Roma 13

Ẽg pã'i ag

1Ẽg pã'i ag vỹ nỹtĩ. Kỹ tóg ẽg tỹ ag tỹ ẽg mỹ nén tó mũ ẽn han kỹ há tĩ. Topẽ tỹ ag tỹ pã'i han hã vẽ, ag krĩn kỹ. Ti hã vỹ ũ tỹ tỹ pã'i nĩnh ke to jykrén tĩ'. 2Kỹ ag kato tẽ sór tũg nĩ. Topẽ hã vỹ pã'i ag vin tĩ, kỹ ag kato vãsãn tũg nĩ. Ũ tỹ ag kato vãsãnsãn mũ ag vóg kónãn jé ag tóg ke mũ, pã'i ag. 3Ẽg tỹ vẽjykre há han kỹ ẽg tóg pã'i ag vég mũ ra kanẽ jur ke tũ nĩ. Ũ tỹ vẽjykre kórég han mũ ag vỹ vẽso kanẽ jur tĩ, pã'i ag ve kỹ. Kỹ ẽg hỹn hẽ ri kenh ke mũ, ag tỹ ẽg kanẽ jun tũ nĩ jé? Vẽjykre há tãvĩ han jé ẽg tóg ke mũ. Kỹ ag tóg ẽg to vĩ há han ke mũ sir, pã'i ag. 4Ẽg pã'i ag ne ẽg jyvẽn tĩ', ẽg tỹ vẽjykre há to tar nỹtĩ jé. Ag tỹ Topẽ tỹ ag mỹ nén tó mũ han hã vẽ. Ã tỹ vẽjykre kórég han kỹ mũmẽg nĩ. Ã vóg kónãn jé ag tóg ke mũ, ha vem nĩ, hã jé Topẽ tóg ag vin, ag tỹ ũn jykre kórég ag vóg kónãn jé. 5Hã kỹ ag tỹ nén tó mũ han nĩ, ag tỹ ãjag to jũ tũ nĩ jé. Ãjag kakã kavénh ti tĩ gé, ãjag tỹ pã'i ag vĩ han tũ nĩn kỹ. Hã kỹ ki króm sórm nĩ.

6Kỹ governo mỹ imposto kajãm nĩ gé. Topẽ tỹ ag mỹ vẽnh rãnhrãj nĩm ja ẽn han ag tóg tĩ, governo mỹ rãnhrãj tĩ ag. Kỹ ag mỹ kajãm nĩ. 7Kỹ ãjag név kajãm kãn nĩ, governo mỹ ke gé. Ãjag tỹ pã'i ũ mỹ imposto kajãm ken kỹ ti mỹ ven nĩ, jãnkamy ti. Ãjag pã'i ag kamẽg nĩ, ag mỹ komẽr hã vĩm nĩ.

Topẽ jykre hã mĩ mũm nĩ

8Ãjag név kajãm kãn nĩ. Mré hã jagnẽ to há tãvĩ nỹtĩm nĩ gé. Ẽg tỹ jagnẽ to há nỹtĩn kỹ ẽg tóg Topẽ tỹ ẽg jyvẽn mũ ẽn ki króm kãn mũ sir. 9Ha vé, Topẽ tóg ẽg mỹ: “ã prũ tũ fi mré nỹ tũg nĩ, kỹ ã mén tũ mré nỹ tũg nĩ gé,” he ja nĩ. Kỹ tóg: “ũ tén tũg nĩ, nén ũ péju tũg nĩ, ũ to ón tũg nĩ, nén ũ to én tũg nĩ gé,” he ja nĩ gé. Ti tỹ ẽg jyvẽn vỹ e nỹtĩ. Hã ra ẽg tóg ẽg tỹ ti tỹ ẽg jyvẽn kar tỹ ũn pir han sór kỹ: “ã régre ki rĩr há han nĩ. Ã tỹ vẽnh ki rĩr há ri ke han nĩ,” henh ke mũ. 10Ẽg tỹ ẽg régre kar ki rĩr há nỹtĩn kỹ ẽg tóg ag mỹ nén ũ kórég han ke tũ nĩ. Ẽg tỹ jagnẽ ki rĩr há nỹtĩn kỹ ẽg tóg Topẽ tỹ ẽg jyvẽn ẽn ki króm kãn ke mũ.

11Vãsãn nĩ. Vẽjykre kórég tovãnh kãn nĩ. Ti tỹ ẽg kren han ke kurã vỹ kakó pẽ tĩ ha. Ẽg tỹ ti ki ge vén kỹ tóg ver kuvar gy ja nĩ. Hã ra tóg ũri kakó tãvĩ tĩ ha. 12Kuty tag tũg ke nẽ ha. Tỹ vaj ke ti nỹ ha. Ti tỹ kãnhmar kãtĩg ke to ken hã vẽ. Hã kỹ vẽjykre kavéj ẽn han mãn sór tũg nĩ. Ẽg tỹ kurã ki nén han tĩ ẽn han nĩ, vẽjykre kuryj ti, ẽg tỹ vẽjykre há han kỹ vẽjykre kórég kato tẽ jé, tỹ tũ' he jé. 13Ẽg tỹ kurã mĩ tĩg há han tĩ ẽn ri ke han nĩ. Ag tỹ baile ki nén ũ vẽnh mỹ han tĩ ẽn han tũg nĩ. Kronkron tũg nĩ gé. Fag to én tũg nĩ. Kỹ fag mré nỹ tũg nĩ, ag mré ke gé. Jagnẽ to jũ tũg nĩ gé. Jagnẽ tũ to én tũg nĩ gé. 14Ẽg Senhor tỹ Jesus Cristo jykre tãg hã han nĩ. Ẽg tỹ nén to én mũ ẽn han mãn sór tũg nĩ. Ẽg jykre pãno kórég tovãnh kãn nĩ.

Currently Selected:

Roma 13: kgp

Highlight

Copy