Gewreyone 10
10
Jeji wakagraga ga wa chiwograga
1Gi rixanu Tokanchi Yokanatkaluruya gi wetpotutawalu psoluko kiglerkaka wa waneyapwu. Mayawle pixka wetyalu wa kamrutkalurkakatka. Gi wetawalu gi pixka rixpotuta. Giyagni waleko giylatkalurkaka pawalapumnunanuka mutuka genekjetkotu, gi pagogneko rumkata mmagatikane gixkakletna kayegikachine. 2Wane rixkamka ¿gi ge rutuka ganika genekashletmakna? Gi rixanu pakatapje powratkoklunmakna kyonogiklerune, gi wa kmukochirerune rumata getletinmakwana. 3Seyni tyekakaya pawalapumnunanuka rushinkapka mukochri. 4Gi rixanu jeji wakagraga ga wa chiwograga gi gimkata kaspukletlu mukochri.
Genekashlu giylatkalurni wa Gesomane
5Giyagni tyechijne rakanginitka Geso, wane china:
Genekashlu giylatkalurkaka
ga wa ganika genekashletkalurkaka
gi paluka.
Seyni manchi puglepokotyano.
6 Genekashlukaka psoluyako yochpiikalurupa
ga wa genekashlukaka mukochri chinanu,
gi puglereta.
7 Giyagni wane nchina, “Petanu. Gewno Gita.
Kirukamtapoyi nyonpiranyegitika,
Wa pushinikyawaka nkamrutinripa,
Goyakalu.”
8Wa rogwaka chinyawaka, “Genekashlu giylatkalurkaka ga wa ganika genekashletkalurkaka, ga wa genekashlukaka psoluyako yochpiikaluru, ga wa genekashlukaka mukochri chinanu, gi paluka. Gi koxa pugleretlu. Tyekaka Tokanchi Yokanatkaluru chinyawaka ganikjetkaluru.”
9Wanepnute wane china, “Petanu. Gewno Gita, wa pushinikyawaka nkamrutinripa.” Wa muchinanu genekashlukaka konatka, gepi chininri rutakyapa. 10Wane rixa gishinikletyawaka chinanu kpashirine gixkaakalunwu, Geso Kristomane pakatapje ganika genekashletkaluru chinanu.
Satupje ganika genekashlewlu giylatkaluru
11Ga wa pejnuruneko sasertotene pagognemnunanuka tunwa kamrurewlenata. Ga wa gixo kata rumepe ganiklejetluna walekotnaka giylatkalurkaka. Tyekaka gi gimkata konretlu mukochri. 12Seyni Geso pakatapje ganiklu giylatkalurupa mukochri chinanu. Wanekluyakawa Goyakalu potuklesretate tuplagognenatatka, 13wanepnute kagwakinripa kamnixjene gijixipta rapukote gitaakoklunpotunanuko. 14Gi rixanu satupje ganika genekashlewlu chinanu mmagatikane rixkakgognenatna wa kpashirine gitaakalune.
15Ga wa Giwekikaluru Kpashiri koxa gipgujtatwu. Gi rixanu wane chininitka:
16 “Tyenwa gipiratkaluru tokanchi
nupiryegityapna ruknoginpatka walegognekaka,”
china wa Gitsrukaachi:
“Rajiyna nenekinna Ntokanu Yokanatkaluru.
Ga wa ginshinikanna nyonatinna.
17 Ga wa mukochirna ga wa pnu rixlena
gi nushinkapinitkana.”
18Gi rixanu wa tyekaka kaspukikowaka, waneklu maleshatkalu ganika genekashlu mukochri chinanu.
Gerotu gatnugapo ga wa gatnugapo giwekachri
19Giyagni, nomolene, gi wa popiklerunekwu kpashiwaka wjigloka Gesograga chinanu, 20gerotu gatnugapoya ga wa gatnugapo giwekachriya. Walenwa wjigloka Wale kamrutanru gerotu wixa chinanu wa gimaletachrichrataya. Tyenwa Gesomane. 21Ga wa gi rixanu tsru potu sasertote Gitsrukatpotu waneywu wchinini Goyakalupji chinanu, wkayegikanru. 22Wkayegikanru potukgajirunepwu ga wa kgaponshinikanuklerunpotupwu walixlewle chinanu. Gitslaptaagajitkalunepwu Gesogragaya giklukanuwnanshinikanutnachinwa muglenchiya wma mixinitipa. Ga wa gerkamanetkalunepwu gonu powragaluyma. 23Poyegirunwu womkagi gipgujtaletlu wkagwakanrupirana. Gi rixanu poyagkakachrinwa gipiratachri. 24Wyanshinikanyegkakpotutanu, wkomyekanshinikankakinripa wushiniklewatinripa ga wa kigleru kamrurchi wkamrutinripa. 25Gi wa wkaspuka gapatjeretanu wa pimrine gixjetyawaka pixka. Ga wa wanepnute gixa gapatjeretanu ga wa giykokakanu wa geta kayegikgogneretinpatkalu, wa Gitsrukachigognepa.
Giklukanuwnayegjixlewlupa wa wixako wushinikanuya wmukochirewatinipa
26Gi rixanu wali yoptoretinitkalu wa galikakpotunanu tokanchi ga wa wumatinitkalu, wixako wushinikanuya wmukochirewatinipa, wanepnute gi wa rawatka genekashlu giylatkalurupa mukochri chinanu, 27seyni giklukanuwnayegjixlewlu kagwakikolu tsru pikluyma, ga wa xirnachri pixkalutu jgekanchi wa kamnixlewatachine kamakatachripa. 28Moysisi tokanu yokanatkaluru giknokachri gepi, mapa gipgujtatachine chinanu rupnanu metwamonutkotu. 29Giyagni ¿gi pixkalutunanukta salewakchi gkagwakyalu rumuknu retikolupa wa Goyakalu Wgene gektutetachri, ga wa Giwekikaluru gimutlewatachri geyikachri? Walenwa granchi gimuteru kagwakachri, wa gipiratkaluru tokanchi chinpiranyegitanru granchi. Walenwa kpashiri rutakjeru gipiratkaluru tokanchi. 30Gi rixanu wumatlu wa wane chinachri:
“Gitanni gapnuuchipa. Gita gapnurewatanu.”
Wanepnute wanechinatnaka:
“Gitsrukaachi gitakyagokanutkana rayinerutene.”
31Piikalurpotupni wa yineru gijrukini, wa Goyakalu giwekachrimyo rapokinri.
Wumkata kashnantaklegognenata walixgognenatinri
32Seyni gishinkapanru muchinanugognekaka, gepokamlatyegitkoklunu, wa gkashnantakgognenatyawaklu tsru yagotlu nsalewninrikakaya. 33Psoji wa gixa yangikolu ga wa pejnurune getanu nsaletikolu. Ga wa psoji waneko pixka pnumnu gixkoklunu gixa gimatanune. 34Gi rixanu gimata getwamonretna gostutkalune. Ga wa gimuwatachingi wane gixle getasha konretka. Gi rixanu gixa gimatlu wa wanepnute kigleru ga wa gwagognenatachrikaka waneygi.
35Giyagni gi giknokanru gaponshinikanrewle wa wale chinanu waneplu tsru gapnutikolu. 36Gi rixanu gixa gimkata kashnantaklegognenata. Wa Goyakalu gishinikanru gkamrutinpatka, gyoptotanru wa gipiratkaluru.
37 Gi rixanu pshinitsonuuji magatawa
Ga wa ginachripa gapokanu.
Gi wa ramganatanu.
38 Ga wa poyagkakachri Gitanu
giwekanu ralixleya chinanu.
Seyni wa yoxigikini
gi wa ruglenshinikanutanno.
39Seyni wixa gi wa yoxigikachinwu wamginripmaka, seyni galixachinwu waneya wixinripa wuwekinri.
Currently Selected:
Gewreyone 10: pib
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
