Marcos 3

Jesus tỹ ũn nĩgé tóg tỹ há' he

(Mt 12.9-14; Lc 6.6-11)

1Kejẽn tóg vẽnh kanhrãn jafã ra rã mãn mũ. Hã ra ũ tóg tá jẽ nĩ, ti nĩgé tóg tóg ja nĩ. 2Kỹ ag tóg ti tugnỹm mũ sir. “Kema ti tỹ vẽnhkán ke kurã ki ti tỹ há' he ve jé,” he ag tóg mũ. Ag tỹ pã'i ag mỹ ti tó sór vẽ, ti tỹ vẽnhkán ke kurã ki Topẽ vĩ mranh kỹ. 3Hã ra Jesus tóg ũn nĩgé kórég ẽn mỹ: “kunĩg,” he mũ. 4Kỹ tóg ag kar mỹ: “vẽnhkán ke kurã ki ẽg hỹn ne han mũ', ẽg tỹ Topẽ vĩ ki króm jé'? Ẽg mỹ hỹn nén ũ há han mũ'? Ẽg tỹ ũ tũ kókén kỹn mỹ kórég tũ nĩnh mũ'? Ẽg mỹ ũ kren han mũ hỹn'? Ẽg tỹ ũ tén kỹn mỹ há nĩnh mũ hỹn'?“ he tóg. Hã ra ag tóg ti mỹ vĩ tũ nĩ sir.

5Kỹ tóg jũ mũ sir. Fe kaj tóg nĩ sir, ag krĩ tũ nỹtĩn kỹ. “Ã nĩgé tỹ krỹg' hé,” he tóg ti mỹ. Kỹ tóg há' he mũ sir, vãhã.

6Kỹ vãhã Fariseu ag tóg mũ mũ sir, jagnẽ mré ti to jykrén jé, pã'i mág tỹ Herodes mré ke ag mré ke gé. “Ẽg hỹn hẽ ri ken kỹ ti tén mũ?“ he ag tóg mũ.

Jesus tỹ goj nig fyr tá ag kanhrãn

7Hã ra Jesus tóg ti mré mũ tĩ ag mré goj nig mág tỹ Galiléia ra tĩ mũ, vẽnh e tũg ja ra. Ge ra vẽnh e ag tóg ti nón mũ mũ. Ga tỹ Galiléia tá ag tóg kãmũ mũ, ga tỹ Judéia tá ke gé, 8ẽmã tỹ Jerusalém tá, ga tỹ Iduméia tá, goj tỹ Jordão mã tá, ẽmã tỹ Tiro tá, ẽmã tỹ Sidom tá ke gé. E tãvĩ ag nỹtĩ, e pẽ. Ti tỹ nén han mũ kar mẽ kỹ ag tóg ti to kãmũ mũ. 9Kỹ Jesus tóg vẽnh e tỹ ti kutãn kỹ ti mré mũ tĩ ag mỹ tó mũ, ag tỹ ti mỹ canoa jãján jé. 10Ũ tỹ hẽn ri ke tỹ tóg há' he ja nĩ. Hã kỹ ũn kagyga tỹ hẽn ri ke ag tóg ti pénĩn nỹtĩ. Ag tỹ ag nĩgé tỹ ti mẽ sór vẽ, fag ke gé. 11Kỹ ũn jagrẽ kórég ag vỹ tá nỹtĩ gé. Ag tỹ Jesus ve kỹ ag tóg prẽnprẽr mũ sir. “!..Tỹ ã Topẽ kósin ne..!“ he ag tóg mũ. 12Kỹ tóg ag mỹ vĩ tar han mũ. “Ker inh kãmén hẽ',” he tóg.

Jesus tỹ ũ tỹ 12 (ke) ag vin

(Mt 10.1-4; Lc 6.12-16)

13Kejẽn tóg pãnónh ra tĩ mũ. Kỹ tóg tá ag jé prẽr kỹ ag kuprẽg mũ, ag vin jé. 14Ũ tỹ 12 (ke) ẽn ag kuprẽg tóg mũ sir, ag tỹ tỹ ti mré mũ tĩ nỹtĩ jé, ti tỹ ag jẽgnẽ jé, Topẽ vĩ tó jé. 15Ag mỹ tóg vẽjykre nĩm mũ, ag tỹ vẽjagrẽ kórég pan to tar nỹtĩ jé. 16Ũ tỹ 12 (ke) ag hã vẽ, ha mẽ: Simão, Jesus tỹ ti jiji ũ hã vỹ: Pedro, he mũ, 17Tiago ke gé, ti jãvy tỹ João mré, Zebedeu krẽ tag ag. Jesus tỹ ag jiji ũ hã vỹ: Boanerges, he mũ, ẽg vĩ ki ke hã vỹ: ta tỹ tỹrỹr he ri ke ag, he mũ, 18André ke gé, Filipe ke gé, Bartolomeu ke gé, Mateus ke gé, Tomé ke gé, Tiago ke gé, Alfeu kósin tag ti, Tadeu ke gé, Simão ke gé, ag tỹ ũ to: Zelote, he mũ tag ti, 19Judas Iscariotes ke gé, ũ tỹ pã'i ag mỹ Jesus ven mũ ẽn ti.

Topẽ vĩ to ẽg kanhrãn tĩ ag tỹ Jesus to vĩ kónãn

(Mt 12.22-32; Lc 11.14-23; 12.10)

20Kỹ Jesus tóg ag mré tĩg kỹ ti jamã tá jun mũ. Kỹ vẽnh e tóg sir tá vẽnh mãn mãn mũ, kỹ tóg ag jẽn ke mũ ra vẽnh mỹ tĩ. 21Kỹ ti kanhkã fag vỹ ti kãme mẽ kỹ ti kãgmĩnh kãmũ mũ. “Krĩ vẽnh mỹ nĩ ve ti nĩ,” he fag tóg. Hã ra tóg fag mré tĩ tũ nĩ.

22Kỹ Topẽ vĩ to ẽg kanhrãn tĩ ag tóg tá junjun mũ gé, ti ve jé. Jerusalém tá ag tóg kãmũ jẽg. Ag tỹ ti to: “Japo tỹ tóg jagrẽ nĩ. Hã kỹ tóg vẽjagrẽ kórég ag pan tĩ,” hen kỹ. “Belzebu jykre han tóg tĩ, Nén-Kórég ag pã'i mág ẽn jykre ti,” he ag tóg.

23Kỹ Jesus tóg ag jé prẽr kỹ: “Satanás vỹ vẽjagrẽ kórég pan tũ nĩgtĩ mỹr,” he mũ. 24“Pã'i pir krẽm ke ag tỹ jagnẽ kato tẽgtẽn kỹ ag tóg jagnẽ kãgtén kãn ke mũ. 25Ðn pir krẽm ke fag tỹ jagnẽ kato tẽ kỹ fag tóg jagnẽ kãgtén kãn ke mũ gé. 26Satanás krẽm ke ag tỹ jagnẽ kato tẽ kỹ ag tóg jagnẽ tỹ tũ' henh ke mũ gé, kỹ tóg tũ' he mũ sir, Satanás ti. 27Ẽg tỹ ũ tar ĩn tá ti tỹ nén ũ péju sór kỹ ẽg tóg, ti se vén tĩ. Kar kỹ hã ẽg tóg ti tũ mãn ke mũ sir. Ge ti nĩgtĩ, sỹ nén han mũ ti. Japo vỹ tar nĩ, hã ra sóg hur ti sé. Hã kỹ sóg ti tũ ag kygvãg mũ sir. Ag jagrẽ kórég ẽn pan sóg mũ sir,” he tóg.

28“Sỹ ke há vẽ, hã kỹ sóg tó mũ. Topẽ vỹ ãjag mỹ vẽnh pãte fón kãn mũ, ãjag tỹ ti vĩ mranh ja kar ẽn tỹ, ãjag tỹ ti to vĩ kónãn ẽn mré hã. 29Jãvo ãjag tỹ Topẽ kuprĩg to vĩ kónãn kỹ tóg ãjag mỹ vẽnh pãte fón mãn ke tũ nĩ. Ẽn vỹ ãjag hã kã nĩ nĩ. Kurã tũ ti nĩ,” he tóg.

30Ag mỹ tóg ke mũ, ag tỹ ti to: “Japo tỹ tóg jagrẽ nĩ,” hen kỹ.

Jesus mré ke pẽ fag

(Mt 12.46-50; Lc 8.19-21)

31Kỹ ti mỹnh fi tóg ti jãvy ag mré ti venh kãtĩ mũ. Re tá fag nỹtĩ. Kỹ fag tóg ũ jẽnẽg mũ, ti to. 32Jesus pénĩn tóg fór tĩ, kỹ tóg ti mỹ: “ã mỹnh fi vỹ re tá jẽ, ã jãvy ag mré. Fag tỹ ã mré vẽmén sór vẽ,” he mũ.

33Kỹ tóg: “mẽ',” he mũ. 34Hã ra tóg ũn nĩgnĩg kỹ nỹtĩ ag ki ẽvãnh kỹ ag to: “inh mỹnh fi hã vẽ, inh jãvy ag hã vẽ gé,” he mũ. 35“Ũ tỹ Topẽ vĩ han mũ ẽn ag hã vỹ tỹ inh jãvy nỹtĩ, inh ve fag ke gé, inh mỹnh fi ke gé,” he tóg.

Currently Selected:

Marcos 3: kgp

Highlight

Copy