Mateo 8
8
Yesu akangwisa muka-mbumba
(Mako 1:40-45; Luka 5:12-16)
1Omo Yesu washelumukilile ku munkinda, mbunga yakama vamukavele. 2Asinoni munu umo wakele nakuyanda na mushongo wa mbumba wezile watsikamene ku mesho endi, wendekele ngwendi, “Shukulu, nga mushaka, mwasa kunjijelesa.”#8:2 MWASA KUNJIJELESA: Mushongo wa mbumba walingisile munu ngeci kesi ajele.
3Co Yesu wolwele livoko lyendi wamukwatele, wendekele ngwendi, “Njishaka, jela.” Co aje vene wajelele ku mushongo wendi wa mbumba. 4#VaLe 14:1-32 Co Yesu wamulekele ngwendi, “Tolilila! Kesi ulekeko munu umo cuma eci embwe, oloni ya ukalisholole kuli muka-kukombelela ngeci akakwilule, asinoni ukakombelele n̄ombelo ije yashikile Mosesa, ngeci voshe vakazivuke ngwavo vanakukangwisa.”
Yesu akangwisa ngamba ya mukulunu wa mashwalale va Loma
(Luka 7:1-10)
5Omo Yesu wakovelele mu Kapenauma, mukulunu wa mashwalale va Loma wezile kuli ikeye, wamulombele ngwendi, 6“Shukulu, ngamba yange nalala mu njuvo alinakuvinja mushongo wa kayekele, co alinakuyanda manene.”
7Yesu wamukumbulwile ngwendi, “Njiija nakumukangwisa.”
8Oloni uje mukulunu wa mashwalale wamukumbulwile ngwendi, “Shukulu, kucapandele yove kukovela mu njuvo yange, oloni endeka lika na lijwi, co ngamba yange akakanguka. 9Omwo nange njili mwisi ya moko ya vamyata vange, co njili na mashwalale vakanjononoka. Njishika umo ngwange, ‘Ya!’ Co aya, co njishika mukwavo lalo ngwange, ‘Ija!’ Co aija, co lalo njikashiki ndungo yange ngwange, ‘Linga eci!’ Co acilinga.”
10Omo wazivile evi, Yesu walikomokelele, co wendekele kuli vanu vaje vamukavele ngwendi, “Mwa vushunga njimileka ngwange, nameme mu lifuti lya Isalele, kumwesi muka-kukulaela wangacije. 11#Luk 13:29 Njimileka ngwange vavangi vakaija, vakatunda mu ngangela na mu kangombe ka yambi, co vakatumbama ku mesa amo na Avilahama, na Isake, na Yakomba, mu Vumwene vwa mwilu. 12#Mat 22:13; 25:30; Luk 13:28 Oloni vaje vanapandele ngeci vakatumbame mu Vumwene vuje vakavombila anja mu lisusulungu kuje kukakala kulila nakulingenjenga ku mayo.” 13Co Yesu wendekele kuli uje mukulunu wa mashwalale ngwendi, “Ya kwimbo, cifwe ngoco kuli yove ngwe kukulaela kwove.”
Co ngamba yendi wakangukile a simbu ije vene.
Yesu akangwisa vanu vavangi
(Mako 1:29-34; Luka 4:38-41)
14Co omo Yesu wakovelele mu njuvo ya Petulu, muje wamwene vainamweno ya Petulu vanalala a vulili nakuvinja lisika-sika. 15Yesu wamukwatele ku livoko, co lisika-sika lyamutundile, wendukile nakushangumuka kuvapangela.
16Omo vetele ku cingwezi, vanu vanenele vanu vavangi vaka-minzinzime yakujwala kuli Yesu, co Yesu wavatundisile minzinzime yakujwala na lijwi, co wakangwisile voshe vaje vavinjile. 17#Isa 53:4 Ikeye walingile evi ngwe muje mwendekele Isaya muka-kwimanena ngwendi, “Ikeye vavenya watundisile kuvinja kwetu, co wambatele mishongo yetu.”
Vaje vashaka kukavangeya Yesu
(Luka 9:57-62)
18Omo Yesu wamwene vimbunga vyakama vanamuzengeleka, walekele vandongisi vendi ngeci vaye musambwa ya lishali. 19Co mulongisi wa majwi a Lishiko wezile kuli ikeye nakwendeka nendi ngwendi, “Mulongisi, njikakukava kwoshe kuuya.”
20Yesu wamukumbulwile ngwendi, “Vimbanje vali na mena, co lalo tuzila vali na mashwa, oloni Muna Munu kesi naa akusatela mutwe wendi.”
21Munu mukwavo uje wapwile ndongisi yendi, wendekele kuli ikeye ngwendi, “Mwene, njitave akulivanga njiiluke njikatsinde tai tate.”
22Oloni Yesu wamukumbulwile ngwendi, “Njikave, co seza vatsi valitsinde vakevo vavenya.”
Yesu olwesa lihunzi lyakama
(Mako 4:35-41; Luka 8:22-25)
23Co omo Yesu wakovelele mu vwato, vandongisi vendi vamukavele. 24Co vwasi-vwasi lihunzi lyakama lyakatukile a lishali, ngecivene, vwato vwashakele kuvombela. Oloni Yesu walalele. 25Vandongisi vendi vaile kuli ikeye nakumwindula ngwavo, “Twovole Mwene. Tushaka kutsa.”
26Co Yesu wavakumbulwile ngwendi, “Omwo vikajo muli na lyova lyangacije, yeni vaka-kukulaela kwakundondo?” Asinoni wakatukile wolwesele lihunzi na mankimba, co kwalendamene kuluu.
27Co voshe valikomokelele, vendekele ngwavo, “Munu wakufwa vatijo ou? Uje nameme lihunzi na mankimba vimwononoka!”
Yesu akangwisa vanu vavali vaka-minzinzime yakujwala
(Mako 5:1-20; Luka 8:26-39)
28Omo Yesu wetele mu lifuti lya Ngandalene, ku mutambela ukwavo wa lishali, waliwanene na vanalume vavali vatundile ku viilo. Vanalume ava vakele na minzinzime yakujwala yakukomokesa manene, ngecivene, naumo wai wasele kwitila mu ngila ije. 29Co vwasi-vwasi vatambekele ngwavo, “Ushaka kulinga vika netu ove Muna Njambi? Unaija nakutunyanyamesa omo simbu yetu kanda icete ndi?”
30Kuyehi navo kwakele vutanga vwakama vwa vingulu vwakele nakulila kuje, 31co ije minzinzime yakujwala yalombele Yesu ngwayo, “Nga ututundisa muli vano vanu, tutume mu vutanga vwa vingulu vaje.”
32Co Yesu wailekele ngwendi, “Yeni,” ngecivene, yatundile muli vaje vanu, co yakakovelele mu vutanga vwa vingulu. Vutanga vwoshe vwashatukilile mu lishali, co vwakanyongelelemo.
33Vaje vanu vaka-kunyunga vingulu vashatukilile ku nganda, co vakambulwile vin̄anda vyoshe kuje, co nevi vyalingiwile ali vaje vanu vaka-minzinzime yakujwala. 34Ngecivene, vanu voshe vatundile ku nganda ije vezile nakuliwana na Yesu, co omo vamuwanene, vamulombele ngeci atunde mu lifuti lyavo.
Currently Selected:
Mateo 8: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
