Marcos 11

Jesus tỹ Jerusalém tá jun

(Mt 21.1-11; Lc 19.28-40; Jo 12.12-19)

1Vãhã ag tóg Jerusalém to hã nỹtĩ. Kỹ ag tóg ẽmã tỹ Betânia tá junjun vén mũ, ẽmã tỹ Betfagé tá, krĩ tỹ Oliveiras tá ke gé. Kỹ Jesus tóg ti mré mũ tĩ régre ag jẽgnẽ kỹ ag mỹ: 2“ha ẽg jo ẽmã nĩ ẽn ra mũjẽg,” he mũ. “ Tá ãjag tóg burrica fi krẽ venh ke mũ. Se kỹ tóg jẽ. Ũ vỹ ver ti kri nĩ ja tũ nĩ. Ti kavãn kỹ ti pére kãmũm nĩ,” he tóg. 3“Hẽn ri ke mũn ag tóg ãjag mỹ: ãjag tỹ ne jé ti kavãn nẽ? henh ke mũ. Kỹ ag mỹ: ẽg Senhor tóg ti ve sĩ han sór mũ, kãnhmar tóg ti jẽnẽ mãn mũ, hem nĩ,” he tóg.

4Kỹ ag tóg mũ mũ sir. Burrica fi krẽ vég ag tóg mũ. Jãnkã rã tóg se kỹ jẽ. Kỹ ag tóg ti kavãg mũ sir. 5Kỹ ag tóg ag mỹ: “ãjag tỹ ne jé burrica sĩ kavãn nẽ?“ he mũ.

6Kỹ ag tóg Jesus tỹ ag mỹ nén tó ja ẽn ti tó mũ. Kỹ ag tóg: “ha ma mũjẽg ge,” he mũ. 7Kỹ ag tóg burrica krẽ ma mũ mũ sir, Jesus to. Ag kur tỹ ag tóg ti kri kugjén mũ, kỹ tóg kri nĩ mũ sir. 8Kỹ vẽnh kar tóg ẽpry kri ag kur kugjén mũ sir, jo ũ ag tóg ka féj kre kỹ ti jo vãvãm mũ gé. 9Kỹ ũ ag tóg ti jãmĩ mũ mũ, jo ũ ag tóg ti nón mũ mũ. Ẽn ag tóg prẽnprẽr mũ sir. “!..Viva..! !..pã'i vỹ ẽg tá jun, ẽg Senhor mág tỹ ti jẽnẽn kỹ..! 10!..Sér tãvĩ tóg tĩ..! !..Ẽg pã'i vẽ mỹr, ẽg jógjóg tỹ Davi ri kén..! !..Topẽ tá tóg kãtĩg, ũ tỹ kynhmỹ nĩ ẽn tá, viva..!“ he ag tóg mũ, prẽnprẽr kỹ.

11Gen kỹ tóg Jerusalém ra rã mũ sir, Topẽ ĩn ra. Kỹ tóg nén kar ki ẽvãnh mũ, kar kỹ tóg rãké ra Betânia ra tĩg mãn mũ, ũ tỹ 12 (ke) ag mré.

Ka tỹ figueira

(Mt 21.18-19)

12Tỹ vaj kỹ, ag tỹ Betânia tá kãmũ kỹ tóg kókĩr mũ. 13Kỹ tóg ka tỹ figueira féj vég mũ. Kỹ tóg to tĩ mũ, ti kanẽ ko jé. Tá jun kỹ tóg ti féj tãvĩ vég mũ, ti kanẽn ke pétẽm tũ nĩn kỹ. 14Kỹ tóg figueira ẽn mỹ: “ũ tóg ã kanẽ ko mãn ke tũ nĩ ha,” he mũ. Hã ra ti mré mũ tĩ ag tóg ti vĩ mẽg mũ.

Jesus tỹ Topẽ ĩn krẽm ag pan

(Mt 21.12-17; Lc 19.45-48; Jo 2.13-22)

15Kỹ ag tóg mũ mãn kỹ Jerusalém tá junjun mũ sir. Topẽ ĩn ra tóg rã mũ. Tá tóg nén ũ vẽne he tĩ ag ve kỹ ag pan kãn mũ sir, nén ũ kũmpra he tĩ ag ke gé. Topẽ ĩn krẽm ag tóg nén kar kygjãm tĩ, jãnkamy trocar he ag tĩ gé. Ag mesa tỹ tóg vyryn ke mũ, Jesus ti. Sórãg vẽne he tĩ ag nĩgnĩ jafã tỹ tóg vyryn ke mũ gé sir. 16Kỹ tóg ag tỹ Topẽ ĩn fĩn nén gé mũ kamẽg mũ gé sir. 17Kỹ tóg ag mỹ: “Topẽ vĩ rá to jykrén nĩ,” he mũ. “Inh ĩn jiji hã vỹ: nação kar tỹ Topẽ mré vĩ jafã, he mũ, he tóg, Topẽ vĩ rá ki. Hã ra ãjag tóg krẽm nén kar pigju mũgtĩ,” he tóg.

18Hã ra Topẽ tũ to pã'i ag vỹ Jesus vĩ mẽg mũ. Kỹ ag tóg: “ẽg hỹn hẽ ri ken kỹ ti tén ke mũ?“ he mũ. Hã ra ag tóg ti kamẽg mũ. Vẽnh kar mỹ tóg há tĩ, ti vĩ ti. Hã kỹ ag tóg ti vóg tũ nĩ sir.

19Kutyg kỹ ag tóg ẽmã mág ki pa mãn mũ sir.

Ka tỹ figueira tóg

(Mt 21.20-22)

20Tỹ vaj kỹ ag tóg ẽmã mág ẽn ra mũ mãn mũ sir. Mũ kỹ ag tóg sir ka tỹ figueira ẽn ve mãn mũ, hã ra tóg tóg ja nĩ, ti jãre mré hã. 21Kỹ Pedro tóg Jesus vĩ ja ẽn mĩ ẽkrén kỹ ti mỹ: “ha vé, Senhor,” he mũ. “Ã vĩ ja ẽn hã vẽ. Ã tỹ ka tỹ figueira mỹ vĩ kónãn ja ẽn vỹ tóg ja nĩ,” he tóg.

22Kỹ tóg ag mỹ: “Topẽ ki ge pẽ han nĩ,” he mũ. 23“Sỹ ke há vẽ: kejẽn ãjag tóg krĩ mỹ: ha goj nig ki ráj kutẽ, henh ke mũ. Kỹ tóg ki ráj ke mũ, ãjag tỹ ãjag fe tỹ: ti mỹ ki ráj mũ vỹ? he tũ nĩn kỹ,” he tóg. 24“Hã kỹ sóg ãjag mỹ ke mũ. Ãjag tỹ Topẽ mỹ nén ũ to vĩ kỹ to: han jé tóg ke mũ, hem nĩ, kỹ ãjag tóg venh ke mũ sir,” he tóg.

25“Ãjag tỹ kejẽn Topẽ mré vĩ kỹ, ãjag tỹ ũ to jũ mũ mĩ ẽkrén kỹ, ti mỹ vẽnh pãte fón nĩ. Ãjag tỹ gen kỹ tóg vẽnh kato ãjag mỹ vẽnh pãte fón ke mũ gé, ẽg jóg mág tỹ kanhkã tá nĩ ti. 26Ãjag tỹ hã ra ag mỹ vẽnh pãte fón tũ nĩn kỹ ẽg jóg mág vỹ vẽnh kato ãjag mỹ vẽnh pãte fón ke tũ nĩ gé,” he tóg.

Jesus tỹ ũ tỹ ti jẽnẽg mũ tó tũg

(Mt 21.23-27; Lc 20.1-8)

27Kỹ ag tóg mũ mãn kỹ Jerusalém tá junjun mãn mũ sir. Topẽ ĩn ra tóg tĩ mũ. Kỹ Topẽ tũ to pã'i ag tóg ti venh kãmũ mũ. 28“Ũ nỹ ã mỹ: tag han nĩ, hé? Ũ nỹ ã jẽnẽ?“ he ag tóg.

29Kỹ tóg ag mỹ: “ãjag ki sóg jẽmẽnh ke mũ gé, vẽnh kato,” he mũ. “Ãjag tỹ inh mỹ tó há han kỹ sóg ãjag mỹ ũ tỹ inh jẽnẽg mũ tónh ke mũ gé,” he tóg. 30“João vỹ ag kygpég tĩ ja nĩgtĩ. Ti mỹ kanhkã tá vẽjykre han, ẽprã vẽjykre vó? Ũ nỹ ti jẽnẽ?“ he tóg.

31Kỹ ag tóg jagnẽ mỹ: “ẽg tỹ ti mỹ: Topẽ tỹ ti jẽnẽ ja vẽ, hen kỹ tóg ẽg mỹ: ãjag tỹ ne jé ti vĩ kri fi ja tũ nĩ nẽ? henh ke mũ. 32Ẽg tỹ hã ra ti mỹ: ẽprã ke jykre ja vẽ, hen kỹ tóg vẽnh mỹ nỹ gé,” he ag tóg, ag tỹ vẽnh kar kamẽg kỹ. Vẽnh kar tóg João to: “Topẽ vĩ tó tĩ pẽ ja vẽ,” he tĩ. 33Hã kỹ ag tóg ti mỹ: “ẽg pijé ki kanhró nỹtĩ',” he mũ. Ón kỹ ag tóg ke mũ. Kỹ tóg ag mỹ: “kỹ sóg ãjag mỹ ũ tỹ inh jẽnẽg mũ tónh ke tũ nĩ gé,” he mũ.

Currently Selected:

Marcos 11: kgp

Highlight

Copy