Santiaco 3

Ana chiaid

1Cun utsibo, Nuquin Papan Chiaid tantiamequid icte dadpen bunenquien ictiad. Nuquin Papan Chiaid tantiamenu, queshumbi aidën chiaidpenquio icnuc chuibanquin tantiamequid icsho issun cumapenquien cuidendac, quequin nuquitedi tantiec. 2Nuquitedi icsa uatanquido nendac. ¿Tsutsi bëdambuecuidi onquequid icpatsiash? Utsi icsambuen chuishunesa icsambuen naisa ictsiash. Adquid abibi datantiadquin icsambuen chiec onquenquiocquid iquendac.

3Cabachu annëshquin dëchëdëdcaidën uidënuash catsadquin nidmequin dëbidiacbanec. 4Adembidi dëbidiacbante aniactsëcquidën cano dapa dëbidiacuaic. Cunquequidën cumapenen bëcunnetiadquiocnobi adembidi icbon ambi tantiacno nidmec. 5Cabachubëd cano dapa nua icnuc abi dëbidiacbante aniactsëc iquec. Adecbidi nuquin ana aniactsëcquid nec. Adquidëmbi icbon bëdambuen chuibanmequimbic icsambuen chuibanmequin oncamec. Cute isquidquiocquid aniactsëcquidëmbi nëdënquedotanec cute abitedi pichiquec. 6Cute nëdënquequidbimbuecquid ana nec. Icsambuen chuibanec onquequin nabanec aton dada icsabudquin utsibo icsamequiendac. Adquid Satanasën namiaid iquec adequi icsate bunec abibi cuidadtequido nendac. Icsambuec chuishumënquid icsambuec tabadquid nendac.#3.6 Chotaquën onqueten dada uaid B.T.Ch. 16.27 isbanta.

7Nëish yec podon shucquec capuquid yec tacbidën capuquid yec acten icquid yec quenuc matsesën iuaid quenenash cuenenquiocquid nec. 8Adquidpenquio ana nec. Quenenenquio yec ana onquebudec. Onquiaid icsa adecbidi ënëdtiapimbo iquec. Abi icsambuec onquiaid dauë icsa uënës uantebimbuecquid icnuc icsabudquiec tabadendac.#3.8 Chotaquën onqueten dada uaid Cuëd. 140.3 isbanta.

9Nuquin anan onquequin: Nuquin Icbo Nuquin Papa bëdambo iquec, quequin chuishumbic Nuquin Papan abibimbuecnuc uaid matses icshobi icsambuen nuqui chuishunec.#3.9 Ene. 1.26-27 isbanta. 10Adembidi nuquin ananshun utsi bëdambuen chuishumbic utsi icsambuen chuishunuaic. Cun utsibo, nuquitedi aden chiec onquenquien ictiad. 11Adecbidi ¿acte pududquequidënuështa batambocquidbëd mucambocquid chopadic? 12Tantia, cun utsibo, adecbidi cute icuedan bacuë uba ictiapimbo iquec. Adecbidi uban bacuë ico ictiapimbo iquec. Adecbidi acte pududquequidënuësh batambocquidbëd mucambocquid chotiapimbo iquec.

Nuquin Papan bëdambuen tantiamiaidquio chiaid

13Mibitedi utsi utsiec: Bëdambuen tantiaquidquio nebi, quequid icquin: Ubiuidtsëqui bëdambuen tantiaquidquio nebi, quenquio icquin ma bëdambuen naic tabadquin utsibo ismepanuna. 14Padnuen nadquid bëdambuen tantiaquidpenquio nendac. Nëidic: Ubi bunacpaden: Umbi nanu, cabuedi aidën naic, quiash chieshëmënquid. Nëidic chushcanante bunquid. Nëidic: Ma utsibon ubi bëdambuen isquin aton chuiquid icmenu, quequin tantiaquid. Adec tabadquid yec abimbo chiaidquio tantiesabo nendac. 15Aden icsambuen tantiaquid Nuquin Papan tantiamiacmaid nec. Esus tantiesabon tantiacbimbuen tantiaquid nec. Adecbidi Mayan Icsa Satanasën tantiamiaid nendac. 16Adec nëishnanash tabadec: Umbiuidtsëqui namenu, quec tabadquid icnuc utsi utsiec: Ubi bunacpadombuenuidi ma nabannu, quec tabadquid iec chieshënnanec icsambuecshë tabadanendac. 17Padnuen Ambi tantiacpadombuen Nuquin Papan bëdambuen tantiamiaid yec nadquio iquec. Icsambuen nate bunesa nec. Adecbidi utsibobëd bëdambuec tabadquid nec. Adecbidi utsi nashumënquid nec. Adecbidi chushcanesa nec. Adecbidi utsi natiambo icsho uënësquiocquid nec. Adecbidi chuiquidën: Nanuna, cac badedquio: Ai, adonona, quequid nec. Adecbidi cuidmenquiocte bunquid nec. Adecbidi bëdambuen nabanquid nec. Adecbidi: Nëid bëdambuen isquimbi utsi chieshënembi, quesa nec. Adecbidi: Esus tantiaquid nebi, quec muesa nec. 18Aden naic bëdambuec tabadquin ismiac adecbidi utsibobëd aidën chiacpadombuen naic bëdambuec tabadquid dadpen yanendac.

Currently Selected:

Santiaco 3: mcfNT

Highlight

Copy