Roma 3
3
1Kỹ Judeu ag hỹn inh mỹ: “kỹn mỹ há tũ nĩ, ẽg tỹ tỹ Judeu ag krẽ nỹtĩn kỹ?“ he sór mũ. “Ẽg gré fár junun kym kỹ nĩn kỹn mỹ tỹ nén ũ tũ nĩ?“ he sór ag hỹn mũ. 2Vó, há tãvĩ ti nĩ gé. Ẽg hã mỹ tóg ti vĩ ti tó ja nĩgtĩ, ẽg tỹ tỹ Judeu krẽ nỹtĩn kỹ. 3Ẽg kã mĩ ũ tóg ti vĩ kri fig tũ nĩgtĩ. Hã ra Topẽ pijé ag tugrĩn ti tỹ nén tó ja ẽn han ke tũ nĩ'. Ẽg tỹ ti vĩ han tũ ra tóg ti tỹ nén tó mũ ẽn han tĩ, Topẽ ti, ẽg jãvo. 4Ón vãnh ti nĩgtĩ. Ẽprã ke ag ne ónón tĩ'. Hã ra Topẽ tóg ón ke tũ pẽ nĩ. Hã kỹ tag tóg rán kỹ nĩ, hã vỹ: “vẽnh kar vỹ venh ke mũ, ã tỹ ã vĩ han tĩ ẽn ti,” he mũ. “Ũ tỹ ã jykre tugnỹm kỹ tóg venh ke mũ sir,” he ja tóg nĩ, Topẽ mỹ. Hã ra tóg ge nĩ.
5Kỹ Judeu ag hỹn ón kỹ inh mỹ: “kỹn hỹn há nĩ, ẽg jykre pãno ti,” he sór mũ. “Hã ra Topẽ tóg to ẽg vóg kónãn sór mũ, ti tỹ tỹ nén ũ há nĩ ra. Tag tugrĩn tóg jykre pãno nĩ ve nĩ,” he sór ag hỹn mũ. Ẽprã ke ag vĩ hã vẽ. 6Hã ra tóg kygnẽ kỹ nĩ. Topẽ jykre hã ne há nĩ', inhhã. Ti jykre há nĩn kỹ tóg ẽprã ke jykre to: “há tũ ti nĩ,” henh ke mũ.
7Hã ra Judeu ũ ag tóg ón kỹ: “vẽnh mỹ ẽg ki króm kỹ nỹtĩ vẽ,” he tĩ gé. “Ẽg ón tugrĩn Topẽ tỹ tỹ ũn mág nĩ tag vỹ vẽnh ven mũ. Hã kỹ ti tỹ ẽg ón mũ tag to: “inh vĩ mranh ja ãjag tóg nĩgtĩ,” hen kỹ tóg hã tũ tó mũ, Topẽ ti,” he ag tóg tĩ, ón kỹ. 8“Ti kórég han jé ẽg tóg ke mũ, Topẽ tỹ ẽg jykre kórég tỹ nén ũ há han jé,” he ag tóg tĩ, ón kỹ. Kỹ ag tóg iso ón kỹ: “tag tó ti tĩ, Paulo ti,” he tĩ gé. Ũ tỹ tag tó mũ ag vóg kónãn jé tóg ke mũ, Topẽ ti, ti jykre kuryj nĩn kỹ, ha vem nĩ.
Ẽg kar tỹ Topẽ vĩ mranh kãn
9Kỹ isỹ Judeu ag to ne tó nẽ? Ẽg mỹ fóg ag kãfór nỹtĩ, ẽg tỹ tỹ Judeu nỹtĩn kỹ? Vó, ag kãfór tũ ẽg nỹtĩ. Topẽ vĩ mranh kãn ẽg mỹr, Judeu, fóg, kanhgág, ag, fag, ẽg kar mỹr. Tag tó inh huri. Hã ra tóg ge nĩ. 10Hã kỹ tag tóg rán kỹ nĩ gé, ha mẽ: “ũn jykre kuryj vỹ tũ tĩ, ũn jykre kuryj venh ke tũ pẽ ẽg nĩ. 11Vẽjykre há han ki kagtĩg kar ẽg nỹtĩ. Ũ tỹ Topẽ jykre han sór mũ vỹ tũ tĩ. 12Ẽg kar vỹ Topẽ japry tovãnh kãn kỹ nỹtĩ. Jykre kórég kar ẽg nỹtĩ. Vẽjykre kuryj han vãnh ẽg nỹtĩ. Ũn jykre há venh ke tũ pẽ ẽg nĩ,” he tóg. 13“Un'ón (ka)mẽ kar ẽg nỹtĩ, jagnẽ to. Ẽg tỹ nén ũ ter rã tĩg kỹ ti ger tóg fun ke tĩ. Ẽg ón vỹ nén ũ ter ger tag ri ke nĩ. Jagnẽ mỹ ẽg tóg ónón tĩ gé. Ẽg vĩ jũ tỹ ẽg tóg jagnẽ kãgtén ri ke han tĩ gé. Kỹ tóg pỹn veneno ri ke nĩ. 14Vẽnh vĩ jũ tỹ ẽg fór nỹtĩ. Kỹ ẽg tóg vẽnh kar mỹ vĩ kónãn tĩ,” he tóg. 15“Jagnẽ kãgtén (ka)mẽ ẽg nỹtĩ, tag hã tóg ẽg mỹ sér tĩ. 16Ẽg tỹ hẽn mĩ mũ kỹ ẽg tóg nén ũ kar kókég tĩ. Hã kỹ ẽg mré ke fag vỹ jagtar nỹtĩ, ẽg to. 17Ẽg pijé vẽjykre kusa ve sór tĩ'. 18Topẽ kamẽg sór vãnh ẽg nỹtĩ,” he ja tóg nĩgtĩ, Topẽ vĩ tỹ rán kỹ nĩ ki. Hã ra tóg ge nĩ.
19Hã ra ẽg kar vỹ tag ki kanhró nỹtĩ, ha mẽ. Ẽg hã mỹ ti rán kỹ nĩ, Topẽ vĩ ti, ẽg tỹ ki króm jé. Hã ra ẽg tóg mranh kãn. Kỹ Topẽ tỹ ẽg mỹ: “ti kórég han ã,” he mũ ra, ẽg tỹ ti mỹ ne tónh ke tóg tũ tĩ. Hã jé tóg ẽg mỹ ti vĩ jẽnẽ ja nĩgtĩ, ẽg tỹ to ẽg kórég nĩ tag ki kanhrãn jé. 20Topẽ vĩ ki króm kãn ja tũ ẽg tóg nỹtĩ, hã kỹ ẽg kuryj tũ nỹtĩ, Topẽ mỹ. Hã ra ẽg tóg Topẽ tỹ vãsỹ ẽg jyvẽn ja ẽn mẽ kỹ ti vĩ mranh ki kanhrãn mũ, ti tỹ ẽg mỹ: “tag han tũg ra,” hen kỹ. Ge ra ẽg tóg mranh tĩ.
Topẽ tỹ ẽg kren han sór
21-22Vãhã Topẽ jykre kuryj tóg vẽnh ven ja nĩgtĩ. Ti hã ne ẽg mỹ vẽnh pãte fón mũ sir', inhhã', ẽg tỹ Jesus Cristo ki ge kỹ, ẽg tỹ ti tỹ ẽg jyvẽn ja ẽn mranh ja ra. Ti jykre kuryj hã vẽ. Vãsỹ tóg tó ja nĩ, ti tỹ tag han ke ti. Vãsỹ ti vĩ tó tĩ ag, profeta ẽn ag tóg tó ja nĩgtĩ gé, ti jykre tãg ke ti. Ũ tỹ ti ki ge kỹ nỹtĩ kar mỹ tóg vẽnh pãte fón tĩ. Kỹ ẽg kar tóg jagnẽ ri ke nỹtĩ ha, ẽg tỹ ti ki ge kỹ. 23Topẽ vĩ mranh kãn ẽg. Vẽjykre kuryj han ki kagtĩg ẽg nỹtĩ. 24Hã ra tóg ẽg jagãgtãn kỹ ẽg mỹ vẽnh pãte fón sór mũ. Fagrĩnh mỹ ke vẽ. Kaãm ke tũ ẽg tóg nĩ. Jesus Cristo tugnĩn tóg ẽg kren han sór mũ. 25Topẽ ne Jesus fẽg', ti hã tỹ ẽg tỹ Topẽ vĩ mranh tỹ tũ' he jé, ti kyvénh tỹ ẽg jagfy ti ki kãkutẽ kỹ. Kỹ ẽg tóg ti ki rã kỹ há nỹtĩ sir. Topẽ jykre kuryj hã vẽ sir. Jesus to ẽg ki kanhrãn mũ, vẽjykre kuryj ti. Hã kỹ Topẽ tóg, ẽg tỹ vãsỹ ti vĩ mranh ja ẽn to ẽg vóg kónãn ja tũ nĩ ver, ẽg to fen kỹ, 26ti tỹ ũri ẽg mỹ ti jykre tãg ven sór kỹ. Ti tỹ ẽg mỹ vẽnh pãte fón kỹ ẽg tóg ti mỹ kugryj nỹtĩ sir, ẽg tỹ Jesus ki gen kỹ. Topẽ jykre kuryj hã vẽ sir.
27Kỹ Judeu ag hỹn inh mỹ: “kỹ ẽg mỹ Topẽ mỹ há tũ nỹtĩ, ẽg tỹ ti vĩ ki króm sór mũ ra?“ he sór mũ. Hỹ, hã vẽ. Kórég ẽg nỹtĩ, hã kỹ ẽg tóg ti vĩ ki króm sór mũ ra mranh tĩ. Ẽg tỹ ti ki ge kỹ tóg ẽg mỹ vẽnh pãte fón tĩ. Kỹ ẽg há nỹtĩ. 28Tag ki kanhró ẽg nỹtĩ, ha mẽ. Ẽg tỹ Topẽ tỹ vãsỹ ẽg mỹ tó ja ẽn han sór mũ ra ẽg jykre pãno vỹ ẽg kã kã nĩ nĩ. Ẽg tỹ Jesus ki gen kỹ tóg ẽg mỹ vẽnh pãte fón ke mũ hã ra. 29Topẽ pijé Judeu ag tãvĩ vég nĩ nĩ'. Fóg ag vég ti nĩ gé, kanhgág ag ke gé, fag ke gé. 30Pir ti nĩ, Topẽ ti. Hã kỹ tóg ũ tỹ ti ki ge mũ ag mỹ vẽnh pãte fón tĩ, Judeu ag mré hã, fóg ag mré hã, kanhgág ag mré hã. Ẽg kar mỹ tóg vẽnh pãte fón tĩ, ag mỹ, fag mỹ ke gé.
31Kỹ ẽg mỹ ti ki ge kỹ Topẽ tỹ vãsỹ ẽg mỹ vẽjykre nĩm ja ẽn tỹ tũ' he tĩ, Topẽ tỹ Judeu ag jyvẽn ja ẽn ti? Vó. Vãhã ẽg ki króm há han ki kanhró nỹtĩ.
Currently Selected:
Roma 3: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
