Kushangumuka 34
34
Ndaina vamuwisa
1A litangwa limo, Ndaina muna Yakomba uje yakitile na Leya, waile nakusikamesa vanakazi va vaKanana. 2Shekeme muna Hamole kaHivi, wapwile muna mwene wa lifuti lije, omo wamumwene, co wamuwisile. 3Oloni wamwene ngeci uje mumbanda wapwile wamuvwa manene, co wamushakele nakumuzema ngecivene, wesekele kumukokweya. 4Co Shekeme wendekele kuli ishe ngwendi, “Njishaka munjambatele ou mumbanda apwe munakazi wange.”
5Yakomba wazivile ngwavo munendi vanamuzivisa shwamwa, oloni kalingile cuma cimo omwo vana vendi va vanalume vakele mu cana na vimuna vendi, ngeci wolokele kuluu noo velukile. 6Ngecivene, Hamole ishe ya Shekeme waile nakwendeka na Yakomba. 7A simbu ije vene vana va Yakomba vezile kutunda mu cana. Omo vazivile a cuma eci, co vazivile manene kuvavala ku vimbunge na vukalu ali Shekeme, omwo ikeye nalingi cuma cakufwa ngacije cakutuka vanu va Isalele akukwata muna Yakomba nakumuwisa. Cuma cangacije kucapandele kulingiwa. 8Co Hamole wendekele nendi ngwendi, “Munange Shekeme ashaka kwambata munove. Mwane, njilomba ngeci mumutave amwambate. 9Tulinge lizivasano ngeci kukakale kulyambatela akati ka vanu vetu na vanu vove, 10ngeci mwase kukala muno mu lifuti amo netu. Co mwasa kukakala kwoshe mushaka, mukalilandulwila ngoco, co mukakala na vufuko.”
11Asinoni Shekeme wendekele lalo kuli ishe ya Ndaina na vandolome vendi ngwendi, “Njitaveni nakunjitetela, co njikamyana vyoshe mushaka. 12Njilekeni mwoshe mumushakela kumyondela, co njikamyana vyonda vyoshe vije mushaka.”
13Co vana va Yakomba vakumbulwile Shekeme na ishe Hamole mu ngila yakuvalalela vushonge omwo Shekeme wazivisile shwamwa ndokazi yavo Ndaina. 14Vendekele navo ngwavo, “Kutwasa kushombwesa ndokazi yetu kuli munalume wakwilika kutuuka. Eci cinapu cuma ca shwamwa kuli yetu. 15Twasa kutava lika nga mukapwa ngwe yetu akutuula vanalume voshe. 16Asinoni citava kulyambatela, co tukatunga amo neni nakupwa vanu vamo. 17Oloni nga sheni kulizivasana netu akumituula, co tukambata ndokazi yetu nakuya nendi.”
18Co kunangula oku kwapwile kwakuvwa kuli Hamole na kuli munendi Shekeme, 19co uje mukwenje ketisilemo simbu. Vwasi-vwasi walingile muje vendekele, omwo wazemene manene muna Yakomba. Shekeme wapwile wavulemu manene mu naanga yendi.
20Hamole na munendi Shekeme vaile ku mutambela wakuliwanena ku cikolo ca nganda, co vendekele kuli vandambo vavo ngwavo, 21“Vanalume ava vanapu vasamba vetu. Ngecivene, tuvataveni vatunge amo netu muno mu lifuti ngeci valandulule, omwo kengeni lifuti linapu lyakama, tupwisamo netu navo. Twambate vana vavo ngeci vapwe vanakazi vetu, co netu lalo vatwambatele vana vetu va vanakazi. 22Oloni vanalume ava vakatava kukala amo netu kupwa vanu vamo netu nga tutava kutuula vanu vetu voshe va vanalume, ngwe omwo vakevo vapwa vakutuuka. 23Kuma vimuna vavo, na vufuko vwavo na vyoshe vyavo kuvikapu vyetu ndi? Ngecivene, tuvataveni vakale amo netu.” 24Vanu voshe va mu nganda vatavele ku viyongola vya Hamole na Shekeme, co vanalume voshe vavatuwile.
25Omo kwetile matangwa atatu kanda valonde simba, vana va Yakomba vavali Simyoni na Levi, vandolome va Ndaina, vambatele mikwale yavo, vakovelele mu nganda kujeneka kuvazivuka, co vatsiile vanalume voshe, 26amo na Hamole na munendi Shekeme. Asinoni vatuwisile Ndaina mu njuvo ya Shekeme, co vaile. 27Omo vanavatsii laja, co vana va Yakomba vakwavo vezile nakupukula vyuma vya muje mu nganda nakulinga shambandinga omwo kushauka kwa ndokazi yavo. 28Ngecivene, vambatele matanga a vingombe, na vimulu, na vyuma vyoshe vije vyakele mu nganda na mu mahya. 29Co vambatele vufuko vwamwo vwoshe, nakufungulula vanakazi voshe na vanike, co vambatele vyuma vyoshe vya mu vinjuvo.
30Yakomba wendekele kuli Simyoni na Levi ngwendi, “Mwanjikovelesa mu vukalu, ololo vaKanana, na vaPelezi, na vanu voshe va muno mu lifuti vakanjizinda. Yange kunjesi na vanu vavangi, nga voshe vakalipandakana amolika nakunjilwisa, co vakanyongesa naanga yetu yoshe.”
31Oloni vakevo vamukumbulwile ngwavo, “Kutwasa kutava ngeci ndokazi yetu vamupwise ngwe cikwizi.”
Currently Selected:
Kushangumuka 34: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
