Han Kãme 28
28
Goj vãso tỹ Malta tá
1Ẽg tỹ ga tá nỹtĩn kỹ ẽg tóg ga jiji mẽg mũ, hã vỹ: Malta, he mũ. 2Tá ke ag tóg ẽg jagãgtãn mũ. Kỹ ag tóg pĩ han mũ. Ẽg mỹ ag tóg: “kãge jẽg ra,” he mũ, ta kutẽ kỹ, kusa jagy tĩn kỹ.
3Kỹ Paulo tóg pĩnh tĩ mũ, kỹ tóg pĩ ki nĩn mũ. Hã ra pỹn tóg pĩ kã kã nỹ ja nĩ. Rỹ mẽ kỹ tóg tim ke kỹ Paulo prãg mũ, ti nĩgé ki. 4Kỹ tá ke ag tóg pỹn ẽn vég mũ, ti tỹ ti nĩgé to sa kỹ. Kỹ ag tóg jagnẽ mỹ: “ũ tén tĩ hỹn vẽ. Goj tán kren, hã ra tóg ti tỹ nén han jan kajãm mũ,” he mũ, Paulo to.
5Kỹ tóg pỹn tỹ pĩ ki kãvén mũ. Hã ra tóg kaga tũ nĩ, ti nĩgé ti, Topẽ tỹ ti tỹ há' hen kỹ.
6Hã ra ag tóg ti tugnỹm mũ, ti kãnhpar ve jé, ke tũ nĩ kỹ ti ter kỹ kutẽ ve jé. Hã kỹ ag tóg ti vég nỹtĩ, óra tỹ hẽn ri ke ki. Hã ra tóg hẽ ri ke tũ nĩ. Kỹ tóg ag mỹ e tĩ, kỹ ag tóg ti to jykrén mãn mũ. “Topẽ hỹn,” he ag tóg mũ, ón kỹ, Paulo to.
7Goj vãso tá ke ẽn ag kãfór vỹ tỹ Públio nĩ. Tá tóg ĩn nĩ, ti japỹ tá. Ẽg tỹ tugtón nỹtĩ tag tá tóg kakó nĩ, ti ĩn ti. Kỹ tóg ẽg mỹ: “kãge jẽg ra,” he mũ. Ti mré ẽg tóg kurã tãgtũ han mũ.
8Hã ra Públio panh tóg kaga nỹ nĩ, jãgfa kyvénh han kỹ. Kỹ tóg to rỹg nỹ nĩ gé. Kỹ Paulo tóg ti venh rã mũ. Kỹ tóg ti to Topẽ mré vĩ mũ. Ti nĩgé tỹ tóg ti mẽg mũ, kỹ tóg há' he mũ sir. 9Ti han kỹ vẽnh kagyga kar ag vỹ tá junjun mũ sir, goj vãso ẽn tá. Kỹ tóg ag tỹ há' he kãn mũ gé, Paulo ti.
10Kỹ ag tóg ẽg ki rĩr há han mũ. Ẽg tỹ kar kỹ canoa ũ kã ra ge kỹ ag tóg ẽg mỹ ẽg tỹ nén ve sór mũ kar ẽn vin mũ.
Roma ra
11Kysã tãgtũ tũg kỹ ẽg tóg canoa ũ kã ra ge mũ sir. Ẽmã tỹ Alexandria tá ke vẽ gé. Tá tóg kusa fĩn rãm ja nĩ. Ti rá vỹ tỹ ti vẽgni kãgrá nĩ. Romano ag topẽ ũ vẽ, ti vẽgni kãgrá ti.
12Tá pa kỹ ẽg tóg ẽmã tỹ Siracusa tá krỹg mũ. Kỹ ẽg tóg tá kurã tãgtũ tũg mũ. 13Tá pa kỹ ẽg tóg ẽmã tỹ Régio tá junjun mũ. Tỹ vaj kỹ kãka tóg ẽg vóg há han mũ. Hã kỹ ẽg tóg kurã régre tũg kỹ ẽmã tỹ Pozuoli tá junjun mũ sir. 14Tá ẽg tóg Jesus mré ke ag vég mũ, kỹ ag tóg ẽg mỹ: “ẽg mré semana tũg nĩ ver,” he mũ. Kar kỹ ẽg tóg ẽmã tỹ Roma ra mũ mũ sir. 15Roma tá ke ag tóg ẽg kãmũ mẽ ja nĩ, Jesus mré ke ag. Kỹ ag tóg ẽg venh kãmũ mũ. Ẽmã tỹ Ápio he mũ ẽn tá ag tóg ẽg kato tẽgtẽ mũ, ẽmã tỹ Venda Tãgtũ he mũ ẽn tá ke gé. Paulo tỹ ag ve kỹ ti fe tóg mrin ke mũ. Kỹ tóg Topẽ mỹ vĩ há han mũ. Ti krĩ tóg kãnhvy' he mũ sir.
16Ẽg tỹ ẽmã mág tỹ Roma tá junjun kỹ Paulo tóg vyr mỹ nĩ nĩ. Vẽse ũ ag mré tóg nĩ tũ nĩ. Soldado pir hã tóg ti ki rĩr mũ. Capitão tóg ti mỹ tag to: “he,” he ja nĩ.
Roma tá
17Kurã tãgtũ tũg kỹ Paulo tóg Judeu ag pã'i ag jé prẽr mũ. Kỹ tóg ag mỹ: “inh kanhkã', se kỹ inh jẽ, Jerusalém tá,” he mũ. “Kỹ ag tóg tá fóg tỹ Romano ag mỹ inh fẽg, isỹ nén ũ kórég han tũ hã ra, isỹ ẽg jykre mranh tũ hã ra,” he tóg. 18“Fóg tỹ Romano ag tóg inh kavãn sór mũ vẽ, ag tỹ inh ki jẽmẽ kar kỹ. Isỹ nén han ja tũ to sóg ter ke tũ nĩ vẽ. 19Hã ra Judeu ag tóg inh kato vĩ, hã kỹ sóg sir pã'i mág tỹ Imperador ve sór mũ, ag tỹ isén tũ nĩ jé. Hã ra sóg ẽg povo kavénh sór tũ nĩ, Imperador jo,” he tóg. 20“Hã kỹ sóg ãjag jé prẽr mũ, sỹ ãjag ki jẽmẽ jé. Ẽg povo tỹ Judeu kar vỹ Cristo ve sór mũ. Sỹ Cristo kãmén hã to sóg se kỹ jẽ nĩ,” he tóg, Paulo ti.
21Kỹ ag tóg ti mỹ: “ũ tóg ẽg mỹ ã to vẽnh rá han ja tũ nĩ, Judéia tá,” he mũ. “Kỹ ẽg kanhkã ũ tóg ẽg ki jun ja tũ nĩ gé, ti tỹ ẽg mỹ ã tỹ nén ũ kórég han mũ ẽn tó jé. 22Hã ra tóg ẽg tỹ ã ki jẽmẽnh há tĩ, ã tỹ nén to jykrén mũ ti. Vẽjykre tãg tag kato ag tóg vĩ tĩ, vẽnh kar ag. Hã kỹ tóg ẽg tỹ ã ki jẽmẽnh há tĩ,” he ag tóg ti mỹ.
23Kỹ ag tóg ti mỹ kurã nĩm mũ. Kỹ ũn e ag tóg vẽnh mãn mũ sir, ti tỹ ĩn krẽm nĩ ẽn tá. Ag mỹ tóg Topẽ tỹ tỹ ẽg pã'i nĩ kãmén mũ. Jesus kãmén tóg mũ, ag tỹ hẽn ri ke mũn ti ki ge jé. Moisés tỹ ag mỹ vẽjykre nĩm ja ẽn kãmén tóg mũ gé sir. Kusã ki kãmũ kỹ ag tóg tỹ vẽmén nỹtĩ ki kutyg mũ. 24Kỹ tóg ũ ag mỹ há nỹ. Kỹ ag tóg kri fig mũ. Hã ra tóg ũ ag mỹ há tũ nĩ. 25Hã kỹ ag tóg vẽnh kãpugpóv kỹ nỹtĩ. Kỹ Paulo tóg ag mỹ: “Topẽ kuprĩg tóg tó há han ja nĩ, ti tỹ Topẽ vĩ tó tĩ tỹ Isaías mỹ: ag mỹ tag tó, hen kỹ,” he mũ. 26“Ẽg jógjóg ag mỹ tóg: povo tag mỹ: mẽ jé ãjag tóg ke mũ, ón kỹ, hã ra ãjag tóg to jykrén ke tũ nĩ, hem nĩ, he ja nĩ. 27Kỹ ag tóg ki kagtĩg nỹtĩnh mũ. Krĩ tũ ag nỹtĩ. Nĩgrẽg kutu ag tóg nỹtĩ gé. Kanẽ kyvó ag tóg nỹtĩ gé, ag tỹ nén ũ ve sór tũ nĩn kỹ. Jẽmẽ sór tũ ag nỹtĩ, ag tỹ to jykrén sór tũ nĩn kỹ. Hã kỹ ag tóg inh ki ge sór tũ nĩ gé, kỹ sóg ag tỹ há' henh ke tũ nĩ gé,” he ja tóg nĩ, Topẽ ti, Isaías mỹ,” he tóg.
28“Ãjag tỹ mẽ jãvãnh nỹtĩn kỹ fóg ag vỹ mẽnh mũ, kanhgág ag ke gé, Topẽ tỹ ag krenkren han sór mũ ti. Kỹ ag tóg ti mỹ: he, henh ke mũ,” he tóg, Paulo ti.
29Kỹ Judeu ag tóg ti ré kỹ mũ mũ sir, jagnẽ vĩ kafãn kỹ.
30 Paulo vỹ prỹg régre tũg mũ, ti ĩn krẽm nĩn kỹ. Alugar hen kỹ tóg jẽ nĩ, ĩn ẽn ti, kỹ tóg kajãm mũ, ti jãnkamy tỹ. Kỹ tóg ũ tỹ ti mré vĩ sór mũ mỹ: “kãrã ra,” he ti. 31Vẽnh kar mỹ tóg Topẽ tỹ tỹ ẽg pã'i nĩ kãmén mũ sir, fe tar han kỹ. Ẽg Senhor tỹ Jesus Cristo kãmén tóg mũ sir. Ũ tóg ti mỹ: “vĩ tũg ra,” he tũ nĩ, ti se kỹ nĩ hã ra.
Currently Selected:
Han Kãme 28: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
