzintla tjqetjo kynabꞌl, tuꞌntzintla mina chi bꞌet toj najin, tzeꞌnku jun xjal nbꞌet toj qxopin; qalaꞌ toj tumilxix, tzeꞌnku jun xjal nbꞌet toj spikyꞌin. Ikytzin kchi elitzeꞌ tjaqꞌ tkawbꞌil tajaw il, tuꞌn kyok lipe, ex tuꞌn kynimin wiꞌja, ayiꞌn kyMan ex kyDios. Noq tuꞌn ikyjo, knajsitiljo kyil, ex ktenbꞌil kyoklin tojjo xjan Ntanima, ayiꞌn kyDios.

Tej tkubꞌ tnimin Pabl a otaq tzaj tqꞌmaꞌn Dios te

19Ay, Agripa, ikytzin bꞌajjo, chi Pabl. Kubꞌ nniminjiꞌy a tzaj tqꞌmaꞌn qMan Dios weꞌy. 20Tnejilxix, xi nqꞌmaꞌnjiꞌy Tbꞌanil Tqanil kyeꞌ iteꞌtaq toj Damasco.#Kybꞌi. 9:19-22. Tbꞌajlinxiꞌ ikyjo, xi nqꞌmaꞌn kyeꞌ iteꞌtaq toj Jerusalén, ex te tkyaqil xjal toj tkyaqil txꞌotxꞌ te Judey.#Kybꞌi. 9:28-29. Ex majxjo kyeꞌ nya Judiyqe, i tzaj ntxkoꞌn, tuꞌntzintla kynimin, tuꞌn kymeltzꞌaj tukꞌa Dios, exsin tuꞌntla bꞌaꞌnjo kybꞌinchbꞌin te yekꞌil teꞌ kynimbꞌil.

21Noq tuꞌn nyoliꞌn kyukꞌa nya aj Judiy, chi Pabl, in ok tzyuꞌn kyuꞌn Judiy toj tnejil ja te naꞌbꞌl Dios toj Jerusalén, ex kyajtaq tuꞌn nkubꞌ kybꞌyoꞌn. 22Me noq tuꞌn tmojbꞌil qMan Dios, loqin intiꞌn tzmax tzaluꞌn, ex nchin yolin tiꞌj Dios kyukꞌa kykyaqiljo nimxix kyoklin, exqetziꞌn kyukꞌa jniꞌ txqantl. Kukx nchin yolinjiꞌy, ex ntiꞌx chꞌin ma tzꞌok ntzꞌaqtziꞌn, tzeꞌnku kyij tqꞌmaꞌn Moisés, a yolil Tyol qMan Dios ojtxe, junx kyukꞌa txqantl, a tiꞌtaqjo tuꞌn tbꞌaj: 23Qa ilxtaq tiꞌj tuꞌn tkyim Crist, a Klolqe. Me tbꞌajlinxitaqjo tkyimlin, axixtaq tnejiljo, tuꞌn tjatz anqꞌin juntl majl;#1Co. 15:20. exsin tuꞌn tqꞌmetjo kolbꞌil te qtanima ex kyeꞌ txqantl junxil tnam.#Is. 42:6; 49:6. Atzin kolbꞌil, ikyx tzeꞌnku jun tzaj te yekꞌbꞌil teꞌ bꞌaꞌn.

Tej tyolin Pabl tuꞌn tkubꞌ tkꞌuꞌj Agripa, tuꞌn t-xi tnimin Tyol Dios

24Tej tbꞌaj tqꞌmaꞌn Pabljo lo, te kolbꞌilte, bꞌeꞌx jaw weqj Festo, ex tqꞌma: ¿Qape txꞌuꞌj taꞌya te twiꞌ, Pabl? Noq tuꞌn nim t-xnaqꞌtzbꞌila, jaꞌ ma tzꞌele txꞌuꞌj twiꞌy.

25Me atzin te Pabl xi ttzaqꞌwin: Nya txꞌuꞌjqin weꞌ, ay Festo, a nimxix toklina, qalaꞌ mikyxi teꞌ, quꞌn tumilxix ex twutzxixjo, a xi nqꞌmaꞌn. 26Ex luꞌpe Agripa lo, a nmaq kawil. Atzin te ojtzqil teꞌ, a jniꞌchaqjo ma bꞌaj nqꞌmaꞌn. Tuꞌnpetziꞌn, nchin yolin jikyin wen twutz, quꞌn bꞌiꞌnxix wuꞌn, qa bꞌin tkyaqiljo luꞌn tuꞌn, quꞌn nya toj ewajil xbꞌante, a ma bꞌaj nqꞌmaꞌn.

27Ay, Agripa, chi Pabl, ¿Tzuntzin nxi tnimin tejiy a kyyol yolil Tyol Dios? ¡Bꞌiꞌn we wuꞌn, qa nxi tnimiꞌn!

28Xitzin ttzaqꞌwin Agripa: ¿Noqx chꞌime xkubꞌe nkꞌuꞌja tuꞌn woka te nimil?

29Xi ttzaqꞌwin Pabl te: Qa noq chꞌime mo qa nimxtaq, me noqit iky tajbꞌil qMan Dios, nya oꞌkxa a ay, nim tokliꞌn, qalaꞌ kykyaqilxitlaꞌ a loqe nchi bꞌin wiꞌja jaꞌlin, tuꞌn kyoke nimil tzeꞌnku weꞌ; me nya kꞌloꞌnqiꞌy tuꞌn kxbꞌil tzeꞌnku weꞌ.

30Jawtzin weꞌ nmaq kawil junx tukꞌa t-xuꞌjil, Berenice tbꞌi, ex tukꞌa Festo, a kawil, ex kykyaqiljo a qꞌuqleqetaq antza. 31El kypaꞌn kyibꞌjo kawil, tuꞌn kyyolin kyjunalx tiꞌjjo til Pabl. Kyqꞌma kyxolilex kyjaluꞌn: Ntiꞌ teꞌ ichin til lo te kyimin, ex nya tuꞌn tkuꞌx toj tze.

32Atzin te Agripa xi tqꞌmaꞌn te Festo: Matla txi tzaqpet te ichin lo, noqit nya ax saj qaninte, tuꞌn tok toj paꞌbꞌin twutz Augusto César, a tnejilxix kawil te Rom.

Currently Selected:

Kybꞌinchbꞌin 26: mamC

Highlight

Copy