1 Aj Corint 1

Jun qꞌolbꞌil tuꞌn Pabl kye nimil toj tnam Corint

1Ayiꞌn Pabl, o chin txokliꞌy noq tuꞌn tajbꞌil qMan Dios, tuꞌn woka te jun tsanjil Klolqe Jesucrist. Nkubꞌ ntzꞌibꞌinjiꞌy uꞌj luꞌn junx tukꞌa qerman Sóstenes 2te kyeꞌy, ayiꞌy Ttanim Dios toj tnam Corint,#Kybꞌi. 18:1. ayiꞌy o chi el paꞌn tuꞌn Crist, a Jesús, tiꞌj tkyaqil nya bꞌaꞌn, ex o saqix kyanmiꞌn tuꞌn. Ex o chi oka te tajlal Ttanim Dios junx kyukꞌa txqantl toj tkyaqil twutz txꞌotxꞌ, ayeꞌ nimilqe tiꞌj tbꞌi Jesucrist, a tAjaw Tkyaqil, a kyAjaw ex qAjaw te jun majx.

3Noqit ax qMan Dios ex qAjaw Jesucrist tzaj qꞌonte t-xtalbꞌil ex tnukꞌbꞌil kyibꞌaja.

4Kukx nxi nqꞌoꞌnjiꞌy chjonte te Dios kyiꞌja, tuꞌn t-xtalbꞌil ma tzaj tqꞌoꞌn kyeꞌy, noq tuꞌn kymujbꞌil kyibꞌa tukꞌa Crist, a Jesús. 5Quꞌn noq tuꞌn, ma tzaj tqꞌoꞌn Dios tkyaqil qꞌinimil kyeꞌy toj kynimbꞌila, tzeꞌnku tuꞌn kyyola ex kyojtzqibꞌla. 6Atzin luꞌn jun yekꞌbꞌil qa ma kubꞌ kyniminjiꞌy Tbꞌanil Tqanil tiꞌj Crist, a xi qqꞌmaꞌn kyeꞌy. 7Tuꞌnpetziꞌn, ntiꞌl atx taj kyeꞌy, tuꞌn Xewbꞌaj Xjan, a ayiꞌy nchi ayoꞌn tulil qAjaw Jesucrist. 8Ex axte Dios kꞌwel waꞌbꞌin kyeꞌy jikyinxix wen toj kynimbꞌila te jun majx, tuꞌntzin mix aꞌl jun tzꞌokx ẍchꞌinte jun tiꞌ toj kywutza, aj tpon tqꞌijil tuꞌn tul qAjaw Jesucrist. 9Ex ate Dios kukx njapin bꞌaj Tyol tuꞌn, a xjaw skꞌoꞌn kyeꞌy, tuꞌn kymujbꞌin te kyibꞌa tukꞌa qAjaw Jesucrist, a Tkꞌwal.

Nya wen tuꞌn tbꞌaj qpaꞌn qibꞌ, awo nimilqo

10Ayiꞌy werman, nchin kubꞌsin nwutza kyeꞌy noq toj tbꞌi qAjaw Jesucrist, tuꞌn tkubꞌ kyxmoxin kyibꞌa, tuꞌn mi bꞌaj kypaꞌne kyibꞌa; qalaꞌ noqpe kyja tuꞌn tok kymujbꞌinxix kyibꞌa wen, tuꞌntzintla tten kynabꞌla junx, ex jun elnin kyyola. 11Quꞌn o nbꞌiꞌy jun tqanil kyiꞌja kyuꞌn jniꞌ tbꞌaj Kloé, qa at qꞌoj kyxola. 12Nya tiquꞌn nxi nqꞌmanjiꞌy luꞌn kyeꞌy, quꞌn tuꞌn noq tzeꞌnchaqku nkyqꞌmaꞌn. At junjun nqꞌmaꞌnte, qa te Pabl, junjun te Apolos,#Kybꞌi. 18:24-28. ex junjun te Pegr. Ex at junjun te Crist, chiꞌ.

13¿Ma ilaꞌtzin elnin Crist toj kywutza? ¿Ma ajinqintzin weꞌ ẍin jaw twutz cruz tuꞌn kypaja? ¿Ma tiꞌjtzin nbꞌiꞌy, i kuꞌxiꞌy toj aꞌ, te jawsbꞌil aꞌ? 14Chjontex qMan Dios, mix aꞌl jun kyeꞌ tkuꞌx toj aꞌ wuꞌn te jawsbꞌil aꞌ wuꞌn, qalaꞌ oꞌkx Crispo#Kybꞌi. 18:8. ex Gay.#Kybꞌi. 19:29; Ro. 16:23. 15Tuꞌnpetziꞌn, mix aꞌl juntl kyeꞌ aku qꞌmante qa tiꞌj nbꞌiꞌy ẍi kuxiy toj aꞌ. Quꞌn ex noqit ma chi kuxa wuꞌn toj aꞌ, nyatla tiꞌj nbꞌiꞌy xjawe wiꞌn, qalaꞌ tiꞌjxitla tbꞌi qMan Dios, ex Tkꞌwal, exsin Xewbꞌaj Xjan.

16Ex ma tzul julkꞌaj toj nkꞌuꞌja, qa tkyaqil tbꞌaj Estéfanas i kux nqꞌoꞌn toj aꞌ te jawsbꞌil aꞌ.#1Co. 16:15. Me mi naꞌn wuꞌn qa atx juntl. 17Quꞌn nya ma chin tzaj smaꞌn tuꞌn Crist noq tuꞌn kykuꞌx xjal toj aꞌ wuꞌn te jawsbꞌil aꞌ, qalaꞌ tuꞌn t-xi nqꞌmaꞌn Tbꞌanil Tqanil kolbꞌil. Tuꞌnpetziꞌn, mi ẍin yoliꞌn kyukꞌiy tukꞌa nmaq yol tbꞌanilx kywutzxjal, tzeꞌnku jun aj uꞌj, noq tuꞌn kyxi lipekuy wiꞌja, qalaꞌ tuꞌn kyxi lipey tiꞌjjo t-xilin nyola, a at tipin tuꞌn qklet, a tkyimlin Crist twutz cruz te qxel.

A Crist tipin ex tnabꞌl qMan Dios

18Quꞌn atzin Tbꞌanil Tqanil kolbꞌil, a xi nqꞌmaꞌn tiꞌjjo tkyimlin Crist twutz cruz, ntiꞌ tajbꞌin toj kywutzxjal, ayeꞌ kyja kyxiꞌ toj najin. Me atzin Tqanil luꞌn tipin Dios teꞌ te qe, awoꞌ nqo okx toj tbꞌeyil kolbꞌil, tuꞌn qklet tuꞌn.#Ro. 1:16. 19Tuꞌnpetziꞌn, ntqꞌmaꞌn toj Tuꞌjil Tyol Dios:

K-okil nyupiꞌn kynabꞌljo aj nabꞌl;

ex k-elil wiꞌjliꞌn kyojtzqibꞌljo aj uꞌjil.#Is. 29:14.

20¿Ma atzin tqꞌuqiljo twutzxix a kynabꞌl? ¿Ex ma attzin tumiljo aj uꞌjil exsin jniꞌ ẍtij tzaluꞌn twutz txꞌotxꞌ? Quꞌn axte qMan Dios ma tzꞌok najsinte kynabꞌljo xjal anetziꞌn.#Job 12:17; Is. 44:25. 21Quꞌn tbꞌanilxjo t-xilin qMan, quꞌn mi xtaqꞌ tuꞌn tel tnikyꞌtzajil kyuꞌnxjal noq tuꞌn kynabꞌl nimx tiꞌjjo te twutz txꞌotxꞌ. Qalatziꞌn nejxix xtaqꞌ kolbꞌil kye xjal, ayeꞌ i nimin tiꞌj Tyol, exla qa ntiꞌ tajbꞌin toj kywutz junjuntl. 22Quꞌn ayetzin kye Judiy nchi qanin tiꞌj jun techil tipin Dios, tuꞌn tyekꞌin qa twutzxixjo Tbꞌanil Tqanil. Ex ayetzin aj uꞌjil te Grecia, nchi jyoꞌn txqan tumil tbꞌanilx kywutz xjal. 23Me metzin qeꞌ, nqo yoliꞌn tiꞌj tkyimlin Crist twutz cruz. Me atzin toj kywutz Judiy nya wen n-ele, ex toj kywutzjo aj uꞌjil ntiꞌ tajbꞌin. 24Me atzin kyeꞌ, ayeꞌ o chi txokle, kyxoljo Judiy ex nya Judiyqe, ma tzꞌok Crist te t-xilin tipin ex t-xilin tnabꞌl qMan Dios. 25Tuꞌnpetziꞌn, a tzajnin te Dios, a ntiꞌ tajbꞌin kywutz xjal, nimxixtl toklin tzeꞌnku tkyaqil kynabꞌlxjal tzaluꞌn twutz txꞌotxꞌ. Ex atziꞌn a nyakuj ntiꞌ tipin kywutzxjal, nimxixtl teꞌ tipin tzeꞌnku tkyaqil kyipin xjal.

26Ayiꞌy erman, bꞌiꞌn kye kyuꞌn, qa ma chi txokliꞌy tuꞌn kyoka te Ttanim Dios, exla qa nya ilaꞌ aj uꞌjil kyxola, ex qa nya ilaꞌ at kyipin mo at kyoklin kywutzxjal. 27Quꞌn tuꞌnpetziꞌn, ma chi jaw skꞌoꞌn tuꞌn Dios, ayiꞌy nyakuj ntiꞌ kyajbꞌin toj kywutzxjal, tuꞌn kytzaj txꞌixweꞌ a at kynabꞌl toj kywutz; ex o chi jaw skꞌoꞌn tuꞌn Dios ayeꞌ ntiꞌ kyipin toj kywutzxjal, tuꞌn kytzaj txꞌixweꞌ a at kyipin toj kywutz. 28Me ayetziꞌn ntiꞌx chꞌin kyajbꞌin tzaluꞌn twutz txꞌotxꞌ, ayeꞌ nchi el kyiꞌjlinxjal, ex najnin iteꞌye toj kywutzxjal; me ma chi jaw tskꞌoꞌn Dios, tuꞌn tel yupitjo a attaq tajbꞌin toj kywutz, 29quꞌn tuꞌntzin mix aꞌl jun jaw tnimsin tibꞌ twutz Dios. 30Quꞌn noq tuꞌn, ma tzꞌok kymujbꞌin kyibꞌa tukꞌa Crist, a Jesús, ex ma tzꞌok Crist te kynabꞌla, ex noq tuꞌn, ma chi oka tzꞌaqle twutz qMan, ex ma chi el paꞌn tuꞌn, tuꞌn tsaqix kyanmiꞌn, ex ma chi kotpaja tuꞌn. 31Tuꞌnpetziꞌn, ntiꞌ tumil tuꞌn kynimsin kyibꞌa. Me tzeꞌnku ntqꞌmaꞌn toj Tuꞌjil Tyol Dios:

Qa at jun xjal taj tuꞌn tja tnimsin jun tiꞌ,

bꞌaꞌn tuꞌn tja tnimsin tbꞌi qAjaw.#Jer. 9:23-24.

Currently Selected:

1 Aj Corint 1: mamC

Highlight

Copy