Santiaco 2

Utsibobëd chieshënnanesa icta, quiaid

1Cun utsibo, mibitedi Nuquin Icbo Esuquidistu bëdamboshëcquid tantiaquido mibi nec. Adquido yec: Nëid umbi bëdambuen isaid nec. Nëid umbi icsambuen isaid nec, quec chieshëmënec icsambuec tabadenda.#2.1 Nëid chiacbimbuen chiaid iste bunquin chotaquën onqueten dada uaid D.N.Ch. 19.15bëta B.T.Ch. 28.21 isbanta. 2Mibitedi cuëdënnuec iccuededacno atona dadpen icquid bëdaidquio dasiuidash nacnacquiocquid shocosh bëshpiu bëshpiucquid odo caid nacnenaid mësiuidquid choec puduedpec. Adnubien utsi aton na nibëdquid yec icsactsëcquiocquid dasiuidtsash puduedpec. 3Adec atona dadpen icquid puduedsho istanquin: Nëmbo tsadec cho, quequin mimbi aidi bëdambo yacno tsadumpec. Adshumbic atona nibëdquid puduedsho istanquin: Ambobi nidtoash nidta. Adte bunenquio yec nidaidën tsadta, mimbi capec. 4Aden mimbi tantiaiduidi bëdambuen isec tabadenda. Nëid bëdambocquid nec. Nëid icsambocquid nec, quec chieshëmënec icsambuen tantiec tabadenda.

5Tantia, cun utsibo. Umbi tantiaido icsho mibitedi chuinu. Atona nibëdquido icsho Nuquin Papan abi tantiaquido icmequin ambi namiaidquio icmiac. Nuquin Papa bëdambocquid icquin ma ubi nashunnu, quequin ma tantianu. Adoac aid tantiaquido yec: Nuquin Papan ambi chiampicpadombuen bëdambuen isquin uënësacsho abi yacno abëdi tabadmequin abi tantiaquido icsho ubi bëdamboshë icmendac, ma quenu, quequin ambi namiaidquio nendac. 6Nuquin Papan adoaid icshobi mibitedi: Tsadten tsadenquio yec nidaidën tsadta, cac: Icsambocquid nec, quequin ubi isec, quequin tantiec aidi tsadpec. Padnuen atona dadpen icquidon mibitedi utsi utsien chonuauaquin mëyanshun mibi daëdpactsëc ¿menenquioda ictiosh? Adquidon mua uaquin chuiquin mibitedi utsi utsien cuidte chuiquid yacno ¿buanenquioda ictiosh? 7Adoanquidën oncaquin Nuquin Icbo Esuquidistu ¿icsambuen chuishunenquioda ictiosh?

8Nuquin Papan: Naden nata, quequin chiampid tantiaquin nabanquid yec mibitedi bëdambo iquendac. Ambi chuiquin dada uamiampid nad iquec:#2.8 D.N.Ch. 19.18 isbanta. Min dada mibibi datantiadacbimbuen utsibo tantiaquiota, quequin chuipampic. 9Aden chiampid icnuc: Nëid bëdambocquid nec. Nëid icsambocquid nec, quec chieshëmënec tabadquin Nuquin Papan Chiampid niaquec mibi icsaindac.#2.9 M.I.Ch. 1.17 isbanta chotaquën onqueten dada uaid. 10Nuquin Papan: Naden nata, quequin chiampidtedi nabanquid icquimbi Aidën Chiaid abentsëc niacquin abitedi niacquidbimbuec mibi iquendac. 11Nuquin Papambidi naden chuipampic: Min chidopenquio chudenda, quequin chiaid icnubi adembidi: Cuessunnianenda, quequin Ambi Chiampid utsi iquec. Adquid icnuc: Min chidouidtsëqui chudquid icquimbi utsi cuessunnequid iquec Nuquin Papan Chiaid niacquidquio mibi nendac.#2.11 Buan. 20.13-14 isbanta. Chotaquën onqueten M.I.Ch. 5.17-18 isbanta.

12Matses abitedishun naid chuibante uëshë icnuc Nuquin Papan matsesën naidtedi tantiaquin chuibanendac. Aden chuibantequid icnuc utsibo bëdambuen isquin nabanec bëdambuec onquec tabadta. 13Utsibo uënësquiocquin tantiesa matses icsho Nuquin Papan: Aido tantiac uënësquio iquec, quenquio icquin cuidendac. Aden cuidshumbic utsibo uënësquio icquin tantiaquido icsho Nuquin Papan ambi abitedi cuidte uëshën aido cuidenquio iquendac.

Esus tantiaquid icquin utsibo nashunquid icta, quiaid

14Cun utsibo: Esus tantiaquid nebi, quequid icquimbi ¿Ambi Chiaid nabanenquiocquidta Nuquin Papan bëdambuen ispadic? ¿Adquidta abi yacno tabadmepec? Padenquio. 15Esus tantiaquid dadabëd chido aton dashcutebëd pete nibëdquid: Bec cho, quesho 16menenquio icquin naden chiec: Nidec nid. Dashcute bedash dasiuidta. Adembidi: Pete bedshun codocashun pec nid, ¿mimbi cacta bëdambo icpadic? Padenquio. Aden mimbi dashcutebëta pete menenquio icquin chuiquinuidtsëqui nacta ¿bëdambo icpadic? Padenquio. 17Adecbidi: Esus tantiaquid nebi, queshun aidën chiacpadombuen utsibo bëdambuen nashunenquiocquid yec uënësacbimbuen tantienquiocquid nendac.

18Adnubien: Esus tantiaquid nebi, quequid icnubi utsi: Ubi bëdambuen nabanquidquio nebi, quequid icpec. Adshun: Esus tantiaquid nebi, quequin aidën chiacpadombuen nainquiocquin ubi isme, capec. Adshun: Esus tantiaquid nebi, quequin chienquiocquimbi Esusën chiacpadombuen bëdambuen nabanquin mibi ismembi, quequid icpec. 19Nuquin Papa abentsëcquiobi iquec, quequin mimbi tantiec. Aden tantiaid bëdambo iquec. Adembidi podobitsi icsatedishun tantiauaic. Aden tantiec aido dacuëdec uëdëquec. 20Tantiesabimbuecquid iquenda. Nuquin Papa tantiaquid nebi, quequid icquimbi bëdambuen nabanquin ismenquiocquid uënësacbimbuen tantienquiocquid nendac. 21Ëndenquimbo nuquin tsusedpa Abadauanën Nuquin Papan chiacpadombuen naquin aton mado Isac cuëmëdquid: Ubi ismequin cuessunneshun pichicatan, cac: Cuessunneshun pichicanu, quequin cuessunnetsensho Nuquin Papan Abadauan bëdambuen ispampic icsambuen naisabimbuecnuc.#2.21 Ene. 22.1-14 isbanta. 22Abadauanën Nuquin Papan Chiaid niaquenquio icquin naquin ismepampic. Aden nabanquid yec Nuquin Papauidtsëqui tantiaquin nabanquidquio yampampic. 23Nuquin Papan naden chuiquin dada uamiampicpadombuen napampic: Umbi chiacpadombuen naquidquio icquin ubi tantiaquidquio Abadauan nec, queshun bëdambuen ispampic icsambuen naisabimbuecnuc, quequin chuipampic.#Ene. 15.6. Adoaid icsho matsesën: Abadauan Nuquin Papabëd icquidquio nec, quequin chuipampic.

24Aden chiampid issun naden mibitedishun tantiec. Nuquin Papa tantiaquid nebi, queshun ambi chiacpadombuen naquidquio icsho Nuquin Papan bëdambuen isec icsambuen naisabimbuecnuc. Nuquin Papa tantiaquid nebi, quequid icquimbi aidën chiacpadombuen nainquio yec tabadquidien bëdambuen istiapimbo iquendac. 25Adquidbidi Daba cuëmëdquid piucquid bedec chudadquid abi tantiaquid icsho Nuquin Papan bëdambuen ispampic. Osuen aton matses isadaidbo dada chuiquin: Istan, cac chochoaido Daban aton shubun iuedshun ompotanquin podquied utsin nidmequin aton matses ismenquio icquin cuenmepampic. Aden nasho Nuquin Papan bëdambuen isaid icpampic.#2.25 Osue 2.1-21 isbanta. 26Naden tantiamenuen chuibanombi. Aton dadan icquid aton mayan nibëdnuc uënësaid nec. Adecbidi: Nuquin Papa tantiaquid nebi, queshun aidën chiacpadombuen bëdambuen nabanenquiocquid yec uënësacbimbuen tantienquiocquido nec.

Currently Selected:

Santiaco 2: mcfNT

Highlight

Copy