Tiago 2
2
Jagnẽ to vẽjykre pir han ke
1Inh kanhkã', ẽg Senhor tỹ Jesus Cristo ki ãjag ge mũ mỹr. Pã'i kar kãfór vẽ. Ge ra ãjag ne tóg ũn riko ag to há nỹtĩ', kỹ ũn jagtar ag tóg ãjag mỹ tỹ nén ũ tũ nỹtĩ. Ke tũg nĩ. 2Hẽn ri ke mũn ũn riko vỹ Topẽ vĩ jẽmẽnh kãtĩg mũ, ãjag vẽnhmãn kỹ. Ti kur vỹ há tãvĩ nĩ, kỹ ti nĩgé kãnĩm ja vỹ tỹ ouro nĩ. Kỹ ũn jagtar vỹ kãtĩg ke mũ gé, kur kórég tu kỹ. 3Kỹ ãjag hỹn ũn riko mỹ: “ha tag kã nĩ, nĩg ja há kri,” he tĩ. Jó ãjag hỹn ũn jagtar mỹ: “ha inh mré nĩ, hã ra ẽprã nĩ, gan kri,” he tĩ. 4Hã ki ãjag tóg ũn riko to há nĩ ve nĩ, ti tũ tugrĩn. Jãvo ãjag tóg ũn jagtar to é he ve nĩ, ti jagtar nĩn kỹ. Ke tũg nĩ. Ãjag tỹ jagnẽ ri ke nỹtĩ to jykrén nĩ, ke tũ nĩ mũ ra ãjag tóg vẽjykre pãno han mũ.
5Inh kanhkã', jẽmẽ há han ra. Ãjag to sóg há nĩ mỹr, hã kỹ sóg ãjag jyvẽn mũ. Topẽ vỹ ũn jagtar ag kuprẽg, ag tỹ ti to rikon jé, ti ki ge kỹ. Ga kri mũn kỹ ag tóg jagtar nỹtĩ. Ẽg Senhor ki ge kỹ ag tóg há nỹtĩ hã ra. Topẽ tỹ tỹ ẽg pã'i nĩ ve jé ag tóg ke mũ, ag tỹ ti to há nỹtĩn kỹ. 6Jãvo ãjag tóg ũn jagtar ag to é he tĩ. Ũn riko ag to ãjag tóg vĩ há han tĩ. Hã ra ũn riko ũ ag tóg ãjag to kórég nỹtĩ gé. Kỹ ag tóg ãjag to vĩ kónãn tĩ. Hã kỹ tóg vẽnhmỹ nỹ, ãjag tỹ ũn jagtar to é he ti. 7Kỹ ũn riko ũ ag tóg ẽg Senhor to é he tĩ gé. Ti to ag tóg vĩ kónãn tĩ gé, hã ra ẽg tóg tỹ ti mré ke nỹtĩ. Hã kỹ ag tóg ẽg to vĩ kónãn mũ gé.
8Topẽ tỹ vãsỹ ẽg mỹ vẽjykre nĩm ja ẽn ki króm nĩ, hã vỹ: “ã régre to há nĩm nĩ, ã tỹ vẽso há nĩ ri ke nĩm nĩ, ã régre tỹ,” he mũ. Kỹ tóg rán kỹ nĩ. Ãjag tỹ tag han kỹ tóg há nĩ. 9Ãjag tỹ hã ra ũn riko to há nỹtĩn kỹ, ũn jagtar to kórég nỹtĩn kỹ ãjag tóg, ti vĩ mranh mũ sir, ti tỹ ẽg jyvẽn ja ti. Kỹ Topẽ tóg ãjag to jykrén kónãn ke mũ.
10Ha vé, hẽn ri ke mũn ẽg kã mĩ ũ tóg Topẽ tỹ ẽg mỹ vẽjykre nĩm ja kar ki króm tĩ. Hã ra tóg sir, nén pir ki ti vĩ mranh mũ. Kỹ ti tỹ ti vĩ mranh kãn vẽ sir. 11Topẽ tóg ẽg mỹ: “ã prũ tũ fi mré nỹ tũg nĩ, kỹ ã mén tũ mré nỹ tũg nĩ gé,” he ja nĩgtĩ. Kỹ tóg ẽg mỹ: “ũ tén tũg nĩ,” he ja nĩgtĩ gé. Hẽn ri ke mũn ẽg tóg ẽg prũ tũ fag mré nỹ tũ nĩgtĩ. Ẽg tỹ hã ra ũ tén kỹ ẽg tóg ti vĩ mranh kãn mũ sir. 12Kỹ tag to jykrén nĩ, ãjag tỹ nén ũ han ke to jykrén kỹ. Ẽg Senhor vỹ ẽg jykre kar vég tĩ, ti tỹ ẽg tỹ ti jykre ki króm ve sór kỹ. Kỹ ãjag jykre to jykrén nĩ, ãjag vĩ to ke gé. 13Ẽg tỹ jagnẽ jagãgtãn tũ nĩn kỹ tóg ẽg jagãgtãn ke tũ nĩ gé, ẽg Senhor ti. Ẽg tỹ hã ra jagnẽ jagãgtãn kỹ tóg ẽg jagãgtãn ke mũ gé, ti tỹ ẽg jykre tugnỹm ken kỹ, kurã ẽn kã. Kỹ ti pijé ẽg vóg kónãn ke mũ sir'.
Ti ki rã há
14Inh kanhkã', ũ tóg kejẽn: “ti ki sóg rã kỹ nĩ,” he tĩ, Topẽ to. Hã ra tóg ti vĩ han tũ nĩgtĩ. Kỹ tóg ón kỹ ti ki rã kỹ nĩ ja nĩ. Kren ke tũ tóg nĩ sir. 15Kejẽn Jesus mré ke ũ tóg kur vég tũ nĩgtĩ, vẽjẽn vég tũ tóg nĩgtĩ gé, Jesus mré ke ũ fi ke gé. 16Kỹ ãjag kã mĩ ũ tóg hẽn ri ke mũn ti mỹ, fi mỹ: “ã jé kusa mẽg tũ nĩgtĩ, ã jé kókĩr tũ nĩgtĩ,” he mũ. Hã ra tóg fag mỹ nén ũ nĩm tũ nĩ. Kỹ tóg fagrĩnh mỹ fag mỹ: “ã jé jagtar tũ nĩgtĩ,” he ja nĩ. 17Ge ti nĩ, ẽg tỹ ón kỹ: “ti ki sóg rã kỹ jẽ,” hen kỹ. Ẽg tỹ ti vĩ han tũ nĩn kỹ ẽg tóg fagrĩnh mỹ: “ti ki sóg rã kỹ nĩ,” he mũ sir. Nén ũ tũ vẽ.
18Ãjag kã mĩ ũ tóg hẽn ri ke mũn: “ũ tóg Jesus ki rã kỹ nĩ, jãvo ũ tóg ti jykre han tĩ,” he sór mũ, ãjag tỹ ti jykre han sór tũ nỹtĩn kỹ. Ã tỹ ti jykre ki króm vãnh nĩn kỹ sóg ki kagtĩg nĩ. “Ti mỹ Jesus ki rã kỹ nĩ vỹ?“ he jé sóg ke mũ, ã to. Ã jãvo sóg ti jykre han tĩ inhhã. Hã to ã tóg ki kanhró nĩ, sỹ ti ki rã kỹ nĩ ti,” he jé sóg ke mũ, ãjag mỹ.
19“Topẽ vỹ tỹ ũn pir nĩ,” he ãjag tóg tĩ gé. Ãjag tỹ ki hã tó vẽ. Kỹ Japo ag vỹ tag tó tĩ gé. “Pir tóg nĩ, Topẽ ti,” he ag tóg tĩ gé. Ag tỹ ti pir ki kanhró hã ra ag tóg krenkren ke tũ nĩ, ag tỹ ti jykre han tũ nĩn kỹ. Hã kỹ ẽg tóg ẽg tỹ Topẽ vĩ kãmén há ra krenkren ke tũ nĩ gé, ẽg tỹ ti jykre han tũ nĩn kỹ. 20Ãjag tỹ tag to jykrén tũ nĩn kỹ ãjag tóg krĩ tũ pẽ nỹtĩ. Ẽg tỹ ti vĩ ki króm tũ nĩn kỹ ẽg tóg ón kỹ ti ki ge kỹ nỹtĩ. Nén ũ tũ vẽ sir, ẽg tỹ ti ki ge kỹ nỹtĩ tag ti. Ẽg mỹ tóg nén ũ há han ke tũ nĩ.
21Ẽg jógjóg ve tỹ Abraão to jykrén nĩ. Topẽ tóg ti mỹ: “ã kósin tỹ Isaque tãnh kỹ pũn, inh mỹ,” he ja nĩ. Kỹ tóg ti mỹ: “he,” he ja nĩ sir. Hã kỹ tóg Topẽ mỹ há nĩ sir, Abraão ti, ti tỹ ti vĩ ki króm ja nĩn kỹ. Kỹ tóg ti to: “inh ki rã há han ja ti nĩ,” he mũ. 22Ve ra ha. Ti tỹ Topẽ ki rã kỹ jẽn hã kỹ tóg ti mỹ: “he,” he ja nĩ, Abraão ti. Kỹ tóg, ti tỹ ti mỹ: “he,” hen kỹ ti ki rã kỹ jẽ ẽn to tar nĩ sir, Topẽ vĩ ki króm ke to. Ge ti nĩ mỹr. 23Rán kỹ tóg nĩ gé, kỹ tóg: “Topẽ vĩ kri tóg fi, Abraão ti,” he mũ. Hã kỹ Topẽ tóg ti to: “ũ tỹ iso há nĩ ẽn,” he tĩ,” he tóg, Abraão to. 24Hã ki ãjag tóg vég mũ. Ẽg tỹ ti vĩ han kỹ tóg ẽg to: “inh ki rã há han ja ti nĩ,” henh ke mũ gé. Ẽg tỹ ón kỹ ti ki rã kỹ nĩn kỹ ẽg tóg hã ra ti mỹ há tũ nỹtĩ, Topẽ mỹ, ẽg tỹ ti vĩ ki króm tũ nĩn kỹ.
25 Raabe fi to jykrén nĩ gé, ũn mén jafã ẽn fi to. Ẽg povo vỹ ũ ag jẽgnẽ ja nĩ, ag tỹ fi jamã ve jé, ẽmã mág ẽn ti. Kỹ fi tóg ag mỹ: “kãge jẽg ra,” he ja nĩ. Tag to fi tóg kren mũ mỹr, fi tỹ tag han to. Kỹ Topẽ tóg fi to: “inh ki rã há han fi,” he ja nĩ sir, fi tỹ ti vĩ kri fi to.
26Ge ti nĩ gé, ẽg mỹ. Ẽg tỹ ti ki ge kỹ nỹtĩn kỹ ẽg tóg ti vĩ kri finh ke mũ, Raabe fi ri ke. Ẽg tỹ ti vĩ han tũ nĩn kỹ tóg ẽg mỹ nén ũ há han ke tũ nĩ gé, ẽg tỹ ón kỹ ti ki ge kỹ nỹtĩn kỹ, ẽg fár tỹ kuprĩg tũ ra ter kỹ nỹ ẽn ri ke ti nĩ.
Currently Selected:
Tiago 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido