Lucas 15

Ovelha vãfor kãme

(Mt 18.12-14)

1Kejẽn ũ tỹ imposto mãg tĩ ag tóg ti to kãmũ mũ, Topẽ vĩ mranh tĩ ag ke gé. Ag tỹ ti vĩ mẽ sór vẽ. 2Kỹ tóg Fariseu ag mỹ kórég nỹ, Topẽ vĩ to ẽg kanhrãn tĩ ag mỹ ke gé. Kỹ ag tóg ti to vĩ vĩ he mũ sir. “Topẽ vĩ mranh tĩ ag to tóg há nĩgtĩ. Ag mré tóg jẽg tĩ mỹr,” he ag tóg mũ.

3Kỹ tóg fag mré ag mỹ: “ũ tỹ Topẽ vĩ mranh mũ tỹ ti jykre kórég tovãnh kỹ tóg ge nỹnh mũ, ha mẽ,” he mũ. 4“Ũ mẽg tỹ mé vỹ tỹ ũ tỹ 100 (ke) nỹtĩ. Hã ra kejẽn ti mẽg pir tóg vãfor mũ. Kỹ tóg ti kanẽnh tĩ mũ sir, ũn e ẽn ag ré kỹ. 5Ti tỹ ti ve kỹ ti fe tóg mrin ke mũ sir. Kỹ tóg ti nunh kri ti fi kỹ kãtĩ mũ sir. 6Kỹ tóg ti ĩn tá jun mũ. Tá tóg ti kanhkã fag jé prẽr mũ, ti rã hã nỹtĩ fag kar. Kỹ tóg fag mỹ: “inh mré ti to mỹ sér,” he mũ. “Inh mẽg vỹ vãfor ja nĩ, hã ra sóg ti ve mãn mũ,” he tóg. 7“Kỹ tóg ge nĩ, ha mẽ. Ũ tỹ 99 (ke) ag tỹ vẽjykre kuryj han kỹ tóg há tĩ sir. Kỹ tóg kanhkã tá ke ag mỹ sér tĩ sir. Hã ra tóg sér kãfór tĩ, ũn pir tỹ ti jykre kórég tovãnh kỹ, ti tỹ ti tỹ Topẽ vĩ mranh mũ ẽn tovãnh kỹ,” he tóg Jesus ti.

Jãnkamy vãfor kãme

8“Kỹ ũn tỹtá fag tóg ge nỹtĩ tĩ gé, ha mẽ. Ũ fi tóg jãnkamy tỹ 10 (ke) tỹ tũ nĩ. Kejẽn ũn pir tóg fi mỹ vãfor mũ. Kỹ fi tóg néj grug kỹ fi ĩn kã mĩ prun kãn mũ gé, jãnkamy ẽn kanẽn jé. 9Vãhã fi tóg ve mãn mũ sir. Kỹ fi tóg fi mré ke kar fag jé prẽr mũ. Kỹ fi tóg fag mỹ: “inh mré to mỹ sér,” he mũ. “Inh jãnkamy vỹ vãfor ja nĩ, hã ra sóg ve mãn mũ,” he fi tóg mũ. 10Kỹ tóg ge nĩ, kanhkã tá, ha mẽ. Topẽ tỹ jẽgnẽ jafã ag mỹ tóg sér tãvĩ tĩ, ũ fi tỹ fi tỹ Topẽ vĩ mranh ẽn tovãnh kỹ, ha mẽ,” he tóg, Jesus ti.

Ũ kósin vãfor kãme

11Kỹ tóg: “ũ vỹ tóg kósin régre ja nĩgtĩ gé,” he mũ. 12“Kỹ ti kósin tỹ ẽgno tóg ti panh mỹ: “ha ũri inh mỹ isũ nĩm, ã tỹ inh mỹ nén nĩm ke mũ ẽn ti,” he mũ. Kỹ ti panh tóg ti krẽ mỹ ti tũ vẽnh kãpãm mũ sir. 13Kãnhmar ti kósin kyrũ tóg ti tũ mãn kỹ ẽmã ũ ra tĩ mũ. Tá tóg vãm kãn mũ, nén ũ kórég kar to. 14Kejẽn tóg tá prỹg han mũ sir, ẽmã ẽn tá. Kỹ tóg kókĩr mũ sir. 15Kỹ tóg tá ke ũ mré vẽmén mũ, ti tỹ ti mỹ vẽnh rãnhrãj nĩm jé. Kỹ tóg ti tỹ ti mỹ ti mẽg tỹ porko ki rĩr jé ti jẽnẽg mũ sir, ti safra ra. 16Kỹ tóg ti mẽg jẽn ko sór mũ, ti kókĩr tãvĩ nĩn kỹ. 17Kỹ tóg kejẽn krĩ há han mũ. To jykrén tóg mũ sir. “Inh panh mỹ rãnhrãj tĩ ag vỹ ẽmĩ ko mág tĩ. Ag jẽn tóg ag mỹ kén tĩ. Jo sóg kókĩr kỹ ter sór mũ ha,” he tóg. 18“Inh jé hỹn inh panh kukãm tĩg mãn ha,” he tóg. “Kỹ sóg ti mỹ: “panh',” henh ke mũ. “Kanhkã tá nĩ ẽn vĩ mranh inh, ã vĩ ti ke gé. 19Kỹ sóg vẽnh mỹ tỹ ã kósin tũ nĩ. Vẽnhmỹ sóg tỹ ã camarada nĩnh ke nĩ ha,” he jé sóg ke mũ,” he tóg mũ, to jykrén kỹ. 20Kỹ tóg tĩ mũ sir, ti panh kukãm.

Hã ra ti panh tóg kuvar há tá ti kãtĩ ẽn vég mũ. Kỹ tóg ti kato tĩg kỹ ti ki póm ke mũ sir. Ti ki nhun ke tóg mũ gé sir. 21Kỹ ti kósin tóg ti mỹ: “panh',” he mũ. “Kanhkã tá nĩ ẽn vĩ mranh inh, ã vĩ ke gé. Hã kỹ sóg vẽnh mỹ tỹ ã kósin tũ nĩ ha,” he tóg.

22Hã ra tóg ti mỹ: “vó, vẽnh pãte fón kỹ tóg nĩ,” he mũ. Kỹ tóg ti camarada ag mỹ: “kur há tãvĩ ẽn gé kãmũjẽg,” he mũ. “Ti nĩgé kã rãg gé, nĩgé kã nĩm jafã tỹ, pẽn né ẽn ke gé. 23Monh tãgy ẽn venh mũjẽg. Ti tãnh ra, ẽg tỹ ko jé. 24Inh kósin vỹ inh mỹ ter ri ke han, hã ra tóg rĩr mãn ri ke han. Vãfor ja ti nĩ vẽ, hã ra tóg kãtĩg mãn mũ,” he tóg. Kỹ tóg ag mỹ sér tĩ sir, ag tỹ fénhta han kỹ.

25Hã ra ti kósin sanh tóg ti japỹ tá rãnhrãj tĩ. Kỹ tóg vãhã tá kãtĩg kỹ ti ĩn tá jun kỹ vãkyr mẽg mũ. Fag vẽnh gringrén ẽn vég tóg mũ. 26Kỹ tóg ti camarada mỹ: “fénhta tỹ ne nẽ hỹn'?” he mũ. 27Kỹ tóg ti mỹ: “ã jãvy vỹ jun, kỹ ã panh vỹ monh tãgy ẽn tãnh,” he mũ. “Ti mỹ tóg sér tĩ, ti tỹ ti ve mãn kỹ. Kaga tũ tóg jẽ, há tóg jẽ, hã kỹ tóg ã panh mỹ sér tĩ,” he tóg. 28Kỹ tóg jũ mũ sir. Kỹ tóg ĩn kã ra rã tũg mũ, jũ kỹ.

Kỹ ti panh tóg ti mỹ jã han tĩ mũ. Ti mỹ tóg: “ẽg mré fénhta venh kãrã,” he mũ. 29Hã ra tóg ti mỹ: “nejé,” he mũ. “Prỹg tỹ hẽn ri ke ki sóg ã rãnhrãj ti han, ha mẽ. Inh pijé ã vĩ mranh ja nĩgtĩ'. Ge ra ã tóg inh mỹ nén ũ nĩm ja tũ nĩ. Ã pijé inh mỹ cabrito fẽg tĩ', sỹ inh mré ke ag mỹ fénhta han jé. 30Hã ra ã kósin ẽn tóg jun mũ sir, kỹ ã tóg ti mỹ monh tãgy ẽn tãnh. Kórég ti nĩ. Ã tũ fón kãn tóg mỹr, ũn tỹtá kórég fag to, hã ra ã tóg fénhta mág han mũ, ti kãtĩg kỹ,” he tóg.

31Hã ra ti panh tóg: “vó,” he mũ. “Inh mré ã tóg jẽ nĩ, kỹ tóg inh mỹ sér tĩ. Kỹ isũ kar vỹ tỹ ã tũ nỹtĩ, mỹr, ha mẽ. 32Hã ra fénhta tag vỹ há nĩ, ha mẽ. Ẽg mỹ tóg sér tãvĩ tĩ. Ã jãvy vỹ inh mỹ ter ri ke han, hã ra tóg rĩr mãn ri ke han. Vãfor ja ti nĩ vẽ, hã ra tóg kãtĩg mãn mũ,” he tóg, ti panh ti, ti kósin sanh mỹ,” he tóg, Jesus ti.

Currently Selected:

Lucas 15: kgp

Highlight

Copy