1 Aj Corint 8

Ajo chibꞌj, a nxi qꞌoyit kywutzjo kywutzbꞌiyil dios

1Atzin jaꞌlin, tzaj kytzꞌibꞌiꞌn weꞌy tiꞌj qa wen tuꞌn kychyoꞌn tchibꞌjil aluꞌmj, a kubꞌ bꞌyoꞌn toj kybꞌi kywutzbꞌiyil dios. Kxel nqꞌmaꞌn jun tumil te nukꞌbꞌil kyeꞌy. Twutzx kye kyuꞌn qa qkyaqilx at qnabꞌl tibꞌajjo luꞌn. Me a kynabꞌla lo, a nchi nimsin kyibꞌa tukꞌa; nya toj tumil taꞌye. Me metzin tetz tumil, tuꞌn tten jun qkꞌuꞌjbꞌil qibꞌ qxolile, tuꞌn qchꞌiy, tzeꞌnku taj Dios. 2A qꞌuqlek tkꞌuꞌj tiꞌjjo a n-el tnikyꞌ te, nya tumil taꞌye tnabꞌl twutz Dios. 3Me metzin teꞌ, a n-ok kꞌuꞌjlin kye txqantl, apente toj tumil taꞌye tnabꞌljo.

4Atzin tumil tiꞌjjo chibꞌj kubꞌnin kywutz twutzbꞌiyil ntiꞌ tajbꞌin, quꞌn ayetziꞌn twutzbꞌiyil ntiꞌ kyoklin tzaluꞌn twutz txꞌotxꞌ, quꞌn ntiꞌ juntl te Dios, qalaꞌ oꞌkxjo jun, a ojtzqiꞌn quꞌn. 5Twutzx tetz qa toj kywutzxjal, ilaꞌku dios twutz txꞌotxꞌ, ex toj kyaꞌj, quꞌn ilaꞌ kybꞌaj dios kye xjal ex ilaꞌ kyajaw. 6Me metzin qetz, ntiꞌ juntl dios, qa nya oꞌkxjo Dios, a qMan, a ttxuyil tkyaqil, ex noq te, ok qo ajbꞌila.#Mal. 2:10; Jn. 1:3; Ro. 11:36; Ef. 4:6. Ex junchꞌinx qAjaw, a Jesucrist,#Jn. 13:13. a kubꞌ bꞌinchinte tkyaqil, ex noq tuꞌn, nqo anqꞌine.#Kybꞌi. 17:25; Col. 1:16.

7Nya tkyaqil nimil qxol, ma tzꞌel tnikyꞌ te lo. Quꞌn nkubꞌ kyximin tiꞌjjo kybꞌinchbꞌin ojtxe, qa tuꞌn kychyoꞌn a tchibꞌjil aluꞌmj, a kubꞌnin kywutzjo kywutzbꞌiyil dios, nkubꞌ kyximin qa ma kuꞌx kyil. 8Me twutzx tetz, qa nya tuꞌn qwa, ma qo ele wen twutz qMan Dios. Quꞌn qa ma txi qchyoꞌn ex qa mina, ntiꞌ tajbꞌinjo lo twutz Dios.

9Twutzx tetz qa tzaqpiꞌnqo tuꞌn t-xi qchyoꞌn chibꞌj anetziꞌn. Me kykaꞌyinktzin kyibꞌa, tuꞌn mi jaw tzꞌaq jun nimil, a naꞌm tweꞌ wen toj tnimbꞌil noq tuꞌn kypaja, aj t-xi kychyoꞌn. 10Quꞌn aku bꞌaj ikyjo; qa nxi kychyoꞌn tchibꞌjil aluꞌmj, a otaq kubꞌ kywutzjo kywutzbꞌiyil toj tja kydiosxjal, exsin qa atkutaq jun nimil nkaꞌyin kyiꞌja, a naꞌmxix tweꞌ toj tnimbꞌil; exsin qa xkubꞌ tbꞌinchinkutaq tzeꞌnkuꞌ kyeꞌ, exsin bꞌalaqa ntiꞌtaq bꞌisin tuꞌn ikyjo. Me noq tuꞌn s-ok tkaꞌyin kyiꞌja ikyjo, ja xkubꞌe tzꞌaqe te jun majx toj il. 11Me tuꞌnpetziꞌn xkyim Crist, tuꞌn tkletjo a neꞌẍ toj tnimbꞌil lo, me atzin kyeꞌ, noq tuꞌn tpajjo noq chꞌin kynabꞌla, knajileꞌ kyermana te jun majx. 12Quꞌn qa noq tuꞌn kypaja, kchi jawile tzꞌaq kyermana, ma kuꞌx kyila ikyjo twutz Crist.#Mt. 25:45. 13Tuꞌnpetziꞌn, qa noq tuꞌn tpajjo nnikyꞌbꞌila, aku kubꞌ tzꞌaq juntl nimil, bꞌaꞌntz tuꞌn mi t-xi nnikyꞌbꞌinjiꞌy chibꞌj ikyjo, tuꞌntzin mina chin okiꞌy tzeꞌnku jun tze, ja tuꞌn tja tolpaje jun wermana toj tchwinqil.

Currently Selected:

1 Aj Corint 8: mamC

Highlight

Copy