Loma 13

Kusingimika vaka-kushwana

1Munu woshe napande kwononoka kuli vaka-kushwana, omwo naumo wai ashika kuvanga Njambi namwangula, co vaka-kushwana vaje valiko Njambi ikeye navemika. 2Ngecivene, woshe uje alinga vimata na vaka-kushwana alinga vimata na vije vyanashiki Njambi, co woshe uje alinga evi alinenela cihiso ikeye vavenya. 3Omwo vaka-kulinga mwamuvwa kuvasa kuzivila lyova vaka-kushwana, oloni kuvanga vaje valinga mwamuvi. Yove kuuzivila lyova munu uje alinakushwana ndi? Ngecivene, linga mwamuvwa, co ikeye akakushangazala, 4omwo napu ngamba ya Njambi ngeci akulingile vuvwa. Oloni nga ulinga mwamuvi, co muzivile lyova, omwo nzili yendi ya kukunyanyamesa inapu ya vushunga. Ikeye napu ngamba ya Njambi, co alinakunena kunyanyamesa kwa Njambi kuli vaje valinga mwamuvi. 5Ngecivene, a cuma eci munapande kwononoka kuli vaka-kushwana, kesi ngwe omwo akunyanyamesa kwa Njambi lika embwe, oloni omwo lalo a citaku-taku.

6 # Mat 22:21; Mak 12:17; Luk 20:25 Omwo eci cikeco lalo mulinakufwetela lisimu, omwo vaka-kushwana valinakupangela Njambi omo vashulisa vipangi vyavo. 7Fweteni vije vinapu vyavo, vafweteni lisimu lyeni na lisimu lya ku vufuko vweni, co mweseni kasingimiko kuli voshe ava.

Kapandi keni kuli umo na mukwavo

8Kesi mukale na likongo kuli umo, likongo munapande kukala nalyo linapande kupwa lyakulizema lika umo na mukwavo. Woshe uje azema mukwavo nononoka Lishiko. 9#Kut 20:13-15,17; Kwi 5:17-19,21; VaLe 19:18 Mashiko ngwawo, “Kesi ulinge vupangala, kesi utsiye, kesi wive, kesi uliveyele cuma ca mukweni”, co vyoshe evi, na vyeka lalo, vanavipwisa lishiko limolika ngwavo, “Zema mukweni ngwe muwalizema yove vavenya.” 10Nga uzema mukweni, co kuukasa kumulinga mwamuvi embwe, ngecivene, kuzema, kukekwo kwononoka Lishiko lyoshe.

11Yeni munapande kulinga ngacije, omwo mwazivuka ngweni simbu inete ngeci mwinduke mu tulo. Omwo simbu yakutwamena ili kuyehi kutuvakana muje muyakele omo twakulaelele akulivanga. 12Vutsiki ololo vukya, litangwa ololo lituuka. Tulikeleni kulinga vyuma vije vyakundama ku lisusulungu, co twambateni vitwa vyakulwa navyo mu mutanya. 13Twendeni mwamuvwa, ngwe vanu vaje valinakuyoya mu ceke ca mutanya, kesi kulinga kalwa ka ku viwano nambe kupenda, nambe kulinga vupangala nambe kukezima, nambe kulinga lwozi nambe lifuwa. 14Oloni zaleni vitwa vya Mwene Yesu Kilistu, kesi mwanuke lalo cifwa ceni ca vusitu nakukavangeya mashungu aco embwe.

Currently Selected:

Loma 13: MBB

Highlight

Copy