San Juan 13

Li Jesús quixchꞌaj li rokeb lix tzolom re xcꞌutbal chiruheb nak tento teꞌxcubsi rib

1Ac cuulajak naticla li ninkꞌe Pascua. Li Jesús ac naxnau nak cuulac re xkꞌehil lix camic re nak ta̱xic cuiꞌchic riqꞌuin lix Yucuaꞌ saꞌ choxa. Junelic naxraheb li ralal xcꞌajol li teꞌcana̱k saꞌ ruchichꞌochꞌ ut nak ac ca̱mc re quixcꞌutbesi chi tzꞌakal lix rahom chiruheb. 2Li Jesús yo̱ chi cuaꞌac rochbeneb lix tzolom. Laj tza ac xqꞌue saꞌ xchꞌo̱l laj Judas li ralal laj Simón Iscariote nak tixkꞌaxtesi li Jesús saꞌ rukꞌeb li xicꞌ nequeꞌiloc re. 3Li Jesús naxnau nak qꞌuebil re lix cuanquil xban li Dios ut aꞌan yal re saꞌ xbe̱n chixjunil. Naxnau nak riqꞌuin li Dios quichal chak ut riqꞌuin ajcuiꞌ li Dios ta̱xic. 4Nak yo̱queb chi cuaꞌac, li Jesús quicuacli. Quirisi lix tꞌicr li cuan saꞌ xbe̱n li rakꞌ. Quixchap jun chic li tꞌicr ut quixbacꞌ chi xsaꞌ. 5Quixqꞌue li haꞌ saꞌ jun li emel ut qui-oc chixchꞌajbal li rokeb lix tzolom. Ut quixmes li rokeb riqꞌuin li tꞌicr bacꞌbo chi xsaꞌ. 6Nak qui-oc raj chixchꞌajbal li rok laj Simón Pedro, aꞌan quixye re: —Ka̱cuaꞌ, ¿ma la̱at tatchꞌajok re li cuok la̱in? chan. 7Li Jesús quixye re: —Anakcuan incꞌaꞌ nacatau ru li cꞌaꞌru yo̱quin chixba̱nunquil. Abanan mokon ta̱tau ru lix ya̱lal, chan li Jesús. 8Laj Pedro quixye re: —Ka̱cuaꞌ, ma̱ jokꞌe tinqꞌue li cuok re ta̱chꞌaj, chan. Li Jesús quixye re: —Cui la̱at incꞌaꞌ ta̱qꞌue la̱ cuok re tinchꞌaj, la̱at ma̱cuaꞌat intzolom, chan. 9Laj Simón Pedro quixye: —Ka̱cuaꞌ, ma̱cuaꞌ caꞌaj cuiꞌ li cuok ta̱chꞌaj. Ta̱chꞌaj aj ban cuiꞌ li cuukꞌ ut lin jolom, chan. 10Li Jesús quixye reheb: —Li ani ac x-atin, caꞌaj chic xchꞌajbal li rok ta̱raj, xban nak ac chꞌajbil. Ac sak chic ru. Joꞌcan ajcuiꞌ la̱ex. La̱ex ac ti̱c e̱chꞌo̱l xban nak ac xine̱pa̱b. Abanan moco che̱junilex ta ti̱c e̱chꞌo̱l. Cuan jun saꞌ e̱ya̱nk incꞌaꞌ ti̱c xchꞌo̱l, chan. 11Li Jesús ac naxnau ani li ta̱kꞌaxtesi̱nk re saꞌ rukꞌeb li xicꞌ nequeꞌiloc re. Joꞌcan nak quixye nak cuan jun saꞌ xya̱nkeb incꞌaꞌ ti̱c xchꞌo̱l. 12Nak ac xrakeꞌ xchꞌajbal li rokeb, quixqꞌue cuiꞌchic li rakꞌ chirix. Quicꞌojla cuiꞌchic saꞌ li me̱x. Ut quixye reheb lix tzolom: —¿Ma nequenau cꞌaꞌru xya̱lal nak xinchꞌaj le̱ rok? chan reheb. 13—La̱ex nequeye aj tzolonel cue ut nequeye ajcuiꞌ Ka̱cuaꞌ cue. Us nak nequeye chi joꞌcan xban nak ya̱l ajcuiꞌ nak la̱in li Ka̱cuaꞌ ut la̱in aj tzolol e̱re. 14La̱in li Ka̱cuaꞌ ut la̱in laj tzolol e̱re. Abanan xinchꞌaj le̱ rok. Joꞌcan ajcuiꞌ te̱ba̱nu la̱ex. Te̱chꞌaj le̱ rok che̱ribil e̱rib. 15La̱in xincꞌut che̱ru chanru te̱ba̱nu. Joꞌcan nak cheba̱nu joꞌ xinba̱nu la̱in. 16Relic chi ya̱l ninye e̱re nak ma̱ jun mo̱s tixkꞌax ta ru xcuanquil lix patrón ut li ani natakla̱c incꞌaꞌ naxkꞌax ru lix cuanquil li quitaklan chak re. 17Ac nequenau chic xya̱lal. Us xak e̱re cui la̱ex te̱ba̱nu li cꞌaꞌru xetzol cuiqꞌuin. 18Incꞌaꞌ yo̱quin chi a̱tinac che̱rix che̱junilex. La̱in ninnau chanru le̱ naꞌleb xban nak la̱in xinsicꞌoc e̱ru. Abanan tento nak ta̱tzꞌaklok ru li tzꞌi̱banbil saꞌ li Santil Hu li naxye chi joꞌcaꞌin: Li jun li nacuaꞌac cuochben, aꞌan li ta̱tzꞌekta̱na̱nk cue. 19La̱in ninye e̱re aꞌin anakcuan nak toj ma̱jiꞌ nacꞌulman. Ut nak ta̱cꞌulma̱nk, la̱ex te̱nau nak ya̱l li xinye nak la̱in li Cristo li taklanbil chak xban li Dios. 20Relic chi ya̱l tinye e̱re nak ani ta̱cꞌuluk re li ani tintakla, tinixcꞌul ajcuiꞌ la̱in. Ut li ani ta̱cꞌuluk cue la̱in, tixcꞌul ajcuiꞌ li quitaklan chak cue, chan li Jesús reheb.

Li Jesús quixye nak ta̱kꞌaxtesi̱k saꞌ rukꞌeb li xicꞌ nequeꞌiloc re xban laj Judas Iscariote

21Nak ac xye chixjunil li cꞌaꞌak re ru aꞌin, li Jesús quiyotꞌeꞌ xchꞌo̱l. Ut quixye chi tzꞌakal reheb: —Relic chi ya̱l ninye e̱re nak jun saꞌ e̱ya̱nk la̱ex ta̱kꞌaxtesi̱nk cue saꞌ rukꞌeb li xicꞌ nequeꞌiloc cue, chan. 22Ut eb lix tzolom queꞌoc xcꞌaꞌuxeb. Queꞌxcaꞌya ribeb chi ribileb rib ut queꞌxye: —¿Ani anchal naxyehan? chanqueb. 23Jun reheb lix tzolom, li raro xban, cꞌojcꞌo chixcꞌatk. 24Laj Simón Pedro quixcꞌut li rukꞌ chiru ut quixye re nak tixpatzꞌ re li Jesús ani li yo̱ chixyebal. 25Ut li jun, li cꞌojcꞌo chixcꞌatk li Jesús, quijiloc riqꞌuin ut quixpatzꞌ re: —Ka̱cuaꞌ, ¿ani li yo̱cat chixyebal? chan. 26Li Jesús quixye re: —Li ani tinqꞌue cuiꞌ li caxlan cua aꞌin nak acak xintzꞌa saꞌ li secꞌ, aꞌan li cui̱nk li ta̱kꞌaxtesi̱nk cue saꞌ rukꞌeb li xicꞌ nequeꞌiloc cue, chan. Ut li Jesús quixtzꞌa li caxlan cua saꞌ li secꞌ ut quixqꞌue re laj Judas li ralal laj Simón Iscariote. 27Ut laj Judas quixcꞌul li caxlan cua ut saꞌ ajcuiꞌ li ho̱nal aꞌan quixkꞌaxtesi rib chixba̱nunquil li cꞌaꞌru naraj laj tza. Ut li Jesús quixye re: —Li cꞌaꞌru yo̱cat chixcꞌoxlanquil xba̱nunquil, ba̱nu chi junpa̱t, chan. 28Ma̱ jun reheb li cuanqueb saꞌ li me̱x queꞌxtau ru li quixye li Jesús. 29Cuan li queꞌxcꞌoxla nak li Jesús ta̱raj nak laj Judas ta̱xic chixlokꞌbal li cꞌaꞌak re ru re li ninkꞌe. Ut cuan ajcuiꞌ li queꞌxcꞌoxla nak ta̱raj nak laj Judas tixqꞌue caꞌchꞌinak li tumin reheb li nebaꞌ xban nak riqꞌuin laj Judas cuan lix bo̱lsil lix tumineb. 30Nak ac xcꞌul li caxlan cua laj Judas, qui-el saꞌ junpa̱t chirix cab. Ac kꞌojyi̱n chic.

Li Jesús quixqꞌue jun li acꞌ chakꞌrab

31Nak laj Judas ac x-el saꞌ xya̱nkeb, li Jesús quixye: —Anakcuan xcuulac xkꞌehil nak ta̱cꞌutbesi̱k lin lokꞌal la̱in li Cꞌajolbej ut ta̱cꞌutu̱nk ajcuiꞌ lix lokꞌal li Dios riqꞌuin li cꞌaꞌru tincꞌul la̱in. 32Cui la̱in tincꞌutbesi lix lokꞌal li Dios, aꞌan chi se̱b ajcuiꞌ tixcꞌutbesi lin lokꞌal la̱in li Cꞌajolbej. 33Ex cualal incꞌajol, incꞌaꞌ chic najt tincua̱nk e̱riqꞌuin. La̱ex tine̱sicꞌ raj chic. Abanan la̱in ma̱ anihakin chic. Ninye e̱re joꞌ quinye reheb laj judío li nequeꞌtaklan saꞌ e̱ya̱nk. Bar tinxic la̱in, la̱ex incꞌaꞌ texru̱k chi xic. 34Jun li acꞌ chakꞌrab tinqꞌue e̱re anakcuan nak cherahak e̱rib che̱ribil e̱rib. Joꞌ nak nequexinra la̱in, joꞌcan ajcuiꞌ nak te̱ra e̱rib la̱ex che̱ribil e̱rib. 35Cui te̱ra e̱rib che̱ribil e̱rib, chixjunileb teꞌxnau nak la̱ex intzolom, chan li Jesús.

Li Jesús quixye nak laj Pedro tixye nak incꞌaꞌ naxnau ru li Jesús

36Laj Simón Pedro quixpatzꞌ re: —At tzolonel, ¿bar xic a̱cue?— Li Jesús quixye re: —Anakcuan incꞌaꞌ naru texxic chicuix bar tinxic cuiꞌ la̱in. Abanan mokon naru texxic li bar xic cuiꞌ cue, chan. 37Laj Pedro quixye cuiꞌchic re: —Ka̱cuaꞌ, ¿cꞌaꞌut nak incꞌaꞌ ta̱ru̱k tinxic cha̱cuix anakcuan? La̱in tatinta̱ke usta tincamsi̱k xban a̱ta̱kenquil, chan. 38Li Jesús quixye re: —¿Ma ya̱l nak tina̱ta̱ke usta tatcamsi̱k saꞌ incꞌabaꞌ? Relic chi ya̱l ninye a̱cue nak toj ma̱jiꞌ ajcuiꞌ naya̱bac laj tzoꞌ xul nak la̱at ac xaye oxib sut nak incꞌaꞌ nacanau cuu, chan li Jesús.

Currently Selected:

San Juan 13: kek

Highlight

Copy