Ducas 10

Esusën abi tsibanquido 72ted icquido nidmiaid

(Mat. 11.20-27; 13.16-17)

1Adshumbic abi tsibanquido dadpen 72ted icquid Esusën chomepanëdash. Aido chiec: Daëd daëdquiec shubu dadpen icquid utsi utsiec yacno nidshun chuibennetan, quequin ambi bëyuc nidmetequid 2naden chuipanëdash: Pete nitsinaid sinaid dadpenquio icnubi aid bedquid daëdpactsëc iquec. Adacbimbuec Nuquin Papan Chiaid chuibanquid daëdpactsëcquio icnuc matses dadpenquio iqueque. Naden Nuquin Papa chuita. Mimbi Chiaid Bëda chuibanquido dadpenquio icmeta, Papa, quequin chianneta, quepanëdash. 3Aden mimbi chiacpaden nëbi mibitedi nidannemembique. Nidannetan. Adec nidshun mimbi chuibenniacnobi bëdi obeca pete bunacbimbuec mibi chieshënquido dadpen iquendac. 4Ubi chuibennec nidannequin min piucquidbëta shictoadte buanenda. Tapucudte buanenda. Adec nidannequin podquiedën utsi chosho bëquedash aidbëd onquec tabadtuidenquio yec datambidanec nidta. 5Shubun puduedshun naden shubu icbo tantiaquin chuita: Nëid shubun icquido ma Nuquin Papan bëdambuec tabadmepanuna, quequin chuita. 6Aden chiac shubu icbo bëdambuec tabadte bunquid icsho Nuquin Papan bëdambuen tabadmendac. Shubu icbo utsibic mibi chieshënquid iquec. Mimbi chiaid tantianu, quesa icnubi Nuquin Papan mibiuidtsëqui bëdambo icmendac. 7Mibi iuedquidën shubunuidtsëqui tabadta. Adembidi mibi iuedquidën meniaiduidtsëqui peshun acta. Mimbi chuibansho tantiaquidon mibi meniac bëdambo ictsiash. Shubun shubunquien isedbennec capuenda.

8Shubu dadpen icquid yacno nidacsho iuedshun pete meniac isuidenquio icquin peta. 9Ambobi tabadquin daicsaidobëta nënquido icsho bëdanmeshun naden chuita: Nuquin Papan namiacno tabadmianquid nëmbobi mibitedi yacno iquec, quequin chuita. 10Shubu dadpen icquid utsi yacno choshon mibi iuedte bunenquiocsho aton podquiedën nidquin naden chuita: 11Nuquin Papan namiacno iuedanquid nëmbobi iquec, quequin mibitedi chuinuec chouidobi. Umbi chuisho tantiate bunesa mibitedi icsho isash mibi yacno capuec ubi tabitacquebued nidaid putu tabesquenu. Is. Mibitedi cuidtequido nendac, quequin ismeta, capanëdash Esusën. 12Aden chiashic Esus: Ambi icsambuen naidbëtabi ambi bëdambuen naid chuibanquin cuidte uëshëmbi Sodoma yacnocquido bëdiactsëc cuidampid icnubi mibi iuedesa Nuquin Papan cumapenquien cuidendac, quequin Esusën chuipanëdash.#10.12 Sodoma yacnocquido chiampid istiadquio icquin Ene. 19.24-28 isbanta.

Esus tantiesabo cuidtequid chiaid

(Mat. 11.20-24)

13Shubu dadpen icquid Codasin caid yacnocquidobëta shubu dadpen icquid Betsaida caid yacnocquido Nuquin Papan cuidtequidombo nendac. Umbi nadatiambocquin nabanquin mibitedi ismebocpadombuen ismiac shubu dadpen icquid Tido caid yacnocquidobëd shubu dadpen icquid Sidon caid yacnocquido cuidadtequidpenquio ictsempanëdash. Aden ismiac: Ai, icsambuec tabadquid nebi, quiash dashcute icsactsëcquio dasiuidec shubibudequi icsainquio yec ënëdtsempanëdash. 14Adquido icsho Tido yacnocquidobëta Sidon yacnocquido Nuquin Papan bëdiactsëc cuidendac. Padnuen umbi nadatiambocquin naid isquimbi ubi tantiesabo icsho abitedimbo cuidte uëshëmbi Nuquin Papan mibitedi cumapenquien cuidendac. 15Adembidi nëmbo icquido Capednaun yacnocquido: Nuquin Papa yacno tabadtequido nebi ¿quequinda mibitedishun tantie? Padenquio. Umbi nadatiambocquin nabansho issumbi tantiesa icsho Nuquin Papan cuidquin chian annëdënquiacno mibitedi nësecaindac, quepanëdash Esus.

16Aden chuishumbic ambi: Chuibennec nid, caido chiec: Mibitedishun chuibansho tantiaquido yec ubi tantiaquido nendac. Utsiboen mimbi chiaid tantiesabo yec ubi tantiesabo nendac. Aden ubi tantiesabo icquin ubi chomequid Nuquin Papa tantiesabotsen nendac, quequin Esusën chuipanëdash.

Nidannemiaido chochoshon chiaid

17Adnubien ambi 72ted icquido nidmebuedo Esusën chiacpaden nabenniash: Bëdambo iquebi, quec cuishonquec Esus yacno chochopanëdash. Adec chochoshon: Mimbi chiacpaden nabanquin: Esus nadatiambocquid tantiaquid nebique. Dapuduenta, umbi caidtedi podobitsi icsa dapuduemposh, Icbo, quecuededpanëdash Esus chuibanec.

18Adoaquien Esusën: Umbi nadatiambocquin namiac mibitedishun podobitsi icsa dadpen dapuduenmebedednubi Mayan Icsa Satanas abucuësh abu bedquetanacbimbuec badedquio paëdsho isombi. 19Umbi nadatiambocquin nabanquid mibitedi icmebanombi. Adquid icmiac nisibëta chichun tincac mibi icsa uatiapimbo iquendac. Adembidi Mayan Icsa Satanasën namiaidon mibi chieshënquin icsa uatiapimbo iquendac. 20Aden mimbi chiacpadec podobitsi icsa dapuduensho isash: Bëdambo iquebi, quec cuishonquenda. Adenquio yec: Nuquin Papa yacno ubi cuëmëdquid ënden dada uaid icnuc abi yacno ubi puduedte iquec, quequin tantiec: Bëdambo iquebi, quec cuishonqueta, capanëdash Esusën.

Aton Madonuidtsëqui aton Papan naid tantiec, quiaid

(Mat. 11.25-27; 13.16-17)

21Aden chuibanashic Nuquin Papan Mayan Bëdan tantiamiacpadec cuishonquec Esus nadpanëdash: Mibi bëdamboshë iquec, Papa. Mibi abuc icquidtedishun Icbo yec nidaidën icquidtedishun Icbobidi mibi nec, Papa. Adquid icquin mimbi tantiamiabi dadpen tantiaquidobëtambi cumapenen tantiaquid nebi, quequidombi tantienquio iquec. Bacuën daëdpactsëc tantiacbimbuen tantiaquid icshobi mimbi utsibo tantiamiabi yaid tantiamioc. Aden mibi bunacpadombuen naic mibi bëdamboshë iquec, Papa, quepanëdash Esus.

22Aden chiashic: Cun Pan ambi tantiaidtedi ubi tantiamec. Umbi nabambuedbëta umbi nabante abitedi utsibon tantienquio icnuc Cun Panuidtëqui tantiec. Adembidi cun Pan natebëta ambi nabambued utsin tantienquio icnuc umbentsëqui abitedi tantiembi. Aden tantiaquid icquin: Umbi tantiaidtedi nëid matses bëdambuen tantiamembi, queshun: Nuquin Papa nadquio iquec, quequin tantiamembi, quepanëdash Esus.

23Aden chuibanshumbic abëd icquidouidtsëqui Esusën naden chuipanëdash: Ubi tantiaquido icquin umbi nadatiambocquin nabansho isquid icsho Nuquin Papan bëdambo icmiaido mibitedi nec. 24Ubi chote chuimequin Nuquin Papan oncamiaidobëtan chuiquid tapabo dadpenshun mibitedishun ubi isacpadombuen iste bunequi ubi isambobi uënësbudnepampic. Adembidi umbi chuibansho mibitedishun tantiacpadombuen tantiate bunequi tantiambobi uënësbudneuapampic, quepanëdash Esus.

Utsi chiacbimbuen bëdambuen nashuntequid chiaid

25Adnubien Moisesën chiampid tantiamequid abentsëc Esusbëd onquenuec nidash: ¿Tantiaquidquiobida Esus neque? Tantiabono, queshun: Icbo, tantiamequidquio icquin en ubi chui. ¿Nuquin Papa yacno ënëdenquio yec tabadnuen atotsimbi nape? capanëdash.

26Adoaquien Esusën: Nuquin Papan: Naden nata, quequin Moises chuiquin dada uamiampid ¿Mitsipaden chiaid icpec? ¿Aid isbanquin atotsi mimbi tantio? quequin chuipanëdash.

27Adoaquien Moisesën chiampid tantiamequidën: Min Icbombo Nuquin Papa neque. Chieshtoenquio icquin aiduidtsëqui tantiaquiota. Mibi icnëdacpadpenquio icquin uidënquiocquid yacbimbuec Nuquin Papa bunacpadquiec tabadta. Adec tabadquin mibibi min dada datantiadacbimbuen utsibotsen tantiaquiota, quequin Nuquin Papan Chiaidquio nec, quepanëdash Esus chiec.#10.27 M.I.Ch. 6.5bëta D.N.Ch. 19.18 tantiaquin nëid dada uapanëdash.

28Adoaquien Esusën: Bëdambuen mimbi chioque. Aden chiacpadombuen nabanec Nuquin Papa yacno mibi tabadendac, capanëdash.

29Adoaquien: Aden natiapimbo iccobi, quequin otacquio tantiaquin utsibo: Bëdambocquid nec, camenuen padpiden Esus chiec: ¿Mitsicquid cun utsibimbuecquido nepec? quepanëdash.#10.29 D.N.Ch. 19.18, 33-34 tantiaquin nëid dada uapanëdash.

30Adoaquien Esusën: Dada abentsëc Edusaden yacnouësh shubu dadpen icquid Edico yacno podquiedën nidsho issun ampequidon bedshun aton piucquidbëta aton dashcute bedshuntanquin cumapenen cuesac uënëstiadtsëcquio icsho niamposh. 31Adoambic aid podquiedëmbidi nëish iua cuessunneshun pichicaquid choquin cuesaid uesho isash: Isnu, quenquio icquin datambidanec nidposh. 32Adembidi Debin tsiuecquid Nuquin Papa tabadte shubu dapa nuntan nacnenquid choquin uesho isash: Isnu, quenquio icquin uanno cuenquin datanuaposh. 33Adnubien Samadia yacnouësh choquid aid podquiedëmbidi choquin cuestanquin nianaid uesho istuidash uënësquio yec 34aidën dayun tsadbudshun cuestanquin nianaidën chiuëtedi aton dauëmbi bënoshcatanquin dashcute cuëshën bëtaneshumposh. Aden bëtaneshuntanquin aton cabachubitsecquidëmpi canandoshon aid buanec nidequi ënapen nidquido ushte shubu yacno choash abëdi tabadquin bëdambuen isquin nashumposh. 35Adshumbic badiadshun ushte shubu icbo naden chuiquin abentsëc ushec badiad daëdec chonoadacsho meniacted piucquid meneposh. Nidebique. Umbi bëbued bëdambuen isquin nashunta. Mimbi aid nashunquin umbi menebued uessun mitsanambi nashunaid icnuc chouashun cuidquin mibi piucquid menendambi, quequin chianec ampequidon cuestanquin nianaid nashumbued nidposh, quepanëdash Esus. 36Aden chuishumbic: Umbi 3ted icquid chuibued ¿Mitsicquid ampequidon cuestanquin nianaidën utsibimbuecquid nepec? capanëdash Esusën.

37Adoaquien: Ampequidon cuestanquin nianaid istuidash uënësquiocquin abi nashumbuedien aton utsibimbuecquid nechitec, quepanëdash Moisesën chiampid tantiamequid.

Adoaquien: Adembidi mimbitsen utsibo tantiaquin nashunuata, capanëdash Esusën.

Madtabëta Madia Esusën isedaid

38Adashic Esus abëd icquidobëd nidequi shubu daëdpactsëcquid yacno chosho issun ambocquid chido Madta cuëmëdquidën Esusbëta abëd icquido aton shubun iuedpanëdash. 39Adoac ambo puduedash tsadquin Esusën chuibansho datsadbudshun Madtan chibi Madian tantiapanëdash. 40Adec datsadquin Madian tantianubi Madtan ambi natequidtedi tantiaquin nabampanëdash. Aden nabanequi Esus yacno choshon: ¿Cun chibin ubëtambi nainquio icsho isacta bëdambo iquec? Min chuchubëtan natan, quequin ma ubi nashunnu. Chui, Icbo, capanëdash Madtan Esus chuiquin.

41Adoaquien Esusën: Madta, Madta. Mimbi natequid dadpen icnuc aiduidi tantiaquidquio mibi nec. 42Adquid icnuc abentsëc nac bëdambo ictsiash. Adombuen min chibi Madian naquin bëdambocquidquio tantiasho utsibon: Padi, cac icsambo ictsiash, quepanëdash Esus.

Currently Selected:

Ducas 10: mcfNT

Highlight

Copy