Mako 14

Vutumbe vwakutsiya Yesu

(Mateo 26:1-5; Luka 22:1-2; Yowano 11:45-53)

1Kwasalele matangwa avali ngeci kukale Ciwano ca Pasovala na Ciwano ca Makende Akujeneka Musima. Co vakulunu va vaka-kukombelela na valongisi va majwi a Lishiko vakele nakusetela ngila yakukwata Yesu mu vushweke, co vamutsiye, 2omwo vendekele ngwavo, “Kesi tumukwate a simbu ya ciwano, kutewa vanu vakanena mpindangano.”

Vavwavesa Yesu ku Mbeteniya

(Mateo 26:6-13; Yowano 12:1-8)

3Co Yesu wakele mu Mbeteniya ku njuvo ya Simoni, munalume umo uje wayandele manene ku mushongo wa mbumba. Omo Yesu wakele nakulya ku mesa, munakazi umo wezile kuli ikeye wakele na lilulu lyakushula lya mazi akunika lwengo lwaluvwa a ndando yakama, avalingisile na vyuma vya seo. Co watsiile lije lilulu wetilile mazi ku mutwe wa Yesu. 4Oloni vanu vamo vakele muje valuvalele, valihozwele umo na mukwavo ngwavo, “Omwo vikajo alinakuviisa awa mazi ngacije? 5Omwo mazi awa vanapandele kuwalandesa vimbongo vya siliva#14:5 VIMBONGO VYA SILIVA: Kenga 6:37. vyakupwa 300 nakuvyana ku tuutu!” Co valinyengele manene ali uje munakazi.

6Oloni Yesu wendekele kuli vakevo ngwendi, “Mweseleni! Omwo vikajo mulinakupakesela ou munakazi? Ikeye napanga cuma cacivwa manene ali yange. 7Omwo tuutu muli navo simbu yoshe, co oshe amushakela mwasa kuvakwasa. Oloni yange kunjikakala neni simbu yoshe embwe. 8Ikeye nalingi eci ngwe mwanasela, netila mazi awa a muvila wange kuuvwaesela cimweja kuutsinda. 9Co mwa vushunga njimileka ngwange kwoshe kuvakambulwila evi Vin̄anda Vyavivwa mu kaye koshe neci lalo canalingi ou munakazi, vakacambulula nakumwanukilao.”

Yundasa enda Yesu vungungu

(Mateo 26:14-16; Luka 22:3-6)

10Asinoni Yundasa Isikalyote, umo wa vaje likumi na vavali, waile kuli vakulunu va vaka-kukombelela ngeci akavasholwele Yesu. 11Co vavwaelelele akuziva vije vyendekele, co vamukulaesele kumwana vimbongo. Ngecivene, Yundasa washangumukile kushakezeka ngila imo yaivwa yakwenda Yesu vungungu ngeci avaaneye.

Yesu alya na vandongisi vendi ku Ciwano ca Pasovala

(Mateo 26:17-25; Luka 22:7-14,21-23; Yowano 13:21-30)

12Co a litangwa lyakulivanga lya Ciwano ca Makende Akujeneka Musima, a litangwa lije vatsiile vana va vimanga vakulya a Ciwano ca Pasovala, vandongisi va Yesu vamwihwile ngwavo, “Kulijo ushaka ngeci tukakuvwaesele kwakulila kulya kwa Ciwano ca Pasovala?”

13Asinoni Yesu watumine vandongisi vendi vavali wavashikile ngwendi, “Yeni mu nganda, co mukaliwana na munu nambata njava yakutekwila mema. Mukaveni 14nakweta ku njuvo kuje kwakakovela, endekeni kuli vavenya njuvo ngweni, ‘Mulongisi nendeka ngwendi, mulili ulikuli kwakalila Ciwano ca Pasovala na vandongisi vendi?’ 15Asinoni akamimwesa mulili wakama akamwa ya njuvo, vanauvwaesa cimweja, kuje mukatuvwaesele vyuma vyoshe.”

16Co vandongisi vendi vaile, vakovelele mu nganda, co vawanene vyuma vyoshe ngwe mwavalekele Yesu, co vavwaesele vyakulya vya Ciwano ca Pasovala.

17Omo vetele ku cingwezi, Yesu wezile na vandongisi likumi na vavali. 18Omo vakele nakulya ku mesa, Yesu wendekele ngwendi, “Mwa vushunga njimileka ngwange umo akati keni akanjenda vungungu, uje alinakulya amo nange.”

19Vandongisi vakele na vusiwa manene, co vashangumukile kumwihula umo na umo ngwavo, “Mwa vushunga vene amo yange, indi vati?”

20Yesu wavakumbulwile ngwendi, “Umo waakati keni likumi na vavali, uje vene natanta amo nange mu lilonga omo tunakele nakulya. 21Omwo Muna Munu akatsa ngwe muje muvanasoneka, oloni ngongo yendi uje enda vungungu Muna Munu! Mwamuvwa kuli munu uje nga kasemukile!”

Mesa ya Mwene

(Mateo 26:26-30; Luka 22:14-20; 1 Kolinte 11:23-25)

22Omo vakele nakulya, Yesu wanonele likende, walombelele lilombelo lyakukandelela, co walipazwile walyanene ku vandongisi vendi ngwendi, “Tambuleni, eli linapu muvila wange.”

23Asinoni Yesu wanonele lalo nganja ya vinyu, wakandelele kuli Njambi, co wavaneneyo, co voshe vanwilemo. 24Co Yesu wendekele ngwendi, “Awa akewo maninga ange aje akakolesa cikumiiyo ca Njambi akewo akwitikila ali vanu vavangi. 25Mwa vushunga njimileka ngwange, kutunda lelo kunjikanu neni lalo vinyu kuvanga noo a litangwa lije njikanwa neni vinyu vyaviha mu Vumwene vwa Njambi.”

26Co omo vamanesele kwimba mwaso, co vatuukile vaile ku Munkinda wa Oliveta.

Yesu endeka ngeci Petulu akamuvyana

(Mateo 26:31-35; Luka 22:31-34; Yowano 13:36-38)

27Yesu wendekele kuli vakevo ngwendi, “Yeni voshe mukatewa nakunjiseza ange lika, omwo visoneka vinendeka ngwavyo, ‘Njambi akatsiya kanyungi, co vimanga voshe vakalishandoka.’ 28Oloni omo njikasanguka, njikalivanga kuya kulutwe lweni ku Ngalileya.”

29Petulu wamukumbulwile ngwendi, “Nameme voshe vakakuseza, yange kunjikakuseza embwe!”

30Co Yesu wakumbulwile Petulu ngwendi, “Mwa vushunga njikuleka ngwange vutsiki vuno vene simbu omo ndemba kanda atambeke luvali, ukanjivyana visimbu vitatu ngwove kuunjizivuka.”

31Oloni Petulu wamukumbulwile manene na nzili ngwendi, “Nalumo lwai njikendeka ngwange kunjikuzivuka, nameme kutsa vene njikatsa amo nove!”

Co na vandongisi voshe vendekele cuma cimo.

Yesu alombela mu Ngetesemani

(Mateo 26:36-46; Luka 22:39-46)

32Co vaile ku mutambela umo uvatumbwile Ngetesemani, co Yesu wendekele kuli vandongisi vendi ngwendi, “Tumbameni kuno simbu njiya nakulombela.” 33Co waile amo na Petulu, na Yakomba, na Yowano. Co washangumukile kuzeya mu mbunge nakuvupuka manene, 34co wendekele navo ngwendi, “Mbunge yange inazeye na vusiwa vwakama manene vwakunjitwala nameme ku kutsa vene. Kaleni kuno, co kengeleleni.”

35Co washwenyele kulutwe kamandondo wavulumanene, walombelele ngwendi nga citava, simbu ije ya tuyando imutuvakane. 36Co walombelele ngwendi, “Tate, Tate! Vyuma vyoshe vyapwa vyavyasi kuli yove. Tundisa nganja eyi ya tuyando kuli yange. Kesi ngwe cizango cange embwe, oloni cizango cove cilingiwe.”

37Asinoni welukile wawanene vaje vandongisi vatatu vanalala tulo. Co wendekele kuli Petulu ngwendi, “Simoni, kuma nove lalo walala tulo ndi? Kuma kuwasa kutumbama nakutona nameme ola imolika indi?” 38Co wendekele kuli vakevo ngwendi, “Toneni nakulombela kutewa mukakovela mu vyeseko. Munzinzime ushaka, oloni muvila unazeye.”

39Co waile lalo simbu yamucivali walombelele, wendekele majwi a cifwa cimolika. 40Co welukile lalo kuli vandongisi vendi, wavawanene vanalala tulo, omwo mesho avo alemene manene na tulo. Co kuvasele lalo kuwana mwakumukumbulwila.

41Co welukile lalo simbu yamucitatu, wendekele kuli vakevo ngwendi, “Kuma anga munalala nakuhwima ndi? Munapwisamo! Simbu inete laja! Kengeni, Muna Munu valinakumwana ku mavoko a vaka-vuvi. 42Indukeni, tuyeni, kengeni, muka-kunjenda vungungu ali kuno!”

Yesu vamukwata

(Mateo 26:47-56; Luka 22:47-53; Yowano 18:3-12)

43Co aje vene omo Yesu wacikele nakwendeka navo, Yundasa, umo wa vaje vandongisi likumi na vavali wetele. Co wezile na mbunga yakama vambatele mikwale na vimbweti, vavatumine kuli vakulunu va vaka-kukombelela, na valongisi va majwi a lishiko, na vakulunu va vaYunda. 44Muka-kumwenda vungungu uje wavanene cizivukiso ngwendi, “Uje munalume injikatsemba ikeye vene imushaka. Mukwateni mumutwale oku mumunyunga.”

45Co omo Yundasa wetele, waile kuli Yesu, co wendekele ngwendi, “Mulongisi!” Co wamutsembele. 46Ngecivene, vakwatele Yesu nakumuvumbatela manene. 47Oloni umo wa vaje vemanene kuje washomwene mukwale mu cindalo wendi, co wavatwike litwi lya ndungo ya Muka-kukombelela Wakama. 48Asinoni Yesu wendekele kuli vakevo ngwendi, “Kuma munaija na mikwale na vimbweti mukunjikwata ngwe lipwepwe ndi? 49A litangwa na litangwa njakele neni mu Njuvo ya Shukulu Kalunga nakulongesa, co kumwanjikwatele, oloni Visoneka vinapande kulingiwa.”

50Asinoni vandongisi vendi voshe vamusezele, co vatewele.

51Co mukwenje umo, uje wazalele lika nanga ya linyu, wakavele Yesu. Co vesekele kumukwata, 52oloni ikeye wombilile ije nanga watewele mutotototo.

Vasompa Yesu ku mesho a munga

(Mateo 26:57-68; Luka 22:54-55,63-71; Yowano 18:13-14,19-24)

53Co vatwalele Yesu ku njuvo ya Muka-kukombelela Wakama, kuje kuvakungulukilile voshe vakulunu va vaka-kukombelela na vakulunu, na valongisi va majwi a Lishiko. 54Co Petulu wamukavele wakele alyala kamandondo, wakovelele mu cipango ca njuvo ya Muka-kukombelela Wakama. Co watumbamene amo na vaka-kunyunga, co wakele nakwota tuhya. 55Vakulunu va Vaka-kukombelela na vaka-Munga voshe vashakele ngila yakuwana vukaleo vwakuvangela Yesu ngeci vamutsiye, oloni kuvavuwanene vwai. 56Omwo vavangi vavangelele Yesu vukaleo vwa makuli, oloni vukaleo vwavo kuvwalitombwele.

57Asinoni vanu vamo vemanene vendekele vukaleo vwa makuli vwakulwisa Yesu ngwavo, 58“Twamuzivile alinakwendeka ngwendi, ‘Yange njikasiwula eyi Njuvo ya Shukulu Kalunga ivatungile kuli vanu, co omo kuneti matangwa atatu njikatunga yeka yakujeneka kutunga na mavoko a vanu.’ ” 59Co nameme ngoco vukaleo vwavo kuvwalitombwele.

60Co Muka-kukombelela Wakama wemanene ku mesho avo voshe wehwile Yesu ngwendi, “Kuwesi na majwi akukumbulula a vyuma evi valinakukuvangela ngeci ndi?”

61Oloni Yesu wolokele kuluu kendekele nambe lijwi limo lyai. Muka-kukombelela Wakama wamwihwile lalo ngwendi, “Yove u Wakuvwavesa, Muna Njambi Wakuvezika ndi?”

62Co Yesu wamukumbulwile ngwendi, “Yange vene, co yeni voshe mukamona Muna Munu natumbama ku livoko lya cilyo lya Muka-nzili yoshe, co alinakwija a mashelwa!”

63Co Muka-mukombelela Wakama watavwile vuzalo vwendi, co wendekele ngwendi, “Vikajo lalo tucishakezekela vukaleo vweka? 64Mwalizivila laja kushaula kwendi. Mwayongola vati?”

Co voshe valizivasanene ngwavo ali na mulonga napande kutsa vene.

65Co vamo vavo vashangumukile kujekwila mate Yesu, co vamukutile nanga ku mesho nakumupupa ngwavo, “Tuleke iya nakupupu!” Co vaka-kunyunga vamutambwile nakumupupa vin̄ome.

Petulu avyana Yesu

(Mateo 26:69-75; Luka 22:56-62; Yowano 18:15-18,25-27)

66Co omo Petulu wakele mu cipango umo ngamba ya Muka-kukombelela Wakama wezile. 67Omo wamwene Petulu alinakwota tuhya, wamukengele shwii, co wendekele kuli ikeye ngwendi, “Nove lalo wakele amo na Yesu waku Nazaleta.”

68Oloni Petulu wavyanene ngwendi, “Yange kunjimuzivuka nambe kuzivizisa evi ulinakwendeka.” Co watuukile waile anja. Aje vene ndemba watambekele.

69Co uje mumbanda wamumwene lalo kuje, co washangumukile kulekako vaje vemanene ku cikolo ngwendi, “Ou munu nendi lalo napu umo wavo!” 70Oloni Petulu wavyanene lalo.

Co kasimbu lika vaje vemanene kuje vendekele kuli Petulu ngwavo, “Yove kuwapandele kuvyana ngwove yange kesi nji umo wavo embwe, omwo nove lalo utunda ku Ngalileya.”

71Asinoni Petulu wendekele ngwendi, “Njilisinga nakumileka vushunga ngwange, Njambi anjihise nga ngoconi, yange kunjimuzivuka ou munalume mulinakwendeka!”

72Co aje vene ndemba watambekele simbu yamucivali, co Petulu wanukile muje mwendekele Yesu ngwendi, “Simbu ndemba kanda akatambeke visimbu vivali, ukanjivyana visimbu vitatu ngwove kuunjizivuka.” Co washangumukile kulila.

Currently Selected:

Mako 14: MBB

Highlight

Copy