Ducas 8

Chidobo Esus nashunquido chiaid

1Adshumbic Esusën shubu daëdpactsëcquidbëd shubu dadpen icquid yacno yacnombuec capucuennequin: Nuquin Papan namiacno tabadte iquec, quequin Chiaid Bëda chuibennepanëdash. Aden chuibennec capunuc abëd icquido 12ted adecbidi Esusbëd nidpanëdash. 2Adecbidi tsibananec chidobo nidpanëdash. Ambi podobitsi icsa dapuduenmiaidobëtan ambi nënsho bëdanmiaidon Esus tsibanampanëdash. Aden Madia Macdadena cuënaidën#8.2 Shubu dadpen icquid Macdada caid yacnouësh choquid nec, quequin Madia Macdadena cuëmpanëdash. Esus tsibanampanëdash. Aidi podobitsi icsa 7ted dapuduedaid icsho Esusën dapuduenmebued nepanëdash. 3Abëd nidquid utsi Uana icpanëdash. Aidën bënë Cusa cuëmëdquid chuiquid tapa Edodes Antipas aton chuiquid icsho aid dadpen nashunquid icpanëdash. Abëd nidquid utsibic Susana icpanëdash. Adecbidi chido utsibo dadpen atona dadpen icnuc Esus nashunquin menedednepanëdash.

Utsi chiacbimbuen pete ëshë secaid chiaid

(Mat. 13.1-9; Madc. 4.1-9)

4Aden chuibenniash tabadtuidtsëcnubi shubu dadpen icquid utsi utsiec yacnouësh Esus isec matses dadpen chochopanëdash. Adec chochoacsho issun utsi chiacbimbuen Esusën naden chuibampanëdash: 5Tied icbo pete ëshë secaic aton tied yacno nidposh. Adec nidshun pete ëshë secac maisec utsi utsiec podquied nantan paëdacsho matsesën tintincanubi utsi dadpen uicchunën cheposh. 6Utsibic cuënote dadpen samëdacno paëdaid badedquio dëyucuidtsashi acte nibëdnuc bidiquec uënësposh. 7Utsibic nisanquid dadpen yacno paëdash aidbëdi dëyucash canidotsëcshobi nisanquidën bëtinac canitiapimbo yec uënësposh. 8Utsibic nidaid bëdambo yacno paëdaid dëyucash caniash dadpen bacuëash 100ted ëshë icquid icposh, quepanëdash Esus.

Aden chuibanashic cumapenec cuëdec: Pabiate shëcuë choquidën Umbi Chiaid bëdambuen tantiata, quepanëdash Esus.

Utsi chiacbimbuen dadpen chuibanaid

(Mat. 13.10-17; Madc. 4.10-12)

9Adoaquien: ¿Atotsi tantiamenuen utsi chiacbimbuen chuibanquin nao? Tantianu. Ubitedi chui, capanëdash abëd icquidon.

10Adoaquien: Matses tantiamenquio icnëdaidi nëbi: Nuquin Papan namiacno tabadte iquec, quequin mibitedictsëqui tantiamembi. Utsiboembi utsi chiacbimbuen chuibanendac. Aden chiac:

Ëshën bëdambuen isquimbi ma isenquiocpanuna.

Adembidi tantiaten bëdambuen tantiaquimbi ma abimbo chiaid tantienquio icuapanuna,

quepanëdash Esus.#8.10 Isa. 6.9-10 tantiaquin nëid dada uapanëdash.

Pete ëshë secaid cuembo chiaid

(Mat. 13.18-23; Madc. 4.13-20)

11Aden chiashic: Umbi utsi chiacbimbuen chuibambued nad iqueque. Tantia. Chuinu. Tied icbon pete ëshë secaidbimbuecquid Nuquin Papan Chiaid nec. 12Secac podquied nantan paëdaidbimbuecquid nad iquec. Nuquin Papan Chiaid tantiashumbi bëdambuen tantienquiocsho Mayan Icsa Satanasën: Nuquin Papa tantiabenash aid yacno tabadnushe, queshun tantiamenquio icquin badedi bëshunmendac. 13Pete ëshë utsi cuënote dadpen samëdacno paëdaidbimbuecquid nad iquec. Nuquin Papan Chiaid chuibansho tantiash: Tantiabenombi, quiash cuishonquendac. Adbuedi aton tapun nibëdquio yacbimbuec chieshtomiantequid utsi utsiec icnuc bëdambuen tantienquio icquin Nuquin Papa tantienquio yanendac. 14Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi natiaquin tantiaiduidi tantiec chieshtoendac. Utsibic ambi bedteuidi tantiaquin nabanquin chieshtoshon tantienquio yanendac. Utsibic abi bunaidtedi nate bunquin tantienquio yanuaindac. Adquidon Nuquin Papan Chiaid tantiesa yanshun bëdambuec tabadaid ismesa yanendac. Adquid nisanquidën bëtinac bacuëtiapimbo yacbimbuecquido nendac. 15Pete ëshë utsi nidaid bëdambo yacno paëdaidbimbuecquid nad iquec. Nuquin Papan Chiaid chuibansho tantiaquioshon ambi tantiabued bëshunenquio icquin tantiadonec bëdambuec tabadquin utsi tantiamequin chuibanquidquio nendac. Adquid natiamiantequid chonoc chieshtoenquio icquin utsibo ënenquio icquin chuibanendac. Adquidën chuibanac ubi tantiaquid dadpenquio yanendac, quepanëdash Esus abëd icquido chiec.

Utsi chiacbimbuen tabote chiaid

(Madc. 4.21-25)

16Aden chuishumbic Esusën utsi chiacbimbuen naden chuiuapanëdash: Tabote taboshon matsun bëtashesa nec. Adembidi uete tëdion tabote nanesa icbo nec. Ma umbi iuedaidon isnu, queshun tabote taboshon nënantanquio abuc dectanquid. 17Utsibo tantiamenquio icquin ompodshon nabanaidtedi tantiadanendac. Adembidi utsibo tantiamenquio icquin nabanaidtedi chiadanendac. Adembidi utsibo ismenquio icquin nabanaidtedi sebadënquio tantiadanendac.

18Adquid icnuc Umbi Chiaid bëdambuen tantiaquiota. Nuquin Papa tantiate bunquidën ubi tantiabensho bëdambuen tantiamendambi. Nuquin Papa tantiauidtsëcquidën umbi utsi chiacbimbuen chiac tantienquio icsho tantiamenquio iquendambi, quepanëdash Esus.#Mat. 13.12; 25.29; Duc. 19.26.

Esusën utsibo aton titabëd choaid

(Mat. 12.46-50; Madc. 3.31-35)

19Adashic Esus isnuec aton titabëd aton utsibo chopanëdash. Adec chochoash matses dadpen icnuc Esus anoentsëc chotiapimbo icpanëdash. 20Adnubi utsin: Titabëd min utsibo chochoshon mibi isnuen umanucshun cainec, quequin Esus chuipanëdash.

21Adoaquien: Nuquin Papan Chiaid tantiashun aidën chiacpaden nabanec tabadquid icsho dada cun utsi catanquimbi chido cun ta caimbi, quepanëdash Esus.

Acte cumapenec bocquequid ënëdmiaid

(Mat. 8.23-27; Madc. 4.35-41)

22Uëshë utsimbi: Chian potec ëquëmatsiuc nidnu nid, quianec abëd icquidobëd cano antabëdtoanec puduanec nidpanëdash. 23Adec nidnubi cano anuec Esus ushtopanëdash. Adec ushnubien cunquequid tapa cumapenec cunquec acte bocquequidën acte ancushadec cano mentoadtiadtsëcquio yampanëdash. 24Adsho isash dacuëdquin Esus ushec uesho tinec: Icbo, Icbo, nuqui mentoadeque. Isucun, quequin cuëmbededpanëdash abëd icquidon. Adsho tantiash isucunec nidtoshon: Mibi cumapenec cunqueque. Ënëd, Esusën cac cunquequid badedquio ënëdpanëdash. Adembidi: Mibi cumapenec bocqueque. Ënëd, Esusën cac badedquio acte bocquequid ënëduapanëdash. 25Aden ënëdmetanec: ¿Atotsi quiash ubi tantienquio yec dacuëdcuededo? Esusën caquien abëd icquido tantiadempambo yec dacuëdcuededquiequi: ¿Mitsipadquidquio nëid nepec? Cunquequidbëta acte bocquequid: Ënëd, cacpadequi ma ënëdpaboc, quec abëd icquido onquecuededpanëdash.

Nidaid Quedasa yacnoshon podobitsi icsa dadpen dapuduedaid dapuduenmiaid

(Mat. 8.28-34; Madc. 5.1-20)

26Adec acte bocquec ënëdan nidec chian ëquëmatsiuc potec nidaid Quedasa caid yacno Esus nidpanëdash abëd icquidobëd. Aid yacnoshon isac utsiuc nidaid Cadidea icpanëdash. 27Ambo nidash pudundosho isash podobitsi icsa dadpen dapuduedaid dada Esus bëquedec chopanëdash. Aidi shubu dadpen yacno iccondaidi uanno uënësaid chococate cuënote shëcuën tsadcuennequid yec dashcute dasiuidenquio icpanëdash. 28Aidi Esus bëquedec choec Esusën taëno dannëshën tinquebudash cumapenec cuëdec: ¿Atotsi ubi canuec ne? Esus. Nadatiambocquid Nuquin Papan Madombo mibi neque. Ubi mëyanenda, quequin aid dadan chuipanëdash podobitsi icsan oncamiac. 29Adec onqueshobi podobitsi icsa chuiquin Esusën: Dapuduen, capanëdash. Aid dada podobitsi icsa dapuduedshun namiac nad icpanëdash. Shocosh bucun abi mëtaniaidbëtabi abi tataniaid tëstenniacsho podobitsi icsan shubu nibëdacno buanaid aid dada nepanëdash.

30Adquid nec, quequin tantiaquin Esusën: ¿Tsutsi cuëmëdquid ne? capanëdash.

Adoaquien: Dadpenquioshë dapuduedaid yec Dequion#8.30 Dequion quequin 5midtedi capanëdash. nebi, quepanëdash podobitsi icsa dapuduedaido onquec. 31Adashic: Mibi nadatiambocquid neque. Mëyadmequin ënenquio icquin cuidtequid yacno ubitedi nidmenda, quiashic 32chanchu dadpenquio macuësh yacno pec tabadsho isash: Ubitedi chanchu dapuduedtiadquio iquebique. Ubitedi dapuduedme, quepanëdash podobitsi icsabo Esus caic.

Adoaquien: Ai, chanchu dapuduedcuededec nid, Esusën caquien 33matsesën dadanouësh dapuduenequi icbo icboec chanchu dapuduedash niquianec abucquio quiusudacnouësh chian nëpaëdbudnec mentoadbudnepanëdash nibëdquio yec.

34Adsho istanec chanchu pemequin isquido titinquianec nidannepanëdash. Adec nidshun shubu dadpen icquid yacno tabadquidobëta uanno uannoec tabadquido ambi isbued chuipanëdash. 35Adoac ambocquido: Istannu, quianec Esus yacno chochopanëdash. Adec chochoshon podobitsi icsa dapuduenmequin bëdanmiaid dashcute dasiuidash bëdambuen tantiabenash Esusën dayun tsadec onquesho istuidpanëdash. Adsho isash: Uinsadpambo iquec, quiash dacuëdcuededpanëdash. 36Adnubien podobitsi icsa dapuduenmequin bëdanmesho isbuedon ambi isbued dacuëdquido chuipanëdash. 37Aden chiac nidaid cuëshë Quedasa yacnocquido natiambo dacuëdcuededquimbi: Nëmbo iquenquio yec nidec nid, cabededpanëdash chochobuedon Esus chuiquin. Adoac Esus abëd icquidobëd aucbidi budec cano dapa antabëdtoanec nidpanëdash.

38Adsho isash: Mibëd nidte bunebique. ¿Ada ubi buantsia? quepanëdash ambi podobitsi icsa dadpen dapuduenmequin bëdanmebued Esus caic. Adoaquien:

39Padi. Min shubuno nidec nid. Ambo nidshun Nuquin Papan mibi nashunquin podobitsi icsa dadpen dapuduenmequin bëdanmebued ambocquido chuibanta, quianec Esus canon nidpanëdash. Aid nidnubien podobitsi icsa dapuduenmequin Esusën bëdanmebued aton shubu yacno nidshun ambo icquidotedi chuibennepanëdash.

Chido bëdanmiaid chiaidbëta champi uincuenmiaid chiaid

(Mat. 9.18-26; Madc. 5.21-43)

40Adashic chian ëquëmatsiuc potiash Esus padpidec chosho isash: Mibi isec cuishonquebi, quepanëdash abi cainquidotedi. 41,42Adnubien Nuquin Papan Chiaid chuibante shubun tabadquido isquin namequid Aido cuëmëdquid choash Esusën taëno dannëshën tinquebudec nidaidën bëccuësquebudash: Cun champi abentsëc icquidi uënëstiadtsëcquo iccosh. Aidi aton seta 12ted icquid niosh. ¿Ada aid isnuec cun shubuno nidtsia? quepanëdash Aido cuëmëdquid.

Aden chiac: Ai, quianec aidbëd Esus nidnubien chochoquido dadpen tsucus tsucustsëcquio yec Esusbëd nidpanëdash. 43Adnubien chido seta 12ted matanmec intac mëyanec nacchoadec bëdanenquiocquid chopanëdash. Aidi dauëchoquid aton piucquid uesquin menianniaqui bëdanmenquio icpanëdash. 44Adquid yec: Bëdanmianquidën ubi bëdanmetsiash, quianec Esus ismenquio yec cachoc choshon aidën dashcute bëntsecquid cuëma mishnubi aton intac badedquio bëdampanëdash.

45Aden mishac: ¿Tsuntsimbini mishosh? quepanëdash Esus. Aden chuisho tantiash abi datsidadquido mishambo yec otacquio tabadcuededpanëdash. Adec tabadnubien Petedon: Matses dadpenshun tsucus tsucustsëcquiocquin ma mibi cuëscabededpayoc, Icbo, capanëdash.

46Adoaquien: Matses abentsëcshun ubi mishosh. Umbi nadatiambocquin nabued iquec, quepanëdash Esus.

47Adsho tantiashien chido: Nëidën umbi nabued ambibi tantiaquin ubi isec, quec abibi onquequi dacuëdec uëdëquequi Esusën taëno dannëshën tinquebudpanëdash. Adec tinquebudshun datsidadquidon tantianubi: Intac bëdannu, quequin min dashcute bëntsecquid mishequi badedquio bëdanobi, quepanëdash Esus chiec.

48Adoaquien: Mimbi tantiacpadquiequi mibi bëdanaque. Dacuëdenquio yec bëdambuec tabadec nid, champi, capanëdash Esusën.

49Aden chiec abi Esus onquenubien Nuquin Papan Chiaid chuibante shubun icquidon chuiquid tapa Aido cuëmëdquidën shubun icquid choshon: Min champi uënësoshe. Chuibanquidi ancabudenda, quequin chuituidpanëdash.

50Aden chuisho tantiashun Esusën: Dacuëdenquio icquin ubi tantiata. Aden mimbi tantiacpadquiequi min champi bëdanendac, capanëdash Aido cuëmëdquid chuiquin.

51Aden chianec Aido cuëmëdquidën shubuno nidash chochoquidotedi caic: Ubëd puduedenda, quequin chianec Petedo yec Uan yec Santiaco yec aton papa yec aton tita yec quec champi uiacno Esus puduedpanëdash. 52Ambo Esus puduednubi ambo icquido uënësquio yec shubiec sedenquesho tantiashun: Mibi shubieque. Ënëd. Champi uënësenquio yec ushash neque, capanëdash Esusën.

53Adsho tantiashun: Ma champi uënësquiopacboc, quequin tantiaquin Esus mamënshumbededpanëdash. 54Aden mamënshunaqui Esusën champi mëdinquin: Nidto, champi, cumapenen cac 55uincuenec badedquio nidtopanëdash. Adec nidtosho isash: Champi peme, quepanëdash Esus. 56Adosho isash tantiadempambo yec aton titabëd aton papa tabadpanëdash.

Adsho: Mimbi isbued utsibo chuibanenda, capanëdash Esusën.

Currently Selected:

Ducas 8: mcfNT

Highlight

Copy