Luka 11

Yesu alongesa a kulombela

(Mateo 6:9-13; 7:7-11)

1Litangwa limo Yesu wakele nakulombela ku mutambela umo. Co omo wamanesele umo wa vandongisi vendi wendekele kuli ikeye ngwendi, “Mwene, tulongese kulombela, ngwe omo Yowano walongesele vandongisi vendi.”

2Yesu wendekele kuli vakevo ngwendi, “Omo mulombela endekeni ngweni,

‘Tatetu,

valemese lizina lyove,

vumwene vwove vwije.

3Twane kulya kwa a litangwa na litangwa.

4Tusambese ku vivi vyetu,

ngwe yetu lalo mutukasambesa vaka-kutuvulumwina.

Kesi ututwamenene ku vyeseko.’ ”

5Yesu wendekele kuli vandongisi vendi ngwendi, “Iya akati keni ali na musamba wendi, co aya ku njuvo yendi akati ka vutsiki nakumuleka ngwendi, ‘Musamba, njilombako mikasha itatu ya makende. 6Musamba wange ali a vungenzi naija ku njuvo yange, oloni nevi njimujumbula vyai!’ 7Co nga uje musamba wove ali mu njuvo akukumbulula ngwendi, ‘Kesi unjipese! Njashoko laja lipito, vana vange nange tunalala laja. Kunjasa kwinduka njikwane cuma cimo.’ 8Njimileka ngwange, nameme nga kenduka nakukwana makende omwo wapwa musamba wove, oloni akenduka nakukwana vyoshe ushaka omwo kuwesi na shwamwa yakulomba kushwakumo. 9#Mat 7:7-10 Ngecivene, njimileka ngwange, lombeni, co mukatambula, seteleni, co mukawana, toteni, co vakamishokolwela. 10Omwo woshe alomba atambula, co woshe asetela awana, co woshe atota vakamushokolwela. 11Cisemi mukajo akati keni nga munendi amulomba isi, co ikeye amwana linyoka? 12Nambe nga munendi amulomba livunda, co ikeye amwana linyewe? 13Inonwa yeni vaka-vuvi muzivuka kwana vyuma vyavivwa kuli vana veni, kuma Ishweni wa mwilu kakatuvakana manene kwana Munzinzime Wakujela kuli vaje vamulomba ndi?”

Yesu na Mbelezembulu mwene ya minzinzime yakujwala

(Mateo 12:22-30; Mako 3:20-27)

14Yesu wakele nakutundisa munzinzime wakujwala mu munu uje kasele kwendeka, omo uje munzinzime wakujwala watundile, co uje munalume washangumukile kwendeka. Co mbunga valikomokelele, 15#Mat 9:34; 10:25 oloni vamo vendekele ngwavo, “Mbelezembulu mwene ya minzinzime yakujwala ikeye alinakumwana nzili yakuvatundisa.”

16 # Mat 12:38; 16:1; Mak 8:11 Vamo vamwesekele, vamulombele ngeci alinge cizivukiso cije cisholola ngeci kuma Njambi namutava. 17Oloni Yesu wazivukile viyongola vyavo, co wendekele kuli vakevo ngwendi, “Vumwene vwoshe vuje vulyangunuka mu vimunga nakulilwisa akati kavwo vukanyonga, naanga yoshe ije ilyangunuka akati kayo ikanyonga. 18Ngecivene, nga vumwene vwa Satana vulyangunuka mu vimunga nakulilwisa, co vwasa kwishwala vatijo? Yeni mwendeka ngweni yange njikatundisa minzinzime yakujwala omwo Mbelezembulu ikeye akanjana nzili yakulinga ngacije. 19Co nga yange njikatundisa minzinzime yakujwala na nzili ya Mbelezembulu, co iyajo alinakwana vanu veni nzili yakutundisa minzinzime yakujwala? Vanu veni vanapu vakaleo vakumihisa! 20Embwe, eyi inapu nzili ya Njambi injikatundisa nayo minzinzime yakujwala, muzivuke ngeci Vumwene vwa Njambi vunete kuli yeni vene.

21“Omo munalume wa nzili uje nalivwaesela cimweja vitwa vyendi anyunga njuvo yendi, co vufuko vwendi vwoshe vukala mwamuvwa. 22Oloni omo munalume weka namutuvakana nzili amulwisa nakumufungulula, co ambata vitwa vyoshe vya uje vavenya njuvo vije vyakulaelele, co akapangezela vyoshe vije vyanapukwile.

23 # Mak 9:40 “Woshe uje kesi amo nange, mwa vushunga ikeye muka-n̄ole yange, woshe uje kakungulula amo nange, mwa vushunga vene ikeye ashandola.

Kwiluka kwa munzinzime wakujwala

(Mateo 12:43-45)

24“Omo munzinzime wakujwala utunda muli munu, co wita ku lifuti kukwesi mema nakukengezekako mutambela wakuhwimina. Nga kuwasa kuwanako mwela kuje, asinoni ulyendekesa ukewo vavenya ngwawo, ‘Njiiluka ku njuvo yange kuje kunjatundile.’ 25Co omo uneluka uwana muje mu njuvo mwakukomba munajele. 26Uya nakushakelamo minzinzime yeka itanu na ivali yakujwala manene kutuvakana ukewo ikovelamo nakutumbamamo. Co kuviya kwa munu uje kwakukotokela kukatuvakana kwakulivanga.”

Kuvwaelela kwa vushunga

27Omo Yesu wendekele evi, munakazi umo wa mu mbunga watambekele nakwendeka ngwendi, “Navezika munakazi uje wakukitile nakukulela!”

28Oloni Yesu wamukumbulwile ngwendi, “Oloni vanavezika vaje vaziva lijwi lya Njambi nakulyononoka!”

Cihula ca cizivukiso

(Mateo 12:38-42)

29 # Mat 16:4; Mak 8:12 Mbunga ya vanu vazengelekele Yesu, co wakele nakwendeka ngwendi, “Vanu vavavi va matangwa ano vashaka lika cizivukiso, oloni cizivukiso nacimo cai vakamona kuvanga lika cizivukiso ca Yona. 30#Yow 3:4 Omwo Yona muka-kwimanena wapwile cizivukiso kuli vaka-Nenevayi, mukemwo lalo Muna Munu akapwa cizivukiso ku vanu va matangwa ano. 31#1 Vim 10:1-10; 2 Miz 9:1-12 A Litangwa Lyakusompa Vamwene wa ku Shemba akakatuka nakuhisa vanu ava valinakuyoya lelo, omwo ikeye watundile ku lifuti lyendi waile kuli Solomoni mukukatolilila vilongesa vyendi vya mana. Co njimileka ngwange, kuli cuma cimo kuno cakama cinatuvakana Solomoni. 32#Yow 3:5 A Litangwa Lyakusompa vaka-Nenevayi vakakatuka nakumihisa, omwo vakevo vatengulukile ku vingila vyavo vyavivi omo vazivile kwambulula kwa Yona, co njimileka ngwange kuli cuma cimo kuno cakama cinatuvakana Yona!

Ceke ca muvila

(Mateo 5:15; 6:22-23)

33 # Mat 5:15; Mak 4:21; Luk 8:16 “Naumo wai ashwameka ndeya, co a ishweka, nambe ayaka mwisi ya lyendeko,#11:33 NAMBE AYAKA MWISI YA LYENDEKO: Kunungulula kumo majwi awa aimo. oloni ayaka a citumbikilo ca vindeya, ngeci vaje vakovela mu njuvo vamone ceke. 34Mesho ove akewo anapu ngwe ndeya ya muvila wove. Nga mesho ove anapu amavwa, co na muvila wove ukakala na ceke, oloni nga mesho ove anapu akutsisivala, co muvila wove uli mu lisusulungu. 35Ngecivene, zivuka ngwove ceke cili muli yove kesi cipwe lisusulungu. 36Nga muvila wove woshe unashulu na ceke, co mutambela naumo wai uli mu lisusulungu, co woshe ukakala na ceke, ngwe omo ndeya itwa ceke ali yove.”

Yesu anangula ngeci vanyanyame kuli vaFaliseo na kuli valongisi va majwi a Lishiko

(Mateo 23:1-36; Mako 12:38-40)

37Omo Yesu wamanesele kwendeka, kaFaliseo umo wamulanyele ngeci akalye amo nendi, co Yesu wakovelele mu njuvo nakutumbama kukulya. 38Co kaFaliseo walikomokelele omo wamwene Yesu kajwelele simbu kanda alye. 39Co Mwene wendekele kuli ikeye ngwendi, “Kenga, yeni vaFaliseo mukajelesa nganja na lilonga akamwa, oloni mukati munashulu na muuka na vuvi. 40Eni vilema! Kuma kesi Njambi watangele vya anja ikeye lalo watangele vya mukati ndi? 41Oloni aneni vili mu vinganja vyeni na mu malonga eni kuli tuutu, co vyuma vyoshe vikapwa vyakujela kuli yeni.

42 # VaLe 27:30 “Tuyando tweni, vaFaliseo! Yeni mukaana kuli Njambi camulikumi a vyuma mukatovesa vyakulya ngwe visapa-sapa amo akunika, na luku, na visapa-sapa vikwavo, oloni muzinda vushunga nakuvyana cizemo ceni kuli Njambi. Evi munapande kuvilinga kujeneka kulikela kulinga vije vikwavo.

43“Tuyando tweni, vaFaliseo! Omwo muzema kutumbama a vitumbamo vyavivwa mu masinangonge, co muzema vanu kumikandelela na kasingimiko mu mitambela yakulandesela. 44Tuyando tweni! Omwo munalifu ngwe vimbumbo vyakujeneka cimweso aje vanu vendao kujeneka kuzivuka.”

45Co umo wa valongisi va majwi a Lishiko wendekele kuli ikeye ngwendi, “Mulongisi, omo ulinakwendeka evi ulinakutushaula lalo yetu!”

46Yesu wakumbulwile ngwendi, “Tuyando tweni, yeni lalo valongisi va majwi a Lishiko! Omwo mukatwika vanu vitele vyakulema, oloni yeni vavenya sheni kujundulako na mulavo umo mukukwasa vaje vajundula vije vitele. 47Tuyando tweni! Omwo mukavwaesa vimbumbo vya vaka-kwimanena, vaka-kwimanena vaje vavatsiile vakukulwila veni. 48Ngecivene, mwatavele vukaleo yeni vavenya vwa vije vivalingile vakukulwila veni, vatsiile vaka-kwimanena, co yeni munavatungila vimbumbo. 49A cuma eci Mana a Njambi anendeka ngwawo, ‘Njikavatumina vaka-kwimanena na miluwa, vakatsiya vamo vavo, co vamo vakavayandesa.’ 50Ngecivene, vanu va simbu ino vakavanyanyamesa, a kutsa kuvatsiile vaka-kwimanena voshe tunde akutanga kwa kaye, 51#Kus 4:8; 2 Miz 24:20-21 tunde akutsiya Avele nakweta akutsiya Zakaliya uje vatsiilile mukati ka mutula na Mwela Wakujela. Eyo, njimileka ngwange, vanu va simbu ino vakavanyanyamesa voshe!

52“Tuyando tweni, valongisi va majwi a Lishiko! Munanyungu sapi yakushokolwesa ku cikolo ca mana, oloni yeni vavenya kumwesi kukovelamo, nambe vaje veseka kukovelamo kumwesi kuvatavesa!”

53Omo Yesu watundile ku mutambela uje, valongisi va majwi a Lishiko na vaFaliseo vashangumukile kumulwisa manene nakumwihula vyuma vyavingi, 54vesekele kumutela vinganjo ngeci vamone nga endeka mwamuvi ngeci vamukwateleo.

Currently Selected:

Luka 11: MBB

Highlight

Copy