Uan 14

Nuquin Papa yacno tabadmianquid Esus nec, quiaid

1Aden chuisho tantiash ubitedi natiec tabadsho isashien Esus: Natienda. Ubi dayun uaquid nec, quequin Nuquin Papa tantiata. Adembidi tantiaquin ubitsen tantiaquiota. 2Cun Pan shubu yacno quënë dadpenquioshëcquid tsucustiapimbo iquendac. Adquidpenquio icsho mibi aden chienquio ictsiambi. Adquid tantiaquin: Ubi tantiaquido ubëdi tabadmendambi, quequin chiombi. 3Adquid iquec, quiash ubia nidshun: Ubi tantiaquido nëmbo tabadmetiad, quequin Cun Pa chiendambi. Adashic ubi yacno ubëdi tabadmenuen mibitedi bednuec chouaindabi. 4Ubi nidan ubi nidacno nidte mibitedishun tantiec, quepondash Esus.

5Adsho tantiashun Tomasën: ¿Mitsimbo nide, Icbo? Podquied tantienquio iquembique. En ubitedi chui, capondash. 6Adoaquien Esusën: Nuquin Papa yacno nidte tantiamequidquio nebi. Nuquin Papan Chiaiduidtsëqui chiec muesambo nebi. Adquid icnuc ubiuidtsëqui tantiash Nuquin Papa yacno tabadendac. 7Ubi caic: Nuquin Papan Mado nec, quequin ubi tantiaquin mibitedishun Cun Patsen tantiendac. Nëbi abipadquid ubi icsho issun Cun Pambo isacbimbuen ubi isquimbi mibitedishun tantiec, quepondash Esus.

8Adshobien Uedipen: Nuquin Papa ubitedi isme, Icbo. Nuquin Papa iste bunebique. Aid isash ubitedi bëdambo ictsiabi, capondash. 9Adoaquien Esusën: ¿Tantienquioda ique, Uedipe? Iuec mibëd tabadobi. ¿Mimbi isacmaidtabi nedi? Nuquin Papapadquidquiobidi nebi, quesho ubi isquin: Adquiobidien Aton Papa iquec, quequin Cun Patsen mimbi tantiendac, quequin mibi chiombi. ¿Atotsi queshumbini: Nuquin Papa ubitedi isme, cai? 10Cun Pa padquidquiobidi yec aidbëd abentsëc yacbimbuecquid nebi, ubi quesho tantiash: Ai, abimbo caic ¿quenquioda icco? Umbi tantiacpaden chienquio iccombi. Cun Pan chiaidquio chiequini nioc. Adembidi ambembi nabanenquio iccombi. Ubëd tëshnanenquio icquin cun Pan ambi tantiaid namiaquimbi nabanoc. 11Cun Papadquidquio nebi, ubi quesho tantiashun: Aton papabëd abentsëc yacbimbuecquid nec, quequin ubi tantiata. Umbi chiaid tantiatiapimbo icquimbi umbi nadatiambocquin dadpen nabambuedquio tantiaquin: Ai, adquid nec, quequin ubi tantiata. 12Tantia. Mibitedi abimbo chuinu. Cun Pa yacno ubi nidan umbi nabocpadombuen ubi tantiaquidontsen nadatiambocquin udictsëc nabanendac. 13Ubi tantiaquido mibitedishun: Ubi nashunta, Icbo, quesho tantiashun ambi chiacpadombuen nashunendambi. Nuquin Papa bëdamboshë iquec, camenuen 14ubi tantiaquidën chiacpadombuen nashunendambi, quepondash Esus abëd icquido chiec.

Nuquin Papan Mayan Bëda chomendambi, quequin Esusën chiaid

15Adshumbic abëd icquido padpiden chiec Esus: Ubi tantiaquido icquin umbi chiacpadombuen naquid iquendac.#14.15 M.I.Ch. 6.4-9 tantiaquin Esusën aden chuipanëdash. 16Aden naquidquio icsho issun Cun Pabëd icquin Cun Pa naden chiendambi: Nuqui tantiaquido bëdambuen tantiamequin ma aido cudasënquin bëdambuen nashunnu. Nuquin Mayan Bëda aidobëd ënëdenquio icnuc tabadmenuna, Papa, umbi cac Cun Pan Aton Mayan Bëda mibëdi tabadmendac. 17Adoaid yec mibëd tëshnanenquio iquendac. Mibëd icquin ubi chuiquin mibi abimbo tantiamendac. Aid isadenquio icsho ubi tantiesabon aid tantiatiapimbo iquec. Mimbien aid tantiec. Cun Pan ubëd icmiaidquio icquin ambi namiaid ubi icsho Aton Mayan issumbimbuen mibitedishun tantiec. Aidi ubi nidan choash mibëd tëshnanenquio yec Cun Mayan mibëd iquendac. 18¿Shiadi mëyadacbimbuec icnudambi mibitedi niampe? Padenquio. Mibëd icnuec chouaindabi. 19Nëbi iuecpactsëcshun ubi nidacsho ubi tantiesabon ubi isenquio icnubi mibitedishun ubi uincuenacsho isendac. Adec uincuenaid icquin mibi uënësacsho uincuenmendambi. 20Ubi uincuenaid uëshëmbi mimbi naden tantiendac: Aton Papabëd abentsëc yacbimbuec tabadec, quequin ubi mimbi tantiendac. Adembidi: Esusbëd abentsëc yacbimbuec tabadebi, quequin mibitedishun tantiendac. 21Umbi chuibued tantiaquin nabanquid yec ubi tantiaquidquio nendac. Adquid icsho Cun Pabëtan mibi tantiaquioquin: Adquio aton Papabëd Esus iquec, camequin mibi bëdambuen tantiamendambi, quepondash Esus.

22Adsho tantiashun Udas utsin abi bedmequidëmpenquio naden chuipondash: ¿Atotsi queshun ubitediuidtsëqui aden tantiamequin mimbi chuibampe? ¿Matses abitedi tantiamequin chuibantiapimboda ique, Icbo? capondash. 23Adoaquien Esusën: Ubi tantiaquid umbi chiacpadombuen naquid nec. Aden nasho aid tantiaquioquin Cun Pabëtan aidbëd icquin bëdambo icmendambi. Adoac ubëd iquec Cun Pabëd yacbimbuec tabadendac. 24Ubi tantiesaboen umbi chiaid niacquido nendac. Umbi chuibansho mibitedishun tantiabued umbiuidtsëqui chiaidpenquio nec. Mambi ubi chomequid Cun Pan Chiaidquio chuibamboc, quepondash Esus ubitedi chiec.

25Adashic padpidec Esus nadpondash: Nidabi yec mibëd tabadquin aidtedi chuibanec nebi. 26Cun Pa yacno nidshun umbi: Nuquin Mayan aido dayun uanuen aidobëd tabadmenuna, Papa, cac Cun Pan Aton Mayan Bëda mibëd tabadmendac. Adoac umbi nabanondaidbëta umbi chuibanondaidtedimbo mibi bëdambuen tantiameuaindac. 27Cun Pa yacno nidshun Cun Mayan mibëdi tabadmequin dacuëdenquio yec bëdambuec tabadquid mibi icmendambi. Ubi tantiesabombien mibi adquid icmetiapimbo iquendac. Umbi aden nate chuisho tantiash dacuëdec tabadenda. 28Nëbimbobini Cun Pa yacno nidendac. Adtanequic chouaindabi, quequin umbi chuisho mibitedishun tantioc. Ubi adsho tantiash ubi tantiaquidombo yec cuishonquendac. Abi namequid yec nadatiambocquid aton Papabëd tabadec nidec. Aton Papa bëdamboshëcquidquio nec, quiash ubi tantiec cuishonquendac. 29Umbi chuibocpadquiec yansho issun ma nëidon: Esusën abimboshenda capondash, quequin tantianu, queshun aidtedi mibi chuibanombi. 30Nëbi mibi utsi dadpen chuibantiapimbo iquebi. Ubi tantiesabon icbo Mayan Icsa Satanas ubi bedmec choec. Ambembi aidën ubi dëniacquin uënës uametiapimbo ictsiash. 31Cun Pan tantiacpaden ubi uënës uamendac. Ubi adec uënësso isash: Aton Papa tantiaquidquio yec aidën chiacpadombuen naic abided cuidadec Esus uënësac, quequin ma matses abitedishun tantianu, quiash adebi. Aden chuitanec: Nëbimbobini naique. Nidec nidnunid, quepondash Esus.

Currently Selected:

Uan 14: mcfNT

Highlight

Copy