Tiago 3
3
Ẽg nũnẽ tỹ Topẽ vĩ mranh ke tũ
1Inh kanhkã', kãnhmar jagnẽ mỹ: “sỹ ã kanhrãn há tóg tĩ, ã tỹ kygnẽ to,” he tũg nĩ. Ẽg kar vỹ kygnẽg tĩ. Kỹ ẽg tóg, ẽg tỹ ũ jyvẽn ken kỹ vẽnh ki rĩr vén ke mũ, ẽg tỹ ti mré kygnẽg tũ nĩ jé. Jãvo Topẽ vỹ ẽg vóg kónãn ke mũ, ti mré.
2Ẽg kar vỹ kygnẽ (ka)mẽ nỹtĩ. Ẽg tỹ ẽg vĩ ki kygnẽg tũ pẽ nĩn kỹ ẽg tóg kuryj kar nĩ sir. 3Kãvãru to jykrén nĩ. Freio tỹ ẽg tóg ti jẽn kã kã fig tĩ. Kỹ ẽg tóg tỹ ti vóg tĩ sir, kỹ tóg ti tĩg ke ẽn ra tĩ mũ sir, ũ tỹ kãvãru kri nĩ ẽn ti. 4Kỹ canoa mág to jykrén nĩ gé. Éhé tóg nỹ, hã ra kãka vỹ ti tĩn tĩ. Kỹ ag tóg ti vóg jafã tỹ ti vóg tĩ. Kỹ tóg ag mỹ ki ke tĩ. Ti vóg mũ ag mũnh ke ra tóg tĩ mũ sir. Ti vóg jafã sĩ ra tóg ki ke mũ. 5Ge tóg nĩ, ẽg nũnẽ ti. Sĩ ti nĩ mỹr, hã ra ẽg tóg tỹ vĩ mág han tĩ gé.
Pĩ ri ke tóg nĩ. Ti sĩ ra tóg kejẽn vãnh pũn tĩ mỹr, nẽn kar ti. 6Ẽn ri ke tóg nĩ, ẽg nũnẽ ti. Tỹ ẽg tóg vẽjykre pãno tó tĩ. Kỹ ẽg tóg ẽg vĩ tag to kavéj kar nỹtĩ, ẽg tỹ ẽg vĩ tag to ti vĩ mranh kỹ. Japo tỹ ẽg krĩn hã vẽ, ẽg tỹ ẽg vĩ ki Topẽ vĩ mranh jé.
7Ha mẽ, misu kar vỹ tỹ ẽg mẽg nỹtĩ. Ũ ag vỹ mĩg tỹ mẽg nỹtĩ, kỹ ũ ag vỹ sẽsĩ tỹ mẽg nỹtĩ, ũ ag vỹ pỹn tỹ mẽg nỹtĩ, ũ ag vỹ goj ki ke kar tỹ mẽg nỹtĩ gé. Ti kar kanhrãn ẽg tóg tĩ mỹr, ha mẽ. 8Hã ra ẽg pijé ẽg nũnẽ kanhrãn há han tĩ'. Ti kanhrãn ki kagtĩg ẽg nỹtĩ. Vẽjykre pãno tãvĩ tó sór ẽg tóg tĩ. Kỹ tóg veneno ri ke nĩ, ẽg vĩ ti. Tỹ ẽg tóg jagnẽ kãgtén ri ke han tĩ, jagnẽ mỹ vĩ kónãn kỹ. 9Tỹ ẽg tóg Topẽ mỹ vĩ há han tĩ, ẽg jóg mág mỹ, ẽg nũnẽ tỹ. Kỹ ẽg tóg tỹ ẽprã ke ag mỹ vĩ kónãn tĩ gé. Hã ra Topẽ tóg ẽg han, ẽg tỹ ti ri ke nỹtĩ jé. Kỹ ẽg tỹ jagnẽ mỹ vĩ kónãn kỹ, ẽg tỹ Topẽ mỹ vĩ kónãn ri ke vẽ sir. 10Ẽg jẽn kã tá tóg kãkutẽ tĩ, ẽg vĩ há ti, ẽg vĩ kónãn ti ke gé. Pir ti nĩ, ẽg jẽnky ti, hã ra ẽg tóg tỹ vĩ régre han tĩ. Tag vỹ kórég tãvĩ nĩ, inh kanhkã'. 11Goj tỹ ẽganẽ to jykrén nĩ. Ti há nĩn kỹ tóg há nĩ, goj ti. Ti kajã nĩn kỹ tóg kajã nĩ. Ti pijé tỹ goj régre nĩ', goj tỹ ẽganẽ ti. Pir tóg nĩ. 12Kỹ ka kanẽ to jykrén nĩ gé. Ka tỹ pẽnva ki ẽg tóg jymi vég tũ nĩgtĩ mỹr. Pir ti nĩ, ka kanẽ ti. Ge ti nĩ gé, goj ti. Ti kajã nĩn kỹ tóg kajã nĩ gé. Kỹ gem nĩ gé, ãjag nũnẽ tỹ. Vĩ pir han nĩ.
Topẽ tỹ ẽg mỹ krĩ há nĩm
13Ãjag mỹ krĩ há nỹtĩ'? Ãjag mỹ Topẽ vĩ ki kanhró nỹtĩ'? Kỹ tóg há tĩ. Kỹ vẽjykre há kar han kỹ nỹtĩm nĩ. Hã ki vẽnh kar vỹ ãjag krĩ há venh ke mũ sir. Hã ra tỹ vĩ mág han tũg nĩ. Tỹ vẽnh kãfór han tũg nĩ gé.
14Ãjag tỹ ũ to ãjag fe tỹ gỹm ke (ka)mẽ nĩn kỹ tóg tỹ ũ nỹ jãvo, jagnẽ to jũ (ka)mẽ nỹtĩn kỹ, ãjag tỹ jagnẽ kãfór nỹtĩ sór kỹ. Ãjag tỹ tag han kỹ vẽso: “krĩ há inh nĩ, Topẽ vĩ ki Kanhró inh nĩ,” he tũg nĩ. Vẽnh ó vẽ, tag ti. 15Topẽ tỹ ẽg kanhrãn ja pijé', ẽg tỹ ũ to ẽg fe tỹ gỹm ke (ka)mẽ nĩ ti, jagnẽ kãfór han sór mũ ti, jagnẽ to jũ (ka)mẽ ti ke gé. Ẽprã vẽjykre vẽ mỹr. Japo jykre vẽ mỹr, ẽg fe jũ tag ti. 16Ẽg tỹ jagnẽ kãfór han sór kỹ ẽg tóg jagnẽ kato tẽgtẽ mũ sir, ẽg tỹ vẽsỹ ũn mág han sór kỹ, ẽg tỹ jagnẽ to vĩ (ka)mẽ nỹtĩn kỹ. Kỹ ẽg tóg vẽjykre pãno han kãn mũ sir.
17Ẽg tỹ hã ra Topẽ tỹ ẽg kanhrãn mũ han kỹ ẽg tóg jãnhkri nỹtĩ, kavéj tũ mỹr. Jagnẽ to ẽg tóg krĩ kusa nỹtĩ. Jagnẽ mỹ ẽg tóg komẽr hã vĩ tĩ gé. Jagnẽ jagãgtãn ẽg tĩ sir. Nén kar há han ẽg tĩ. Topẽ vĩ to ẽg tar nỹtĩ. Jykre régre tũ ẽg nỹtĩ. 18Ẽg tỹ ti jykre tag han kỹ ẽg tóg jagnẽ krĩ kuprãg mũ sir, ẽg tỹ jykre kuryj nỹtĩ jé sir, ha mẽ.
Currently Selected:
Tiago 3: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido