San Marcos 10
10
Jesús yachachin casaraskacunapaj
1Galileamanta llojsispataj Jesús rerka Judea jallp'aman Jordán mayu chimpanej jallp'asmanpis. Jakaypi purishajtintaj watejmanta may ashqha runa payman tantacamoj. Watejmanta paycunata yachachisharka costumbrenmanjina. 2Chanta fariseos Jesusman kayllamorkancu. Parlaskanpi pantachiyta munaspataj taporkancu:
—¿Camachiwaskanchejmanjina uj khari warminta wijch'upuyta atillanchu?
3Payrí paycunaman nerka:
—¿Imatataj Moisés camachisorkachej?
4Cuticherkancutaj:
—Moiseska kharita sakellarka warminta wijch'upuyta divorcio papelta jaywaspa, —nispa.
5Jesusrí paycunaman nerka:
—Moisés chayta camacherka kancuna Diospa quiquin camachiskanta mana casuyta munaskayquichejraycu, rumi sonkoyoj runas caspa. 6Kallariypi Dios tucuy imata ruwarka. Chaymantapacha kharita warmitapis churarka. 7Chayraycu khareka sakenan tiyan tatanta mamantapis warminwan ujchaska cananpaj. 8Iscaynincutaj ujchaska cankancu. Ajinaka manaña iscaychu cancu, manachayrí ujllaña. 9Chayraycu Diospa ujchaskanta runaka ama t'akachunchu, —nerka Jesús.
10Wasipiña cashaspa yachacojcunan ujtawan chay jawa Jesusta taporkancu. 11Paycunaman nerkataj:
—Pillapis warminmanta t'akanacuspa waj warmiwantaj casaracun chayka, warminpa contranpi khenchachacun. 12Sitajchus warmi kosanmanta t'akanacuspa waj khariwantaj casaracun chayka, khenchachacun, —nispa.
Jesús wawasta munacun
13Uj cuti wawitasnincuta Jesusman pusamusharkancu maquisninta churaspa paycunapaj Diosmanta mañaripunanpaj. Yachacojcunataj pusamojcunata c'amerkancu. 14Chayta ricuspa Jesús phiñacorka, yachacojcunanta nerkataj:
—Sakeychej wawitasta nokaman jamunancuta. Amañataj paycunata jarc'aychejchu. Dios paycunajinata munacuyninwan camachenka. 15Chekata niyquichej: Waquin runas wawitajina Diosta jap'incu Camachejnincupaj. Pillapis wawitajina mana jap'ejrí janaj pachaman#10.15 Literal: Diospa reinon. yaycuyta manapuni atinchu, —nerka Jesús.
16Paytaj wawitasta mark'aricuspa sapa ujman munacuywan maquisninta churarka, paycunapaj Diosmanta mañaripuspa.
Uj khapaj runamanta
17Jesús wasimanta llojsispa ñanpi cashajtinña uj runa correspa paypa ñaupakenpi konkoricorka. Taporkataj:
—C'acha. Yachachejníy ¿imatataj ruwanay tiyan wiñay causay chayaketa jap'inaypaj?
18Jesustaj payman nerka:
—Dioslla c'achaka. Chanta kanka ¿imaynapitaj noka c'acha caskayta niwanquirí? 19Yachanqui Diospa camachiskasninta: Ama khenchachacuychu; ama runata wañuchiychu; ama suwaychu; ama llullacuspa runamanta willaychu; ama pacaymanta runamanta imantapis khechuychu; tatayquita mamayquitapis casuy, —nispa.
20Runarí nerka:
—Yachachejníy, tucuy cay Diospa camachiskasninta wawamantapacha casorkani, —nispa.
21Jesustaj payta khawaycuspa munacorka. Paytataj nerka:
—Uj imallaña jarc'asunqui. Ripuy, tucuy capuyniyquita vendemuy, kolketataj wajcha runasman jaywaramuy. Ajinapi khapaj capuyniyqui janaj pachapi canka. Chanta nokawan jamuspa yachacojniy cay, —nerka Jesús.
22Chay niskanmantari runaj uyanka ujjinayarka. Mayta phuticuspataj riporka, may khapaj caskanraycu.
23Muyuyninta khawaspa Jesuska yachacojcunanman nerka:
—¡Khapaj runaska janaj pachaman#10.23 Literal: Diospa reinon. wiñay causayniyoj canancupajka ñac'ayta yaycuyta atenkancu! —nispa.
24Yachacojcunaka chay niskanmanta t'ucorkancu. Jesusrí ujtawan paycunata nerka:
—Wawasníy, khapaj capuynincupi sonkoncuta churajcunaka ñac'ayta janaj pachaman#10.24 Literal: Diospa reinon. yayconkancu. 25Jatun camello uywaraj astawan atinman yaycuyta agujaj ningrinman, khapaj runa janaj pachaman#10.25 Literal: Diospa reinon. yaycunanmantaka, —nispa.
26Mayta t'ucuspa yachacojcunapura tapunacusharkancu:
—Ajina cajtenka ¿pitaj janaj pachaman#10.26 Literal: Diospa reinon. yaycuyta atinmanrí?
27Jesusri paycunata allinta khawaycuspa nerka:
—Cayka runacunapaj mana aticunchu. Diospajrí aticun, Dioska tucuy atiyniyoj caskanraycu, —nispa.
28Chaymanta Pedro nerka:
—Khaway, nokaycu ari, tucuy imaycuta sakespa kanta khatishaycu, —nispa.
29Jesustaj cuticherka:
—Chekata niyquichej: Uj runa atinman sakeyta wasinta chayrí waukesninta chayrí panasninta chayrí mamanta chayrí tatanta chayrí wawasninta chayrí chajrasninta. Sichus cayta saken nokaraycu sumaj willanasraycupis chayka, 30cay p'unchaycunapi sakeskanmanta, pachaj cutis astawan cutichiska payman canka. Ajinaka wasisniyoj, waukesniyoj, panasniyoj, mamasniyoj, wawasniyoj, chajrasniyoj canka. Payri muchuchiskapis canka nokaraycu. Jakay jamoj p'unchaycunapirí wiñay causayniyojmin canka. 31Ashqha runas cay pacha imasraycu sumajpaj khawaska cajcunaka jakay p'unchaypi pisipaj khawaskas cankancu. Ashqha runas cunan p'unchaycunapi pisipaj khawaska cajcunarí, jatunpaj khawaskas cankancu, —nerka Jesús.
Jesús sut'inchan wañuyninmanta causarimuyninmantawan quinsa cajtaña
32Ashqha runas Jesuspis Jerusalenman ñanta risharkancu. Jesús ñaupajta rishajtin yachacojcunanka khepanta t'ucushaj khatisharkancu, ni imata paymanta yuyayta atispa. Wajcuna khaticushallarkancutaj, paycunapis manchachicuspa risharkancu. Ujtawantaj Jesús chunca iscayniyoj yachacojcunanta wajnejman pusarka. Chay jamoj p'unchaycunapi imachus paywan ruwacoj risharka, chayta paycunaman willarka:
33—Khawaychej, Jerusalenman rishanchej. Chaypimin noka, Diospa cachaska Runan, yupaychana-wasimanta curajcunaman israel yachachejcunamanpis jaywaska canay tiyan. Nokata wañunaypaj juchachawankancu, waj llajtayoj runasmantaj jaywaycuwankancu. 34Paycunaka nokata asipayawankancu. Nokaman thokaycuwankancu, jasut'iwankancu, wañuchiwankancutaj. Quinsa p'unchayninmantataj causarimpusaj, —nerka Jesús.
Jacobojtawan Juanpatawan mañacuskancu
35Chanta Zebedeoj wawasnin Jacobowan Juanwan Jesusman kayllaycorkancu. Nerkancutaj:
—Yachachejníy, munaycu ruwapunawaycuta imatachus mañacuskaycuta, —nispa.
36Jesustaj nerka:
—¿Imata ruwapusunayquichejtataj munanquichejrí?
37Paycunaka cuticherkancu:
—Atiyniyquiwan camachinayquipaj tiyaycuspa, kanwan cusca tiyaycuchiwaycu, ujniycuta paña ladoyquiman ujniycutataj llok'e ladoyquiman, —nispa.
38Jesusrí cuticherka:
—Kancunaka mana yachanquichejchu imatachus mañacushaskayquichejta. Manchayta ñac'arinay tiyan. Chayka uj copapijina junt'aña. ¿Chayta ujyayta atiwajchejchu nokajina? ¿Atiwajchejchu ñac'ariyman yaycuyta wañuycama nokajina?
39Paycunaka nerkancu:
—Arí, atiycu, —nispa.
Jesustaj paycunata nerka:
—Junt'a copata ujyanquichej nokajina. Wañuycama ñac'ariymantaj yaycunquichej nokajina. 40Astawanrí camachinaypaj tiyaycuspa, paña ladoyman chayrí llok'e ladoyman tiyaycuchinayka, mana nokamantachu. Manachayrí picunapajchá waquicherka, chaycunataka Dioslla tiyaycuchenka, —nispa.
41Chayta uyarispa chay waj chunca yachacojcunanka Jacobopaj Juanpajwan phiñacorkancu. 42Jesusri paycunata wajyaspa nerka:
—Yachanquichejjina llajtasta camachejcunaka runasta llaquichispa camachiskancuta. Callpayojcunapis atiynincumanjina tucuy imapi runaswan casuchicuncu. 43Kancuna uqhupeka mana ajinachu canka. Astawanrí kancunamanta pillapis atiyniyoj cayta munajka tucuy sonkowan yanapasojniyquichej canan tiyan. 44Kancunamanta pillapis curajpaj khawaska cayta munajka tucuyta casoj canan tiyan. 45Ajinallatataj noka, Diospa cachaska Runanpis, mana runas yanapanawancupajchu jamorkani. Manachayrí noka runasta yanapanaypaj jamorkani. Astawanpis paycuna wañunancumanta noka wañusaj juchancumanta cacharichinaypaj, —nerka Jesús.
Jesús thañichin ciego Bartimeota
46Jesús yachacojcunanwan Jericó llajtaman chayarkancu. Chaymanta ashqha runaswan llojsishajtincutaj, Timeoj wawan Bartimeo chay ñannejpi tiyacusharka. Payka ciego caskanraycu runasmanta mañacoj. 47Nazaret llajtayoj Jesús chaynejta rishaskanta uyarispataj khapariyta kallarerka:
—¡Jesús, Davidpa miraynin,#10.47 Literal: Wawan. qhuyacuway nokata! —nispa.
48Chay ashqha runastaj payta c'amisharkancu:
—¡Ch'in cay! —nispa.
Payri aswan sinch'ita khaparerka:
—¡Davidpa miraynin,#10.48 Literal: Wawan. qhuyacuway! —nispa.
49Jesusri chayta uyarispa sayarka, nerkataj:
—Payta wajyaychej, —nispa.
Chanta ciego runata wajyaspa nerkancu:
—¡Sonkochacuy, jataricuy! Kanta wajyashasunqui, —nispa.
50Payri ponchonta wijch'uricorka aswan uskhayta rinanpaj. Phinquirispataj Jesusman chimparka. 51Jesustaj payta taporka:
—¿Imatataj ruwasunayta munashanqui?
Ciegotaj cuticherka:
—¡Señorníy, ricuyta munani! —nispa.
52Jesusri payta nerka:
—Ripullayña. Diospi jap'icuskayquiraycu thañiskaña canqui, —nispa.
Chay quiquinpacha ciegoka ricuyta aterka. Ñantataj Jesusta khaticorka.
Currently Selected:
San Marcos 10: quh
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
