Doma 2

2. Nadquio isadaidbo iquec, quequin chiaid

(2.1—3.20)

Matsesën naid Nuquin Papan abimbo chuite

1Aden utsin icsambuen nabanaid chuisho tantiash: Adquid icsamboshë iquec ¿quequinda tantie? Adec: Utsibo icsambocquid nec, quebuedi mimbitsen aidon nacpadombuen icsambuen naic. 2Nuquin Papambien matsesën naidtedi tantiaquidquio icquin: Icsambuen naquido icsho mëyadtequid yacno nësecaquin abimbo chuiquin cuidendac, quequin nuquitedi tantiec. 3Utsibo isec: Icsambuen naquid nec, quebuedëmbi mimbitsen aidon nacpadombuembidi icsambuen nauaic. Adash: Nuquin Papan ubi cuidenquio iquec ¿quecta ique? Mibitsen Nuquin Papan cuidendac. 4Ambi uaido matses abitedishun icsambuen nasho isash uënësquio icquin aido bëdambuen iste bunquin icsambuen naquidobi Nuquin Papan baded cuidenquio iquec. Icsambuen nabuedi nëbi Nuquin Papa tantiate bunec: Ambi chiacpadec bëdambuec tabadte bunebi, quequin ma ambi icsambuen naid ënshun ubi tantiabennu, queshun Nuquin Papan matses baded cuidenquio iquec. Adquid icshobi Nuquin Papa tantiate bunenquio mibi iquec.

5Aden: Nuquin Papan Chiaid niac niacbuedëmbi ënta, caqui: Padi Umbi naiduidi naic bëdambo iquebi, queshun Nuquin Papa tantiate bunenquio icquin aidën chiaid niac niacquin icsambuenuidi naic mibi tabadec. Adquid icsho Nuquin Papan matsesën naidtedi chuibante uëshëmbi mimbi icsambuen naidtedi chuibanshun nëishënshun Nuquin Papan mibitedi cuidquiendac. 6Aden matsesën naidtedi tantiaquid icquin bëdambuen naquido abëdi tabadmequimbi icsambuen nabanquido cuidendac. 7Abi tantiec bëdambuec tabadsho issun mabi Nuquin Papan: Mibi bëdambo iquec, canu, quiash abëd tabadte bunec ambi chiacpadec bëdambuec tabadquid uënësacsho Nuquin Papan ënëdenquiocnoc abëdi tabadmendac. 8Icsambuen naquidoen Nuquin Papan Chiaid chiaqui tantiate bunenquio icquin abi bunaiduidi naic icsambuec tabadsho Nuquin Papan nëishënshun cumapenen cuidendac. 9Adoac icsambuec tabadquido abitedi mëyadec natiacuededec tabadec shubiquiendac. Aden ambi bëyuc tantiamiaid isadaidbobëta isadaidpembo Nuquin Papan cuidendac. 10Padnuen abi tantiec bëdambuec tabadquido Nuquin Papan naden chiendac: Mibi bëdambuec tabadoque. Ma adquid icsho utsibon: Bëdambocquid mibi nec, canu, queshun dacuëdenquiocnoc mibi bëdambo icmendac. Abia tantiamiaid isadaidbobëtan isadaidpembon bëdambuen nasho aden bëdambo icmendac. 11Abi tantiesabo icsho: Nëid umbi tantiaid nec. Nëid umbi tantiacmaid nec, quenquio icquin Nuquin Papan abitedimbo cumapenen cuidendac.#2.11 M.I.Ch. 10.17 isbanta.

Nuquin Papan Moises chuiquin dada uamiampid

12Ambi: Naden nata, quequin Moises chuiquin dada uamiampid tantiamiacmaido matses utsibo icsambuen naic tabadsho Nuquin Papan cuidendac. Isadaidbo Nuquin Papan: Naden nata, quequin Moises chuiquin dada uamiampid tantiashumbi aidën chiaid niac niaquec icsambuec tabadsho adembidi cuidendac. 13Ambi: Naden nata, quequin Moises chiampid tantiashumbi adombuen naisa bëdambuen istiapimbo icquimbic ambi chiacpadec tabadquid Nuquin Papan bëdambuen istsiash. 14Nuquin Papan: Naden nata, quequin chiampid tantiamiacmaidon matses utsibon bëdambuec tabadte ¿ada tantienquio iccuededpec? Ma aidon bëdambuec tabadte abentse abentsen: Naden nac icsambo iquec. Naden nac bëdambo iquec, quequin ambembi tantieyoc. Aden tantiaquin Nuquin Papan chiacpadombuen abentse abentsen bëdambuen naic Nuquin Papan Chiampid tantiashumbimbuen. 15Adec tabadquin: Bëdambuen naimbi, quequin ambibi: Naden nata, quequin Moisesën chiampid tantiaquimbimbuen nabanec. Adembidi: Icsambuen naic tabadquin: Icsambuen naombi, quequin adembidi ambibi tantiec. 16Nuquin Papan abitedimbo cuidte uëshëmbi aidën chiacpadombuen Esuquidistun matsesën otacquio tantiaidbëta ompodshon naidtedi tantiashun matses cuidendac. Aden umbi Chiaid Bëda chuibanquin chuibocpadombuen naindac.

Isadaidbon Moisesën chiampid tantiaid

17Tantia. Chuinu. Udiubo nebi, mibi quepec. Nuquin Papan: Naden nata, quequin chiaid cun tsusedpa Moises dada uamiampid tantiaquidquio nebi. Umbi tantiaid Nuquin Papa bëdamboshë iquec, mibi quepec. 18Nuquin Papan chiacpadombuen tantiembi, mibi quepec. Adembidi Nuquin Papan: Naden nata, quequin Moises dada uamiampid chuibanac mimbi bëdambuen nabante tantiec. 19Adembidi pashuacbimbuec tabadquidobëta inchëshën istiapimbo icquin tantiatiapimbocquido bëdambuen tantiamequin Nuquin Papan Chiaid chuibanquidquio nebi, mibi quepec. 20Chuisho tantiabi icquido nëbi tantiabentsëcquidobëta Nuquin Papan Chiaid chuibanquid nebi. Abitedimbo tantiaquid icquin Nuquin Papan: Naden nata, quequin Moises chiampid bëdambuen tantiaquin abimbo chuibanquidquio nebi, mibi quepec. 21Aden utsibo chuibanec: Nuquin Papan Chiaid niaquenda, quebuedëmbi ¿atotsi quequin aidën chiaid mimbi niacpe? Ampenda, quebuedëmbi ¿atotsi quequin mimbi ampepe? 22Utsin chido chudenda, quebuedëmbi ¿atotsi queshun utsin chido mimbi chudpe? Utsibon papa canun nacnenaid isash: Icsambo iquec, quebuedëmbi ¿atotsi quequin aid tantiate shubun puduedshun mimbi ampeshumpe? 23Nuquin Papan: Naden nata, quequin Moises dada uamiampid chuibanec bëdambocquid nebi, quebuedëmbi aidën chiaid niac niaquec: Nuquin Papa icsambocquid nec, utsibo camec mibi icsambuec tabadec.

24Aden nate chuiquin Nuquin Papan naden dada uamepampic: Mibitedi icsambuec tabadsho issun matses utsibo tantiesabon Nuquin Papa icsambuen chuishunec, quequin chuipampic.#2.24 Isa. 52.5 isbanta.

Nuquin Papa tantiaquidquio icte chiaid

25Tantia. Abimbo chuinu. Nuquin Papan: Naden nata, quequin Moises dada uamequin chiampicpadombuen isadaidbon shui dëbid dëtemebanec. Adoaid yec Ambi Chiaid niaquenquio yec bëdambuec tabadsho Nuquin Papan bëdambuen istsiash. Padnuen isadaidbo utsibon Ambi Chiaid niac niacsho Nuquin Papan bëdambuen istiapimbo iquec shui dëbid dëtemesabimbuecnuc.#2.25 Ene. 17 isbanta. 26Padnuen matses utsibo shui dëbid dëtiacmaidobi Nuquin Papan Moises chiampicpadec bëdambuec tabadsho Nuquin Papan bëdambuen istsiash shui dëbid dëtemiaidobimbuecnuc. 27Adec matses utsibo shui dëbid dëtiacmaido Nuquin Papan chiacpadec bëdambuec tabadnubi Nuquin Papan: Naden nata, quequin Moises dada uamiampid isban isbanshumbi shui dëbid dëtemiaidombi isadaidbon aidën chiaid niac niacpec. Adsho issun: Aido icsambo iquec, caindac utsibon. 28Isadaidbo nebi, quiash ismeteuidi bunquid yec ¿Nuquin Papa tantiaquidomboda nedic? Adecbidi shui dëbid dëtemequido icquimbi ¿icsambuen naquido bëdambo icmequidoda nedic? 29Isadaidbo nebi, queshun shui dëbid dëtemequido yec bëdambuec tabadquin Nuquin Papa tantiaquidombo nec. Adquid icquin Moisesën chiampicpadombuenuidi nainquio yec Nuquin Papan Mayan Bëdan tantiamiacpadec bëdambuec tabadec. Adec tabadsho: Adquid bëdambo iquec, matsesën cainquio icnubi Nuquin Papan: Bëdambo iquec, caindac.#2.29 M.I.Ch. 10.16 isbanta.

Currently Selected:

Doma 2: mcfNT

Highlight

Copy