Marcos 9

1Kỹ tóg ag mỹ: “ha vé, ki hã sóg tó mũ,” he mũ. “Ãjag kã mĩ ũ ag vỹ Topẽ tỹ tỹ ẽg pã'i nĩ venh ke mũ, ag ter ke to hã, tag ki ẽg mré nỹtĩ ũ ag. Topẽ vỹ tar nĩ. Ti tar nĩ ve jé ag tóg ke mũ,” he tóg.

Jesus tỹ vẽnh ve ũ han

(Mt 17.1-13; Lc 9.28-36)

2Kurã tỹ 6 (ke) tũg kar kỹ Jesus tóg ag mỹ: “mũ nỹ, vyr mỹ,” he mũ. Pedro mỹ tóg ke mũ, Tiago mỹ ke gé, João mỹ ke gé. Ag hã mré tóg pãnónh ra tĩ mũ. Kỹ tóg ag jo vẽnh ve ũ han mũ. 3Ti kur vỹ tóg kókov tãvĩ nĩ sir, kópréj. Fag tỹ kur kupri fa kỹ ti kupri kãfór tóg nĩ. 4Kỹ Elias tóg sir vẽnh ven mũ, Moisés ke gé. Jesus mré ag tóg vẽmén mũ.

5Kỹ Pedro tóg Jesus mỹ: “Senhor, tag ki tóg há nĩ,” he mũ. “Ẽg tỹ tag ki pãjó tãgtũ han kỹn hỹn há nĩnh mũ vẽ, ã mỹ, Moisés mỹ, Elias mỹ ke gé,” he tóg. 6Hã ra tóg ti tỹ nén tónh ke mũ ki kagtĩg nĩ, ag fe tỹ jũrũn ken kỹ. 7Kỹ vẽsỹmér kanhkã góg vỹ ag kri rũm ke mũ sir. Kỹ vẽnh vĩ tóg mẽ há' he mũ, kanhkã góg kã tá. Kỹ tóg: “inh kósin hã vẽ. Inh fe pẽ vẽ. Ti vĩ jẽmẽ ra,” he mũ. 8Kỹ vãhã ti mré mũ tĩ ag tóg Jesus hã vég mũ sir. Ti mré nỹtĩ ag ve mãn tũ ag tóg nĩ.

9Kỹ ag tóg pãnónh tá kãre mũ sir. Kỹ tóg: “ker ũ mỹ ãjag tỹ ũri nén vég mũ tó hẽ'. Ẽprã ke fi kósin tỹ ti ter ja tá vỹn ke kar hã inh kãmén nĩ,” he mũ. 10“Ne nẽ hỹn, ti tỹ: iser ja tá vỹn ke, he mũ tag ti?“ he ag tóg mũ, jagnẽ mỹ. 11Kỹ ag tóg ti mỹ: “hã ra Topẽ vĩ to ẽg kanhrãn tĩ ag tóg: “Cristo kãtĩg ke to hã Elias tóg kãtĩg vén ke mũ,” he tĩ. Hã mỹ'?“ he mũ.

12Kỹ tóg: “hỹ, kãtĩg jé tóg ke mũ, Elias ti, nén kar han mãn jé,” he mũ. “Hã ra sóg rán kỹ nĩ gé. Tỹ sóg ẽprã ke fi kósin nĩ mỹr. Jagtar jagy han jé sóg ke mũ. Ag tỹ iso é henh ke vẽ. 13Kỹ Elias vỹ hur kãtĩg gé, kỹ ag tóg ag tỹ ti ki nén han sór mũ ẽn han. Hã kỹ tóg rán kỹ nĩ,” he tóg.

Jesus tỹ kyrũ jagrẽ kórég kutẽm

(Mt 17.14-21; Lc 9.37-43a)

14Vãhã ag tóg Jesus mré mũ tĩ ũ ag tá junjun mũ. Vẽnh e tóg ag pénĩn nỹtĩ. Kỹ Topẽ vĩ to ẽg kanhrãn tĩ ag tóg ag vĩ kato vĩ ũ han mũ. 15Ag tỹ Jesus ve kỹ tóg vãhã ag mỹ e tĩ, vẽnh e ẽn mỹ. Kỹ ag tóg ti to pétẽ kãmũ kỹ ti mỹ: “ã mỹ há?“ he mũ. 16Kỹ tóg ag mỹ: “ãjag tỹ ne tỹ vẽmén nẽ?“ he mũ.

17Kỹ ag kã ũ tóg ti mỹ: “Senhor, inh kósin pére sóg kãtĩg, ã to,” he mũ. “Jagrẽ kórég ti nĩ, hã kỹ tóg vĩ vãnh pẽ nĩ. 18Ti jagrẽ kórég tỹ ti kã vyryn ke kỹ tóg kutẽ' he tĩ. Kỹ tóg jãrãn tĩ. Ti jã tỹ tóg gángán ke tĩ. Tar' he tóg tĩ. Ã mré mũ tĩ ag mỹ sóg to vĩ vẽ, hã ra ag tóg tỹ hẽ ri ke tũ nĩ,” he tóg.

19Kỹ Jesus tóg: “ãjag ne tóg inh ki ge há han tũ nĩgtĩ',” he mũ. “Topẽ tóg ãjag mỹ krój nĩ ve nĩ, ãjag kar mỹ. Inh mỹ tóg e tĩ, sỹ to krónh kenh ha mẽ tóg tĩ. Inh mỹ ti pére kãmũjẽg,” he tóg. 20Ti jagrẽ kórég tỹ Jesus ve kỹ tóg kyrũ kã vyryn ke mãn mũ gé. Kỹ tóg kutẽ mãn mũ gé sir. Vĩrĩn', vĩrĩn' he tóg mũ. Jãrãn tóg mũ gé sir.

21Kỹ tóg ti panh mỹ: “mỹ si há tĩ ha?“ he mũ. Kỹ tóg: “hỹ, ti sĩ kã tóg ge nĩ,” he mũ. 22“Kejẽn tóg pĩ ki ti fón mũ, goj ki ke gé. Ti tỹ ti tén sór vẽ. Ã tỹ hẽ ri ken há nĩn kỹ ẽg jagãgtãn nĩ, ti tỹ há' hem nĩ,” he tóg.

23Kỹ tóg: “ã tỹ hẽ ri ken há nĩn kỹ, he tũg nĩ, inh mỹ. Ũ tỹ Topẽ ki rã mũ ẽn tỹ inh hẽ ri ken há han tĩ, nén kar tỹ,” he mũ.

24Kỹ vẽsỹmér kyrũ panh tóg: “ti ki sóg rãnh mũ,” he mũ, jamã há ra. “Isỹ ti ki rã tũ ẽn tỹ inh ki tỹ tũ' hem nĩ,” he tóg.

25Hã ra tóg ũ tỹ hẽn ri ke fag vẽnhmãn vég mũ, kỹ tóg ti jagrẽ kórég to jũ mũ. “Vẽjagrẽ vĩ vãnh', vẽjagrẽ kutu', kãkutẽ ra, ti ki rã mãn tũg,” he tóg.

26Kỹ tóg prẽr mũ sir. Ti tỹ jũrũn ke han tóg mũ. Kỹ tóg kyrũ ki kãkutẽ mũ sir. Kỹ tóg ter ve nĩ, kỹ ag tóg ti to: “tũg ja ti nĩ,” he mũ.

27Hã ra Jesus tóg ti nĩgé kãgmĩ kỹ ti nĩm mũ, kỹ tóg jẽgnẽ mũ sir. Há' he tóg mũ sir.

28Kỹ tóg ĩn kã ra rã mũ. Tá ti mré mũ tĩ ag tóg ti pin kỹ ti mỹ: “ẽg ne tóg ti tỹ há' he ja tũ nĩ'. Hẽ ri ken kỹ, hỹn?“ he mũ.

29Kỹ tóg: “vẽjagrẽ kórég tỹ ge kutẽm tóg jagy nĩ,” he mũ. “Topẽ mré ẽg vĩ tĩ, kỹ ẽg tóg vãkrég tĩ gé sir. Kỹ tóg vãhã kãkutẽ tĩ,” he tóg.

Jesus tỹ ti ter ke tó mãn

(Mt 17.22-23; Lc 9.43b-45)

30Kỹ ag tóg tá kãpa kỹ Galiléia mĩ mũ mũ. Kỹ tóg: “ker ũ ẽg tỹ mĩ mũ ki kanhrãn hẽ',” he mũ. 31Ti tỹ ti mré mũ tĩ ag kanhrãn sór vẽ, hã kỹ tóg ke mũ. Kỹ tóg ag mỹ: “ẽprã ke fi kósin ẽn vỹ jagtar nĩnh mũ,” he mũ. “Inh hã vẽ. Ẽprã ke ag vỹ ag tỹ isỹ nén han sór mũ ẽn han ke mũ. Ag tỹ isén ke vẽ. Hã ra sóg kurã tãgtũ tũg kỹ rĩr mãn mũ,” he tóg.

32Kỹ tóg ag tỹ ti tỹ nén tó mũ tag to jykrén tũ tĩ. Hã ra ag tóg ag tỹ ti kamẽg kỹ ti ki jẽmẽg tũ nĩ.

Ũ tỹ tỹ ũn mág nĩ

(Mt 18.1-5; Lc 9.46-48)

33Kỹ ag tóg mũ mãn kỹ ẽmã tỹ Cafarnaum tá junjun mũ sir, ũ tỹ 12 (ke) ag mré. Ðn krẽm nỹtĩn kỹ tóg ag mỹ: “ẽpry jagma mũn kỹ ãjag ne tó ja nĩ?“ he mũ.

34Hã ra ag tóg ti mỹ tó tũ nĩ. Jagnẽ mỹ ag tóg: “ẽg kã ũ tỹ hẽ nỹ hỹn tỹ ũn mág nĩ?“ he ja nĩ.

35Kỹ Jesus tóg ag mỹ: “ãjag mỹ tỹ ũn mág nỹtĩ sór mũ'?,” he mũ. “Kỹ tỹ ũn sĩ ri ke nỹtĩm nĩ. Ũ tỹ ãjag mỹ nén tó mũ han nĩ, ti há nĩn kỹ,” he tóg. 36Kỹ tóg gĩr ũ mỹ: “kunĩg,” he mũ. Ag kuju kã ti fẽg kỹ tóg ti nunh jagma ti pẽ fón mũ sir. Kỹ tóg ag mỹ: 37“Gĩr tỹ ge ri ke nỹtĩm nĩ. Ãjag tỹ isugrĩn ũn sĩ to há nỹtĩn kỹ tóg inh mỹ há tĩ, kỹ ãjag tóg ũ tỹ ijẽnẽg mũ ẽn to há nỹtĩ gé sir. Tỹ ũn mág nĩ to ken hã vẽ,” he tóg.

Ũ tỹ Jesus mré ke

(Lc 9.49-50)

38Kỹ João tóg Jesus mỹ: “Senhor, ũ ve ẽg tóg. Hã ra ẽn tóg ã jiji tó kỹ vẽjagrẽ kórég pan ja nĩgtĩ,” he mũ. “Hã ra tóg tỹ ẽg mré ke tũ nĩ, kỹ ẽg tóg ti mỹ: ke tũg nĩ, hé,” he tóg.

39Hã ra tóg: “vó, ti tỹ vẽjagrẽ kórég pan kamẽg tũg nĩ,” he mũ. “Ũ tỹ inh jiji tó kỹ nén ũ há han kỹ tóg iso há nĩ,” he tóg. 40“Ũ tỹ ẽg kato tẽ tũ nĩn kỹ tóg tỹ ẽg mré ke nĩ sir,” he tóg. 41“Sỹ ke há vẽ. Kejẽn ũ tóg ãjag mỹ, nén ũ sĩ ven mũ, goj hẽn ri ke mũn, ãjag tỹ tỹ inh mré ke nỹtĩ tugrĩn. Ẽn tóg vẽnh kato nén ũ há venh ke mũ gé, ha vem nĩ,” he tóg.

Ẽg tỹ Topẽ vĩ mranh

(Mt 18.6-9; Lc 17.1-2)

42Kỹ tóg “ũn sĩ tag vỹ inh ki rã kỹ jẽ,” he mũ. “Kejẽn ũ tóg ti tỹ inh vĩ mranh han sór mũ. Ẽn jykre vỹ kórég tãvĩ nĩ. Ũ tỹ pó mág tỹ ẽn nunh to sa kỹ goj nig ki ti fón kỹ tóg há nĩnh mũ vẽ. Jagy tãvĩ tóg nĩ, ũ tỹ gĩr tỹ isovãnh han kỹ,” he tóg.

43“Ã tỹ nén ũ péju to Topẽ vĩ mranh kỹ ã nĩgnó kym nĩ, ã tỹ ke mãn tũ nĩ jé. Jagy tóg nĩ, ã nĩgnó pir nĩ ti. Jãvo ã tỹ rĩr krỹg ja tũ venh ke tóg inhhã há nĩ. Ã tỹ ã nĩgnó régre ra nũgme ki kutẽn kỹ tóg jagy kãfór tĩnh mũ. 44Tá ga ga tóg ã konh mũ, hã ra tóg tũ' henh ke tũ nĩ. Tá pĩ ẽn vỹ nhyr ke tũ nĩ gé, nũgme ki.

45Ã tỹ hẽn kã tátĩg to Topẽ vĩ mranh kỹ ã pẽn kym nĩ, ã tỹ ke mãn tũ nĩ jé. Jagy ti nĩ, ã tĩg vãnh nĩn ti. Jãvo ã tỹ rĩr krỹg ja tũ venh ke tóg inhhã há nĩ. Ã tỹ ã pẽn régre ra nũgme ki kutẽn kỹ tóg jagy kãfór tĩnh mũ. 46Tá ga vỹ ã konh mũ gé, hã ra tóg tũ' henh ke tũ nĩ. Tá pĩ ẽn vỹ nhyr ke tũ nĩ gé, nũgme ki.

47Ã tỹ nén ũ ki vẽ'ĩ to Topẽ vĩ mranh kỹ ã kanẽ tỹ nám kem nĩ, ã tỹ ke mãn tũ nĩ jé. Jagy ti nĩ, ã kyvó nĩ ti. Jãvo tóg há nĩ, ã tỹ Topẽ tỹ tỹ ẽg pã'i nĩ ven kỹ. Ã tỹ ã kanẽ régre ra nũgme ki kutẽn kỹ tóg jagy kãfór tĩnh mũ. 48Tá ga tóg ã konh mũ, hã ra tóg tũ' henh ke tũ nĩ. Tá pĩ ẽn vỹ nhyr ke tũ nĩ gé, nũgme ki,” he tóg.

49“Ãjag tỹ tag ki jagtar nỹtĩ tóg pĩ tỹ ãjag pũn ri ke nĩ. Kỹ tóg, ẽg tỹ Topẽ mỹ nén ũ pũn mũ ri ke nĩ. Sa ri ken hã vẽ,” he tóg. 50“Sa vỹ há nĩ. Hã ra ti kãhór nĩn kỹ tóg kórég nĩ, kỹ ẽg tỹ ne tỹ tỹ kajã' henh ke tóg tũ tĩ. Kỹ sa há ri ke nỹtĩm nĩ. Jagnẽ to krĩ kusa nỹtĩm nĩ,” he tóg.

Currently Selected:

Marcos 9: kgp

Highlight

Copy