1 Aj Corint 2

1Tuꞌnpetziꞌn werman, tej nkaniꞌn kyukꞌiy qꞌmalte Tbꞌanil Tqanil tiꞌj Dios, mix in kaniniꞌy tukꞌa jun yol mo tukꞌa jun nabꞌl nimxix kywutzxjal. 2Quꞌn tej nteꞌn kyukꞌiy, ntiꞌtaq juntl t-xilin nyola, qalaꞌ oꞌkxjo tiꞌj Jesucrist ex tiꞌjjo tkyimlin twutz cruz. 3Ex tej nteꞌn kyxola, ntiꞌtaq nim wipiꞌn ex nimtaq nxobꞌila, ex noq nchin luꞌlintaqa wen, tuꞌn jun wokliꞌn o tzaj tqꞌoꞌn Dios kyxola.#Kybꞌi. 18:9. 4Ex tej t-xi nqꞌmaꞌnjiꞌy Tbꞌanil Tqanil kolbꞌil, mix in yoliniꞌy tukꞌa nmaq yol noq tuꞌn tkubꞌku kykꞌuꞌja wuꞌn. Qalaꞌ ma kubꞌ kyeꞌ kykꞌuꞌj, me tukꞌa jun yekꞌbꞌil tuꞌn tipin Xewbꞌaj Xjan, 5tuꞌn mi tzꞌoke qe kykꞌuꞌja tiꞌjjo nabꞌl, a tbꞌanilx kyexjal, qalaꞌ oꞌkxjo tiꞌjjo tipin qMan Dios.

Ajo nabꞌl tuꞌn Xewbꞌaj Xjan

6Me atziꞌn jaꞌlin, kyxoljo aye ma chi tijin toj kynimbꞌil, nqo yoliꞌn tukꞌa jun t-xilin nabꞌl tal kuj chꞌinl, me a nya jun qnabꞌla, a qekuxa te twutz txꞌotxꞌ, ex nya kynabꞌljo a nchi kawin twutz txꞌotxꞌ, a jun paqx kbꞌajil. 7Qalaꞌ, atzin tnabꞌl Dios, a ewintaq tuꞌn, atxix naꞌmxtaq tbꞌant twutz txꞌotxꞌ tuꞌn. Atzin tnabꞌljo lo, ximintaq tuꞌn atxix ojtxe, tuꞌn ttzaj tqꞌoꞌn qe jaꞌlin te jun tzaljbꞌil. 8Quꞌn ayetzin kye nejinel twutz txꞌotxꞌ, mi s-el kynikyꞌ te, quꞌn noqit maꞌy, mitla xkubꞌ kybꞌyoꞌn tAjaw Tkyaqil twutz cruz, a nqoptzꞌaj jaꞌlin toj kyaꞌj. 9Quꞌn ikytziꞌn ntqꞌmaꞌn toj Tuꞌjil Tyol Dios kyjaluꞌn:

Nimku o bꞌant tuꞌn Dios kye kꞌuꞌjlinqe tuꞌn.

Me atziꞌn o bꞌant tuꞌn, mix aꞌl jun o lonte;

mix aꞌl jun o bꞌinte;

mixpe aꞌlx jun o pon tiꞌj.#Is. 64:4.

10Me ma tzaj tyekꞌin Dios qe, noq tuꞌn Xewbꞌaj Xjan, quꞌn ate Xewbꞌaj Xjan nxpichꞌinte tkyaqil jniꞌ t-xilin tumil tuꞌn qMan Dios. 11Quꞌn mix aꞌl junxjal, aku tzꞌel tnikyꞌ te t-xim juntl, qalaꞌ oꞌkxjo tanminxjal ojtzqilte alkye t-xilin t-xim. Ikytzin te Diosjo: Mix aꞌlx juntl ojtzqilte t-xim, qalaꞌ noq oꞌkxjo tanmin Dios, axjo Xewbꞌaj Xjan. 12Ex awotzinqe, nya ma tzaj qkꞌmoꞌn jun xewbꞌaj, a tzajnin te twutz txꞌotxꞌ, qalaꞌ a Xewbꞌaj Xjan, a tzajnin te Dios, tuꞌntzin tel qnikyꞌ te tkyaqiljo a o tzaj tqꞌoꞌn noq tuꞌn t-xtalbꞌil. 13Tuꞌnpetziꞌn, nqo yoliꞌn tiꞌjjo lo, nya tukꞌa jun yol, a noqit s-el qbꞌiꞌn kyiꞌjxjal, qalaꞌ tuꞌn saj t-xnaqꞌtzin Xewbꞌaj Xjan. Ikytziꞌn, nqo qꞌmaꞌnejiꞌy jun tumil tuꞌn Xewbꞌaj Xjan kyeꞌy tukꞌa t-xilin yol te Xewbꞌaj Xjan.

14Me qa ntiꞌ Xewbꞌaj Xjan toj tanmin jun xjal, nlay txi tnimiꞌn a tzajnin te Xewbꞌaj Xjan, quꞌn ntiꞌ tajbꞌin toj twutz. Ex nlay tzꞌel tnikyꞌ te, quꞌn noq tuꞌn Xewbꞌaj Xjan, aku tzꞌel pjete. 15Me atzin teꞌ at Xewbꞌaj Xjan toj tanmin, n-el teꞌ tnikyꞌ te tkyaqil, ex mix aꞌlx jun aku tzaj qꞌoꞌnte juntl tumil te. 16Ikyxjo tzeꞌnku ntqꞌmaꞌn toj Tuꞌjil Tyol Dios:

¿Ankye n-el tnikyꞌ te t-xilin tnabꞌl qAjaw?

¿Ex ankyeꞌ aku tzaj xnaqꞌtzinte?#Is. 40:13; Ro. 11:34.

Ikytzin tzeꞌnku qe, atqe tnabꞌl Crist qukꞌa.

Currently Selected:

1 Aj Corint 2: mamC

Highlight

Copy