Hechos 25

Pabadon ambi naid chuiquid tapa utsi Uesto cuëmëdquid chuiuaid

1Uesto cobednadod yanash Sesadea yacno choash 3tedec ushanec Edusaden yacno nidpanëdash. 2Adec ambo nidash tabadsho Nuquin Papa ismequin nëish iua cuessunneshun pichicaquidon chuiquidobëtan isadaidbon chuiquidon Pabado chieshënquin naden chuipanëdash: 3Ubitedi bëdambo icmenuen ¿ada Pabado Edusaden yacno bëmeuatsia? quequin Uesto chuipanëdash. Podquiedën bësho ma cuessunnenu, quequin tantiaquin isadaidbon chuiquidon aden Uesto chuipanëdash.

4Aden chuisho tantiashun Ueston: Sesadea yacnobi Pabado quënën tsadunaid icnuc ambo nidebique. 5Mibitedi utsi utsiec ubëdi nidanneshun ashunquio Pabadon icsambuen nabanaid ubi chuita, quepanëdash Uesto isadaidbon chuiquido caic.

6Adashic 9tedec ushash Edusaden yacnouësh puduanec nidec Uesto Sesadea yacno padpidec chopanëdash. Adashic badiadash matses chushquiaid tantiec tsadte dapan tsadtoshon Ueston isadaidbo tabadnubi Pabado bëmepanëdash. 7Aden bëmiac puduedsho isash cun matses isadaidbon chuiquido Edusaden yacnouësh chochobuedo Pabadon naid chiec abimbo chiacbimbuec muaic onquecuededpanëdash: Abimbo chiec. Nasho isombi, utsibo quetiapimbo icnuc.

8Aden isadaidbon chuisho tantiashun Pabadon naden chuipanëdash: Umbimbo isadaidbon: Naden nata, quequin chiaid niacambo iccombi. Adembidi Nuquin Papa tabadte shubu dapa yacno nidash aid shubun puduedtemaid isadaidpembobëd puduedambo iccobi. Adembidi chuiquid tapa empedadod caid Doma yacno tabadquid Sesadën chiaid niacambo iccombi, quepanëdash Pabado.

9Adoaquien: Edusaden yacno buanac amboshon adombuembidi isadaidbo chuiquidon chiaidbëta mimbi naid chuimeuanun ¿adambi mibi ambo buanmepe? quepanëdash Uesto Pabado chiec. Aden buanmesho isadaidbon bëdambuen istsiashi, quequin tantiec Uesto adpanëdash. 10Adoaquien Pabadon: Doma yacnocquidon chuiquid tapambo empedadod caid Sesadën: Mibi yacnocquido cuidte chuiquid icta, caid icquin mimbimbo umbi naid chuisho tantiashun ubi cuidte chui. Isadaidbo icsambuen nambo iccombi. Abimbo Pabadon chiec, quequin mimbi tantiec. 11Icsambocquidquio neque. Pabado cuessunneme, quequin abimbo chuisho tantiash: Adoanenda, quenquioctsiabi. Isadaidbon abimbo chiacbimbuen chuisho tantiash: Pabado buanshun cuidta, quetiapimbo mibi iquec. Isadaidbo yacno buanmetiadquio iquebi, mibi quesho tantiashun: Doma yacnocquidon chuiquid tapambo Empedadod Sesadën ma umbi naid chuimeshun ma umbi icsambuen naid cuidnu, quepanëdash Pabado Uesto chiec.

12Aden Pabadon chuisho tantiash Uesto dadpenquio tantiaquidobëduidtsëqui onquetanec chouashun: Sesad umbi naid chuite bunebi, quebocsho tantiashun mibi aid yacno buanmenu, quepanëdash Uesto Pabado chiec.

Pabadon chuiquid utsi Aquidipa caid chiaid

13Adashic daëdpactsëc ushash chuiquid tapa utsi Aquidipa cuëmëdquidbëd aton chu Bedenise cuëmëdquid Uesto isedec chopanëdash. Sesadea yacnocquido cobednadod Uesto yanosh, quequin chiac aid isec chopanëdash.#25.13 Nëid chuiquid Aquidipa cuëmëdquid Edodes Aquidipan mado nepanëdash. Udiubo icshobi aton papan nacpadombuen Doma yacnocquidon chuiquid tapanquio nëid Aquidipa chuiquid tapabidi icmepanëdash. 14Adec choash dadpen ushec tabadsho isash Pabado quënën tsadunmiaid chiec Uesto nadpanëdash: Uedisën quënën tsadunmeshun niannëdaid Pabado cuëmëdquid nuntan abi iquec. 15Aidi nëmbo icnubi Edusaden yacno nidobi. Ambo nidacsho issun: Pabado icsambocquid neque. Cuessunneta, quequin nëish iua cuessunneshun pichicaquidon chuiquidobëtan isadaidbon chuiquid utsibon chuiposhi.

16Adoaquimbi: Mibëd chushcananaid Pabadontsen mibi bëisquin chiambocnoc: Cuessunneta, quetiapimbo iquebi. Doma yacnocquidon: Naden nata, quequin chiaid naquin adometiapimbo iquebi, quequin isadaidbon chuiquido chiombi. 17Aden chiac nëmbo aido chochoaid badiadash abi chushcaid aidon chuisho tantiec tsadnuec cuidte tsadte dapan tsadtoshon Pabado bëmiombi. 18Aden bëmiacsho umbi tantiacpaden abi chushcaquidon Pabadon icsambuen naid chienquio icposh. Aidon: Icsambuen naosh, caid nuquin chuiquidon: Naden nata, quequin chiaid niacambo yaid iccosh. 19Ambi papa caidën: Naden nata, quequin chiaid niacquid nec, quequin aid chuiquin umbi tantiaidpenquio Esus uënësash uincuenaid Pabadon chiaid chuiposhi isadaidbon chuiquidon. 20Adoaquimbi: ¿Mitsipadombuembimbi abimbo tantiape? queshun Pabadon aden chuipombi: Min matsesën: Naden nata, quequin chiaid tantienquio iquembique. ¿Ada Edusaden yacno nidtsia? Ashunquio mimbi naid chiac bëdambo ictsiash, quequin chiombi. 21Adoaquien: Chuiquid tapambo Empedadod caid Sesad yacno nidshun umbi naid chuite bunebi, queposh Pabado. Aden chiac quënë yacnoshon aid puduenmetiapimbo iccobi. Doma yacno buanmiabi yec nëmbobi Pabado quënën tsadec, quepanëdash Uesto Aquidipa chiec.

22Adoaquien Aquidipa: Umbitsen aidën chuibansho tantiate bunebi, quesho tantiash Uesto: Badiadshun aidëmbi chuisho tantianuna, quepanëdash.

Pabadon ambi naid chuiquid Aquidipa caid chiaid

23Aden Ueston chiaquien badiadash dashcute bëdaidquio dasiuidash aton chu Bedenisebëd Aquidipa choash matses iccuededte quënën puduedash sondadon chuiquidobëd chuiquid utsibo tabadpanëdash. Aido tabadsho issun Ueston Pabado bëmepanëdash. 24Bëmiac Pabado nënantanquio nidtonobi Uesto nadpanëdash: Chuiquid tapa Aquidipa, mibëd iccuededquidobëtan umbi bëmebued mibitedishun isec. Aidi isadaidbon: Nëid dada icsambocquid neque. Cuessunneme, quequin cumapenec cuëdquin chuiposhi. Edusaden yacno ubi nidacsho issun adoposhi. Adombuembidi nëshuntsen Sesadea yacnoshon chuiuaposhi. 25Aden chuisho tantiashun Pabado ambi naid chuimeuapombi. Aden chuisho tantiashun ambi icsambuen naid nibëdnuc: Nëid cuessunnetiapimbo iquebi, quequin tantiapombi. Aden umbi tantianubi: Empedadod yacno nidshun umbi naid chuite bunebi, quequin Pabadon chuiposhi. Adoac Doma yacno buanmembi. 26Aden buanmenuen ¿atotsimbi dada uaquin chuiquid tapambo empedadod chuipatsia? quequin tantienquio icquin Pabado ambi naid chuimeuaimbi: Ma aden chiac mibitedishun tantiapanu, quequin. Aden tantiashun: Naden chuiquin dada uata, mimbi cac dada uatsiambi. 27Aidën icsambuen nabanaid chuitequid nibëdnuc ¿atotsimbi chuipe? Chiambobi buanmiac icsambo ictsiash, quequin Ueston chuiquid Aquidipabëta abëd iccuededquido chuipanëdash.

Currently Selected:

Hechos 25: mcfNT

Highlight

Copy