Lucas 18

Ẽg tỹ Topẽ mré vĩ to krónh kenh ke tũ

1Kỹ tóg ag kanhrãn mũ, ag tỹ kurã kar ki Topẽ mré vẽmén jé, to krónh ke tũ nĩ jé. Kỹ tóg: 2“kejẽn pã'i tóg nĩgtĩ, ẽmã ũ tá,” he mũ. “Topẽ kamẽg vãnh tóg nĩ, ti jykre pãno nĩn kỹ. Kỹ tóg ti mré ke ag kamẽg vãnh pẽ nĩgtĩ gé. Kórég pẽ ti nĩgtĩ. 3Ẽn jamã tá ũ fi tóg nĩgtĩ gé, ũn mén ter ja fi. Ẽn fi vỹ kejẽn ti mỹ: “inh lograr he sór mũ ẽn ag jo inh ki rĩr,” he mũ. 4Hã ra tóg mẽ jãvãnh nĩ. Jatun mỹ tóg nĩ nĩ, kysã tỹ hẽn ri ke ki. Kỹ fi tóg ti tá jun tỹ hẽn ri ke han mũ gé. To krónh ke tũ fi nĩ. Kỹ tóg kejẽn to jykrén mũ. “Topẽ kamẽg vãnh inh nĩgtĩ,” he tóg.“Ũ kamẽg vãnh inh nĩgtĩ gé. 5Hã ra fi tóg isovãnh tũ pẽ nĩ. Kurã kar ki fi tóg inh mỹ to vĩnh kãtĩ mũ. Kỹ inh hỹn fi jy nĩgãn mũ ha, ke tũ nĩ mũ ra fi tóg ijũ han ke mũ, fi tỹ inh venh kãtĩg to krónh ke tũ nĩ kỹ, ha vem nĩ,” he tóg, pã'i kórég ti,” he tóg.

6Kỹ tóg ag mỹ: “ti vĩ jẽmẽ ra,” he mũ. “Jykre pãno ti nĩ, hã ra tóg fi tỹ ti mỹ vĩ e ẽn to fi kren han sór mũ,” he tóg. 7“Hã kỹ Topẽ vỹ ãjag krenkren han ke mũ gé. Ãjag kuprẽg ja tóg nĩ mỹr, kỹ ti mré vẽmén nĩ. Kurã ki ti mré vĩm nĩ, kuty tá ke gé. Ãjag kren han tũ nĩ ve ti nĩ, kejẽn. 8Hã ra tóg ãjag krenkren han ke mũ, kãnhmar, ha vem nĩ. Ki hã sóg tó mũ,” he tóg. “Hã ra ag mỹ ẽprã ke fi kósin ẽn kãtĩg mãn kỹ ti mré mũ sór mũ vỹ?“ he tóg.

Ẽg tỹ: “tỹ inh ũn há nĩ,” henh ke tũ

9Ũ tỹ ti vĩ mẽg mũ ẽn ag kã mĩ ũ ag tóg vẽso: “tỹ ẽg tóg ũn há nỹtĩ,” he tĩ. “Jo ũ ag ne kórég nỹtĩ', inhhã,” he ag tóg tĩ. Ẽn ag kanhrãn sór tóg mũ. Kỹ tóg ag mỹ: 10“kejẽn Fariseu ũ tóg nĩgtĩ,” he mũ. “Topẽ ĩn ra tóg tĩ mũ, tá ti mré vĩ jé. Ti mré ũ tóg ra tĩ mũ gé, ũ tỹ governo mỹ jãnkamy mãg tĩ ti. Ti mré vĩ sór tóg mũ gé. 11Kỹ Fariseu tóg: “Topẽ,” he mũ. “Inh mỹ tóg há tĩ, isỹ jykre kórég tũ nĩn kỹ. Ũ ag tóg nén ũ péju tĩ, ũ ag tóg nén ũ vẽnh mỹ han tĩ inhhã, jãvo inh pijé han tĩ'. Ag prũ tũ fag mré ag tóg nỹgnỹ tĩ. Kỹ governo mỹ jãnkamy mãg tĩ tag ti vỹ kórég nĩ gé, inhhã. 12Ag jãvo sóg vẽjykre há han tĩ. Semana kar ki sóg vãkre régre han tĩ, jẽg tũ nĩn kỹ. Isũ kar tỹ sóg dízimo han tĩ, ã mỹ,” he tóg, Fariseu ti, Topẽ mỹ. 13Hã ra governo mỹ jãnkamy mãg tĩ ẽn tóg kuvar há tá jẽ nĩ, mỹ'ãg kỹ. Kỹ tóg kanhkã ki ẽvãnh tũ nĩ gé. Ti fe kri tóg kãgmĩg mũ, kỹ tóg: “Topẽ,” he mũ gé. “Ã vĩ mranh inh mỹr. Ã mỹ inh jagãgtãn ke tũ hã ra?“ he tóg.

14“Ha mẽ, Topẽ vỹ ti mỹ vẽnh pãte fón, hã kỹ tóg jatun mỹ vyr. Jãvo tóg Fariseu ẽn mỹ vẽnh pãte fón tũ nĩ. Ge ti nĩgtĩ. Ẽg tỹ vẽso: “há inh nĩ,” hen kỹ Topẽ tóg ẽg mỹ vẽnh pãte fón ke tũ nĩ. Ẽg tỹ hã ra vẽso: “jykre kórég inh nĩ,” hen kỹ Topẽ vỹ ẽg to há nĩ, kỹ tóg ẽg tỹ ũn mág han ke mũ gé sir, ẽg jykre kurynh kỹ,” he tóg, Jesus ti.

Jesus tỹ gĩr to há

(Mt 19.13-15; Mc 10.13-16)

15Kỹ fag tóg gĩr tatĩ kãmũ mũ ti to, ti tỹ ag.kri ti nĩgé fi jé. Hã ra ti mré mũ tĩ ag tóg fag to jũ mũ. 16Hã ra tóg fag jé prẽr kỹ ag mỹ: “gĩr mỹ vĩ tũg nĩ,” he mũ. “Fag tỹ iso kãmũ kamẽg tũg nĩ,” he tóg. “Ũ tỹ ge hã vỹ tỹ ẽg Senhor tỹ Topẽ tũ nỹtĩ,” he tóg. 17“Sỹ ke há vẽ. Gĩr ag vỹ iso há nỹtĩ. Ũn kãsir tag fag ri ke nỹtĩm nĩ, ke tũ nĩ mũ ra ãjag tóg Topẽ tỹ tỹ ẽg pã'i nĩ venh ke tũ nĩ mỹr,” he tóg.

Ũn riko ag

(Mt 19.16-30; Mc 10.17-31)

18Kỹ kejẽn pã'i ũ tóg ti mỹ: “Senhor', há ã tóg jẽ,” he mũ. “Sỹ rĩr krỹg ja tũ venh há tóg tĩ. Sỹ ve jé inh hỹn vẽjykre há tỹ ne han ke mũ?“ he tóg. 19Kỹ tóg ti mỹ: “inh mỹ: “há ã tóg jẽ,” he sór tũg nĩ. Ẽg pijé há nỹtĩ'. Topẽ hã ne ti pir mỹ há nĩ',” he mũ. 20“Topẽ tỹ nén to ẽg jyvẽn mũ ẽn ki kanhró ã tóg nĩ, hã vỹ: ã prũ tũ fi mré nỹ tũg nĩ, ũ tén tũg nĩ, nén ũ péju tũg nĩ, ũ to ón tũg nĩ, ã nỹ mré ã jóg kamẽg nĩ, he mũ,” he tóg. 21Hã ra tóg: “tag kar ki sóg króm kãn, isĩn kã,” he mũ. 22Kỹ tóg ti mỹ: “nén ũ pir vỹ tũ nĩ ver,” he mũ. “Ã tũ vãm kãn nĩ, ã tỹ ũn jagtar ag mỹ vin jé, jãnkamy ti. Kỹ ã tóg kanhkã tá tũ mág nĩnh mũ sir. Kar kãtĩg nĩ, ã tỹ inh mré tĩg jé,” he tóg. 23Kỹ tóg ti mỹ vẽnh mỹ tĩ, ti riko pẽ nĩn kỹ.

24Hã ra Jesus tóg ti mỹ vẽnh mỹ ẽn ki kanhrãn mũ. Kỹ tóg ti mré mũ tĩ ag mỹ: “jagy ti nỹ, ũn riko tỹ Topẽ tỹ tỹ ẽg pã'i nĩ venh ke ti,” he mũ. 25“Kãvãru pãnĩ sór vỹ préj nor fĩn kutẽnh ke tũ nĩ,” he tóg. “Ti tỹ fĩn kutẽ há nĩ ra tóg há tĩ vẽ, ũn riko tỹ Topẽ tỹ tỹ ẽg pã'i nĩ venh ke ti,” he tóg.

26Kỹ ti vĩ mẽg mũ ag tóg jagnẽ mỹ: “kỹ ũ hỹn kren ke tũ pẽ nĩ,” he mũ. 27Kỹ tóg ag mỹ: “ẽprã ke ag vỹ tá junjun ke tũ nĩ vẽ,” he mũ. “Hã ra Topẽ hã tóg ẽg tỹ tá junjun han ke mũ,” he tóg.

28Kỹ Pedro vỹ: “ha vé, ẽg tỹ nén ũ kar ré kỹ ẽg tóg ã mré mũ mũ,” he mũ. 29Kỹ tóg ag mỹ: “sỹ ke há vẽ. Ũ tóg kejẽn ti jamã ré kỹ tĩ mũ, ti prũ fi, ti kãke, ti jãvy, ti han mũ fag, ti krẽ ré kỹ tóg tĩ mũ, Topẽ tỹ tỹ ẽg pã'i nĩ tugrĩn, ti tỹ ti vĩ ki króm jé,” he mũ. 30“Ẽn vỹ tóg sir vẽnh kaja jé nén kar ẽn venh ke mũ, ag jẽgja kã, ga kri, kar kỹ tóg vãhã sir ẽg rĩr krỹg ja tũ venh ke mũ gé sir, kanhkã tá,” he tóg.

Jesus tỹ ti ter ke tó mãn

(Mt 20.17-19; Mc 10.32-34)

31Kỹ tóg ũ tỹ 12 (ke) ag jé prẽr mũ, vyrmỹ. “Ha vé, Jerusalém ra ẽg mũnh mũ, kỹ sóg tá ve kãn ke mũ, vãsỹ Topẽ vĩ tó tĩ ag tỹ iso nén rán ja ẽn ti,” he tóg. 32“Fóg ag mỹ ag tóg inh fẽg ke mũ, Jerusalém tá, ha vem nĩ, ag tỹ iso é he jé, ag tỹ inh vóg kónãn jé, ag tỹ iso sug jé gé, 33ag tỹ inh mrãnmrãn jé. Ag tỹ isén ke vẽ. Hã ra sóg kurã tãgtũ tũg kỹ rĩr mãn ke mũ, ha vem nĩ,” he tóg. 34Hã ra ag tóg ti vĩ tag to jykrén tũ nĩ. Ti vĩ tóg ag mỹ vẽnh mỹ tĩ. “Ti tỹ ne tó nẽ hỹn'?“ he ag tóg mũ sir.

Jesus tỹ ũn kyvó tỹ há' he

(Mt 20.29-34; Mc 10.46-52)

35Ag mũn kỹ ag tóg Jericó to hã mũ nĩ. Hã ra ũn kyvó tóg ẽpry kri nĩ nĩ. “Inh mỹ jãnkamy nĩm,” he tóg tĩ, vẽnh kar mỹ. 36Ẽn vỹ vẽnh kar tỹ ẽpry jagma mũ mẽg tĩ. Kỹ tóg ag mỹ: “ũ nẽ?“ he mũ. 37Kỹ ag tóg ti mỹ: “Jesus vẽ, Nazaré tá ke ẽn vẽ,” he mũ. 38Kỹ tóg prẽr mũ sir. “!..Jesus'..! !..Davi krẽ'krẽ'..! !..Ijagãgtãn ra..!“ he tóg mũ. 39Kỹ ti jãmĩ mũ ag vỹ ti mỹ vĩ jũ han mũ, “mẽ kã nĩ nĩ,” hen kỹ. Hã ra tóg prẽr mãn', prẽr mãn' he mũ. “!..Davi krẽ'krẽ'..! !..Ijagãgtãn ra..!“ he tóg.

40Kỹ Jesus tóg krỹg he kỹ: “ti jé prẽr,” he mũ. Ti tỹ ti ki jun kỹ tóg ti mỹ: 41“inh ã tỹ hẽ ri kenh mũ?“ he mũ. Kỹ tóg: “sỹ venh há tóg tĩ,” he mũ. 42Kỹ tóg ti mỹ: “he, ha tã mĩ vé,” he mũ. “Ã tỹ inh ki rã kỹ ã há' henh ke mũ,” he tóg. 43Kỹ tóg vẽsỹmér ẽvãnh há' he mũ sir. Ti hã mré tóg tĩ mũ sir. Topẽ mỹ tóg vĩ há han mũ. Kỹ tóg vẽnh kar mỹ há tĩ. Topẽ mỹ ag tóg vĩ há han mũ gé sir.

Currently Selected:

Lucas 18: kgp

Highlight

Copy