2 Timotey 3
3
Tzeꞌn kytenxjal, aj chꞌixtaq tjapin bꞌaj tqꞌijil
1Tzꞌelxix tnikyꞌa tiꞌjjo lo: Aj chꞌixtaq tjapin bꞌaj tqꞌijil twutz txꞌotxꞌ, tzul kanin jun qꞌij te bꞌisbꞌajil. 2Quꞌn iteꞌ xjal k-okil qe kykꞌuꞌj kyiꞌjx ex tiꞌj pwaq, nimsil kyibꞌqe, ex laꞌjilqe, xoꞌl yolqe tiꞌj Dios, k-elil kyiꞌjlin kytata ex mi txi kyqꞌoꞌn chjonte kye, ex nya wenqe. 3Mi ntzaj qꞌaqꞌin kykꞌuꞌj kyiꞌj txqantl, aj qꞌojilqe, iqil yolqe, mibꞌin chi tzyuꞌn kyibꞌ, kuj kyanmin, ikyꞌil tiꞌj tkyaqiljo bꞌaꞌn, 4noq nchi ok bꞌuꞌkꞌj, ex ntiꞌx kyxobꞌil tuꞌn kyok lipin tiꞌj jun tiꞌ, xkabꞌilqe, ex oꞌkx npon kykꞌuꞌj tiꞌj jniꞌ achbꞌil nya bꞌaꞌn, a tzeꞌnku ntqanin kyxmilil; ex ntiꞌx chꞌin nkubꞌ kybꞌisin tiꞌj qMan Dios. 5Ex k-okil kyqꞌoꞌn kyibꞌ tzeꞌnkuꞌ jun nimil kyxola. Me noq tuꞌn kybꞌinchbꞌin, k-elil kynikyꞌtzajil qa nya nimilqe, ex qa tuꞌn ikyjo, ntiꞌ tipin Dios kyukꞌa. Paꞌmil tibꞌa kyiꞌjjo xjal anetziꞌn.
6-7Me kyxoljo xjal ayeꞌ, at junjun tbꞌanilxix tumil toj kywutz tuꞌn kykubꞌxjal kyuꞌn, ex tuꞌn kysbꞌuꞌn kyiꞌjjo qya, ayeꞌ kyaj tuꞌn tel kynikyꞌ teꞌ twutzxix, chi chiꞌ, me tuꞌn lajoꞌnqe tuꞌn il, ex tuꞌn jniꞌ achbꞌil, a tzeꞌnku ntqanin kyxmilil, jun paqx nchex lipe kyiꞌjjo xnaqꞌtzbꞌil, a tbꞌanilx tbꞌijte; me tuꞌn tpajjo kabꞌe kykꞌuꞌj, nlay bꞌant tuꞌn tel kynikyꞌ teꞌ a twutzxix. 8Ikyxsiꞌn tzeꞌnku bꞌaj kye Janes ex Jambres, tej tel kyikyꞌin Moisés,#Ex. 7:11. ex ikyqexsintzjo xnaqꞌtzil kyxola ma tzꞌel kyikyꞌin tkyaqiljo twutzxix. Ma tzꞌok naj kynabꞌl, ex o chi kubꞌ tzꞌaq toj kynimbꞌil. 9Me nlay chꞌiyjo kyxnaqꞌtzbꞌil, quꞌn tkyaqilxjal k-elil tnikyꞌ te qa ntiꞌ tajbꞌin kyxnaqꞌtzbꞌil, tzeꞌnkuj bꞌaj kyej kabꞌe, ayej i el ikyꞌinte Moisés.
Oqxenbꞌil tuꞌn Pabl te Timotey
10Tzeꞌn te, bꞌiꞌn tuꞌn ajo nxnaqꞌtzbꞌiꞌn: Tzeꞌn ẍin bꞌetiꞌy, tzeꞌn nbꞌisa, tzeꞌn nnimbꞌila, ex tzeꞌn woybꞌila tiꞌjjo tajbꞌil qMan Dios; tzeꞌn tqꞌaqꞌbꞌil nkꞌuꞌja kyiꞌj txqantl, tzeꞌn nkujbꞌila 11twutz tkyaqiljo nya bꞌaꞌn ex jniꞌ yajbꞌil s-ul kanin wiꞌja kyuꞌnxjal. Ojtzqiꞌnl tuꞌn, tiꞌ s-ikyꞌx wiꞌja kyojjo tnam Antyokiy, a Iconio ex Listra.#Kybꞌi. 13:14-52; 14:8-20. Me toj tkyaqiljo luꞌn, ma chin kleta tuꞌn qAjaw Jesús.#Kybꞌi. 14:1-7. 12Quꞌn kykyaqilxjo, a kyaj tuꞌn kybꞌet tojxix tumil, tzeꞌnku taj Crist, a Jesús, ok kyꞌelix yajbꞌil kyuꞌn. 13Me ayetzin kyeꞌ xjal nya wenqe, noqx kyja chi xela toj najin, quꞌn nchi sbꞌuꞌn kyiꞌj txqantl, quꞌn tuꞌn o chi sbꞌet.
14Me atzin te, weꞌkuxixa toj tkyaqiljo ma bꞌaj t-xnaqꞌtzin, quꞌn ma tzꞌel tnikyꞌa te, ex ojtzqiꞌnl tuꞌn, alkyeqe ẍi xnaqꞌtzin teꞌy. 15Ex quꞌn ojtzqiꞌnl tuꞌn, ajo Xjan Tuꞌjil Tyol Dios atxix toj tkꞌwalila, ex bꞌiꞌnl tuꞌn, qa noq tuꞌn yol anetziꞌn, aku tzꞌele tnikyꞌa te kolbꞌil te jun majx, noq tuꞌn tnimbꞌila tiꞌj Crist, a Jesús. 16Quꞌn tkyaqiljo Tuꞌjil Tyol qMan Dios, ax o qꞌmante. Tuꞌnpetziꞌn, at tajbꞌin te xnaqꞌtzbꞌil, te kawbꞌil tiꞌjjo nya wen, te jikysbꞌil, ex te qꞌolte tumil, tuꞌntzin qbꞌet tzꞌaqle toj qchwinqil, 17tuꞌntzintla aye xjal, a nchi ajbꞌin te Dios, tuꞌn kyok tzꞌaqleqe tiꞌj tkyaqil, ex bꞌantninl kyten, tuꞌn kybꞌinchin te tkyaqiljo bꞌaꞌn.
Currently Selected:
2 Timotey 3: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.