San Lucas 18

Li jaljo̱quil ru a̱tin chirix li xma̱lcaꞌan ut laj rakol a̱tin

1Li Jesús quixye li jaljo̱quil ru a̱tin aꞌin reheb lix tzolom re xcꞌutbal chiruheb nak tento teꞌtijok junelic ut incꞌaꞌ ta̱chꞌina̱nk xchꞌo̱leb. 2Quixye reheb: —Saꞌ jun li tenamit quicuan jun aj rakol a̱tin incꞌaꞌ naxxucua ru li Dios, chi moco naxqꞌue saꞌ xnakꞌ ru li cristian. 3Ut quicuan ajcuiꞌ saꞌ li tenamit aꞌan jun li xma̱lcaꞌan cuan jun lix chꞌaꞌajquilal. Rajlal yo̱ chi xic riqꞌuin laj rakol a̱tin chixtzꞌa̱manquil lix tenkꞌanquil ut naxye re: “Ba̱nu usilal, charak a̱tin saꞌ xbe̱neb li xicꞌ nequeꞌiloc cue,” chan. 4Ut laj rakol a̱tin incꞌaꞌ quiraj. Abanan mokon quixye saꞌ xchꞌo̱l: “La̱in incꞌaꞌ ninxucua ru li Dios chi moco eb li cui̱nk ninqꞌueheb saꞌ xnakꞌ cuu. 5Abanan xban nak yo̱quin chi titzꞌc chirabinquil li ixk aꞌin, tinrak a̱tin saꞌ xbe̱neb li xicꞌ nequeꞌiloc re. Ma̱re yo̱k chinchꞌiꞌchꞌiꞌinquil junelic,” chan saꞌ xchꞌo̱l.— 6Ut li Ka̱cuaꞌ quixye reheb: —Qꞌuehomak retal cꞌaꞌru quixye laj rakol a̱tin li incꞌaꞌ ti̱c xchꞌo̱l. Usta incꞌaꞌ ti̱c xchꞌo̱l, laj rakol a̱tin quixtenkꞌa li xma̱lcaꞌan re nak incꞌaꞌ chic ta̱chꞌiꞌchꞌiꞌi̱k xban. 7¿Ma tojaꞌ ta chic li Dios incꞌaꞌ tixcoleb li sicꞌbileb ru xban? ¿Ma ta̱ba̱yk ta biꞌ chixsumenquil li cꞌaꞌru teꞌxtzꞌa̱ma li nequeꞌya̱ban re lix cꞌabaꞌ chi kꞌek chi cutan? 8La̱in tinye e̱re nak li Dios tixcoleb chi junpa̱t. Abanan la̱in nincꞌoxla, ¿jarub ta cuiꞌ li cauhakeb xchꞌo̱l saꞌ lix pa̱ba̱l? Ut, ¿jarubeb ta cuiꞌ li yo̱keb chi tijoc nak tincꞌulu̱nk cuiꞌchic saꞌ ruchichꞌochꞌ la̱in li Cꞌajolbej?—

Laj fariseo ut laj titzꞌol toj queꞌco̱eb chi tijoc saꞌ li templo

9Ut li Jesús quixye jun chic li jaljo̱quil ru a̱tin reheb li nequeꞌxcꞌoxla nak cha̱bileb ut nequeꞌxtzꞌekta̱naheb li jun chꞌol chic. Quixye reheb: 10—Cuib li cui̱nk co̱eb saꞌ li templo chi tijoc. Li jun, aꞌan aj fariseo. Ut li jun chic aj titzꞌol toj. 11Laj fariseo quixxakab rib ut quitijoc chi cau xya̱b xcux ut quixye: “At inDios, la̱in ninbantioxi cha̱cuu nak ma̱cuaꞌin joꞌqueb li jun chꞌol chic. Aꞌan eb aj e̱lkꞌeb, aj ba̱nuhom ma̱usilal, ut aj muxuleb caxa̱r. La̱in ma̱cuaꞌin joꞌ laj titzꞌol toj aꞌan. 12Caꞌ sut ninba̱nu in-ayu̱n chiru li jun xama̱n. Ut rajlal ninqꞌue li junju̱nk saꞌ xlaje̱tkil re chixjunil li joꞌ qꞌuial li nincꞌul,” chan laj fariseo saꞌ lix tij. 13Abanan laj titzꞌol toj najt quixqꞌue chak rib ut quixxulub lix jolom. Yo̱ chixtenbal li re xchꞌo̱l chi rukꞌ xban xrahil xchꞌo̱l ut quixye: “At inDios, la̱in aj ma̱c. Chacuuxta̱na taxak cuu,” chan. 14La̱in ninye e̱re nak laj titzꞌol toj, aꞌan li quisukꞌi saꞌ rochoch chi ti̱cobresinbil chic lix chꞌo̱l. Ut laj fariseo incꞌaꞌ, xban nak li ani naxnimobresi rib, aꞌan ta̱cubsi̱k xcuanquil. Ut li ani naxcubsi rib, aꞌan ta̱qꞌuehekꞌ xcuanquil, chan li Jesús.

Li Jesús quirosobtesiheb li cocꞌal

15Saꞌ jun li cutan cuanqueb li queꞌxcꞌam chak lix cocꞌaleb riqꞌuin li Jesús re nak tixqꞌue li rukꞌ saꞌ xbe̱neb ut ta̱rosobtesiheb. Ut eb lix tzolom li Jesús queꞌxqꞌue retal nak queꞌcꞌameꞌ chak li cocꞌal riqꞌuin ut queꞌoc chixkꞌusbaleb lix naꞌ xyucuaꞌeb. 16Ut li Jesús quixbokeb lix tzolom riqꞌuin ut quixye reheb: —Canabomakeb li cocꞌal chi cha̱lc cuiqꞌuin. Me̱ram chiruheb xban nak reheb aꞌan lix nimajcual cuanquilal li Dios. 17Relic chi ya̱l tinye e̱re li ani incꞌaꞌ kꞌun xchꞌo̱l chinpa̱banquil joꞌqueb li cocꞌal aꞌin, aꞌan incꞌaꞌ ta̱oc rubel lix nimajcual cuanquilal li Dios, chan.

Jun li cui̱nk biom quia̱tinac riqꞌuin li Jesús

18Jun li cui̱nk nim xcuanquil saꞌ xya̱nkeb laj judío quia̱tinac riqꞌuin li Jesús ut quixye re: —At cha̱bil tzolonel, ¿cꞌaꞌru ta̱ru̱k tinba̱nu re nak tincue̱chani li yuꞌam chi junelic? chan. 19Li Jesús quixye re: —¿Cꞌaꞌut nak nacaye cha̱bil cue cui incꞌaꞌ nacanau anihin la̱in? Jun ajcuiꞌ li cha̱bil ut aꞌan li Dios. 20La̱at ac nacanau cꞌaꞌru naxye saꞌ li chakꞌrab: Matmuxuc caxa̱r. Ma̱camsi a̱cuas a̱cui̱tzꞌin. Mat-elkꞌac. Matyoꞌoban ticꞌtiꞌ chirix a̱cuas a̱cui̱tzꞌin. Cha-oxlokꞌi la̱ naꞌ a̱yucuaꞌ, chan li Jesús re. 21Li cui̱nk quichakꞌoc ut quixye: —Chixjunil aꞌin ac yo̱quin ajcuiꞌ chak chixba̱nunquil chalen saꞌ incaꞌchꞌinal, chan. 22Nak quirabi li cꞌaꞌru quixye li cui̱nk, li Jesús quixye re: —Jun chic toj ma̱jiꞌ nacaba̱nu. Cꞌayi chixjunil li cꞌaꞌru cuan a̱cue ut ta̱si lix tzꞌak reheb li nebaꞌ ut ta̱cua̱nk a̱biomal saꞌ choxa. Nak ac xaba̱nu aꞌan, tatcha̱lk ut tina̱ta̱ke, chan li Jesús re. 23Nak quirabi li quixye li Jesús, cꞌajoꞌ nak quirahoꞌ saꞌ xchꞌo̱l li cui̱nk xban nak nabal lix biomal cuan. 24Li Jesús quixqꞌue retal nak quirahoꞌ saꞌ xchꞌo̱l li cui̱nk ut quixye: —Cꞌajoꞌ xchꞌaꞌajquil chokꞌ re junak biom oc rubel lix nimajcual cuanquilal li Dios. 25Ma̱min ta̱ru̱k ta̱numekꞌ junak nimla xul camello saꞌ ru junak cu̱x. Joꞌcan ajcuiꞌ li biom. Ma̱ jokꞌe ta̱ru̱k ta̱oc saꞌ xnimajcual cuanquilal li Dios cui caꞌaj cuiꞌ lix biomal naxcꞌoxla, chan li Jesús. 26Eb li queꞌabin re li quixye li Jesús, queꞌchakꞌoc ut queꞌxye: —¿Aniheb li ta̱ru̱k teꞌcolekꞌ chi joꞌcanan? chanqueb. 27Li Jesús quixye reheb: —Li cꞌaꞌru chꞌaꞌaj xba̱nunquil chiru li cui̱nk, chiru li Dios moco chꞌaꞌaj ta xba̱nunquil, chan. 28Laj Pedro quixye re li Jesús: —La̱o xkacanab chixjunil li cꞌaꞌru ke xban a̱ta̱kenquil, chan. 29Li Jesús quixye: —Relic chi ya̱l tinye e̱re, li ani naxcanab li cꞌaꞌru re saꞌ incꞌabaꞌ la̱in, tixcꞌul re̱kaj. Li ani naxcanab li rochoch, lix naꞌ xyucuaꞌ, li ras ri̱tzꞌin, li rixakil, malaj ut lix cocꞌal saꞌ xcꞌabaꞌ lix nimajcual cuanquilal li Dios, aꞌan tixcꞌul re̱kaj. 30Kꞌaxal nabal cuiꞌchic li re̱kaj tixcꞌul saꞌ li ruchichꞌochꞌ aꞌin, joꞌ ajcuiꞌ saꞌ li choxa tixcꞌul li junelic yuꞌam, chan li Jesús.

Li Jesús quixye cuiꞌchic resil lix camic

31Tojoꞌnak li Jesús quixcꞌameb xjuneseb lix tzolom cablaju ut quixye reheb: —Anakcuan toxic Jerusalén re nak ta̱tzꞌaklok ru chixjunil li tzꞌi̱banbil xbaneb li profeta chicuix la̱in li Cꞌajolbej. 32Tinkꞌaxtesi̱k saꞌ rukꞌeb li ma̱cuaꞌeb aj judío. Tineꞌxhob, tineꞌxsacꞌ ut tineꞌxchu̱ba. 33Ut nak acak xineꞌxsacꞌ chi us, tineꞌxcamsi. Abanan saꞌ rox li cutan tincuacli̱k cuiꞌchic chi yoꞌyo saꞌ xya̱nkeb li camenak, chan li Jesús. 34Ut eb lix tzolom chi ti̱c incꞌaꞌ queꞌxtau ru li quixye li Jesús xban nak chꞌaꞌaj xtaubal ru chiruheb.

Li Jesús quixqꞌuirtesi jun li mutzꞌ nak yo̱ chi cuulac Jericó

35Nak li Jesús yo̱ chi cuulac Jericó, cuan jun li cui̱nk mutzꞌ ru cꞌojcꞌo chire li be. Yo̱ chixtzꞌa̱manquil cꞌaꞌru re. 36Nak quirabi li qꞌuila tenamit yo̱queb chi numecꞌ, li mutzꞌ quixpatzꞌ cꞌaꞌru yo̱ chi cꞌulma̱nc. 37Queꞌxye re nak li Jesús aj Nazaret yo̱ chi numecꞌ. 38Li mutzꞌ quixjap re ut quixye: —¡At Jesús, ralalat xcꞌajol laj David, la̱at li yo̱co cha̱cuoybeninquil. Chacuuxta̱na taxak cuu! chan. 39Ut eb li tenamit li yo̱queb chi numecꞌ queꞌoc chixkꞌusbal ut queꞌxye re: —Matchokin, chanqueb re. Abanan li mutzꞌ kꞌaxal cuiꞌchic cau quixjap re ut quixye: —At ralalat xcꞌajol laj David, chacuuxta̱na cuu, chan. 40Nak quirabi li quixye li mutzꞌ, li Jesús quixakli ut quixtakla xcꞌambal li mutzꞌ. 41Nak quicꞌameꞌ riqꞌuin, li Jesús quixye re: —¿Cꞌaꞌru ta̱cuaj tinba̱nu a̱cue? chan. Ut li mutzꞌ quixye: —Ka̱cuaꞌ, tincuaj nak ta̱ilok li xnakꞌ cuu, chan. 42Li Jesús quixye re: —Chi-ilok li xnakꞌ a̱cuu. Xatqꞌuira xban nak xapa̱b nak cuan incuanquil cha̱qꞌuirtesinquil, chan. 43Ut saꞌ junpa̱t qui-iloc li mutzꞌ ut co̱ chirixeb. Yo̱ chixlokꞌoninquil li Dios. Ut nak queꞌril li cꞌaꞌru quicꞌulman, chixjunileb li tenamit queꞌxqꞌue xlokꞌal li Dios.

Currently Selected:

San Lucas 18: kek

Highlight

Copy