Uan 15

Shancuimbiecquid uba chiaid

1Adshumbic Esusën utsi chiacbimbuen naden chuipondash: Uba aton dadan aton cuidi canimequin bëdambo icmiacbimbuecquid nebi. Cun Paen uba isquin taneshcaquidbimbuecquid nec.#15.1 Isadaidbo chiec uba caid dadpen chiaid naden chuipampic. Cuëd. 80.8-16 Chotaquën onqueten Isa. 5.1-7; Ede. 5.9-11. 2Uba taneshcaquidën cuidi utsiuc bacuëesa icsho pateshunnequid. Adotanquin bëdambuen bacuëmenuen cuidi dadpen icquid utsi utsien pateshun secaquid. Ma dadpen bacuënu, queshun aden nacnenquid. 3Adoacbimbuen umbi chiacpadombuen naic: Ma bëdambuec tabadnu, queshun mibitedi dadpen chiombi. 4Ubi tantiec ubëd abentsëc yacbimbuec tabadquin umbi chiacpadombuen nata. Adosho isash mibi bëdambuen tabadmec mibëd iquendabi. Uba cuidi padquëdaid bacuëtiapimbo iquendac. Adacbimbuen ubëd tantiananenquio icquin mibitedishun utsibo ubi tantiametiapimbo iquendac. 5Ubi uba dadabimbuecquid icnuc mibitedi uba cuidibimbuecquido nec. Adquid icnuc ubëd abentsëc yacbimbuec tëshnanenquiocquidobëd iquendabi. Adnuc bëdambuec tabadquin ubi tantiaquid dadpen utsibo yanmendac. Padnuen ubi tantienquio yanec ubëd cuëshëdash mibitedi bëdambo ictiapimbo iquendac. 6Uba icbon cuidi utsi utsiec bacuëesa icsho pateshun tsindoshon tanunacsho nëdëncaquid. Adoacbimbuen ubi tantienquio yanec ubëd cuëshëdshun utsibo ubi tantiamenquio icsho Nuquin Papan icsambuen naquido cuidacno nësecaindac, quepondash Esus.

7Adshumbic Esusën padpiden chuipondash: Ubi tantiec ubëd tëshnanenquio yec tabadquin umbi chiacpadombuen nabanquidën: Ubi nashunta, Papa, cac mimbi chiacpadombuen Nuquin Papan mibi nashunendac. 8Adoac: Nuquin Papa bëdamboshë iquec, mimbi caindac. Adembidi ubi tantiaquid utsibo dadpen yanmesho: Ai, ubi tantiaquidquio nec, mibitedi caindambi. 9Cun Pan ubi tantiaquiacpadombuembidi mibitedi tantiaquiembi. Aden umbi tantiaid icquin ubitsen ënenquio icquin tantiaquiota. 10Abi tantiaquioquin ambi chiacpadombuen nashobini Cun Pan tantiaquiec. Adembidi ubi tantiaquin umbi chiacpaden nasho umbitsen mibi tantiaquiembi. 11Ubi cuishonquiacpadquiecbidi ma ubi tantiaquido cuishonquequiono, queshun aden mibi chiombi, quepondash Esus abëd icquido chiec.

Tantiananta, quequin Esusën chiaid

12Adshumbic abëd icquido padpiden chiec Esus: Mibi tantianante mibi chuinu. Umbi mibitedi tantiaquiacpadquiecbidi mibitedi tantiananquiota. 13Nadec tantiananta. Cuesanquidën mibëd icquid: Cuesnu, cashunac: Padi. Ubien natiad, quiacbimbuec tantiananta. 14Umbi chuibued tantiaquin nabansho mibitedi cun utsibo caimbi. 15Iuan aton icbon nabantequid tantienquio iquec. Adquid icnuc Cun Pan: Ma abi tantiaquido chuinu, caidtedi chuiquin mibitedi tantiamiombi. Adshun iua cainquio icquin mibitedi cun utsibo caimbi. 16Esusbëd icquid icnu ¿quequinda mimbembi tantiadionda? Padenquio. Umbien mibi: Cho, caondac. Utsibo tantiamequin ma nëidon ubi chuibennenu. Aden chuibanac utsibotsen ubëd tabadtequid yanendac, queshun mibi: Cho, caondambi. Aden umbi chiacpadombuen naquidën Nuquin Papa chuiquin: Min mado tantiaquid nebique. Ubi nashun, Papa, cac mimbi chiacpadombuen Nuquin Papan mibi nashunendac. 17Umbi aden chuibued tantiash umbi chuibocpadquiec utsibobëd tantiananta, quepondash Esus.

Esus tantiesabon chieshënte chiaid

18Adshumbic padpiden Esusën ubitedi naden chuiuapondash: Ubi tantiesabon mibitedi chieshënendac. Adoac: Cun Icbo Esusba aden chieshënondash, quequin mibitedishun tantiata. 19Ubi tantiesabo icsho ubi chieshënquidon mibitedi bëdambuen istsiandac. Adquid iccondaidi umbi: Cho, cac ubi tantiaquid mibitedi yampondac. Adquid icsho mibitsen chieshënendac. 20Iuan aton icbo dëniactiapimbo icquid, quequin umbi chuibued tantiata. Aden umbi Chiaid icnuc ubi chieshëmbocpadombuembidi mibitsen chieshënuaindac. Adembidi umbi chiacpadombuen naquidën mimbi chiacpadombuentsen naindac. 21Ubi chieshënquidon ubi chomiondaidquio tantienquio icquin ubi chieshënec. Adombuembidi ubi tantiaquidotsen chieshënuaindac. 22-23¿Ubi chieshënquidon ubiuidtsëquida chieshëmpadic? Ubi chieshënquimbi ma Cun Patsen chieshënec icsamboshë iqueyoc. Nuquin Papa yacnouësh choambo icquin umbi Ambi Chiaid chienquio icnuc ubi chieshënenquio yec cun matses icsainquio ictsenosh. Mambi Nuquin Papa yacnouësh chondaid icquin aidën chiaidquio chuibamboc. Aden chuibanaqui ubi chieshënquido icsho Nuquin Papan: Mibi icsamboshë iquec, caindac. 24Adembidi Nuquin Papa yacnouësh choambo icquin umbi nadatiambocquin nabanquin aido ismiabi icnuc Nuquin Papan: Cun Mado chieshënec mibi icsambo iquec, cainquio ictsenosh. Mambi utsibon nabanacmaidquio nabamboc. Aden nabansho issumbi ubi chieshënquin Cun Patsen chieshënec. 25Aden ubi chieshënte chuiquin nuquin tsusedpa Nuquin Papan naden dada uamiampid iquec: Ambembi matsesën ubi chieshënec, quequin chiampicpadombuen ubi chieshënec, quepondash Esus.#15.25 Chotaquën onqueten Cuëd. 35.19bëta Cuëd. 69.4 isbanta.

26Adshumbic padpiden chiec: Umbi Cun Pa yacno nidshun: Matses dayun uaquid Nuquin Mayan bëdambo icmianquid ubi tantiaquidobëd tabadmenuna, Papa, cac: Ai, queshun Cun Pan chomiac mibëd tabadquin abimbo chuiquin ubi tantiamequiendac. 27Adoac mimbitsen ubi chuibanendac: Esusën tauaquin chuibannuc aidbëd ictennebi, queshun mibitedishun umbi naidbëta umbi chuibanaid bëdambuen chuibanendac.

Currently Selected:

Uan 15: mcfNT

Highlight

Copy