Mateus 25

Tytãg tỹ 10 (ke) fag kãme

1Kỹ Jesus tóg ag mỹ ti kãtĩg mãn ke ẽn kãmén mãn mũ. “Tytãg fag ri ke ti nĩnh mũ,” he tóg. “Tytãg tỹ 10 (ke) fag vỹ nỹtĩ. Vẽnh kyprũg ve jé fag tóg, lampião vyn kỹ mũ mũ, ũn prũg mũ ẽn kato. 2Ũ tỹ 5 fag vỹ jykre kórég nỹtĩ, jãvo ũ tỹ 5 (ke) fag vỹ jykre há nỹtĩ. 3Kỹ ũn jykre kórég fag vỹ vyrmỹ lampião vyn kỹ mũ mũ, hã ra fag tóg tỹ ki mĩn jafã ma mũ ja tũ nĩ. 4Fag jãvo ũn jykre há fag vỹ vyrmỹ tỹ ki mĩn jafã ma mũ mũ. 5Hã ra ũn prũg mũ ẽn tóg kãtĩg vãnh han mũ. Kỹ tóg kejẽn fag nũgnũr hapẽ tĩ, ti jun tũg ki. Hã kỹ fag tóg nũgnũr kãn mũ sir.

6Kuty kuju ki vẽnh vĩ tóg mẽ há tĩ, kỹ tóg: “ũn prũg mũ vỹ hur kãteg..!” he mũ. “!..Ha ti venh kãmũ jeg..!“ he tóg. 7Kỹ tytãg ẽn fag vỹ fag lampião grugrug mũ sir. 8Hã ra ũn jykre kórég fag tũ vỹ nhynnhyn ke sór mũ. Kỹ fag tóg ũ fag mỹ: “ẽg mỹ ãjag tũ vẽnh kãpãm,” he mũ. 9Hã ra fag tóg fag mỹ: “ẽg tỹ ãjag mỹ vẽnh kãpãm kỹ tóg ẽg mỹ kã kyn kenh ke mũ gé, ãjag ri kén. Ũ kanẽnh mũjẽg,” he mũ. 10Kỹ fag tóg mũ mũ. Fag gunja tá tóg jun mũ sir, ũn prũg mũ ti. Kỹ fag tóg ti mré mũ mũ sir, ũn lampião gru nỹtĩ fag. Tá junjun kỹ ag tóg jãnkã ti nĩfénh mũ sir, ũn jykre kórég fag jy. 11Hã ra ũ fag tóg vãhã tá junjun mũ gé sir, kỹ fag tóg ti mỹ: “Senhor', Senhor', ẽg jy nón,” he mũ sir. 12Hã ra tóg fag mỹ: “ãjag ki sóg kagtĩg nĩ, mỹr, ha mẽ,” he mũ,” he tóg, Jesus ti. 13“Hã kỹ sóg ãjag mỹ: vẽnh ki rĩr, nũr tũg ri ke han nĩ, he mũ. Kãtĩg jé sóg ke mũ. Hã ra ãjag tóg inh kãtĩg ke kurã ki kagtĩg nỹtĩ, inh óra ki ke gé. Hã kỹ inh jãvãnh to krónh ke tũg nĩ,” he tóg.

Patrão tỹ ti camarada ag mỹ ti tũ vin

(Lc 19.11-27)

14Kỹ tóg: “inh kãtĩg mãn ke vỹ tag ri ke nĩnh mũ gé, ha mẽ,” he mũ. “Kejẽn patrão tóg ga ũ ra tĩg sór mũ. Kỹ tóg ti camarada ag mỹ ti tỹ nén kar vin mũ, ti jãnkamy ke gé. 15Ũ mỹ tóg jãnkamy kãmur tỹ 5 (ke) vin mũ, ũ mỹ tóg ti kãmur régre vin mũ, ũ mỹ tóg ti kãmur pir nĩm mũ. Ũn krĩ há ẽn mỹ tóg ti kãmur e vin mũ. 16Kỹ ũ tỹ ti kãmur tỹ 5 (ke) mãg mũ ẽn vỹ ti jãnkamy ẽn tỹ rãnhrãj mág han mũ. Kỹ tóg kejẽn, ũ tỹ 5 (ke) ũ mãg mũ, kỹ ti tũ vỹ tỹ ti kãmur tỹ 10 (ke) nỹtĩ sir. 17Kỹ ũ tỹ ti kãmur régre mãg mũ ẽn vỹ tỹ rãnhrãj mũ gé. Ti kãmur régre ũ mãg tóg mũ gé sir, kỹ tóg tỹ ti kãmur tỹ 4 (ke) nỹtĩ. 18Ag jãvo ũ tỹ ti kãmur pir mãg mũ ẽn vỹ ti tũ nég mũ sir, tỹ rãnhrãj mẽ kã, mỹr, ha mẽ.

19Kejẽn ag patrão tóg vỹn ke mũ sir, si há tĩ kỹ. 20Kỹ ũ tỹ ti kãmur tỹ 5 (ke) mãn ja ẽn tóg ti mỹ: “inh mỹ ã tóg ũ tỹ 5 (ke) vin, hã ra sóg tỹ rãnhrãj kỹ ũ tỹ 5 (ke) ũ mãn ja nĩ. Hã vẽ ha,” he mũ. 21Kỹ tóg ti mỹ: “jykre há ã nĩ,” he mũ. “Ã tũ ki rĩr há han ja ã nĩ mỹr, nén sĩ ki. Kỹ sóg ã mỹ nén ũ e vin sór mũ,” he tóg. 22Kỹ ũ tỹ ti kãmur régre mãn ja ẽn tóg ti mỹ: “inh mỹ ã tóg ti kãmur régre vin ja nĩ. Hã ra sóg tỹ rãnhrãj kỹ ũn régre ũ mã. Hã vẽ ha,” he mũ gé. 23Kỹ tóg ti mỹ: “jykre há ã nĩ,” he mũ gé. “Ã tũ ki rĩr há han ja ã nĩ mỹr, nén sĩ ki. Kỹ sóg ã mỹ nén ũ e vin sór mũ,” he tóg.

24Kỹ ũ tỹ ti kãmur pir mãn ja ẽn tóg ti mỹ: “Senhor',” he mũ. “Vĩ tar han ã tóg tĩgtĩ, ki sóg kanhró nĩ. Ã tỹ nén krãn ja tũ ẽn mãn sór ã tóg tĩgtĩ, ã tỹ ti fy krãn tũ ra ã tóg ti kanẽ ve sór tĩgtĩ. 25Hã kỹ sóg inh mũmẽg kỹ ã tũ ẽn né. Hã vẽ ha,” he tóg. 26Kỹ tóg ti mỹ: “jykre kórég ã tóg nĩ,” he mũ. “Inh mỹ isỹ nén krãn ja tũ mãn sór tĩgtĩ'? Inh mỹ isỹ nén ũ fy krãn tũ ra ti kanẽ ve sór tĩgtĩ'? Hã ki kanhró ã mỹ nĩ'? 27Ã tỹ ne jé inh jãnkamy tỹ banco tá vin ja tũ nĩ nẽ? Ã tỹ tá vin ra sóg isũ kãfór mãn ke mũ vẽ,” he tóg. 28Kỹ tóg porisa ag mỹ: “ti tũ ma ra. Kỹ ũ tỹ ti kãmur tỹ 10 (ke) mãg mũ ẽn mỹ nĩm,” he mũ. 29“Ũn tũ mág vỹ ũ mãn mãn ke mũ, kỹ tóg ti mỹ tũ' henh ke tũ pẽ nĩ. Jo ũn tũ sĩ ẽn tóg ti tũ kren kãn ke mũ,” he tóg. 30“Kỹ inh camarada kórég tag fón, kutyg ja ẽn kã tá. Tá ag tóg jagtar tĩ, ag jã tỹ ag tóg gangan ke tĩ, vẽso jũ kỹ,” he tóg, patrão ti,” he tóg, Jesus ti, ti tỹ ti kãtĩg mãn ke kãmén kỹ.

Jesus tỹ vẽnh kar jykre tugnỹm ke

31Kỹ Jesus tóg ag mỹ: “ẽprã ke fi kósin kãtĩg mãn kỹ tóg ge nĩnh mũ, ha mẽ,” he mãn mũ. “Isỹ jẽgnẽ jafã ag vỹ inh mré kãmũnh ke mũ. Kỹ sóg inh nĩgja sĩnvĩ ẽn kri nĩnh ke mũ sir, kỹ inh jykre tar vỹ vẽnh ven ke mũ. 32Kỹ ẽprã ke kar vỹ inh jo vẽnh mãn kãn ke mũ sir. Kỹ sóg vẽnh kar tỹ vẽnh kãpãm ke mũ sir, ha mẽ. Carneiro mré cabrito ki rĩr tĩ ẽn vỹ kejẽn ti mẽg tỹ vẽnh kãpãm tĩ. 33Kỹ tóg carneiro tỹ ti pẽgja tá vin tĩ, jó tóg cabrito tỹ ti jakãnh tá vin tĩ. Tag ri ke han jé sóg ke mũ. 34Tỹ sóg vẽnh kar kri pã'i mág nĩnh mũ, kurã ẽn kã. Kỹ sóg inh pẽgja tá nỹtĩnh ke mũ ag mỹ: inh panh vỹ ãjag mỹ vĩ há han ke mũ. Topẽ tỹ ga tãg mré kanhkã tãg venh kãmũ jẽg. Ti tỹ ga si han kurã ẽn kã tóg ãjag hã kuprẽg ja nĩ. 35Kejẽn sóg kókĩr nĩ ja nĩgtĩ, kỹ ãjag tóg inh jẽn. Isỹ kron há tĩn kỹ ãjag tóg inh mỹ goj ven. Isỹ ãjag ĩn tá jun kỹ ãjag tóg inh mỹ: “kãrã ra, ẽg mré nĩ jé,” he ja nĩgtĩ gé. 36Inh kur tũ nĩn kỹ ãjag tóg inh mỹ kur vin. Inh kaga nĩn kỹ ãjag tóg inh ki rĩr' he ja nĩgtĩ. Ise kỹ jẽ kỹ ãjag tóg inh venh mũ' he ja nĩgtĩ gé, he jé sóg ke mũ ag mỹ,” he tóg.

37“Kỹ ũn jykre kuryj ag vỹ inh mỹ: “ẽg hẽ ri ke kã ã kókĩr nĩ vé? Ẽg hẽ ri ke kã ã kron há tĩ vé? 38Ã hẽ ri ke kã ẽg ĩn tá jun? Ẽg hẽ ri ke kã ã kur tũ vé? 39Ẽg hẽ ri ke kã ã kaga vé, ẽg hẽ ri ke kã ã se vé? Ki kagtĩg ẽg nỹtĩ,” henh ke mũ, inh mỹ.

40Kỹ sóg ag mỹ: ũn jagtar ag jagãgtãn ja ãjag tóg nĩgtĩ, inh mré ke ag, fag mré hã, kỹ tóg tỹ ãjag tỹ inh jagãgtãn ri ke nĩ, henh ke mũ, isỹ tỹ pã'i mág nĩ kurã ẽn kã,” he tóg.

41“Kỹ sóg inh jakãnh tá nỹtĩ ag mỹ: inh panh vỹ ãjag mỹ vĩ kónãn. Pĩ nhyr vãnh ra mũjẽg. Nén-Kórég mỹ tóg kar kỹ nĩ, pĩ nhyr vãnh ẽn ti, ti tỹ jẽgnẽ jafã ag mỹ ke gé. Ẽn ra mũjẽg. 42Inh kókĩr ra ãjag pijé, inh mỹ vẽjẽn ven'. Isỹ kron há ra ãjag pijé, inh mỹ goj ven'. 43Isỹ ãjag ĩn tá jun mũ ra ãjag pijé, inh mỹ: kãrã ra, he ja nĩgtĩ'. Isỹ kur tũ ra ãjag pijé, inh mỹ ũ vin'. Inh kaga nỹ ra, ise kỹ jẽ ra ãjag pijé, inh venh mũ' he ja nĩgtĩ', he jé sóg ke mũ,” he tóg.

44“Kỹ ag tóg inh mỹ: “ẽg hẽ ri ke kã ã kókĩr vé, ã kron há ti? Ã hẽ ri ke kã ẽg ĩn tá jun'? Ẽg hẽ ri ke kã ã kur tũ vé', ã kaga ti', ã se ti'? Ki kagtĩg ẽg nỹtĩ,” henh ke mũ gé.

45Kỹ sóg ag mỹ: ũn jagtar ag jagãgtãn ja tũ ãjag tóg nĩgtĩ, fag ke gé, hã kỹ tóg tỹ, ãjag tỹ inh jagãgtãn tũ ri ke nĩ, mỹr, ha mẽ, henh ke mũ. 46Kỹ ag tóg jagtar ke mũ, hã ra tóg tũ' henh ke tũ nĩ, ag jagtar ke ti. Ag jãvo ũn jykre há ag vỹ rĩr krỹg ja tũ ẽn venh ke mũ,” he tóg, Jesus ti.

Currently Selected:

Mateus 25: kgp

Highlight

Copy