Mateus 26

Ag tỹ Jesus tén sór

(Mc 14.1-2; Lc 22.1-2; Jo 11.45-53)

1Vãhã tóg tó kãn ja nĩ sir, ti tỹ nén tónh ke mũ ti. Kỹ tóg ti mré mũ tĩ ag mỹ: 2“kurã régre tũg kỹ tóg tỹ, ẽg fénhta mág tỹ Páscoa nĩ,” he mũ. “Ẽn kã ag tóg, ẽprã ke fi kósin ti senh ke mũ, kỹ ag tóg, ka to ti sanh ke mũ. Inh hã vẽ,” he tóg, Jesus ti.

3Hã ra Topẽ tũ to pã'i ag vỹ vẽnh mãn mũ sir, Topẽ vĩ to ẽg kanhrãn tĩ ag mré hã, kófa ag ke gé, Pã'i mág tỹ Caifás, he mũ ĩn tá. 4Kỹ ag tóg Jesus se to jykrén mũ sir. Ag tỹ ti vatánh tá ti kãgmĩ sór vẽ, ti tén jé. 5Kỹ ag tóg: “ẽg hỹn fénhta tag to mẽnh ke mũ ver. Ẽg tỹ fénhta kã ti se kỹ vẽnh génh mág vỹ tóg kutẽnh mũ, ha vem nĩ,” he mũ.

Jesus tỹ Betânia tá nĩ

(Mc 14.3-9; Jo 12.1-8)

6Ẽn kã Jesus tóg kejẽn ẽmã tỹ Betânia tá nĩ nĩ, Simão ĩn krẽm, vẽnh kaga kren vãnh han ja ẽn ti. 7Ti jẽg nĩ ra ũ fi tóg, tá jun mũ, garrafa vyn kỹ. Pó kupri tãnãj tỹ tóg há jẽ, garrafa ti. Ti ki jẽ vỹ tỹ, nén ger há jẽ, ũn kaja e ẽn. Ti gãnh tãg fi tóg mũ, ger há ẽn tỹ. 8Kỹ ti mré mũ tĩ ag tóg, fi vég mũ, kỹ tóg ag mỹ kórég nĩ. Kỹ ag tóg: “fi tỹ ne jé nén kaja e kókén nẽ?“ he mũ. 9“Ẽg tỹ ger há tag fón ke vẽ vẽ, kaja há to, ẽg tỹ ũn jagtar ag mỹ vin jé,” he ag tóg mũ.

10Hã ra Jesus tóg mẽ kỹ ag mỹ: “ãjag tỹ ne jé fi mỹ kaga han nẽ?“ he mũ. “Inh jykre ki króm fi tóg. 11Inh hã tóg ver, ãjag mré nĩ sĩ han mũ, jãvo ũ jagtar ag vỹ, kurã kar ki ãjag mré nỹtĩ nĩ. 12Fi tỹ inh kãn vẽ, ag tỹ vẽnh kej tá inh fón ke jo, hã jé fi tóg, ger há tag tỹ inh kri kujẽg mũ. 13Ag tỹ vẽnh vĩ sér tugtón kỹ ag tóg, fi tỹ nén han mũ tag tónh ke mũ gé, ga kar mĩ hã. Kỹ vẽnh kar vỹ, fi tỹ nén han mũ mẽnh ke mũ, ha vem nĩ. Ki hã sóg tó mũ,” he tóg.

Judas tỹ pã'i ag mỹ Jesus ven ke

(Mc 14.10-11; Lc 22.3-6)

14Kar kỹ ũ tỹ 12 (ke) ẽn ag kã ũ tóg, Topẽ tũ to pã'i ag venh tĩ mũ. Ũn tĩ mũ jijin hã vỹ: Judas Iscariotes, he mũ. 15Tá jun kỹ tóg ag mỹ: “sỹ ãjag mỹ Jesus fẽg ke vẽ, ãjag tỹ ti se jé. Ãjag mỹ inh mỹ kajãm mũ'?“ he mũ. Kỹ ag tóg: “hỹ,” he kỹ ti mỹ jãnkamy tỹ 30 (ke) vin mũ sir. 16Kỹ tóg to jykrén mũ. “Inh hỹ hẽ ri kenh mũ, sỹ vẽnh kar vatánh tá ag mỹ ti fẽg jé,” he tóg mũ sir.

Jesus tỹ Páscoa ko

(Mc 14.12-21; Lc 22.7-14, 21-23; Jo 13.21-30)

17Kejẽn tóg ẽmĩ konh ke kurã tá krỹg mũ, kỹ Jesus mré mũ tĩ ag tóg ti mỹ: “ẽg hỹn hẽ tá carneiro sĩ tãnh kỹ konh mũ?“ he mũ. 18Kỹ tóg ag mỹ: “ẽmã mág ẽn ra ũ tỹ ẽg to há nĩ ẽn venh mũjẽg,” he mũ. “Ti mỹ: “ẽg Senhor vỹ ã mỹ: inh kurã vỹ kakó tĩ ha, kỹ tóg sỹ ã ĩn krẽm Páscoa konh há tĩ, inh mré mũ tĩ ag mré, he ti,” hem nĩ ti mỹ,” he tóg. 19Kỹ ag tóg mũ mũ sir. Hã tá ag tóg mé sĩ tãnh mũ sir.

20Rã pur kar kỹ Jesus tóg tá jun kỹ ũ tỹ 12 (ke) ag mré ko mũ sir. 21Ag jẽg nỹtĩ kỹ tóg ag mỹ: “ãjag kã mĩ ũ tóg, pã'i ag mỹ inh fẽg ke mũ, ag tỹ ise jé,” he mũ. 22Kỹ tóg ag fe kaj tĩ sir, kỹ ag tóg ti mỹ: “inh mỹ vó'? Inh mỹ vó'?“ he kãn mũ sir.

23Kỹ tóg ag mỹ: “ũ tỹ inh mré ti nĩgé tỹ ẽmĩ mãn kỹ pénky kã ki kã punpun mũ ẽn hã vẽ,” he mũ. 24“Tĩg jé sóg ke mũ, isỹ tỹ ẽprã ke fi kósin nĩn kỹ, hã kỹ tóg rán kỹ nĩ. Hã ra Topẽ tóg ũ tỹ ag mỹ inh fẽg ke mũ ẽn mỹ vĩ kónãn pẽ han ke mũ. Ti mur tũ nĩ ra tóg ti mỹ há tĩ vẽ,” he tóg.

25Kỹ Judas ẽn, ũ tỹ pã'i ag mỹ ti fẽg ke mũ ẽn tóg ti mỹ: “Senhor', inh hã mỹ'?“ he mũ gé. Kỹ tóg ti mỹ: “ki hã ã tóg tó mũ,” he mũ.

Santa Ceia

(Mc 14.22-26; Lc 22.15-20; 1 Co 11.23-25)

26Kỹ ag tóg jẽg mũ. Ag jẽg nỹtĩ ra Jesus tóg ẽmĩ mãg mũ sir. Kỹ tóg to Topẽ mré vĩ mũ. Kỹ tóg vẽnh kã kupãn kỹ ti mré mũ tĩ ag mỹ: “té, ha kó,” he mũ. “Inh hã vẽ,” he tóg, ẽmĩ to.

27Kar kỹ tóg kópa vãg mũ gé sir, vinho tỹ ki jẽ ẽn. To tóg Topẽ mré vĩ mũ gé. Ag mỹ kópa fẽg kỹ tóg: “ha kronkron,” he mũ. 28“Inh kyvénh hã vẽ,” he tóg, vinho to. “Inh kyvénh tỹ vẽnh kar jagfy kutẽnh ke vẽ. Sỹ vẽnh e mré vẽjykre tãg han to ken hã vẽ, hã vỹ tỹ inh kyvénh ti nĩ. Hã tugrĩn Topẽ vỹ ãjag mỹ vẽnh pãte fón ke mũ, ãjag tỹ ti vĩ mranh ja ti,” he tóg. 29“Ha mẽ, ãjag mré sóg vinho kron mãn ke tũ nĩ ha. Kejẽn sóg ãjag mré kron mãn ke mũ, inh panh tỹ tỹ ẽg pã'i nĩnh ke kurã ẽn kã, ha vem nĩ,” he tóg.

30Kỹ ag tóg jãn mũ sir, ag jẽn kar kỹ. Ag tỹ Topẽ mỹ jãn kar kỹ ag tóg krĩ tỹ Oliveiras ra mũ mũ sir.

Jesus tỹ Pedro mỹ tó

(Mc 14.27-31; Lc 22.31-34; Jo 13.36-38)

31Ag mũn kỹ Jesus tóg: “kuty tag kã ãjag tóg inh ré kỹ mũ kãn ke mũ,” he mũ. “Hã kỹ tóg rán kỹ nĩ. Ũ tỹ carneiro ki rĩr tĩ ẽn tãnh jé sóg ke mũ, kỹ ti mẽg ag vỹ, krig ke kãn ke mũ, he tóg, Topẽ vĩ tỹ rán kỹ nĩ ki, iso“ he tóg. 32“Hã ra sóg iser kar kỹ rĩr mãn ke mũ. Ẽn kã sóg ãjag jo tĩg ke mũ, ga tỹ Galiléia ra,” he tóg.

33Kỹ Pedro tóg ti mỹ: “inh pijé, ã ré kỹ tĩg mũ', ag kar tỹ ã ré kỹ mũ mũ ra,” he mũ. 34Hã ra Jesus tóg ti mỹ: “ũri, kuty tag kã ã tóg iso: ti ki kagtĩg sóg nĩ, he tãgtũ han ke mũ, galo kyr ke to hã, ha vem nĩ,” he mũ. 35Kỹ Pedro tóg: “hã ra sóg ã mré ter ke mũ. Kỹ sóg ã to: ti ki kagtĩg sóg nĩ, henh ke tũ pẽ nĩ,” he mũ. Kỹ ti mré mũ tĩ ag tóg hã tó mũ gé sir.

Getsêmani tá

(Mc 14.32-42; Lc 22.39-46)

36Kỹ Jesus tóg ag mré ka kré tá jun mũ sir. Ka kré jijin hã vỹ: Getsêmani, he mũ. Kỹ tóg ag mỹ: “ha ver nĩgnĩ, tag ki,” he mũ. “Sỹ ver Topẽ mré vĩnh ke vẽ, tãtá,” he tóg. 37Kỹ tóg Pedro mré Zebedeu krẽ ag mỹ: “inh mré kãmũ jẽg,” he mũ. Fe kaj tóg nĩ sir. Mũmẽg tóg mũ gé. 38Kỹ tóg ag mỹ: “inh fe kaj mág tóg tĩ,” he mũ, “kỹ tóg inh mỹ tỹ iser ri ke nĩ,” he tóg. “Tag ki nỹtĩm nĩ, nũgnũr tũg nĩ, inh mré,” he tóg.

39Kỹ tóg tĩg sĩ han kỹ mũg ke mũ sir, ga kri tóg nỹ mũ. Topẽ mré tóg vĩ mũ. “Panh',” he tóg. “Mỹ ã tỹ inh jagtar ke tag tỹ tũ' he jãvãnh?“ he tóg. “Hã ra isỹ ã mỹ nén to vĩ mũ tag han tũg nĩ. Ã tỹ nén han ke mũ ẽn hã han nĩ,” he tóg.

40Kar kỹ tóg, ti mré mũ tĩ ag venh tĩ mũ sir, hã ra ag kar tóg nũgnũr ja nĩ. Kỹ tóg Pedro mỹ: “mỹ óra pir ki nũr tũg kórég?“ he mũ. 41“Nũgnũr tũg nĩ, Topẽ mré vĩm nĩ, ãjag tỹ ti vĩ mranh tũ nĩ jé, ũ tỹ ãjag kutãn mũ ra. Ãjag tỹ mranh sór tũ vẽ vẽ, hã ra ãjag tóg krój nỹtĩ, he tóg.

42Kỹ tóg tĩg mãn mũ sir, kỹ tóg Topẽ mré vĩ mãn mũ. Kỹ tóg: “panh',” he mãn mũ. “Ã tỹ inh jagtar ke tag tỹ tũ' he jãvãnh tĩn kỹ sóg jagtar ke mũ. Ã tỹ isỹ nén han ke mũ ẽn han nĩ,” he tóg. 43Kỹ tóg ag venh tĩg mãn mũ gé sir, hã ra ag tóg nũgnũr mãn ja nĩ, ag nũgnũr hapẽ tĩn kỹ. 44Kỹ tóg ag mỹ vĩ mẽ kã tĩ mũ sir, Topẽ mré vĩ mãn jé. Ti mỹ tóg ti tỹ tó ja ẽn tó mãn mũ. 45Kỹ tóg ag venh tĩg mãn kỹ ag mỹ: “ãjag ne tóg ver nũgnũr nỹtĩ',” he mũ. “Vẽnhkán ja ãjag tóg nĩ'. Pétẽm ti huri, óra ti. Ti tỹ Topẽ vĩ mranh tĩ ag mỹ inh fẽg ke nẽ ha, isỹ tỹ ẽprã ke fi kósin nĩn kỹ,” he tóg. 46“Nĩgnĩ ra, ag kato mũ jé ha. Ũ tỹ ag mỹ inh ven mũ tóg jun ke mũ ha,” he tóg.

Ag tỹ Jesus se

(Mc 14.43-50; Lc 22.47-53; Jo 18.3-12)

47Ti tỹ ver vẽmén jẽ ra Judas tóg jun mũ sir, ũ tỹ 12 (ke) ag kã ũ ẽn ti. Hã ra porisa ag tóg ti mré kãmũ mũ, rógro génh kỹ, ka kykyv génh kỹ ke gé. Topẽ tũ to pã'i ag tỹ ag jẽgnẽ vẽ, kófa ag ke gé. 48Hã ra ũ tỹ ag mỹ Jesus fẽg mũ ẽn tóg ag mỹ: “sỹ ũn ki nhun ke mũ ẽn hã sem nĩ,” he ja nĩ. 49Hã kỹ tóg vẽsỹmér Jesus to grẽn ke kỹ ti mỹ: “ã mỹ há, Senhor'?“ he mũ. Kỹ tóg ti ki nhun ke mũ, Judas ti. 50Hã ra Jesus tóg ti mỹ: “régre', ã tỹ nén han ke mũ ẽn han nĩ,” he mũ.

Kỹ porisa ag tóg vẽsỹmér ti kãgmĩ kỹ ti ség mũ sir. 51Kỹ Jesus mré tĩ tĩ ũ tóg rógro kunũnh kỹ porisa ũ nĩgrẽg kym mũ. Topẽ tũ to pã'i mág camarada vẽ. 52Hã ra Jesus tóg ti mỹ: “ã rógro fi han ra. Ẽg tỹ rógro tỹ ke kỹ ag tóg rógro tỹ ẽg tén ke mũ gé, “ he mũ. 53“Isỹ inh panh mỹ to vĩ ra tóg inh mỹ ti tỹ jẽgnẽ jafã ag jẽgnẽnh ke mũ vẽ, ũn tỹ 12 mil (ke) kãfór ẽn, ag tỹ ijy nĩgãn jé. 54Hã ra sóg nén tỹ iso rán kỹ nĩ ẽn ve kãn sór mũ,” he tóg.

55Ẽn kã tóg porisa ag mỹ: “ãjag ne tóg, rógro génh kỹ kãmũ mũ', ka kykyv mré', ise jé',” he mũ. “Inh pijé tỹ bandido nĩ'. Kurã kar ki sóg ãjag mré jẽ ja nĩgtĩ, Topẽ ĩn krẽm. Vẽnh kar kanhrãn sóg jẽ ja nĩgtĩ, hã ra ãjag tóg tá ise ja tũ nĩ vẽ mỹr. 56Hã ra sóg nén tỹ iso rán kỹ nĩ ẽn vég mũ,” he tóg.

Kỹ ti mré mũ tĩ ag tóg ti ré kỹ pétẽ kãn mũ sir, vẽnh pigju jé.

Pã'i ag tỹ Jesus ki jẽmẽ

(Mc 14.53-65; Lc 22.54-55, 63-71; Jo 18.12-14, 19-24)

57Kỹ ũ tỹ ti ség mũ ag tóg ti pére mũ mũ, Topẽ tũ to pã'i mág tỹ Caifás ĩn ra. Tá Topẽ vĩ to ẽg kanhrãn tĩ ag vỹ vẽnh mãn kỹ nỹtĩ, kófa ag, vẽnh jyvẽn tĩ ag ke gé. Ag kar tỹ ti tén sór vẽ.

58Hã ra Pedro tóg, Jesus nón kãtĩ mũ, kuvar há tá, kỹ tóg Topẽ tũ to pã'i mág ĩn kã ra rã mũ. Ti tỹ ag tỹ Jesus tỹ hẽn ri ke ẽn ve sór vẽ.

59Kỹ pã'i kar ag tóg ũ ag jãvãnhvãnh mũ, ũ tỹ ti jykre kórég tónh ke mũ ag. 60Hã ra ag tóg vég tũ nĩ. Ũ tỹ hẽn ri ke ag tóg, ón kỹ ti jykre kórég tó mũ, hã ra tóg ki krov tũ nĩ. Kỹ vãhã ũ ag tóg: 61“ti vĩ vẽnh mỹ mẽ ẽg,” he mũ. “Topẽ ĩn kókén kar sóg ũ han mãn ke mũ, kurã tãgtũ ki, he ja tóg nĩ, Jesus ti,” he ag tóg mũ. Ũn régre ag tỹ ti to tag tó kỹ tóg vãhã ki krov nĩ, ag mỹ.

62Kỹ Topẽ tũ to pã'i mág vỹ, jẽgnẽ mũ sir, kỹ tóg ti mỹ: “ã tỹ ne tónh ke mỹ tũ'?“ he mũ. “Ag hã ne ã vĩ kónãn tag tó ja nĩ gé'“ he tóg. 63Hã ra Jesus tóg nén ũ tó tũ nĩ. Kỹ pã'i mág tóg ti mỹ: “Topẽ vỹ rĩr nĩ,” he mũ. “Ti rĩnve sóg ã ki jẽmẽg mũ. Ã mỹ tỹ Cristo nĩ', ã mỹ tỹ Topẽ kósin nĩ'? Ha ẽg mỹ tó,” he tóg, pã'i mág ti. 64Kỹ Jesus tóg: “ki hã ã tóg tó mũ,” he mũ. “Kỹ sóg ãjag mỹ tag tó mũ gé, ha mẽ. Ẽprã ke fi kósin vỹ tỹ inh nĩ,” he tóg. “Kỹ ãjag tóg ũ tỹ nén ũ kar han mũ ẽn pẽgja tá inh venh ke mũ. Kanhkã góg kã mĩ sóg kãtérenh ke mũ gé,” he tóg.

65Kỹ pã'i mág tóg, jũ kỹ ti kur tỹ jaran' ke mũ sir. Kỹ tóg: “Topẽ kato vĩ kónãn ti huri,” he mũ. “Mẽ kãn ẽg tóg, kỹ ẽg tóg ũ tỹ ti jykre kórég tónh ke mũ ũ jãvãnh mãn ke tũ nĩ ha. 66Ẽg hỹn ti tỹ hẽ ri kenh mũ ha?“ he tóg. Kỹ ag tóg ti mỹ: “ter jé tóg ke mũ, ti vĩ tag to,” he kãn mũ sir. 67Kỹ ag tóg ti kakã to sugsug mũ sir, ti kakã ki ag tóg tãnh mũ gé. Kỹ ũ tóg ti vatánh tá ti tãnh kỹ ti mỹ: 68“Cristo nẽji tỹ ã nĩ , kỹ ã nẽji nén kar ki kanhró nĩ,” he mũ. “Ũ nỹ ã tãnh?“ he tóg. Gen kỹ ag tóg ti to é he mũ.

Pedro tỹ Jesus to ón

(Mc 14.66-72; Lc 22.56-62; Jo 18.15-18, 25-27)

69Hã ra Pedro vỹ, re tá nĩ nĩ, ĩn vãso kã. Kỹ pã'i camarada ũ fi tóg ti venh kãkutẽ kỹ ti mỹ: “Jesus mré ã tóg tĩ ja nĩ gé, Galiléia tá ke ẽn mré,” he mũ. 70Hã ra tóg: “vó, ã tỹ ne tó nẽ hỹn'?“ he mũ. Kỹ ag kar vỹ ti vĩ mẽg mũ. 71Kar kỹ tóg jãnkã ra rã sór mũ. Hã ra ũ fi tóg ti vég mũ gé, kỹ fi tóg ag mỹ: “Jesus mré ke ũ vẽ, Nazaré tá ke ẽn mré,” he mũ gé. 72Hã ra tóg: “vó,” he mãn mũ. “Ti ki kagtĩg sóg nĩ, Topẽ vỹ ki kanhró nĩ,” he tóg, Pedro ti. 73Ver si há tũ ra tá nỹtĩ ũ ag tóg ti venh kãmũ kỹ ti mỹ: “ha mẽ, ti mré ke ũ vỹ tỹ ã nĩ,” he mũ. “Ã vĩ to ẽg tóg ã ki kanhrãn mũ,” he ag tóg. 74Hã ra tóg: “vó',” he mãn mũ. “Inh pijé, ti ki kanhró nĩ'. Inh ón kỹ Topẽ vỹ inh vóg kónãn ke mũ,” he tóg. Hã ra vãhã galo tóg kyr mũ. 75Kỹ Pedro tóg Jesus vĩ ja ẽn to jykrén mũ, ti tỹ ti mỹ: “iso ã tóg: ti ki kagtĩg sóg nĩ, he tãgtũ han ke mũ, galo kyr ke to hã,” he ja ẽn mĩ. Kỹ Pedro tóg mĩ ẽkrén kỹ tá kãkutẽ mũ sir. Fỹ jagy han tóg mũ sir.

Currently Selected:

Mateus 26: kgp

Highlight

Copy