1 Aj Corint 11

1Tuꞌnpetziꞌn, chi lipeka tiꞌjjo nkubꞌ nyekꞌiꞌn, tzeꞌnku weꞌ lipcheqiꞌn tiꞌjjo tyekꞌbꞌil Crist.#1Co. 4:16; Fil. 3:17.

Jun xnaqꞌtzbꞌil tiꞌjjo kyoklin ichin kyukꞌa qya

2Kxel nqꞌoꞌn chjonte kyeꞌy, tuꞌn kukx nchi tzaj kynaꞌnjiꞌy, ex tuꞌn nkubꞌ kybꞌinchiꞌn tzeꞌnku xkyij nqꞌmaꞌn. 3Me waja tuꞌn tel kynikyꞌa te, qa ate Crist nejinel te ichin, ex atzin te ichin nejinel te kya, ikytzin tzeꞌnku te Dios nejinel te Crist. Tuꞌnpetziꞌn at jun txꞌixpibꞌl kyxol kyoklin ichin tukꞌa Crist, ex kyxol qya tukꞌa ichin, ex kyxol Crist tukꞌa qMan Dios. 4Quꞌn qa ma jax tktxuꞌn ichin twiꞌ tzeꞌnku qya toj tja Dios, aj taqꞌe naꞌl Dios, mo qa aj tyolin Tyol Dios, n-el tikyꞌiꞌn tmujbꞌil tibꞌ tukꞌa Crist. 5Ex ikyxjo kyeqya; qa noq tuꞌn kyokku tzeꞌnku jun ichin, mi jax kyktxuꞌn kywiꞌ toj tja Dios, aj kyaqꞌe naꞌl Dios, mo qa aj kyyolin Tyol Dios, n-el kyikyꞌiꞌn kymujbꞌil kyibꞌ kyukꞌa ichin, quꞌn n-ok kyqꞌoꞌn kyibꞌ te ichin nyakuj mitzoꞌn kywiꞌ te jun majx. 6Tuꞌnpetziꞌn, qa at jun qya, tkyꞌeꞌ jax tktxuꞌn twiꞌ toj tja Dios, bꞌaꞌntla tuꞌn tel tmitzoꞌn twiꞌ, tuꞌn tok tzeꞌnku jun ichin te jun majx. Me jun tij ttxꞌixewjo qya aku tzꞌel ikyjo tuꞌn tkyij twiꞌ tzeꞌn twiꞌ jun ichin. Tuꞌnpetziꞌn, ilx tiꞌj tuꞌn tjax tktxuꞌn twiꞌ toj tja Dios. 7Quꞌn tzeꞌnku te ichin, nya wen tuꞌn tjax tktxuꞌn twiꞌ toj tja Dios tzeꞌnku jun qya, quꞌn twutzbꞌiyil Dios teꞌ, ex jun yekꞌbꞌil tiꞌjjo tqoptzꞌajiyil t-xilin Dios. Ex ikyxjo teqya, jun yekꞌbꞌil tiꞌjjo tqoptzꞌajiyil t-xilin ichin.#Gen. 1:26-27. 8Quꞌn te tnejil, nya te s-el anqꞌin tiꞌjqya, qalaꞌ a teqya tiꞌj ichin. 9Ex nya tuꞌn tpaj teqya xbꞌante ichin, qalaꞌ tuꞌn tpaj te ichin xbꞌante qya.#Gen. 2:18-23. 10Tuꞌnpetziꞌn, bꞌaꞌn tuꞌn tjax tktxuꞌn qya twiꞌ, te jun yekꞌbꞌil kywutz angel, qa tjaqꞌ tkawbꞌil ichin taꞌye.

11Me toj Ttanim Dios il tiꞌj kykabꞌil, quꞌn ntiꞌ ichin qa ntiꞌ qya, ex ikyxjo qya ntiꞌ, qa ntiꞌ ichin. 12Quꞌn te tnejil, ate qya tzajnin tiꞌj ichin. Me ex ikyxjo, qa tkyaqil ichin n-anqꞌin tiꞌjqya. Ex tkyaqiljo luꞌn tzajnin tiꞌj Dios. 13Quꞌn ayex kyeꞌ aku chi qꞌmante, qa nya wen tuꞌn tnaꞌn jun qya Dios toj tja Dios tzeꞌnku jun ichin, a mi njax kutxbꞌil twiꞌ, quꞌn il tiꞌj jun txꞌixpibꞌl kyxol ichin ex qya. 14Quꞌn ¿Ma nyatzin twutzx, qa ttxꞌixew te ichiꞌn tuꞌn tkubꞌ tchꞌiysin twiꞌ tzeꞌnku twiꞌ jun qya? 15Qalaꞌ ma tzaj tqꞌoꞌnx te Dios tsmal twiꞌqya nmaq, tuꞌn tok te jun yekꞌbꞌil qa at txꞌixpibꞌl kyxol tqoptzꞌajiyil qya tukꞌa tqoptzꞌajiyil ichin. Quꞌn ma tzaj tqꞌoꞌn twiꞌqya, tuꞌn tchꞌiy nmaq wen, tuꞌn tok te kutxbꞌil twiꞌ. 16Me ex tiꞌj tkyaqiljo luꞌn, qa at jun kyxola taj tuꞌn tjaw yolbꞌin wiꞌja tuꞌn tpajjo lo, kxel nqꞌmaꞌn, qa ntiꞌ juntl tumil ojtzqiꞌn quꞌn, ex toj tkyaqil Ttanim Dios.

Junjun nukꞌbꞌil tiꞌj Xjan Wabꞌj

17Atzin jaꞌlin, kxel nqꞌmaꞌn kyeꞌy tiꞌjjo aj tikyꞌsit Xjan Wabꞌj kyuꞌn, nya wen kybꞌinchbꞌiꞌn toj nwutza, ex nya toj tumil ikyjo. 18Toj tnejil, nqꞌumle weꞌy qa, aj tok kychmoꞌn kyibꞌa tuꞌn tikyꞌsit Xjan Wabꞌj kyuꞌn, noqx nimku paꞌbꞌl kyxola. Me toj jun tnej, bꞌalaqa twutzx. 19Quꞌn bꞌalaqa toj kywutza, il tiꞌj tuꞌn kypaꞌn kyibꞌa kyukꞌa txqantl, tuꞌntzintla kynimsin kyibꞌa, ex tuꞌn tyekꞌinte nyakuj wenqiꞌy twutz Dios kywutz txqantl. 20Me kxel nqꞌmaꞌn qa ajo paꞌbꞌl lo ntiꞌ tajbꞌin, ex ajo Xjan Wabꞌj, a nchi waꞌn tiꞌj, nyaxla xjan twutz qAjaw. 21Quꞌn ajtzin kywaꞌn junx, a naꞌmtaq tpon or te Xjan Wabꞌj, aye junjun kyxola, a at chꞌin kyqꞌinimil, nejxix nchi ok ten loꞌlte jotx, tuꞌn kynojxix wen, ex majxpe nchi bꞌaj ja txꞌujte. Me ayetzin junjun erman, a yajqe, chꞌixtaq kyel kyim tuꞌn waꞌyaj. 22Me ayetzin kyeꞌ qꞌinin, ¿Ma ntiꞌtzin kye kyja tuꞌn kywaꞌn ex tuꞌn kykꞌwan wen antza? ¿Tiquꞌnil n-el kyikyꞌinjiꞌy Ttanim Dios, a jaꞌ junx kyoklin tkyaqil nimil? ¿Ex tiquꞌn n-el kyiꞌn kytxꞌixewjo a ntiꞌ at kye? ¿Tiꞌtzila kxel nqꞌmaꞌn tiꞌjjo lo? ¿Okpela kchin tzalajila? Mina. ¡Mixla jtojx!

23Atziꞌn xnaqꞌtzbꞌil ma txi nqꞌoꞌn kyeꞌy, ax qAjaw saj qꞌonte weꞌy: Quꞌn toj qnikyꞌin, tej t-xi kꞌayin qAjaw Jesús, jaw ttzyuꞌn jun wabꞌj,#Mt. 26:26; Mr. 14:22; Lc. 22:19; 24:30. 24ex xi tqꞌoꞌn chjonte te qMan Dios. Tbꞌajlinxiꞌ ikyjo, kubꞌ tpiẍin, ex tqꞌmaꞌ: Atziꞌn wabꞌj lo atzin wejiꞌy nxmilil kxel qꞌoꞌyit te kyimin noq tuꞌn kyel wena. Kybꞌinchinkujiꞌy luꞌn te naꞌbꞌl weꞌy.

25Ex ikyxjo, tbꞌajlinxiꞌ waꞌn, jaw ttzyuꞌn jun tkꞌwel kꞌwabꞌj, ex tqꞌma: Atziꞌn kꞌwabꞌj, a tkuꞌx tojjo tkꞌwel kꞌwabꞌj lo, atzin nchkyꞌeljiꞌy k-okil te kujsil te akꞌaj tumil bꞌantnin tiꞌj, tuꞌn kykyijxjal toj wen tukꞌa Dios.#Ex. 24:6-8; Jer. 31:31-34; Mt. 26:27-29; Mr. 14:23-25; Lc. 22:20. Junjun maj, aj t-xi kykꞌwanjiꞌy lo, kykꞌwanxa te naꞌbꞌl weꞌy. 26Tkyaqil maj, aj t-xi kykꞌwanjiꞌy kꞌwabꞌj, ex aj t-xi kywaꞌnjiꞌy wabꞌj, kukxitla xkubꞌ kynaꞌnjiꞌy tkyimlin qAjaw, ajxi tul juntl majl. 27Tuꞌnpetziꞌn, alkye jun kxel waꞌn teꞌ wabꞌj ex kxel kꞌwan teꞌ kꞌwabꞌj luꞌn, ex nya toj tumil, at til tiꞌj, quꞌn n-el tikyꞌin t-xmilil ex tchkyꞌel qAjaw, a xi tqꞌoꞌn te chojbꞌil il. 28Tuꞌnpetziꞌn, teyile junjun tuꞌn t-xpichꞌin tiꞌj tchwinqil, qa at jun tkyꞌi twutz Dios, a naꞌmxtaq twaꞌn ex tkꞌwan tiꞌjjo Xjan Wabꞌj. 29Quꞌn alkye nwaꞌn ex nkꞌwan, qa mi s-aj qꞌaqꞌin tkꞌuꞌj tiꞌj Ttanim Dios, a t-xmilil qAjaw, ax nqaninte jun tkawbꞌil Dios tibꞌajx kujxix wen. 30Tuꞌn tpajjo ikyjo, nimku kyxola ntiꞌ kyipin, ex yabꞌqe, ex ilaꞌ o kyim. 31Quꞌn noqit nqo xpichꞌin wen tiꞌjjo qchwinqil, ex noqit nkubꞌ qbꞌinchin tzeꞌnkux taj Dios, nlaytla tzaj tqꞌoꞌn tkawbꞌil qibꞌaj. 32Exitla qa ma tzaj tkawbꞌil qAjaw qibꞌaj tzaluꞌn twutz txꞌotxꞌ, noqitla tuꞌn tjikysit qchwinqil, tuꞌntzintla mi qo naje te jun majx kyukꞌa nya nimilqe.#Deu. 8:5; Eb. 12:5-11.

33Tuꞌnpetziꞌn werman, ajtzin tok kychmoꞌn kyibꞌa waꞌl teꞌ Xjan Wabꞌj, kyyoꞌnku kyibꞌa kykyaqilxa, quꞌn junx kyokliꞌn kykyaqila. 34Ex qa at jun kyxola, a at chꞌin tqꞌinimil, bꞌaꞌn tuꞌn ttzaj waꞌn tja, qa at waꞌyaj tiꞌj, tuꞌntzin mi chi tzaj kawiꞌn tuꞌn Dios tuꞌn tpajjo chmobꞌl ikyjo.

Ex atzin txqantl tiꞌ, kꞌwel nnikꞌuꞌn, aj npoꞌn kyukꞌiy.

Currently Selected:

1 Aj Corint 11: mamC

Highlight

Copy