Kushangumuka 4
4
Kaini na Avele
1Andama na Eva vakele na mwana wa munalume, co Eva wendekele ngwendi, “Akukwasa kwa Shukulu Kalunga njinawana mwana wa munalume.” Ngecivene, wamulukile lizina lyendi Kaini. 2Co wakele lalo na mwana wa munalume, wamulukile lizina lyendi Avele. Omo Avele wakolele wapwile kanyungi ka vimanga, oloni Kaini wapwile ndimi. 3Litangwa limo, Kaini watwalele vimbuto vimo vije vyatejele kupwa mulambu kuli Shukulu Kalunga. 4#VaHe 11:4 Avele watwalele muna manga wa ntwatwa wa ku vimanga vendi, wamutsiile, waangwileo vilyo vyavivwa, co wavikombelelele kupwa mulambu kuli Shukulu Kalunga. Co Shukulu Kalunga wavwaelelele na Avele na mulambu wendi, 5oloni wavyanene Kaini na mulambu wendi. Co Kaini waluvalele manene na minkanya. 6Shukulu Kalunga wendekele kuli Kaini ngwendi, “Omwo vikajo unaluvalela ngacije na minkanya mu luholo lwove? 7Nga walingile mwamuvwa ngwe njinatambula mulambu wove, oloni omwo walingi vuvi, vuvi vwakuvandamena ku cikolo ngwe ndumba. Vushaka kukunyongesa, oloni unapande kuvuhyana.”
8 #
Mat 23:35; Luk 11:51; 1 Yow 3:12 Kaini wendekele kuli ndolome yendi Avele ngwendi, “Tuye nakwimazala mu lihya.” Oloni omo vakele mu lihya, co Kaini watengulukilile ndolome yendi nakumutsiya. 9Co Shukulu Kalunga wehwile Kaini ngwendi, “Ndolome yove Avele ali kuli?”
Kaini wamukumbulwile ngwendi, “Yange kunjizivuka. Kuma yange njapwa kanyungi ka ndolome yange ndi?”
10 #
VaHe 12:24
Shukulu Kalunga wendekele ngwendi, “Omwo vikajo walingi cuma cakukomokesa ngacije? Maninga a ndolome yove alinakuteta kuli yange mu livu, alinakutambeka ngwe lijwi lya shambandinga. 11Yove unasingiwa ku livu, kuukasa lalo kulima livu eli. Omwo unatsii ndolome yove, co maninga endi anetikila asi. 12Nga ukeseka kukuna vimbuto, co livu kulikamenesa cuma cimo. Kutunda lelo na kulutwe kuukakala na limbo, ukapwa muka-kwendangana lika ano asi.”
13Co Kaini wendekele kuli Shukulu Kalunga ngwendi, “Cihiso eci wanjana cacikalu manene kuli yange. Kunjicasa! 14Kenga ku litangwa lya lelo unanjisheke mu lifuti lino na ku mesho ove lalo. Yange kunjikakala na limbo, njikapwa muka-kwendangana lika ano asi, co munu woshe akanjiwana akanjitsiya.”
15Oloni Shukulu Kalunga wamukumbulwile ngwendi, “Embwe. Woshe akatsiya Kaini, akahya lutanu na luvali#4:15 AKAHYA LUTANU NA LUVALI: Nambe, akahya lutanu na luvali mukulinga shambandinga. kutuvakana cihiso ca Kaini akutsiya ndolome yendi.” Ngecivene, Shukulu Kalunga waakele cizivukiso ali Kaini cakunangula munu woshe uje aliwana nendi ngeci kesi amutsiye. 16Kaini waile, watundile ku mesho a Shukulu Kalunga, wakakele mu lifuti lije vatumbwile ngwavo “Kwendangana” lyakele mu ngangela ya Endeni.
Vatekulwila va Kaini
17Kaini wakele amo na munakazi wendi, co vakitile mwana wa munalume, vamulukile lizina lyendi Inoke. Co Kaini watungile limbo nakuliluka lizina lya munendi Inoke.
18Inoke wakitile munendi wa munalume wamulukile lizina lyendi Ilande, wapwile ishe ya Mehunjaele, co Mehunjaele wakitile munendi wa munalume wamulukile lizina lyendi Metusaele, uje wapwile ishe ya Lameki. 19Lameki wambatele vanakazi vavali, Anda na Zila. 20Anda wakitile Njavale, ikeye kukulwila ya vaje vakele mu vimbalaka nakunyunga vimuna. 21Ndolome ya Njavale wapwile Njuvale, kukulwila ya voshe vaka-kwimba tulyalya na vimbendo. 22Zila wakitile Tumbale Kaini, ikeye wapwile n̄ulungu wa vinoma wa vikuvo vyoshe vya vunengu na vutale, co ndokazi ya Tumbale Kaini wapwile Naama.
23Lameki wendekele kuli vanakazi vendi ngwendi,
“Vanakazi vange Anda na Zila njitolilileni.
Njinatsii munu omwo ikeye nanjivulumuna.
Njinatsii mukwenje omwo nanjipupu.
24 #
Mat 18:22
Nga vanu vatanu na vavali vakalingila Kaini
shambandinga, co vanu makumi atanu na vavali
na vatanu na vavali vakanjilingila shambandinga,
nga munu anjitsiya.”
Seta na Inoshe
25Andama na munakazi wendi, vakitile mwana lalo mukwavo wa munalume. Eva wendekele ngwendi, “Njambi nanjiingisilamo mwana wa munalume muli Avele, uje yatsiile Kaini.” Ngeci wamulukile lizina lyendi Seta. 26Co Seta wakitile mwana wa munalume wamulukile lizina lyendi Inoshe. Ikeyo simbu ije vanu vashangumukile kulemesa lizina lya Shukulu Kalunga.
Currently Selected:
Kushangumuka 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006