Lucas 19

Jesus tỹ Zaqueu venh tĩg

1Kỹ tóg ẽmã tỹ Jericó ki rã kỹ fĩn rãm kỹ tĩg sór mũ. 2Hã ra ũ tóg tá nĩ nĩ, ti jiji hã vỹ: Zaqueu, he mũ. Governo mỹ jãnkamy mãg tĩ ag pã'i vẽ. Kỹ tóg riko tãvĩ nĩ. 3Ẽn tóg Jesus ve sór mũ. Hã ra tóg rur jẽ, hã kỹ tóg vẽnh e ag tugrĩn ti vég tũ nĩ. 4Hã kỹ tóg ti jy vẽnhvãg tĩ mũ, kỹ tóg ka tỹ krén to tãpry mũ, ti tỹ kri nĩg kỹ ti ve jé. 5Kỹ tóg ka ẽn tá jun mũ. Kỹ tóg kri ẽvãnh kỹ ti vég mũ. Kỹ tóg ti mỹ: “Zaqueu',” he mũ. “Kur kãtére to fũrũn. Isỹ ã ĩn krẽm nũr ke vẽ,” he tóg. 6Kỹ tóg tére tỹ mrãnh ke mũ sir. Jesus mỹ tóg: “mũ jé ha,” he mũ. Ti mỹ tóg sér tĩ, Jesus tỹ ti ĩn krẽm nũr sór kỹ.

7Hã ra vẽnh e ẽn tóg Jesus to jũ kỹ ti mỹ: “Topẽ vĩ mranh tĩ vẽ, hã ra tóg ti ĩn krẽm nũr sór mũ,” he mũ.

8Kỹ tóg ti ĩn krẽm nĩ nĩ. Kỹ Zaqueu tóg vẽso jykrén kỹ ti mỹ vẽnh kãmén mũ. “Ha vé, isũ kuju vin jé sóg ke mũ, ũn jagtar ag mỹ. Ũ ag lograr he ja sóg nĩgtĩ, ag tũ ki, hã ra sóg ag mỹ ti kãfór nĩm sór mũ ha. Sỹ jãnkamy pir ki ũ lograr he jan ki sóg ti mỹ ũ tỹ 4 (ke) vin sór mũ,” he tóg mũ.

9Kỹ tóg ti mỹ: “ũri ã tóg kren ke mũ, ã mré ke fag mré hã. Abraão krẽ'krẽ vỹ tỹ ã nĩ gé,” he mũ. 10“Tỹ sóg ẽprã ke fi kósin nĩ. Ũn vãfor mũ ẽn jãvãnh jé sóg kãtĩg, sỹ ag krenkren han jé, ũn jykre pãno ẽn,” he tóg.

Jãnkamy kãme

(Mt 25.14-30)

11Hã ra ũn e ag tóg ti vĩ mẽg mũ. Jerusalém to hã tóg nĩ, hã kỹ ag tóg ti to: “Topẽ tỹ tỹ ẽg pã'i nĩ hỹn vẽnh ven ke mũ, ti tỹ tá jun kỹ,” he mũ. Kỹ tóg ag mỹ.“hã tũ vẽ,” he sór mũ. Hã kỹ tóg: 12“kejẽn pã'i tóg nĩgtĩ,” he mũ. “Ẽn tóg ga ũ ra tĩg sór mũ, kór há ra, tá ke ag tỹ ti tỹ pã'i mág han jé. Tag pãte tóg tá vỹn ke sór mũ. 13Ti tĩg ke to hã tóg ti camarada tỹ 10 (ke) ag mỹ jãnkamy pir nĩm' nĩm' he mũ. Ag mỹ tóg: “ha inh mỹ tỹ rãnhrãj,” he mũ. “Kejẽn sóg vỹn kenh mũ, kỹ sóg ãjag rãnhrãj tugnỹm ke mũ, ti,” he tóg. Kar tóg tĩ mũ sir.

14Hã ra ti krẽm ke ũ ag vỹ ti to há tũ nỹtĩ. Kỹ ag tóg ti nón vẽnh vĩ jẽnẽg mũ. “Ã tỹ ẽg kri tỹ pã'i nĩn kỹ tóg vẽnh mỹ nĩ. Ẽg tỹ tag ve jãvãnh tóg tĩ,” he ja ag tóg nĩgtĩ. 15Kejẽn tóg, vẽsỹ pã'i mág han kỹ vỹn ke mũ. Kỹ tóg ti camarada ag jé prẽr mũ sir, ti tỹ ũn mỹ jãnkamy vin ja ẽn ag. 16Kỹ ũ tóg ti tá jun kỹ ti mỹ: “jãnkamy pir nĩm ã tóg. Hã ra sóg kri ũ tỹ 10 (ke) gỹjỹ hé,” he mũ. 17Kỹ tóg: “jykre há tãvĩ ã tóg nĩ,” he mũ. “Nén sĩ ki rĩr há han ã tóg, hã kỹ ã tóg ẽmã tỹ 10 (ke) ki rĩr ke mũ ha,” he tóg. 18Kỹ ũ tóg ti mỹ: “jãnkamy pir nĩm ã tóg, hã ra sóg kri ũ tỹ 5 (ke) gỹjỹ hé,” he mũ gé. 19Kỹ tóg ti mỹ: “ẽmã tỹ 5 (ke) ki rĩr jé ã tóg ke mũ ha,” he mũ gé.

20Kỹ ũ tóg: “ha vé, ã tũ ti,” he mũ. “Inh krĩ pãgja kã ki vin kỹ sóg kri tógfĩn kỹ nĩm han. 21Ã kamẽg ja inh nĩ, ã vĩ tar to. Ã tỹ nén vin ja tũ ẽn mãn sór ã tóg tĩ. Ã tỹ nén krãn ja tũ kunũnh sór ã tóg tĩ,” he tóg. 22Kỹ tóg ti mỹ: “ã vĩ tóg ã jykre pãno han mũ, ha mẽ,” he mũ.“Inh mỹ vĩ tar han tĩ'? Inh mỹ sỹ nén vin ja kãfór mãn sór tĩ'? Inh mỹ sỹ nén krãn ja tũ kunũnh sór tĩ'? 23Kỹ ã tỹ ne jé inh jãnkamy tỹ banco tá nĩm ja tũ nĩ nẽ? Ã tỹ tá nĩm han ra sóg ti juro venh ke mũ vẽ, kỹ sóg isũ kãfór mãn ke mũ vẽ,” he tóg. 24Kỹ tóg tá nỹtĩ ag mỹ: “ti nĩgã ti tũ mã,” he mũ. “Ũ tỹ jãnkamy tỹ 10 (ke) mãn ja ẽn mỹ nĩm, ti tũ pir ti,” he tóg mũ sir. 25Kỹ ag tóg ti mỹ: “mẽ'. Hã ra tóg tũ mág nĩ ha,” he mũ. 26Kỹ tóg: “hỹ,” he mũ. “Hã kỹ sóg tó mũ. Ũn tũ mág vỹ mãn mãn ke mũ. Ũ tũ sĩ nĩ ẽn tũ mãn kãn jé ag tóg ke mũ gé,” he tóg. 27“Kỹ inh kato tẽ mũ ag tatĩ kãmũm nĩ, ũ tỹ iso: “ti tỹ ẽg kri tỹ pã'i jẽn kỹ tóg ẽg mỹ kórég nĩ,” he mũ ẽn ag. Ag kãgtén ra, inh rĩnve,” he tóg, pã'i ti,” he tóg.

Jesus tỹ Jerusalém tá jun

(Mt 21.1-11; Mc 11.1-11; Jo 12.12-19)

28Kar tóg tá kãkutẽ kỹ ẽmã tỹ Jerusalém ra tĩ mũ. 29Kỹ tóg ẽmã tỹ Betfagé to hã jun mũ, ẽmã tỹ Betânia tá, pãnónh tỹ Oliveiras he mũ ẽn tá. Tá jun kỹ tóg ti mré mũ tĩ régre ag mỹ: 30“ẽmã ẽn ra mũm nĩ, ẽg jo ẽmã nĩ ẽn ra,” he mũ. “Tá junjun kỹ ãjag tóg burrica fi kósin venh mũ. Kri nĩ ja tũ tóg jẽ ver. Ẽn kavãn kỹ ti pére kãmũm nĩ,” he tóg. 31“Hẽn ri ke mũn ag tóg ãjag mỹ: “ãjag tỹ ne jé ti kavãn nẽ?“ henh mũ. Kỹ ag mỹ: “ẽg Senhor vỹ ti ve sór mũ,” hem nĩ,” he tóg.

32Kỹ ag tóg mũ mũ. Ti tỹ ag mỹ tó mũ ve kãn ag tóg mũ sir. 33Kỹ ag tóg ti kavãg mũ. Kỹ tỹ ũn mẽg mũ ag tóg ag mỹ: “ãjag tỹ ne jé burrica kósin tag kavãn nẽ?“ he mũ. 34Kỹ ag tóg: “ẽg Senhor vỹ ti ve sór mũ,” he mũ. 35Kỹ ag tóg ti pére kãmũ kỹ ag kur tỹ ti kri vin mũ, Jesus tỹ kri nĩ jé. 36Ti tĩg kỹ ag tóg ag kur kugjén mũ sir, ẽpry jagma. 37Gen kỹ ag tóg, pãnónh tỹ Oliveiras to re kỹ Jerusalém to hã mũ nĩ sir.

Kỹ vãhã ag kar ẽn tóg Topẽ mỹ vĩ há han mũ, jamã há ra, fag mré hã. Jesus tỹ nén han mũ ve ja ag tóg nĩgtĩ. Hã kỹ ag tóg ẽn mĩ ẽkrén kỹ Topẽ mỹ vĩ há han mũ sir. 38“!..Sér tóg tĩ, ẽg mỹ..!“ he fag tóg mũ.“!..Ẽg Senhor vỹ ẽg ki jun..! !..ẽg jóg mág tỹ ti jẽnẽn kỹ..!“ he ag tóg. “!..Kanhkã tá ke ag mỹ tóg sér te..! !..Topẽ mỹ ẽg tóg vĩ há han sór mũ, kynhmỹ nĩ ẽn mỹ..!“ he ag tóg, prẽnprẽr kỹ.

39Hã ra Fariseu ũ ag tóg tá nỹtĩ gé, vẽnh e ẽn kãmĩ. Kỹ ag tóg: “ã mré mũ tĩ ag mỹ: prẽnprẽr tũg ra, hé,” he mũ. 40Hã ra Jesus tóg ag mỹ: “vó, ag prẽnprẽr tũ nĩ ra pó hỹn prẽnprẽr mũ vẽ, ag mỹn sér tĩnh mũ vẽ,” he mũ.

Jesus tỹ Jerusalém to fỹ

41Gen kỹ ag tóg Jerusalem tá junjun mũ sir. Ẽmã ẽn ve kỹ tóg fỹ mũ. 42“Jerusalém tá ke',” he tóg. “Ki kanhrãn sór tũ ãjag tóg nĩ,” he tóg. “Ãjag tỹ ũri ki kanhrãn há tóg tĩ vẽ, hã ra ãjag tóg ke jãvãnh nỹtĩ. Ãjag tỹ ki kanhrãn ra ãjag tóg krĩ kuprã nỹtĩnh mũ vẽ, mỹr, ha mẽ. Hã ra ãjag tóg jẽmẽ sór tũ nĩ. Kutu ãjag tóg nỹtĩ. 43Hã kỹ ãjag tóg vãhã kurã kórég pẽ venh ke mũ. Ãjag kato tẽ ag vỹ ãjag to ráránh ke mũ. Komẽr hã ag tóg ãjag to grẽngrẽn kenh ke mũ. Kỹ ag tóg ãjag ẽmã jy ró pénĩn vỹrỹn kenh ke mũ sir. 44Ãjag tỹ tũ' he kãn jé ag tóg ke mũ, ãjag krẽ ke gé. Ãjag ĩn kókén kãn jé ag tóg ke mũ gé. Kỹ ĩn tỹ pó pijé jagnẽ kri nỹtĩnh mũ'. Kurã há ki ãjag tóg Topẽ vĩ mẽ jãvãnh nỹtĩ, ũri. Hã kỹ ãjag tóg ti kórég venh ke mũ,” he tóg. Fỹ pẽ han kỹ tóg tó mũ, ẽmã mĩ tĩg kỹ.

Jesus tỹ Topẽ ĩn tá ag pan

(Mt 21.12-17; Mc 11.15-19; Jo 2.13-22)

45Kỹ tóg Topẽ ĩn tá jun kỹ ti jy ró kã ra rã mũ sir. Kỹ tóg ũ tỹ tá nén ũ vẽne he tĩ ag pan mũ. 46“Topẽ vĩ rá to jykrén nĩ,” he tóg. “Inh ĩn jiji vỹ tỹ Topẽ mré vĩ jafã nĩ, hã ra ãjag tóg krẽm nén kar pigju mũgtĩ,” he tóg. Ag pan kỹ tóg ag mỹ tó mũ.

47Hã ki tóg kurã kar ki ag kanhrãn mũ, Topẽ ĩn krẽm. Hã ra tóg Topẽ tũ to pã'i ag mỹ kórég nĩ, pã'i kar ag mỹ. Hã kỹ ag tóg ti tén ke to jykrén mũ sir. 48Hã ra tóg ag mỹ ki króv tũ nĩ. Vẽnh kar mỹ tóg mẽ sér tĩ, ti vĩ ti, hã kỹ tóg vẽnh mỹ tĩ sir, pã'i ag tỹ ti tén sór mũ ra.

Currently Selected:

Lucas 19: kgp

Highlight

Copy