Hechos 27

Doma yacno Pabado buanmiaid

1Aden Uestobëtan Aquidipan: Nidaid Itadia caid yacno buanmenuna, queshun sondadon chuiquid capitan Udio cuëmëdquid naden chuipanëdash: Pabadobëta mëtaniaido utsitedi buanec nidta, cac buanec puduampondash. Aidi aton sondadobëta chuiquid tapambo empedadodën namiaido nec, quequin cuënaid nepondash. 2Aden buanec nid, cac Pabado chedo buanquin shubu dadpen icquid Adadamitio yacnouësh choquid cano dapa istuidpondash. Aid cano dapa icbo: Nidaid Asia caid acte mad caid cuëman shubu dadpen icquid utsi utsiec yacno nidebi, quequin chuisho tantiash Pabadobëd antabëdtopondabi. Adec antabëdtosho isash puduampondash. Pabadobëd icquid utsi Adistadco icpondash. Aidi nidaid Masedonia caidën shubu dadpen icquid Tesadonica yacnouësh choquid nepondash.

3Adec cano dapa antabëdtoanec nidquin badiadshun shubu dadpen icquid Sidon caid yacno istuidpondash. Ambo choshon: Mitsana nibëdeque. Mibëd tantiananquido yacno nidta. Aidon mibi nashunquin menetsiash, quequin Pabado bëdambuen tantiaquin sondadon chuiquid Udion chuipondash. 4Adashic Sidon yacnouësh puduanec nidquin potesho cunquequidën bëquedtuidac uëshë choacmi cuenadtanquin acte nënantan nidaid nacnëdquid Chipide caid datampondash. 5Adembidi nidaid Sidisia caidbëta nidaid Pampidia caid datambëtsenec nidaid Disia caid yacno shubu dadpen icquid Mida caid yacno chopondash. 6Ambo choshombic sondadon chuiquid capitan: Cano dapa utsin nidnu, quequin nibënquin istuidpondash. Shubu dadpen icquid Adejandedia caid yacnouësh chobuedi nidaid Itadia caid yacno nidnu, quequid istuidpondash. Aden aid istuidshun Pabadobëd icquido ubitedi aid cano dapantsen antabëdtomepondash. 7Adec Mida yacnouësh puduanash nidquin potec dadpen ushacsho cunquequidën cano dapa bëquedtuidpondash. Aden bëquedac bëdiactsëc nidquimbi shubu dadpen icquid Nido caid ëquëbitsëc datambidanec acte nënantan nidaid nacnëdquid Quedeta caid yacno buanuapondash. Aid dacuenadec utsiuc acte nënantan nidaid nacnëdquid utsi Sadmona caid icpondash. 8Uëshë choacmi Quedeta yauc cuenadtanec choquin shubu dadpen icquid Buenos Puedtos yacno chopondash. Aid udictsëc shubu dadpen icquid Dasia caid icpondash.

9Cunquequid choquin bëquedtuidac iuenquio potiactannetsëcquien buampondash. Cumapenec cunquec iquenuanquidën nuqui bëquedec, quequin tantiaquin Pabadon nadopondash: 10Tantia, dadatedi. Chuinu. Nëuëshquio puduanquin potesho cunquequid tapan bëquedshun cano dapa cuësh cuështsiash. Adec cano cuësh cuëshëdan: Acten mentoadec nuqui uënëstsiac, quequin chuita, capondash Pabadon sondado chuiquid chuiquin. 11Aden Pabadon chiaqui sondadon chuiquid capitanën aidën chiaid niacbidanquin cano icbobëtan cano nidmequidën: Adequi nidebi, quequin chiaid tantiapondash. 12Cunquequid tapa choan Buenos Puedtos yacno tabadec nuqui iquentsiac, quiash shubu dadpen icquid Penise acte dapa mad caid nidaid nacnëdquid tapa Quedeta yacno nidnuna. Ambo nidash nuqui tabadnubi cunquequid tapa chotsiash. Ambo tabadquin nod ueste yauc isquin sud ueste yauc nuqui istsiac, quequin utsitedishun chuipondash.

Acte dapa mad caidën nidsho cunquequid tapan bëquedaid

13Auëshquio puduanec nidnubi sud yaucuësh bëdiactsëc cunquesho issun: Nëbi nuqui iquenenquio iquendac, quequin tantiaquin abi bunacpadec: Nidnu, quianec canon nidec puduanquin nidaid nacnëdquid tapa Quedeta cuëma anoentsëqui buampondash. 14Adec nidec udictsëc yanshobi uëshë choaid ëquëctsëc nidaid Quedeta caid mannan yaucuësh cunquequid tapamboshë choquin cuesacbimbuen bëquedtuidpondash. 15Adoac icbon cano dapa nidmetiapimbo icshobi cunquequid tapan cano dapa buampondash. 16Aden cunquequidën buanaqui acte nënantan nidaid nacnëdquidëmpi Cauda caid ëquëbictsëc cuenquin datampondash. Amboshon cunquequid cumapenec cunquebuedi ënëdbudan: Canompi cano dapan panëshshun buanaid cunquequid tapa padpidec chouaquin buannushe, queshun iuëmiac bëdiactsëc cadoquin annandopondash. 17Aden canompi annandoshon: Cano dapa canchednushe, queshun uidënuaquin bucun datanebampondash. Adshumbic: Isadenquiocnoc masi dapa Sidte caidën cachiadnushe, queshun cano buante dashcute abi dectante cuestebëtabi imbudshun dashcute chicacshobi cunquequidën cano cumapenen buampondash. 18Aden cunquequid tapan cano buannubi badiadnuc acte cumapenec bocquec tëccuasquesho issun ambi ansandoshon buanaid acte nësecapondash. 19Adshumbic daëdec ushshun bucu nua icnuc uidënuatequid nacnenaid iuëmbocsho nësecauapondash. 20Aden nësecanec nidquimbi inchëshën uëshëbëta uispa abu chëshën bëtinacsho ubitedishun isenquio icpondac. Adembidi badiadën uëshë isenquio icpondambi. Dadpen ushquin aidtedi isenquio icnubi acte cumapenec bocquec tëccuasquepondash. Ad icsho isash abitedi: Mentoadchitequien nuqui iquec, quecuededpondash.

21Adequi iquebi, queshun iuen buna mëmumbededequi ubitedi nidannepondac. Adec cano dapan nidnubi Pabado nidtoash naden chuipondash: Tantia. Chuinu. Quedeta yacnouësh puduanenda, cauidombi. Adoboqui umbi chiaid tantienquio yec mibi puduampoc. Umbi chiacpaden nabannuc mimbi ansandoaidtedi abi ictsiandac. Adecbidi: Uënësebi, quenquio nuqui ictsiandac. 22Adec acte bocquec tëccuasquequidën nuquitedi uënësmenquio iqueque. Dacuëdenquio yec tabadta. Cano dapauidtsëqui cuëshcuëshëdendac. 23Nuquin Papan iuambo yec aid nashunquidquio nebi. Adquid icsho inchëshën abëd icquid ambi budmiaid isadcuenshun naden chuiposhi: 24Doma yacnocquidon chuiquid tapambo empedadod caid bëisquin mimbi chiendac. Mibi ambo nidmequin cano dapan mibëd nidquidotedi Nuquin Papan acte yacnoshon uënësmenquio iqueque. Dacuëdenda, Pabado, quequin chuiposhi Nuquin Papabëd icquidën. 25Aden umbi chuisho tantiash dacuëdenquio yec tabadta. Ambi abëd icquid budmiaidën chuibocpadombuen naquidquio Nuquin Papa nec, quequin tantiembi. 26Adembidi acte bocquec tëccuasquequidën nuqui acte nënantan nidaid nacnëdquid yacno buanac cano dapa cachiadnuc cuëshcuëshëdendac, quequin tantiombi, quepondash Pabado cano antabëdquido chiec.

Cano dapa canched canchedaid

27Adashic Buenos Puedtos caid yacnouësh puduanec nidash 13tedec ushec acte dapa Adidiatico caidën icshobi cunquequidën buampondash. Aden acte bocquec tëccuasquequidën buannubi inchësh poctsembo yannuc: Cuëma anoentsëqui nuqui yanec, quequin cano dapa nidmequidon tantiapondash. 28Aden tantiaquin: Acte ëquëducquio iquec ¿tionda iqueque? Tannu, queshun shocosh iuëmbocquid bucu dëdectanshun acte pumbudquin tanec: 36 metodos cac tion iquec, quianec udictsëc nidshun padpiden tanec: 27 metodos cac tion iquec, quequin chuipondash. 29Cunquequidën nidaid yacno buanquin cano dapa cuënote dapa semenushe, quiash dacuëdquin cano dapa uidën uate dapa iuëmbocquid 4ted tsitsumi tsidectanshun acte nënepondash. Aden nëniash noadec: Ma Nuquin Papa caidën nuqui uidënuac ma badiadbono, quiash tabadpondash. 30Adec tabadnubi cano dapa nidmequidën namiaidon: Cuennu, quequin dëbiate yacnoshontsen cano uidën uate iuëmbocquid dëdectanshun nëniacbimbuen canompi annandobued nimbudpondash. Cano dapa mentoadnuc cuennu, quequin adopondash. 31Adec aido cuennu, quesho tantiashun Pabadon: Cuennu, quequido canompin nidnuc cano dapan nidquidotedi nuqui mentoadendac, quepondash sondadobëta cano dapa nidmequid capitan chiec. 32Aden Pabadon chiaquien sondadon abi nëshaid bucutedi sënac canompi nëpaëdpondash: Cuennu, quequido cuentiapimbo icnuc.

33Adashic badiadte anoentsëc yannubi Pabado nadpondash: 13tedec ushquin: Mentoadtsiabi, quequin tantiaded tantiadedquin mimbi penquio iccoc. 34Mibi acte nëpudunnuc min manëdaid abentsëc paëdenquio iqueque. Penquiocbuedi uënëschitomane, quebuedi peta, quepondash Pabado. 35Aden chuishumbic abitedi ismequin pan bedshun Nuquin Papa chiec: Mimbi icmiaidën shëaid nëid pan nec, queshun cuëshshun Pabadon pepondash. 36Aden Pabadon pesho issun: Nuquitsen penuna, queshun abitedishumbi pebededpondash. 37Cano dapan icquidtedi 276ted icpondash. 38Aden abi bunactembi pebededshumbic: Iuëmbo iquec, queshun ambi sandoaid tidico caid ëshë acte nësecapondash.

Cano dapa cuësh cuëshëdaid

39Adshumbic badiadnuc ambi isacmaid nidaid istuidpondash. Acte cuidiantanquid cuëman masi icsho issun: Ambo cano anoentsëc nidmenu, queshun 40uidënuaquin nëshbanaidtedi tebanac acte nëpaëdpondash. Adembidi abi dëbidiacbante abi bunacno nidmetetsen acte nënetanquin abi buante dashcute shoyontanquimbi cadouapondash. Aden cadouacsho cunquequidën buanquin masi yacno buampondash. 41Aden cano dapa nidmenubi cano dapa dëbiaten masi setuidec chiquidtiapimbo yec cano dapa cachiadpondash. Adec cachiadacsho acte cumapenec tëccuasquec bocquequidën cano dapa cuësh cuëshquin tauapondash.

42Adsho isash sondado: Mëtaniaidtedi tantanec cuentsiashe. Cuessun secanu, quesho 43tantiash: Pabado cuessunnenushe, queshun: Padi ¡Chën! capondash sondado chuiquid capitanën. Aden chuishumbic: Acten tantanec mëquiadquido tantanec abia nidaid yacno nidannenubi 44tantantiapimbocquido cano cuësh cuëshëdaid cuëshë bedash noadec tantanquido tsibanec nidta, quequin chuipondash sondado chuiquid capitanën cano dapan antabëdquido chuiquin. Aden aidën chiacpadquiec nidannec mentoadenquio yec ubitedi nidaid yacno nidash pudundocuededpondash.

Currently Selected:

Hechos 27: mcfNT

Highlight

Copy