Ducas 4

Icsambuen namete bunquin Mayan Icsan Esus tanaid

(Mat. 4.1-11; Madc. 1.12-13)

1Aden Uanën acten mentoac Nuquin Papan Mayan Bëdabëd iquec acte Odan caid yacnouësh pudundoshobi Nuquin Papan Mayanën shubu nibëdacnombo Esus buampanëdash. 2Ambobi 39tedec ushec tsadpanëdash. Aidtedi ushquin penquio yec cumapenec bundoacsho issun Mayan Icsa Satanasën icsambuen namenuen Esus istuidpanëdash.

3Aden istuidshun Mayan Icsa Satanasën nadopanëdash: Nuquin Papan madombo icquin nëid cuënotebi: Pete icta, cata, capanëdash Esus chuiquin.

4Adoaquien Esusën: Nuquin Papan chuiquin dada uamiampid nad iquec: Peteuidi pec matses bëdambuec tabadtiapimbo iquec, quepanëdash Esus.#4.4 M.I.Ch. 8.3 tantiaquin nëid Esusën chuipanëdash.

5Adoshombic Mayan Icsa Satanasën macuësh abucquiocquid yacno buanshun nidaid abitedi ismequin nidaid utsi utsiec yacnocquidon chuiquid tapabobëta badedquio ismepanëdash. 6Aden ismec: Nëidtedishun icbo icmiaidquio nebi. Abitedi cuna nec. Umbi tantiacpadombuen utsi menetsiambi. Umbi meniac aidtedishun chuiquid tapa mibi icnuc aidtedi mitsana iquendac. 7Adquid icnuen ubi dannëshën sebudquin ismequin: Cun icbo mibi nec, ubi casho mibi aidtedi menembi, quepanëdash Mayan Icsa Satanas Esus chiec. 8Adoaquien Esusën: Nuquin Papan chuiquin naden dada uamiampid iquec: Nuquin Papauidtsëqui tantiaquin ismequin dannëshën sebudshun aidën chiacpadombuenuidi nabanta, quequin chiampid iquec, quepanëdash Mayan Icsa Satanas chiec.#4.8 M.I.Ch. 6.13 tantiaquin nëid chuipanëdash Esusën.

9Adsho tantiashumbien shubu dadpen icquid Edusaden yacno buanshun Nuquin Papa tabadte shubu dapa abucquiocquid macano Mayan Icsa Satanasën Esus manidtomepanëdash. Aden manidtomiash: Nuquin Papan madombo nebique. Ismenu, quec nëuëshquiobi pudunta. 10Naden Nuquin Papan chuiquin dada uamiampid iquec:

Pudunsho issun: Uidënuaquin bëdambuen dayun uata, quequin Nuquin Papan abëd icquido chomendac.#4.10 Chotaquën onqueten Cuëd. 91.11-12 isbanta.

11Adoac aidon: Cuënote tincaic tadquëdnushe, queshun uidënuaquin mibi bëdambuen budmendac,

quequin chiampid iqueque. Pudunta, capanëdash Mayan Icsa Satanasën.

12Adoaquien Esusën: Padi. Nadembidi Nuquin Papan chuiquin dada uamiampid iquec: Icsambuen tantiaquimbi Min Icbombo Nuquin Papa: Tannu, quequin cuidmenda, quequin chuipampic, quepanëdash.#4.12 M.I.Ch. 6.16 tantiaquin nëid Esusën chuipanëdash.

13Aden chiaquien Mayan Icsa Satanasën Esus icsambuen namenuen tanquin natequid utsi nibëdnuc niampanëdash. Aden nianec: Iuecshun padpidembuen icsambuen namequin tannun nanu, quequin ambibi tantianec Esus nianec Mayan Icsa Satanas cuempanëdash.

III. CADIDEA YACNOSHON ESUSËN NABANAID

(4.14—9.50)

Nidaid Cadidea yacnoshon Esusën tauaquin naid

(Mat. 4.12-17; Madc. 1.14-15)

14Adashic Nuquin Papan Mayanën nadatiambocquin tantiamiaidquio yec nidaid Cadidea yacno Esus chopanëdash. Adec chouacsho issun: Nuquin Papan Mayan Bëdan tantiamiaidquio nec, quequin abi isquidon chiac dadpenshun tantiapanëdash. 15Adshumbic Nuquin Papan Chiaid chuibante shubu utsin utsinquiec puduedcuennequin Nuquin Papan Chiaid Esusën chuibampanëdash. Aden chuibansho tantiash: Nuquin Papan Chiaid tantiaquidquio nec, quequin Esus tantiabededpanëdash.

Nasaded yacnoshon Esusën nabanquin tauaid

(Mat. 13.53-58; Madc. 6.1-6)

16Adashic abi caninëdacno shubu daëdpactsëcquid Nasaded yacno Esus niduapanëdash. Ambo nidash chonoadtemaid uëshën Nuquin Papan Chiaid chuibante shubu yacno abi puduedtedniacpadequi puduedash Nuquin Papan Chiaid isec onquenush nidtopanëdash. 17Adec nidtosho issun Nuquin Papan oncamiampid Isayasën dada uampid ambo icquidën Esus menepanëdash. Aden aid meniac sananquin seccuduabanquin isbanec nadec Esus onquepanëdash:

18Nuquin Icbon Mayanën namiaidquio nebi.

Aidëmbi: Nuquin Papana nec, caidquio nebi.

Aidën: Atona nibëdquido Chiaid Bëda chuibanta, caidquio nebi.

Quënën tsadunaido ambi icsambuen naid ënmenuen chuibanta, caidquio nebi. Bëshuaid bëdanmeta, caidquiobidi nebi. Aidëmbidi: Mayan Icsa Satanasën iuaid icsho Nuquin Papan iua icmenu, quequin chuibanta, caidquio nebi.

19Aidën: Nuquin Icbon bëdambuen iste chuibanta, caidquiobidi nebi,#Isa. 61.1-2. quequin chiampid Esusën chuibampanëdash.

20Aden isec onquequin nainshun dada uaid bidicashun ambo nashunquid meniash Esus tsadtopanëdash. Adec tsadsho ambo icquidtedishun bëisbededquiopanëdash. 21Aden isec tabadsho isash: Nuquin Papan chuiquin dada uamiampid umbi chuibansho mibitedishun tantiabuedën nëbimbobi nabanquin bedambued mimbi tantioc, quepanëdash Esus.

22Adoaquien: Bëdambuen tantiaquin chuibanquid nec. ¿Mitsipadombuen tantiaquin chuibanec nepeba? quecuededpanëdash. Adec onquec tantiadempambo yec tabadec: ¿Nëmbo tabadquid Osen madopenquioda Esus nedic? quecuededpanëdash.

23Adoaquien: Bëdanmequid iquec abibi daicsambo yanash bëdanmiadacsho isash: Bëdanmequidquio nec, quequin chiampid mibitedishun tantiapec. Umbi Capednaun yacnoshon nabambued tantiashun: Nëshunquiotsen adombuembidi nabantsiash, ¿quequinda mibitedishun tantie? 24Tantia. Abimbo chuinu. Nuquin Papan oncamiaidën abi caniacnoshon chuibansho aton matsesëmbi tantiashunenquio iquendac, quequin chuipampic, quepanëdash Esus. 25Ëndenquimboshë adombuembidi Nuquin Papan oncamiaid Edias cuëmëdquidën chuibansho tantiesabo icpampic. Aid icnubien nidaid Isadaid caid yacno niante chidobo dadpen icpampic. Aido icnubien seta 3ted matanmetanec seta utsi choaid poctse cuësquec ue sequenquiocquidën aton pete nibëdquio yannuc bunec tabadpampic. 26Adec bunec tabadsho issun: Isadaidbo niante nashunec nidta, quenquio icquin Nuquin Papan: Isadaidpembo chido niante yacno nidta, cac Edias nidshun ambi chiacpadombuen nashumpampic. Aid chido shubu dadpen icquid Sadepeta caid yacno icpampic. Sadepeta shubu dadpen icquid Sidon anoentsëqui icpampic.#4.25-26 Aid niante nashunampid istiadquio icquin Ch.D.1. 17.8-16 isbanta. 27Adecbidi nidaid Isadaid yacno aton dada daush daushpambo yec daicsaidquio dadpen icpampic. Adquido icnubien Nuquin Papan oncamiaidquio utsi Ediseo icpampic. Aidëmbi isadaidbo adec daicsaido bëdanmenquio icquin isadaidpembo abentsëc Naman cuëmëdquid nidaid Sidia yacnouësh choquid Ediseon bëdanmepampic, quepanëdash Esus.#4.27 Aid chiaid istiadquiocquin Ch.D.2. 5.1-14 isbanta.

28Aden Esusën isadaidpembo nashunampid chuisho tantiash iccuededquidotedi cumapenec nëishquiopanëdash.#4.28 Isadaidpembobëd isadaidbo ictiapimbo iquec, quec iccuededquido nëishpanëdash. 29Adec nëishshun shubu tsicatiaid yacnouësh puduenanec shubu ënëdacno nidshun: Macuësh abucquio quiusudacnoshon Esus nebudnu, quequin buampanëdash. 30Aden buannu, caquien matses dadpen nidquid natsustanec Esus cuempanëdash.

Dada podobitsi icsa dapuduedaid Esusën dapuduenmiaid

(Madc. 1.21-28)

31Adashic nidaid cuëshë Cadidea yacno nidec shubu dadpen icquid Capednaun yacno Esus chopanëdash. Ambo choshon chonoadtemaid uëshën uëshënquien Nuquin Papan Chiaid chuibante shubun puduedshun chuibampanëdash. 32Aden chuibansho tantiash tantiadempambo yec tabadec: ¿Mitsipadombuen tantiabenshun adombuen chuibanquin napec? Ma tantiaquidënquio chuibanacpadombuen Esusën chuibampayoc, quecuededpanëdash.

33Aden Esusën chuibansho tantiec tabadnubien dada podobitsi icsa dapuduedaid abi tsadacnouëshi cumapenec cuëdec: 34Nasaded yacnocquid Esus caid ¿atotsi quec nëmbo cho? ¿Ubipadquidtedi nibëdquio icmenuecta cho? Umbi isaidquio mibi nec. Nuquin Papan Mado Icsaisambo mibi nec, caquien 35Esusën: Cuëdenquio yec ënëdta. Adash dapuduen, cac abi dapuduedaid podobitsi icsan bëcunniac nidaidën uebudsho isec tabadcuedednubi aid icsa uainquio yec dapuduempanëdash.

36Adosho isash tantiadempambo yec tabadcuededec: ¿Mitsi padquid nëid dada nepec? Chuiquid tapan chiacbimbuen nadatiambocquin chuiquin: Dapuduen, cacpadquiequi ma podobitsi icsa dapuduempayoc, quec onquecuededpanëdash.

37Aden: Esusën podobitsi icsa dapuduenmesho isquidon chuibanac aid nidaid cuëshë pauequidtedishuntsen tantiabededpanëdash.

Esusën Simonën nachi bëdanmiaid

(Mat. 8.14-15; Madc. 1.29-31)

38Adashic Nuquin Papan Chiaid chuibante shubu yacnouësh puduenanec nidec Simonën shubu yacno Esus puduedpanëdash. Adsho issun: Simonën nachi nëncuenash chumboshë iqueque. ¿Ada aid bëdanmetsia? caquien aid mamishec:

39Chumbocquid dauebud, Esus quenubi badedquio dauebudec bëdampanëdash. Aden bëdanmiac nidtoshon Simonën nachin abëd icquidobëta Esus pemepanëdash.

Esusën dadpen bëdanmiaid

(Mat. 8.16-17; Madc. 1.32-34)

40Adshumbic inchëshbudtsëqui daicsaidobëta nënquido utsi utsien bëbëpanëdash. Aden bëbëacsho issumbien mishbanquin Esusën bëdanmebampanëdash. 41Adembidi utsi utsiec podobitsi icsa dapuduedaido icsho dapuduenmebampanëdash. Adoac: Nuquin Papan Madombo mibi nec, quec sidquesho tantiashun: Aden ubi chienda, Esusën cac podobitsi icsa ënëdpanëdash. Mesias nebi, quequin tantiaquin utsibo tantiamenushe, queshun podobitsi icsa chuimenquio icpanëdash.

Nuquin Papan Chiaid chuibante shubun shubunquiec puduedcuennequin chuibenniaid

(Madc. 1.35-39)

42Adashic badiadbudtsëqui matses nibëdacno abentsëqui icnuec Esus nidpanëdash. Adec nidacsho issun matses dadpenshun nibënquin istuidshun: Nidenquio yec ¿ada ubëdi tabadtsia? capanëdash abi istuidquidon.

43Adoaquien Esus: Shubu dadpen icquid utsi utsiec yacno nidshun: Nuquin Papan namiacno tabadte iquec, quequin ma Chiaid Bëda chuibannu, queshun Nuquin Papan chomiondaid nebi, quepanëdash.

44Aden chiashic aton matses isadaidbon nidaid yacnoshon Nuquin Papan Chiaid chuibante shubun shubunquiec puduedcuennequin Nuquin Papan Chiaid chuibennepanëdash.

Currently Selected:

Ducas 4: mcfNT

Highlight

Copy