Hechos 26
26
Chuiquid Aquidipa caid Pabadon chuibanaid
1Aden Ueston chiaquien: Mibibi onquequin mimbi naid chui. Tantianu, quepanëdash Aquidipa Pabado caic. Adoaquien aton mëdante cadoec Pabado nadpanëdash:
2Chuiquid tapa Aquidipa, mimbi tantianubi isadaidbon: Icsambocquid nec, quequin muaquin ubi chuishumbued mibi chuibanec bëdambo iquebi. 3Isadaidbo tabadaidbëta aido chushcananaid mimbi tantiec. Aden tantiaquid mibi icsho umbi nabanaid chuibannuc chieshtoenquio icquin tantiata. Chuinu.
4Ubi tishondacnouësh canidosho cun matses isadaidbon ispondashi. Auësh caniquid yec Edusaden yacno choash tabadsho adembidi aidon isuapondashi. 5Padiseobo icquin padiseobon: Naden nata, quequin chiaidtedi niaquesambo nebi. Padiseobon: Pabado adquid nec, quequin chuitiadquidi nec. 6Uënësash uincuentequid iqueque. Aid cainec tabadta, quequin Nuquin Papan nuquin tsusedpabo chiampicpaden chuiquin dada uamiampid tantiaquid icsho: Icsambocquid nec, quequin isadaidbon ubi chuishunec. 7Nuquin tsusedpa Acobo cashumbic Isadaid caidën madobo 12tedshun tsiuecquido uënësacsho Nuquin Papan uincuenmete iquendac, quequin chiaid tantiaquido icquin Nuquin Papa tantiaquin caimpampic. Aidon cainampicpaden cainembi, quesho: Icsambocquid nec, ubi capec isadaidbon chuiquidon, quequin chuiquid tapa Aquidipa chuipanëdash. 8Cun matses isadaidbon ¿atotsi queshun: Nuquin Papan uënësaido uincuenmendac, quequin chiaid tantienquio mibitedishun icpe?#26.8 Nuquin Papan dada uamiampid Dan. 12.2 tantiaquin aden Pabadon chuipanëdash.
9Ënden shubu dadpen icquid Nasaded yacno icnëdaid Esus tantiaquido: Icsambocquid neque. Cuessunnemembi, quequin tantiapondambi. 10Aden tantiashun Edusaden yacnoshon adquid dadpen mëyanmepondambi. Nëish iua pichicaquidon chuiquidon: Adota, cac umbibi Esus tantiaquid bëdambocquid icshobi bedshun quënën nauedmebampondambi. Cuessunnenu, quesho tantiash, Ai, cuessunnetiadquio iqueque. Adota, quepondabi. 11Nuquin Papan Chiaid chuibante shubu utsi utsiec yacno nidshun aido bedmeshun: Esus Nuquin Papan madopenquio nec, aido camenuen mëyanmepondambi. Adembidi nidaid utsi yacnoshontsen adquid istuidshun mëyanmeuapondambi.
Pabadon ambi Esus tantiabenaid chiaid
12Aden umbi Esus tantiaquido mëyanmebansho issun cun matses nëish iua cuessunneshun pichicaquidon chuiquidon: Adota, quequin dada uaid buanec shubu dadpen icquid Damasco caid yacno nidpondabi. 13Tantia. Chuinu, chuiquid tapa. Podquiedën nidnubi uëshë cuembo yannuc abucuësh uëshëmboshë yec chënquec bedquequidën dachëncaquin ubëd nidquidobëta ubi dëcatesho ispondambi. 14Aidën dëcatiac ubitedi nidaidën uebudcuededpondabi. Adec uequimbi cun matses ebedeon onquetenquio abucuësh nadec onquesho tantiapondambi: Saudo, Saudo ¿atotsieshun ubi mëyane? Mibibi cuesadec mëyamëdacbimbuec mibi iquec, quec onquequin chuipondashi.
15Adoaquimbi: ¿Tsutsi ne? capondac.
Adoaquien: Mimbi mëyanaid Esus nebi. 16Umbi namiaid mibi icmenuec isadcuenec chobique. Nidtota. Adshun: Esus isondambi, quequin ubi chuibenneta, caid nëbi mibi yanec. Ubi chuibennequin mimbi isaidbëta umbi iuecshun mibi ubi tantiamiaid chuibenneta. 17Aden ubi chuibennesho mibi cuessunnete bunquid isadaidbobëd isadaidpembo icsho mibi mënchiquendambi. Aido chuibantan, quequin nëbi mibi nidmembi. 18Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.
Pabadon Esus chuibenniaid
19Aid abucuësh isadcuenash onquesho tantiondashun chieshenquio icquin chuibennepondambi, caimbi mibi chuiquin, chuiquid tapa Aquidipa. 20Shubu dadpen icquid Damasco yacnoshon bedanquin Esusën naid Chiaid Bëda chuibanondambi. Adshumbic Edusaden yacnoshontsen chuibanuaondambi. Adshumbic aid nidaid cuëshë Udea caid shubu utsi utsiec yacnoshontsen chuibenniondambi. Isadaidboba chuibanshumbic Isadaidpembotsen naden chuibanombi: Mimbi icsambuen naid ënshun Nuquin Papambo tantiaquin Aidën chiacpaden nabanta, quequin chuibampondambi. 21Aden chuibanquid icsho issun Nuquin Papa tabadte shubu dapa tsicatequin daquënë uaidën puduedash capusho issun isadaidbon bedshun cuessunnetsemposhi. 22Adoshobi ubi dayun uaquid icquin Nuquin Papan: Udiubon cuessunnenushe, queshun cudasëmposhi. Adoac nëbi mibëtabi mimbi namiaido chuibanec nebi, chuiquid Aquidipa. Moisesën: Naden nata, quequin dada uampicpaden chuibanquid nebi. Nuquin Papan oncamiaid utsibon: Nadquid iquendac, quequin chiampicpaden chuibanquidbidi nebi. Aidon chiampid nadquio iqueque. Tantia. 23Nuquin Papan Chomiaid Quidistu Mesias caid mëyanquin uënës uaqui daëdec ushash abia uincuenshun: Ubi tantiaquid ubëdi tabadendac, quequin aton matses isadaidbobëta isadaidpembo tantiamequin Quidistun chiendac, quequin chiampicpadembi chuipanëdash, quepanëdash Pabado iccuededquido chiec.#26.23 Aden Nuquin Papan oncamiampid Isayas chuiquin dada uapampic. Isa. 42.6bëta 49.6 ista.
Chuiquid Aquidipan Pabado chiaid
24Adec Pabado onquesho tantiashien cumapenec cuëdec: Min tantiate icsabudash tantienquio yanec mibi adec onquec. Mimbi tantiaid dadpen icnuc tantiadenash onquechitequien mibi nec, quepanëdash Uesto Pabado caic.
25Adoaquien Pabadon: Cun tantiate icsabudashpenquio bëdambuen tantiec onquec nebi. Umbi chiaid abimbo iquec, quequin mibi chiec nebi, chuiquid tapa bëdambocquid Uesto. 26Chuiquid tapa Aquidipan umbi chuibambued: Abimbo caic, quequin tantiec. Aden tantiasho dacuëdenquio icquin aid chiec nebi. Umbi chuibambued ompoenquio icquin utsibon chuisho aidëmbi tantiapanëdash. 27Nuquin Papan oncamiaidon: Adquid iquendac, quequin chuiquin dada uampid chuisho mimbi: Abimbo chiec, quequin ¿ada tantie? Ai, mimbi tantiec, capanëdash Pabadon chuiquid tapa Aquidipa chuiquin.
28Adoaquien Aquidipa: ¿Mimbi chuibuedtedtsëqui tantiashtabi badedquio Esus tantiaquid yampe? quepanëdash Pabado chiec.
29Adoaquien Pabado: Nëid uëshënquiobi daëdpactsëc chiombi. Aidtedtsëqui chiac tantiatiapimbocsho issun iuen chuibantsiambi. Mibëd iccuededquidobëta mibi cain: Ma Esus tantiaquid ubipadquid mibitedi yampanu. Adquid yansho ma mibi shocosh bucun mëtanenquio icpanu, quequin chiec nebi, quepanëdash.
30Aden Pabadon chuibanaquien chuiquid Aquidipa nidtopanëdash. Adsho isash Uestobëd Bedenise nidtonoc iccuededquid utsibotsen nidtocuededpanëdash. 31Adec nidtocuededash aid quënënuësh puduen pueduenash Uestobëd Aquidipa chuinanec: Nëid dadan icsambuen naid nibëdec. Adsho cuessunnemenquien ictiad. Adembidi quënën tsadunenquio ictiadquidi nec, quepanëdash chuiquid abidaëdi.
32Aden chiashic: Empedadod chuite bunebi, quiambocsho quënën tsadunacnoshon aidi mimbi chicquin puduenmetsenoc, quepanëdash Aquidipa Uesto chiec.
Currently Selected:
Hechos 26: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
