1 Aj Corint 10

Jun xobꞌtzbꞌil tuꞌn Pabl, tuꞌn mi kyij kyiꞌjlinxjal Dios

1-2Me waja tuꞌn kybꞌintiꞌy werman, qa nya tkyaqilx kkanbꞌil chojbꞌil, a tzaj tqꞌoꞌn Dios. Quꞌn kanqetzinjiꞌy aj Israel ojtxe, aye qxeꞌchil toj qnimbꞌil. Quꞌn kykyaqilxjo i etz toj Egipto tukꞌa Moisés, ex i mujbꞌin te kyibꞌ tukꞌa, tej kyten tjaqꞌ muj,#Ex. 13:21-22. ex tej kyikyꞌx toj ttxuyil aꞌ, Kyaq tbꞌi, nyakuj te jun jawsbꞌil aꞌ.#Ex. 14:21-29. 3-4Ex kykyaqilx i waꞌn tiꞌjjo xjan wabꞌj, tej kywaꞌn tiꞌj maná, a tzaj tqꞌoꞌn Dios,#Ex. 16:35. ex tej kykꞌwan tiꞌjjo aꞌ etz toj piky tuꞌn Dios.#Ex. 17:6; Num. 20:11. Me atziꞌn piky luꞌn nyolin tiꞌj Crist, a attaq kyukꞌa toj tzqij txꞌotxꞌ. 5Exla qa ok qe kykꞌuꞌj tiꞌjjo jawsbꞌil aꞌ ex xjan wabꞌj anetziꞌn, me mix tzalaje Dios kyiꞌj, ex tuꞌn ikyjo, bꞌeꞌx i kyij kyim nimkuxix kybꞌaj; noqx jun jteꞌbꞌin kyij.#Num. 14:29-30.

6Atzin jaꞌlin erman, bꞌaj tkyaqiljo lo te jun yekꞌbꞌil, tuꞌn mi pon qkꞌuꞌj tiꞌjjo nya wen tzeꞌnku pon kye kykꞌuꞌj tiꞌj.#Num. 11:4. 7Tuꞌnpetziꞌn, mi chi kꞌuliꞌn kywutzjo kywutzbꞌiyil dios tzeꞌnku kye txqantl, tzeꞌn ntqꞌmaꞌn Tuꞌjil Tyol Dios:

Aye xjal i kubꞌ qe waꞌl ex kꞌwal twutzjo kywutzbꞌiyil dios.

Exsin tej kybꞌaj waꞌntz, noq tiꞌchaqku bꞌaj bꞌant kyuꞌn kywutz.#Ex. 32:6.

8Ex mi chi bꞌaj kyꞌaꞌjiꞌn tzeꞌnku kye junjun aj Israel, ex tuꞌn ikyjo, bꞌeꞌx kyim 23,000 toj junx qꞌij.#Num. 25:1-18. 9Ex mi tzꞌok kynikyꞌbꞌiꞌn Crist, tuꞌn tkubꞌ kyximiꞌn, qa wen te Dios qa ntiꞌ aku tqꞌma tuꞌn tkubꞌ kybꞌinchin chꞌiꞌn tzeꞌnku kyaja. Quꞌn ikyx kyxim junjun aj Israeljo ojtxe, ex ikyxjo, ex bꞌeꞌx i kyim, tej kyok txꞌaꞌn tuꞌn kan.#Num. 21:5-6. 10Ex mi chi yolbꞌiꞌn tiꞌj Dios tzeꞌnku junjunkye i yolbꞌin, ex bꞌeꞌx i kyim tuꞌn angel te kyimin.#Num. 16:41-49.

11Bꞌaj tkyaqiljo lo, ex bꞌeꞌx kyij tzꞌibꞌit toj Tuꞌjil Tyol Dios te jun yekꞌbꞌil te qe, ex te jun aqꞌbꞌil qnabꞌl, tuꞌntzin mina kubꞌ qbꞌinchinqe ikyjo, a awo nqo anqꞌin kyojjo qꞌij jaꞌlin, a chꞌix tjapin bꞌaj tkyaqil. 12Tuꞌnpetziꞌn, qa waꞌlqiꞌy wen toj kynimbꞌila toj kywutza, kykaꞌyinktzin kyibꞌtza, tuꞌn mi chi kubꞌ tzꞌaqiꞌy, tzeꞌnku kye aj Israel ojtxe. 13Quꞌn ajo xim tuꞌn tbꞌinchit il, ikyxjo tzeꞌnku kyxim txqantl nimil toj tkyaqil twutz txꞌotxꞌ. Me ate Dios bꞌaꞌn tuꞌn tqe qkꞌuꞌj tiꞌj, quꞌn nlay taqꞌ te Dios, tuꞌn ttzaj jun yajbꞌil qiꞌj, a nlayit qpa; qalaꞌ qa ma tzaj jun yajbꞌil toj qchwinqil, ax te Dios ktzajil qꞌonte tumil tzeꞌn tten tuꞌn qetz tjaqꞌ.

14Tuꞌnpetziꞌn ayiꞌy werman, nimxix nkꞌuꞌja kyiꞌja; ku kyel oqa teꞌ kꞌulbꞌil kywutzjo kywutzbꞌiyil dios. 15Quꞌn qa twutzxix at kynabꞌla tzeꞌnku nkubꞌ kyximiꞌn, ex ayexa k-elil kynikyꞌ te, qa twutzxixjo nyola lo. 16Tzeꞌnku tojjo Xjan Wabꞌj, ex tzeꞌn nxi qqꞌoꞌn chjonte te Dios tiꞌj, nkubꞌ qyekꞌin qmujbꞌil qibꞌ tukꞌa Crist tiꞌjjo tchkyꞌel. Ex aj qwaꞌn tiꞌjjo Xjan Wabꞌj, a nbꞌaj kubꞌ sipit qxol, nkubꞌ qyekꞌin qa at qmujbꞌil qibꞌ qxolx, a awo o qo ok te t-xmilil Crist twutz txꞌotxꞌ.#Mt. 26:26-28; Mr. 14:22-24; Lc. 22:19-20. 17Exla qa ma nintz qbꞌaj, me noq tiꞌj jun Xjan Wabꞌj nqo waꞌne, ma qo ok te junchꞌin, a t-xmilil Crist. Tuꞌnpetziꞌn, at qmujbꞌil qibꞌ qxolx, quꞌn qkyaqilx nqo waꞌn tiꞌjjo Xjan Wabꞌj.

18Quꞌn kykaꞌyinktziꞌn kyiꞌj aj Israel. Ayeꞌ nxi kyqꞌoꞌn aluꞌmj te oyaj twutz Dios, at kyoklin tiꞌj tchibꞌjil, ex nchi kꞌulin te Dios, aj t-xi kychyoꞌnjo oyaj lo.#Lv. 7:6. 19Me nya tuꞌn lo nxi nqꞌmaꞌn qa at tipin jun twutzbꞌiyil ex qa a chibꞌj, a n-okx oyit twutzjo twutzbꞌiyil, nimxixtl toklin tzeꞌnku txqantl chibꞌj. 20Qalaꞌ, a wejiꞌy nxi nqꞌmaꞌn, qa ayeꞌ nya nimil, tzeꞌn nxi kyqꞌoꞌn tchibꞌjil aluꞌmj te oyaj kywutzjo kywutzbꞌiyil, te taqꞌnil tajaw il nxi kyqꞌoꞌne, ex nya te qMan Dios.#Deu. 32:17. 21Ex ntiꞌ qmujbꞌil qibꞌ tukꞌa qAjaw, qa axsa nqo kꞌwane tojxjo Xjan Wabꞌj, ex axsa tuꞌn qkꞌwan toj kykꞌwabꞌl taqꞌnil tajaw il. Ex ntiꞌ qmujbꞌil qibꞌ kyukꞌa tkyaqil nimil, a junx nchi waꞌn wabꞌj toj Xjan Wabꞌj, ex axsa tuꞌn qmujbꞌin te qibꞌ kyukꞌa xjal nchi waꞌn kywutzjo kywutzbꞌiyil taqꞌnil tajaw il. Nlay qo ok te kabꞌe tumil. 22Qa nqo labꞌte tuꞌn qxiꞌ tojjo kabꞌe tumil ikyjo, n-okx qyekin Dios tuꞌn ttzaj tqꞌoj qiꞌj.#Ex. 20:5; Deu. 32:21. Ex nlay miyet tqꞌoj, qa ma tzaj. ¿Ma attzinqe qipin tzeꞌnku te Dios?

Nimxixtl tajbꞌin tuꞌn tok qkꞌuꞌjlin qibꞌ tzeꞌnku tuꞌn tkubꞌ qbꞌinchin a qaj

23Twutzxix tzeꞌnku nqꞌumj, qa: Tzaqpiꞌnqo tuꞌn tkubꞌ qbꞌinchin noq alkyex qaj.#1Co. 6:12. Me te weꞌy, nya tkyaqil at tajbꞌin. Twutzxix tetz tzeꞌnku nkyqꞌmaꞌn, qa: Tzaqpiꞌnqo tuꞌn qbꞌinchin noq alkyex qaj. Me nya tkyaqil n-onin qiꞌj tuꞌn qchꞌiy toj qnimbꞌil. 24Quꞌn mix aꞌlx jun nimil njyoꞌn tuꞌn tel wen tuꞌnx tibꞌx, qalaꞌ noq tuꞌn tel wenjo txqantl.

25Bꞌaꞌn txi kychyoꞌnjiꞌy tkyaqil chibꞌj nkꞌayajtz toj kꞌaybꞌil chibꞌj, ex mi kubꞌ kybꞌisiꞌn, mo tuꞌn t-xi kyqaniꞌn, qa nej xkubꞌ bꞌyet kywutzjo twutzbꞌiyil. 26Quꞌn ntqꞌmaꞌn toj Tuꞌjil Tyol Dios kyjaluꞌn: Te qMan Dios tkyaqil txꞌotxꞌ ex jniꞌ at twutz.#Sal. 24:1; 50:12; 89:11.

27Atzin jaꞌlin, qa at jun nya nimil, nxi txkon kyeꞌy waꞌl tja; ex qa kyajtaqkuy tuꞌn kyxiꞌy, bꞌaꞌn tuꞌn kyxiꞌy, ex bꞌaꞌn tuꞌn kynikyꞌbꞌiꞌn tiꞌchaqx kubꞌ qꞌoꞌntz kywutza, ex nya wen tuꞌn tkubꞌ kybꞌisiꞌn, mo tuꞌn t-xi kyqaniꞌn, qa nej xkubꞌ bꞌyet twutz jun twutzbꞌiyil. 28Me qa ma tzaj qꞌmaꞌntz kyeꞌy, qa nej xkubꞌ bꞌyet twutzjo twutzbꞌiyil, nyapen wentz tuꞌn t-xi kychyoꞌn,#Ro. 14:13-18; 1Co. 8:7-13. 29tuꞌntzintla mi kubꞌ kybꞌinchiꞌn a nya wen tuꞌn tbꞌinchinte jun nimil toj twutzjo nya nimil, iꞌchaqxla ntiꞌ tkyꞌi twutz Dios.

Me qa ikyjo, aku bꞌant tuꞌn ttzaj tqanin weꞌy kyjaluꞌn: ¿Me tiquꞌn nyolbꞌiꞌn wiꞌja tiꞌj jun tiꞌ, a ntiꞌ tkyꞌi twutz Dios, exla qa at tkyꞌi twutz jun aꞌla? 30Quꞌn qa ma xi nqꞌoꞌn chjonte te Dios tiꞌjjo a nxi nchyoꞌn, ¿Tiquꞌntzin nyolbꞌin wiꞌja tuꞌn xi nchyoꞌn?

31Oꞌkxsin kxel nqꞌmaꞌnjiꞌy kyeꞌy, qa ma chi waꞌn, qa ma chi kꞌwaꞌn, mo qa tiꞌ juntl tiꞌ xkubꞌ kybꞌinchiꞌn, kybꞌinchinkuy te nimsbꞌil tbꞌi qMan Dios. 32Exla qa ntiꞌ tkyꞌi jun tiꞌ twutz Dios, me mi kubꞌ kybꞌinchiꞌn, tuꞌn mi yaje kyyekꞌbꞌil kyibꞌa tiꞌj kynimbꞌila kywutz Judiy ex nya Judiy ex kywutzjo txqantl nimil. 33Quꞌn te weꞌy, n-ok tilil wuꞌn tuꞌn tbꞌantjo a wen kywutz tkyaqilxjal. Ex nya tok ipbꞌil wuꞌn tuꞌn tbꞌantjo tzeꞌn waja te weꞌy, qalaꞌ kye txqantl, tuꞌntzin kyklet.

Currently Selected:

1 Aj Corint 10: mamC

Highlight

Copy