Luka 2

Kusemuka kwa Yesu

(Mateo 1:18-25)

1Co capwile ngeci a matangwa aje kuli Sezale Angustu kwatundile lishiko ngeci vasoneke vanu voshe mu Vumwene vwa Loma. 2Kusoneka oku kwakulivanga kwalingiwile omo Kilinyu wapwile nguvulu wa Silya. 3Ngecivene, vanu voshe vaile mukulisonekesa, munu na munu waile ku nganda yendi.

4Na Yosefa lalo watundile ku nganda ya Nazaleta mu Ngalileya, waile ku nganda ya Mbetelehema mu Yundeya kwimbo lya Ndaviti. Yosefa waile kuje omwo wapwile wa ku muyati wa Ndaviti. 5Waile mukulisonekesa amo na Maliya uje yaulilile. Maliya te nakulisa laja, 6co simbu ije vakele mu Mbetelehema, matangwa endi akukita mwana etele. 7Co wakitile munendi wa ntwatwa wa munalume, wamuzengelele a vinanga, wamulangekele mu cikasa cakulila vingombe, omwo kukwakele mulili mu njuvo yakutulila vangenzi.

Tunyungi na tungelo

8Co ku lifuti lije kwakele tunyungi mu cana, vakele nakunyunga vimanga vavo vutsiki. 9Kangelo ka Shukulu Kalunga washolokele kuli vakevo, co vumpau vwa Mwene vwatwile ceke akati kavo. Vazivile lyova lyakama manene, 10oloni kangelo wendekele kuli vakevo ngwendi, “Kesi muzive lyova! Omwo njinanena muzimbu wauvwa kuli yeni, uje ukasholola kujolela kwakama kuli vanu voshe. 11Vutsiki vuno vene mu nganda ya Ndaviti munasemuka Muyoyesi weni, ikeye Kilistu Mwene! 12Co eci cikapwa cizivukiso ceni, mukawana mbututu vanamuzengela a vinanga vanamulangeka mu cikasa cakulila vingombe.”

13Vwasi-vwasi kwasholokele mbunga yakama ya tungelo va mwilu vemanene amo na kangelo, vembile nakushangazala Njambi ngwavo,

14“Vumpau kuli Njambi wa akamwa ya akamwa,

kwoloka kukale ano asi kuli vanu vaje vamuvwasa!”

15Omo tungelo velukile mwilu kutunda kuli tunyungi, co tunyungi valyendekesele umo na mukwavo ngwavo, “Tuyeni oni ku Mbetelehema ngeci tukamone eci cuma cinalingiwako, cije canatusholwela Shukulu Kalunga.”

16Ngecivene, vaile vwasi-vwasi vakawanene Maliya na Yosefa, co vamwene mbututu vanamulangeka mu cikasa cakulila vingombe. 17Omo tunyungi vamumwene, vambulwile majwi aje avalekele kangelo ali mbututu. 18Co voshe vaje vawazivile valikomokelele a vyuma vije vivendekele tunyungi. 19Oloni Maliya wanyungile majwi oshe aje nakuwayongola mu mbunge yendi. 20Co tunyungi velukile nakulemesa nakushangazala Njambi a vyuma vyoshe vazivile, na vije vamwene, vyalingiwile ngwe vene muje mwavalekele kangelo.

Yesu vamuluka lizina

21 # VaLe 12:3; Luk 1:31 Omo kuneti matangwa atanu na atatu, omo simbu yetele yakutuula mbututu, co vamulukile lizina lyendi Yesu, lizina lije lyamulukile kangelo simbu kanda awile mwimo lya vaina.

Visemi vakundika Yesu mu Njuvo ya Shukulu Kalunga

22Co omo matangwa apwilemo akulijelesa, Yosefa na Maliya valingile ngwe ku Lishiko lya Mosesa. Ngecivene, vatwalele mwanike ku Yelusalema ngeci vakamwane kuli Shukulu Kalunga, 23#Kut 13:2,12 ngwe muvanasoneka mu Lishiko lya Shukulu Kalunga ngwavo, “Mwana woshe wa ntwatwa wa munalume vakamwana kuli Shukulu Kalunga.” 24Vakevo lalo vaile mukukombelela n̄ombelo ya tutela vavali nambe vana va mayembe vavali ngwe muvemika mu lishiko lya Shukulu Kalunga.

25Cooni kwakele munalume umo mu Yelusalema lizina lyendi Simyoni. Wapwile muka-vushunga muka-kukomoka Njambi, wavandamenene kupatuka kwa Isalele. Munzinzime Wakujela wakele ali ikeye, 26wamulekele ngwendi kakatsi kuvanga namono Wakuvwavesa uje yakulaesele Shukulu Kalunga. 27Akumutwamenena Munzinzime Wakujela, Simyoni wakovelele mu Njuvo ya Shukulu Kalunga. Omo visemi vanenele mwanike Yesu mu Njuvo ya Shukulu Kalunga vamulinge ngwe ku Lishiko vemikile, 28co Simyoni watambwile mwanike mu mavoko endi, wakandelelele kuli Njambi ngwendi,

29“Ololo Shukulu Kalunga unanyungu cikulaeso cove,

ololo tava ngeci ngamba yove atse mu kwoloka.

30Omwo mesho ange anamono kwamena kwove,

31kuje kuunavwaesa ku mesho a vanu voshe,

32 # Isa 42:6; 52:10 ceke cakujombolola cizango cove kuli ava kesi vaYunda,

nakunena vumpau kuli vanu vove va Isalele.”

33Ishe na vaina valikomokelele a vyuma vije vyendekele Simyoni ali Yesu. 34Co Simyoni wavavezikisile wendekele kuli Maliya ngwendi, “Mwanike ou vamwangwile kuli Njambi mukunyongesa nakwamena vavangi mu Isalele. Akapwa cizivukiso cakutunda kuli Njambi cije vanu vavangi vakendeka nakucilwisa, 35nakujombolola viyongola vyavo vyakushweka. Co vusiwa vukativa mbunge yove ngwe mukwale wakuvambuka.”

36Co kwakele umo Ana, muka-kwimanena wa munakazi, muna Fanwele wa ku muyati wa Ashele. Ikeye wapwile kakulukazi. Washombokele a myaka itanu na ivali, 37cooni wapwile fwile a myaka makumi atanu na atatu na myaka iwana.#2:37 WAPWILE FWILE A MYAKA MAKUMI ATANU NA ATATU NA MYAKA IWANA: Nambe, wakele na myaka makumi. Ikeye katundile mu Njuvo ya Shukulu Kalunga, mutanya na vutsiki wakele nakulemesa Njambi, nakulikela kulya nakulombela. 38A simbu ije vene wetele, co wakandelelele kuli Njambi, wendekele vya uje mwana kuli voshe vaje vavandamenene Njambi mukupatula Yelusalema.

Veluka ku Nazaleta

39 # Mat 2:23 Omo Yosefa na Maliya vamanesele vyuma vyoshe ngwe ku lishiko lya Shukulu Kalunga, velukile kwimbo lyavo ku Nazaleta mu Ngalileya. 40Co mwana wakulile wakele na nzili. Washulile na mana, co vivezikiso vya Njambi vyakele ali ikeye.

Mwanike Yesu ali mu Njuvo ya Shukulu Kalunga

41 # Kut 12:1-27; Kwi 16:1-8 A mwaka na mwaka visemi va Yesu vakele nakuya ku Yelusalema ku Ciwano ca Pasovala. 42Omo Yesu wakele na myaka likumi na ivali, co vaile nendi ku Yelusalema ku cilika ca ciwano ngwe simbu yoshe. 43Omo matangwa aje a ciwano ahwile, co vashangumukile kuya kwimbo, oloni mwanike Yesu wasalele munima mu Yelusalema. Visemi vendi kuvazivukile, 44vayongwele ngwavo amo ali a cendo, ngecivene, vendele vungenzi vwa litangwa limo, co vamukengezekele akati ka vavushoko vwavo na vasamba vavo, 45oloni kuvamuwanene. Ngecivene, velukile lalo ku Yelusalema nakumushakezeka. 46Co a litangwa lyamucitatu vamuwanene mu Njuvo ya Shukulu Kalunga, natumbama akati ka valongisi va vaYunda, nakuvatolilila nakuvehozola vihula. 47Co voshe vaje vamutolililile valikomokelele mana endi nakukumbulula kwendi. 48Visemi vendi omo vamumwene valikomokelele, co vaina vendekele kuli ikeye ngwavo, “Munange, vika unatulingilamo? Kenga, isho nange tunakushakezeka manene ngeci tukuwane.”

49Co ikeye wavakumbulwile ngwendi, “Vika munanjishakezekela? Kuma kumwazivukile ngweni njinapande kukala mu Njuvo ya Tate ndi?” 50Oloni vakevo kuvazivukile kulumbunuka kwakukumbulula kwendi.

51Yesu waile navo ku Nazaleta, co kuje wakavononokele. Vaina vanyungile vyuma vyoshe evi mu mbunge yavo. 52#1 Sam 2:26; Vis 3:4 Co Yesu wakulile mu muvila, na mu mana, wawanene kutetela kuli Njambi na kuli vanu.

Currently Selected:

Luka 2: MBB

Highlight

Copy